DWIZ 882

Muling pumalo sa halos 300 ang bilang ng mga bagong kaso ang COVID-19 sa hanay ng Philippine National Police o PNP ngayong araw.

Batay sa datos ng PNP Health Service, nasa 298 ang mga bagong kaso ng virus kaya’t pumalo na sa 42,854 ang kabuuang bilang ng mga tinamaan ng virus.

Mula sa naturang bilang, pumalo sa 850 ang total active cases ng COVID-19 sa PNP at pinangangambahang dahil ito sa Omicron variant.

Wala namang naitalang bagong gumaling sa sakit kaya’t nananatili sa 41,879 ang kanilang total recoveries gayundin sa kanilang death toll na nananatili sa 125.  —ulat mula kay Jaymark Dagala (Patrol 9)

Nangako sina presidential aspirant Ferdinand “Bongbong” Marcos Jr. at running mate nito na si Davao City Mayor Sara Duterte-Carpio, na gawing libre ang pagsakay sa EDSA Carousel Bus kapag nanalo sila sa May 9 National Elections.

Ayon kay Marcos, napakagandang legasiya ito ng administrasyong Duterte at aniya’y ipagpapatuloy ito ng BBM-Sara UniTeam.

Matatandaang nagtapos noong December 2021 ang  ‘libreng sakay program’ ng pamahalaan para sa mga essential workers at Authorized Persons Outside Residence (APOR).

Binigyang diin pa ni Marcos na malaking tulong ito sa mga essential at frontline medical workers, lalo pa’t tumataas ang mga kaso ng COVID-19 sa bansa.

Sinabi pa ng dating senador na sa pamamagitan ng libreng sakay ay makakatipid ang publiko.

Bawat Carousel Bus Commuter, ay makakatipid ng P100 kada araw, na katumbas ng P3,000 kada buwan.

Ayon sa Land Transportation and Franchising Regulatory Board, nasa 31-M commuter ang nagbenepisyo sa naturang programa.

Tiniyak ni Marcos na kapag nanalo siya sa 2022 polls ay iisipin niya ang kapakanan ng publiko.

“kung mabibigyan po ako ng pagkakataon ng makapaglingkod bilang pangulo ay titiyakin ko po na lahat ng aking iisipin at gagawin ay para sa ikabubuti lamang ng sambayanan,” pahayag ni Marcos.

Nag-Iisa na lamang si Partido Federal ng Pilipinas presidential aspirant na si Ferdinand ” Bongbong” Marcos Jr. na may apelyidong Marcos sa candidates list ng Commission on Elections (COMELEC).

Batay sa huling listahan na isinapubliko ng COMELEC nitong January 4, 2022, nasa presidential candidate number eight ang pangalan ni Bongbong Marcos.

Itinuturing umanong lucky number sa mga chinese ang number 8.

Magugunitang, bumaba na lamang sa 11 ang bilang ng mga presidential candidate mula sa 97.

Bukod dito ilang grupo na rin ang nagsampa ng aabot sa 7 petisyon sa tanggapan ng COMELEC para pigilan ang pagtakbo ni Marcos Jr., sa 2022 elections.

Habang patuloy namang namamayagpag sa mga serye ng survey ang BBM-Sara UniTeam at nananatiling pinaka pinagkakatiwalaan at pinakamaraming suporta sa presidential at vice presidential bet.

Aabot sa 487 milyong piso ang ibinigay na donasyon ng Department of Human Settlements and Urban Development  (DHSUD) bilang shelter assistance ng mga nasalanta ng bagyong Odette.

Ayon kay DHSUD Chief Eduardo Del Rosario, pinangunahan ito ng National Housing Authority (NHA) kung saan nasa 97,500 pamilya ang matutulungan.

Ginawa rin ito bilang pagsunod sa direktiba ni Pangulong Rodrigo Duterte para sa muling pagbangon ng mga nasalanta ng bagyo.

Tinatayang nasa 597,779 kabahayan ang nasira ng bagyong Odette partikular na sa regions 4b, 6, 7, 8, 9, 10, 11, 12, CARAGA at BANGSAMORO region.—sa panulat ni Abby Malanday

Pinag-aaralan na ng lokal na pamahalaan ng Maynila na palawigin ang serbisyo ng Drive-thru booster shots para sa mga couriers.

