DWIZ 882

Patay ang isang batang lalaki matapos malunod sa isang palaisdaan sa Cabiao, Nueva Ecija.

Kinilala ang biktima na si alyas “Boy’, walong taong gulang.

Ayon sa Cabiao Police, huling nakitang buhay ang biktimang kalaro ang kanyang kapatid na babae na nuwebe anyos sa gilid ng bahay ng kanilang lolo na si eduardo rodriguez, 61 anyos, na malapit lang sa nasabing palaisdaan.

Paniwala ng otoridad, maaaring sa kuryosidad ng biktima ay nagawi ito sa palaisdaan at pinanood ang mga isda ngunit aksidenteng nahulog dito nang hindi namamalayan ng mga tao roon.

Wala namang nakita na “foul play” sa pagkasawi ng biktima, habang ang pamilya nito ay tumanggi nang magsagawa ng autopsy sa bangkay.

Dala ng pinangangambahang local transmission ng mas nakakahawang Omicron variant at ang mabilis na pagtaas ng kaso ng COVID-19, balik-alert level 3 ang Metro Manila ngayong Lunes hanggang a-kinse ng Enero.

Bawal muli ang face-to-face classes para sa basic education, contact sports, peryahan at mga establisimyento na may live voice at wind instruments.

Hindi rin puwede ang operasyon ng mga casino, karera ng kabayo, mga betting shops at sabungan, maliban na lamang sa mga nauna nang pinayagan ng Office of the President.

Samantala, papayagan naman ang maximum na 30% indoor venue capacity para sa mga fully vaccinated at 50% outdoor venue capacity ang operasyon ng mga establisimyento sa mga lugar na nasa alert level 3.

Naniniwala naman ang Department of Trade and Industry (DTI) na hindi gaanong magiging malaki ang epekto ng muling pagbabalik ng Metro Manila sa alert level 3 ngayong pinapayagan pa rin namang mag-operate ang marami sa mga negosyo.—sa panulat ni Mara Valle

Nagsimula na ang paggunita sa “virtual” na pahalik sa poong Nazareno.

Binuksan nila alas 12 ng tanghali, nitong Lunes ang online na simbahan kung saan pwedeng lumahok sa tradisyunal na “pahalik” ang mga deboto ng itim na Nazareno.

Pangalawang taon na itong ginagawa upang maipagpatuloy ang paglahok ng mga tao sa kabila ng banta ng COVID-19 para na rin maiwasan ang exposure o na maaaring maging sanhi ng hawaan.

Nasakto rin ang pagbubukas ng “Virtual Quiapo Church” sa pagaanunsyo ng gobyerno na isasailalim muli ang buong Metro Manila sa alert level 3 matapos magtala ang Department of Health (DOH) ng 20 percent na COVID-19 positivity rate nitong linggo. —sa panulat ni Mara Valle

 Nagkaisa ang mga alkalde sa Metro Manila na huwag munang palabasin ng bahay ang lahat ng hindi pa bakunado laban sa COVID-19, habang nasa ilalim ng alert level 3 ang National Capital Region (NCR).

Ayon kay Metropolitan Manila Development Authority (MMDA) Chairman Benhur Abalos, papayagan lamang lumabas ang mga hindi pa bakunadong residente kung bibili ng essential goods at serbisyo.

Mananatili sa ilalim ng alert level 3 ang NCR hanggang January 15 dahil sa biglang pagsipa ng COVID-19 cases bukod pa sa banta ng mas nakahahawang Omicron variant.

Sa kabila nito, maari namang ipagpatuloy ang individual outdoor activities at exercise sa labas ng bahay.

Dagdag pa ni Abalos, pwedeng magpatupad ng restriksiyon ang mga local government units basta’t hindi ito mas strikto sa mas mataas na alert level systems.—sa panulat ni Mara Valle

Sa ilalim ng Survival and Recovery Assistance Program mula sa Agricultural Credit Policy Council (ACPC) ng Department of Agriculture (DA), papayagan nang makautang ng P25,000 ang bawat 20,000 libong magsasaka at mangingisda na nasa ilalim ng state of calamity.

Nabatid na walang ilalagay na interes at wala ring collateral ang naturang loan at magiging magaan din ang payment period nito dahil babayaran ang utang sa loob ng tatlong taon.

