DWIZ 882

Hindi na bago para sa Philippine National Police (PNP) ang mga paghahanda sakaling itaas pa ang ipinatutupad na Alert Level sa Metro Manila dahil patuloy na pagtaas ng kaso ng COVID-19 sa bansa.

Ayon kay PNP Chief P/Gen. Dionardo Carlos, nakahanda na sila sa anumang recalibration ng kanilang security plan lalo’t maraming lugar na ang isinailalim sa Alert Level 3 simula Enero a-9.

Nagsimula na aniyang magpatupad ng paghihigpit ang National Capital Region Police Office (NCRPO) mula pa nuong Lunes at dito aniya sila huhugot ng mga dagdag na hakbang upang paigtingin ang kanilang operasyon.

Ngayon pa lamang ay naghahanda na rin ang PNP para sa mas mataas at mas mahigpit na quarantine status na Alert Level 4 sa Metro Manila kung magpapatuloy sa pagsipa ang mga naitatalang kaso.

Sa ilalim ng Alert Level 4, bawal lumabas ang mga nasa edad 18 pababa at 65 pataas, mga buntis, may karamdaman at tanging mga Authorized Persons Outside of Residence (APOR) lamang ang papayagan sa inter-zonal travels.

Muli ring lilimitahan ang operasyon ng mga negosyo sa mas maliit na kapasidad maging sa mga tanggapan ng Gubyerno upang maiiwas ang kanilang mga tauhan sa hawaan ng virus. —sa ulat ni Jaymark Dagala (Patrol 9)

Kumikilos na ang Philippine National Police (PNP) para sa paglansag sa mga indibiduwal, grupo at sindikatong labis na sinasamantala ang sitwasyon para makapanlamang.

Ito’y kasunod ng kautusan ni Pangulong Rodrigo Duterte sa PNP na arestuhin ang mga negosyanteng nananamantala at iligal na nag-iimbak ng mga gamot kontra COVID-19 at sa iba pang karamdaman.

Ayon kay PNP Chief P/Gen. Dionardo Carlos, lubhang mapanganib aniya ang pagbebenta ng mga gamot sa labas ng mga lehitimong botika.

Kaya’t mainam aniyang sundin ang apela ng Food and Drug Administration (FDA) na sa mga FDA approved outlets lang bumili partikular na sa mga botika o pharmacia.

Iimbestigahan din aniya ng PNP kung paano nakukumbinsi ng mga kawatan ang publiko na makabili sa kanila ng mga produkto o gamot na hindi pa subok at iligal din aniya ang operasyon.

Nakikipag-ugnayan na rin aniya sila sa iba pang ahensya ng Pamahalaan sa kung gaano kalaki o kalawak ang operasyon ng mga kawatan. —sa ulat ni Jaymark Dagala (Patrol 9)

Pormal na ring inireklamo ng Criminal Investigation and Detection Group – National Capital Region (CIDG-NCR) ang isa pang balikbayang Pinay na lumabag sa quarantine rules.

Batay sa ibinahaging dokumento ni P/Maj. Michael John Villanueva ng CIDG-NCR, kinilala ang inireklamo na si Maria Bernalyn Muñoz, isang returning Filipino at residente ng Bonifacio Global City sa Taguig.

Kasong paglabag sa Section 9 ng Republic Act 11332 o ang Mandatory Reporting of Notifiable Diseases and Health Events of Public Health Concern Act ang isinampa laban kay Muñoz dahil sa pagtanggi nitong sumailalim sa mandatory quarantine para sa mga umuwing pinoy mula sa ibayong dagat.

Magugunitang ibinunyag ng Department of Tourism (DOT) na may isang returning Pinay na umuwi sa bansa mula sa Amerika nuong Disyembre 22, subalit dumiretso ito sa kaniyang condominium unit sa Pasay City sa halip na sa kaniyang quarantine hotel sa Makati City.

Doon ay nabatid ding nagpatawag pa ng masahista ang Pinay, hindi alintana na positibo pala ito mula sa Coronavirus disease (COVID-19).

Nabunyag ang kasong ito ni Muñoz matapos mabisto ang pagtakas ng tinaguriang Poblacion Girl na si Gwyneth Chua sa kaniyang mandatory Quarantine mula Amerika kung saan ay nakipag-party pa ito bago lumabas na nagpositibo pala ito sa virus. —sa ulat ni Jaymark Dagala (Patrol 9)

Bantay sarado ng National Capital Region Police Office (NCRPO) ang nasa 34 na border controlled points papasok at palabas ng Metro Manila.

