DWIZ 882

Inaprubahan na ng Employees’ Compensation Commission (ECC) ang hiling na itaas ang sickness benefits para sa cash assistance ng mga manggagawang magkakasakit gaya ng COVID-19.

Mula sa 480 pesos kada araw sa sickness benefits at 10,000 pesos na cash assistance ay itinaas na sa 600 pesos kada araw ang sickness benefits at 30,000 pesos naman ang magiging cash assistance na puwedeng apply-an ng mga manggagawang miyembro ng Social Security System (SSS) at Government Service Insurance System (GSIS).

Ayon kay ECC executive director Stella Banawis, nai-submit na nila sa Malacañang ang naturang hiling at hinihintay na lamang ang pag-increase.

Sakop din nito ang medical reimbursement o death pension na kaagad na makukuha sa SSS o GSIS at hindi na kailangan i-apply pa sa ECC.

Sa ngayon, suspendido parin ang pag-iisyu ng tseke sa mga aplikasyon dahil maraming mga empleyado ng komisyon ang tinamaan ng COVID-19. —sa panulat ni Angelica Doctolero

Nilinaw ng Civil Service Commission (CSC) na ikinokonsiderang ‘excused’ ang pag-absent sa trabaho ng isang government employee na naka-quarantine, naka-isolate, o nagpapagaling sa COVID-19.

Sa resolusyon ng CSC, ang pagliban sa trabaho para sa panahon ng quarantine, pag-isolate at pagpapagamot dahil sa COVID-19 ng mga manggagawa ng gobyerno habang nagtatrabaho mapa onsite man o Work from Home (WFH) arrangement ay dapat ituring na excused absence.

Inamyendahan ng CSC Resolution no. 2101122 ang panuntunan sa paggamit ng leave credits for absences para sa COVID-19 quarantine o treatment.

Samantala, giit ng CSC, kailangang ikonsidera ang mga ganitong sitwasyon lalo na sa panahon ngayon na patuloy ang paglobo ng kaso ng COVID-19 sa bansa.—sa panulat ni Mara Valle

Tinatarget ng DOLE na magbukas ng aplikasyon para sa one-time 5,000 peso cash aid sa mga manggagawa sa pribadong sektor na naapektuhan ngmas pinaigting na alert level 3 sa Metro Manila at iba pang mga lugar sa bansa hanggang January 31.

Ipinabatid ni labor assistant secretary Dominique Tutay na hawak na ni labor secretary Silvestre Bello, III ang draft ng guidelines para sa 1 billion camp o COVID adjustment measure program 2022 para sa pag apruba nito.

Sinabi ni Tutay na sakaling aprubahan ni Bello ang draft guidelines, kaagad itong ilalathala para sa agarang effectivity nito.

Sa ngayon, inaasahan ng ahensya sa susunod na linggo na mabubuksan ang sistema para sa camp application sa formal sector upang maibigay ang benepisyo sa halos dalawandaang libong manggagawang apektado ng alert level 3. —sa panulat ni Angelica Doctolero

Target ng gobyerno na makapagsagawa ng isa pang mass vaccination drive kontra COVID-19.

Ayon kay presidential adviser for COVID-19 response Vince Dizon, dapat magkaroon ng isa pang “Bayanihan, Bakunahan” matapos maitala sa mahigit 16 million na bilang ng mga nabakunahan sa dalawang ikinasang mass vaccination noong Nobyembre at Disyembre.

Sinabi ni Dizon na hinihintay lamang nilang humupa ang Omicron surge at makapag recharge ang health workers maging ang LGUs bago muling isulong ang ikatlong malawakang bakunahan. —sa panulat ni Angelica Doctolero

Nag isyu ng temporary restraining order (TRO) ang Korte Suprema laban sa pag kansela ng COMELEC sa certificate of candidacy (COC) ng isang senatoriable.

Matatandaang pinaboran ng high tribunal ang inihaing petisyon kay Norman Cordero Marquez na una nang idineklarang nuisance candidate ng COMELEC.

Ayon sa Korte Suprema, “sufficient in form and substance” ang petisyon ni Marquez kaya’t may sampung araw ang COMELEC para magpaliwanag hinggil dito. —sa panulat ni Angelica Doctolero

Inanunsiyo ng Food and Drug Administration (FDA) ang mga pangalan ng COVID-19 test kits na inaprubahan para sa commercial use o pagbebenta nito sa mga pharmacy o drugstores sa National Capital Region at iba pang lalawigan.

Ito ay binubuo ng 45 produkto para sa RT-PCR test, 42 para sa antigen test products, tig-13 para sa antibody immunoassay test products, at antibody rapid test kits na ginawa ng 33 manufacturer mula sa China, US at South Korea at may dalawa rin na gawa sa Pilipinas.

Samantala, umabot naman sa 29 na importer at distributor ang inaprubahang magbenta ng mga antigen test kit.

Sa kabila nito, sinabi ng FDA na kailangan pa ring isagawa ang mga RT-PCR at antigen test ng mga healthcare professional na siyang pangunahing batayan para malaman kung nagpositibo ang isang tao sa COVID-19.

Nabatid na nirekomenda ang mga test kit sa FDA ng Research Institute for Tropical Medicine (RITM) matapos pumasa sa mga pagsusuri. —sa panulat ni Angelica Doctolero

Naghain ng resolusyon sa Kamara si Partylist Rep. Arlene Brosas na humihikayat sa Committee on Health at Committee on Transportation ng House of Representatives na magsagawa ng joint inquiry kaugnay sa implementasyon ng “No Vaccination, No Rides” policy ng Department of Transportation (DOTr).

Base sa Resolution No. 2451 na inihain ni Brosas, ipinapakita dito ang “illegal and discriminatory” sa bawat pilipino dahil sa pagbawal sa mga unvaccinated na sumakay sa lahat ng pampublikong transportasyon sa Metro Manila.

Ayon kay Brosas, malinaw sa Republic Act No. 11525 o mas kilala bilang COVID-19 Vaccination Program Act of 2021 na hindi pwedeng gawing mandatory requirements ang vaccination cards sa lahat ng educational, employment, at iba pang transaksiyon ng gobyerno.

Sinabi din ng mambabatas na ihinto na ang pagpapatupad ng mga anti-poor at anti-people policy-making schemes at lumikha nalang ang gobyerno ng mga rights-based approach na isa sa mga makakatulong para matugunan ang problema ng bansa sa gitna ng COVID-19 pandemic. —sa panulat ni Angelica Doctolero

Inihayag ni Justice Secretary Menardo Guevara na kaniyang irerespeto ang karapatan ni Public Attorney’s Office (PAO) Chief Percida Acosta makaraang tumangging magpabakuna kontra COVID-19.

Kasunod ito ng pag-amin ni Acosta na pinili niyang hindi magpabakuna dahil sa kanyang edad at kundisyon sa kalusugan.

Ayon kay Guevarra, hindi man mandatory ang pagbabakuna ay kailangan paring sundin ni Acosta ang mga government regulations partikular sa mga restrictions sa galaw ng mga hindi bakunadong individual para sa public safety.

Nilinaw ni Guevarra na hindiipagkakait sa mga hindi pa bakunadoang pampublikong transportasyon basta may patunay na essential ang kanilang pagbiyahe. —sa panulat ni Angelica Doctolero