Bukod sa nasabing pautang, magkakaloob din ng P2.9 billion na halaga ng ayuda ang mga magsasaka, kabilang ang P1 billion na halaga ng Quick Response Fund (QRF) para sa rehabilitasyon ng mga apektadong lugar; P828 million mula sa Philippine Crop Insurance Corporation (PCIC) bilang bayad pinsala sa mga apektadong magsasaka.

Habang makakatanggap din ang mga magsasaka at mangingisda ng P314 million halaga ng rice seeds, P129 million halaga ng corn seeds, at P57 million halaga ng assorted vegetables.

Samantala, magkakaloob naman ang Bureau of Fisheries and Aquatic Resources (BFAR) ng P47 million na halaga ng tulong para sa mga apektadong mangingisda.

Naipamahagi na ng Department of Social Welfare and Development (DSWD) ang mahigit 293,352,307 financial assistance sa mga nasalanta ng bagyong Odette kabilang na ang MIMAROPA, Region 5 hanggang Region 12, CARAGA, at BARMM.

Ayon sa National Disaster Risk Reduction and Management Council (NDRRMC), nasa 1,241,954 na pamilya o 4,876,254 na indibidwal ang naapektuhan ng bagyo.

Samantala bukod sa nabanggit na cash assistance, naibalik narin ang suplay ng kuryente sa 206 mula sa 284 na apektado maging ang communication lines ng 84 mula sa 125 sa nabanggit na lugar.—sa panulat ni Angelica Doctolero

Nagpaalala sa publiko ang Philippine Atmospheric, Geophysical And Astronomical Services Administration (PAGASA) na simulan na ang pagtitipid sa paggamit ng tubig lalo na ang mga residente sa Metro Manila.

Ito ay matapos mabigong maabot ng angat dam ang kaukulang lebel ng tubig nito sa pagtatapos ng taong 2021.

Posible kasing kapusin ang suplay ng tubig sa Metro Manila kung saan, pangunahing kailangan ito ng mga health facilities at para sa personal hygiene ng bawat indibidwal.

Base sa datos ng PAGASA, sa pagpasok ng taong 2022, ang water level ng Angat Dam ay naitala lamang sa 202.80 meters na mas mababa ng halos 10 meters sa dapat o inaasahan na 212 meters na water level nito sa pagtatapos ng taong 2021.

Samantala, may ilang lugar din ang nakakaranas ng water interruption kabilang na ang Brgy. Talon Dos sa Las Pinas City; Brgy. Alabang, Bayanan, Poblacion, Putatan at Tunasan sa Muntinlupa City dahil sa limitadong suplay ng tubig mula sa Laguna lake.—sa panulat ni Angelica Doctolero

Sinabi ni Bureau of Immigration Commissioner Jaime Morente na umabot sa isandaang porsyento ang bilang ng international travelers ang dumating sa bansa bago ang pagsalubong ng bagong taon kung ikukumpara sa nakalipas na taon.

Ayon kay Morente, umabot sa 10,140 ang bilang ng mga pasaherong dumating habang tumaas naman sa 6,951 ang departing passengers mula sa 3,770 noong nakaraang taon.

Dagdag pa ni Morente na nagkaroon ng significant improvements kung saan, hindi umano maaawat ang international at domestic travelers noong 2021.

Samantala, sinabi naman ni BI Port Operations Division Chief Atty. Carlos Capulong na ang rapid increased ay resulta sa smooth sailing operations sa mga nagdaang holiday season.

Sa kabila nito, nakahanda naman ang Bureau of Immigration sa posibleng muling pagdagsa ng mga pasahero ngayong taong 2022.—sa panulat ni Angelica Doctolero

Aarestuhin na ng mga otoridad ang mga pasaway na hindi nagsusuot ng facemask sa Pateros.

Ito’y matapos ipag-utos ni Mayor Miguel “Ike” Ponce III ang pag-aresto sa mga residenteng hindi nakasuot ng facemask sa gitna ng alert level 3.

Kasunod ito ng naitalang 38 aktibong kaso kabilang na dito ang 16 na bagong kaso kayat pumalo na sa 7,992 ang kabuuang kumpirmadong kaso ng COVID-19 sa kanilang lugar.

Aabot naman sa 7,847 ang bilang ng mga naka-recover sa sakit habang 107 naman bilaang ng mga nasawi sa naturang sakit.

Samantala, nagpaalala naman sa mga residente ang alkalde na maging maingat at sumunod sa minimum health standards lalo’t may panibagong Omicron variant ng COVID-19 na mas nakakahawa kumpara sa naunang Delta variant. —sa panulat ni Angelica Doctolero