Ito’y makaraang itaas na ang Alert Level 3 sa Metro Manila at mga karatig lalawigan nito bunsod ng muling pagtaas ng mga naitatalang kaso ng COVID-19 sa buong bansa.

Ayon kay NCRPO Regional Public Information Office Chief at Spokesperson P/LtC. Jenny Tecson, mahigpit nilang sinasala ang mga dumaraan sa border sa pamamagitan ng pagcheck sa kanilang vaccine cards.

Upang masiguro aniyang lehitimo at hindi pineke ang mga vaccine cards na ipinakikita sa kanila, hinahanapan nila ng ID ang dumaraan sa border at tinitingnan din ito sa database ng National Vaccination Registry.

Giit pa ni Tecson, wala silang pinipili dahil maliban sa random ang kanilang pagche-check ay mas tinututukan din nila ang police visibility bilang panlaban na rin sa krimen at iba pang iligal na gawain. —sa ulat ni Jaymark Dagala (Patrol 9)

Naka self-isolate ngayon si Presidential Aspirant at dating Sen. Ferdinand “Bongbong” Marcos Jr.

Ito ang kinumpirma ng kampo ni Marcos matapos ma-expose nito ang 2 niyang tauhan na nagpositibo sa COVID-19.

Unang nakasalamuha ni Marcos ang kaniyang Chief Security nuong Martes na ngayon ay naka quarantine na sa isolation facility.

Sumunod namang nakasalamuha ni Marcos ang kaniyang Tagapagsalita na si Atty. Vic Rodriguez na nagpositibo rin sa virus.

Sa ipinaabot na mensahe ni Rodriguez sa DWIZ patrol, sumailalim siya kahapon sa RT-PCR test kahapon at lumabas ngayong umaga ang resulta.  —ulat mula kay Jaymark Dagala (Patrol 9)

Tuluyan nang tinalikuran ng isang miyembro ng Bangsamoro Islamic Freedom Fighter o BIFF ang armadong pakikibaka at pinili na lamang magbalik loob sa Pamahalaan.

Ayon kay Western Mindanao Command (WESMINCOM) Chief, Lt/Gen. Alfredo del Rosario Jr, sumuko si alyas Seck Panday sa 602nd Infantry Brigade ng Philippine Army sa Cotabato.

Kasamang isinuko ni alyas Panday ang kaniyang M-16 rifle nang humarap ito sa militar sa Brgy. Salunayan sa bayan ng Midsayap dahil na rin sa hirap ng buhay sa kabundukan na sinabayan pa ng pandemiya ng COVID-19.

Dahil dito, pinagkalooban ng tulong pangkabuhayan si alyas Panday upang makapagsimulang muli ng bagong buhay at malayang makagalaw sa sibilisadong lipunan.

Batay sa datos ng Joint Task Force Central, ika-189 na bandido si Panday na sumuko sa Pamahalaan sa Central Mindanao.  —ulat mula kay Jaymark Dagala (Patrol 9)

Pinapurihan ng kampo ni presidential aspirant at dating senador Bongbong Marcos Jr., ang desisyon ng Comelec na ideklarang nuisance candidates sina Tiburcio Marcos at Maria Aurora Marcos.

‘We give it to the members of this august body for seeing through the schemes and machinations of certain political camps to make a mockery of the electoral process by resorting to gutter politics,” ayon sa official statement ni Atty. Victor Rodriguez, Chief of Staff  at tagapagsalita ni Marcos.

Sinabi pa ni Rodriguez na ang naturang desisyon ay nangangahulugan na buhay pa rin ang demokrasya sa bansa, at habang namamayani aniya ito ay walang sinuman ang may karapatan na hadlangan ang publiko na iboto ang kanilang napiling kandidato.

Giit pa niya, ang karapatang bumoto ay nakasaad sa saligang batas. ang karapatan aniyang pumili ng mamumuno sa bansa  ay nagpapakita aniya na malaya ang sambayanang pilipino.

“Our founding fathers have made this privilege a reality with their own blood, with their own lives. any attempt to circumvent this divine right is indeed sacrilegious,” pahayag pa ni Rodriguez.