Ito ay matapos dagsain ng daan-daang delivery riders at bicycles ang Bonifacio Shrine para sa karagdagang proteksiyon laban sa COVID-19.

Ayon kay Manila Mayor Isko Moreno, kakaunti lamang ang nakapagturok ng booster shots sa dami ng dumagsa dahil sa haba ng pila.

Sa katunayan, pito sa sampung nagpapaturok ay hindi residente ng Maynila.

Agad namang inaprubahan ng lokal na pamahalaan ang nagpapatuloy na pagbabakuna ng booster shot sa Divisoria alinsunod sa request ng mga drivers, vendors, at delivery boys.

Hanggang kahapon, umabot na sa 754 driver, vendors at delivery boys ang nakapagturok ng boostershot sa Divisoria.—sa panulat ni Abby Malanday

Nakapagtala ang Pilipinas ng panibagong 29 kaso ng Omicron variant ng COVID-19.

Para ito sa kabuuang 43 kaso ng Omicron variant sa bansa.

Ayon sa Department of Health (DOH), 10 rito ay Returning Overseas Filipinos (ROFS) habang 19 ay lokal na kaso na may address sa National Capital Region (NCR).

15 naman sa kaso ay aktibo, tatlo ang nakarekober at dalawa ang bineberipika pa.

Nitong January 2 ang latest run ng kaso kung saan 48 samples ang nasuri.

Maliban sa Omicron variant, nakapagtala rin ang DOH ng 18 karagdagang kaso ng Delta variant sa bansa.

Para ito sa kabuuang 8,497 kaso kung saan walo ay ROFS at 19 ang local cases.

Patuloy naman ang paghikayat ng DOH sa lahat ng magpabakuna upang maiwasan ang pagkahawa sa mga bagong variant ng COVID-19. —sa panulat ni Abby Malanday

Nagpositibo sa COVID-19 ang 15 miyembro ng Presidential Security Group (PSG).

Ayon kay PSG Chief Colonel Randolph Cabangbang, walang recent contact kay Pangulong Rodrigo Duterte ang mga tauhan.

Kakatapos lang ng holiday break ng mga ito bago magpositibo kaya nananatiling ligtas ang pangulo laban sa virus.

Sa ngayon, wala namang nararamdamang anumang sintomas ng sakit ang 15 tauhan at fully vaccinated na rin sa COVID-19.

Wala pang inilalabas na ibang impormasyon ang malakanyang hinggil dito. —sa panulat ni Abby Malanday

Kinansela muna ang taunang pagbisita ng imahe ng itim na Nazareno sa Manila Cathedral.

Ayon sa ulat, hindi na matutuloy ang naka-iskeldyul na January 6 hangggang 7 dahil sa pagtaas ng kaso ng COVID-19 at bilang pagsunod sa alituntunin ng Inter-Agency Task Force (IATF).

Ang pagbisita ng imahe ng itim na Nazareno ay isinasagawa kada taon bilang parte ng selebrasyon ng pista ng itim na Nazareno sa enero 9.

Ito na ang ikalawang taon na sinuspinde ang pagdaraos ng pista ng itim na nazareno dahil sa Omicron variant ng COVID-19. —sa panulat ni Abby Malanday

Ikinokonsidera na ng probinsya ng Quezon na ibalik ang border checkpoints sa boundaries nito sa Laguna province at Bicol region.

Ito ay matapos makapagtala ng 81 bagong kaso ng COVID-19 sa Quezon province para sa kabuuang 178 aktibong kaso hanggang nitong January 5.

Ilan sa tinitignang dahilan ng pagsipa ng kaso ay ang paglabas ng mga tao nitong Christmas at new year holidays lalo na yung mga nakatira sa Metro Manila.

Ilalagay ang checkpoints sa Quezon-Laguna border sa Tiaong, Lucban, maging sa Real towns at sa Batangas-Quezon border sa San Antonio at Candelaria towns.—sa panulat ni Abby Malanday