DWIZ 882

Binalaan ng mga eksperto ang mga pasyenteng bagong galing mula sa sakit na COVID-19.

Ayon kay infectious diseases expert Dr. Rontgene Solante, bagamat maari nang lumabas ang mga nasabing pasyente hindi pa rin dapat maging kampante ang mga bagong recover lang sa COVID-19 kahit tapos na ang kanilang isolation period.

Mataas kasi ang tsansa na magkaroon ng reinfection o kaya ay makapanghawa sa mga hindi pa bakunadong indibidwal dahil sa kanilang pakikihalubilo sa ibang indibidwal.

Sinabi ni Solante, na ang mga pasyenteng hindi pa nabakunahanay maaring mainfect ulit ng sakit isang buwan matapos makarekober mula sa virus lalo na’t patuloy na nagmumutate ang COVID-19 sa mga lugar na may mataas ang impeksiyon. —sa panulat ni Angelica Doctolero

Nakahanda na ang ilang mga botika na gagamitin bilang sites sa pag-roll out ng COVID-19 booster shots simula ngayong araw Enero a-20.

Kabilang sa mga lugar na gagamitin sa pagbabakuna ay ang Marikina, Pasig at Maynila na kayang mag-accommodate ng 100 hanggang 200 katao kada araw.

Gagawing waiting, registration, screening at vaccination area ang mga botika na may layuning mas mapadali ang pagbabakuna sa mga residente na hihingan ng QR code bago bakunahan.

Nagpaalala naman ang National Task Force Against COVID-19 na libre ang pagpapabakuna, dalhin lang ang vaccination card at valid ID.

Tiniyak naman ng Department of Health (DOH) na sumailalim sa training ang lahat ng mga magbabakuna at mga magbabantay sa bakunahan sa mga botika.  —sa panulat ni Angelica Doctolero

Sisimulan na ng lokal na pamahalaan sa Metro Manila ang pamamahagi ng “care kits” sa mga residenteng kinakailangang mag-quarantine dahil sa COVID-19.

Binubuo ito ng food packs, alcohol, pulse oximeter, thermometer, medicines at vitamins para sa mga matatanda at bata.

Kabilang sa mga lungsod na namahagi ng care kits ay ang Marikina City, Makati City, Malabon at Quezon City.

Pinasalamatan naman ng Metro Manila LGUs ang Office of the Vice President at Department of Health sa pagbibigay ng care kits na kanilang ipinamahagi sa mga residente. —sa panulat ni Angelica Doctolero

Patay ang 26 habang sugatan naman ang apat pa na indibidwal sa magkasunod na lindol sa Western Afghanistan.

Umabot sa 800 mga bahay ang nayupi kung saan, unang naganap ang magnitude 5.3 na lindol at sinundan ng magnitude 4.9 na lindol.

Nagkasa na ng operasyon ang mga otoridad upang alamin ang kabuuang bilang ng mga apektadong residente sa Badghis, Ghor, at Herat sa nabanggit na bansa. —sa panulat ni Angelica Doctolero

Nananawagan ang mga Pharmacist ng Drugstores Association of the Philippines (DSAP) na magsagawa ng training bago ang pag-arangkada ng pilot vaccination kontra COVID-19 sa mga botika.

Ayon kay DSAP Chairman of the Board Jovelun Blancaflor, wala pang nabibigyan ng training sa kanilang mga Pharmacist.

Aniya, bagama’t nakakatuwang ikinokonsidera ng gobyerno na gawing vaccination site ang mga botika ay hindi pa sila handa na magbakuna sa publiko.

Nauna nang sinabi ni Health Undersecretary Maria Rosario Vergeire na pitong botika pa lamang ang kasali sa inisyal na booster vaccine rollout ngayong araw at bukas.

Samantala, tiniyak naman ni Testing Czar at Presidential Adviser for COVID-19 Response Secretary Vince Dizon na palalawakin pa ang pagbabakuna sa mga botika at ilang klinika sa bansa sa mga susunod na linggo. —sa panulat ni Mara Valle

Nananatiling sarado ang mga peryahan sa National Capital Region (NCR) sa ilalim ng alert level 3.

Hindi parin pinapayagan ng Metro Manila Mayors na makapag-operate ang mga peryahan at mga rides base narin sa guidelines na ibinigay ng Inter-Agency Task Force (IATF).

Posible kasing muling magdulot na mas mataas na bilang ng kaso ng COVID-19 dahil sa dami nang pumapasyal dito kung saan, hindi na nasusunod ang health and safety protocols kabilang na ang social distancing, tamang pagsuot ng facemask at disinfection. —sa panulat ni Angelica Doctolero

Kinontra ni health expert na Dr. Tony Leachon ang naging pahayag ni labor secretary Silvestre Bello, III na exempted ang unvaccinated workers sa “No Vaccination, No Ride” policy na ipinatupad ng Department of Transportation (DOTr).

Iginiit ni Leachon na mababalewala lamang ang polisiyang ipinatutupad sa bansa dahil karamihan umano sa mga lumalabas sa mga bahay ay tanging mga manggagawa.

Sinagot naman ni Bello ang batikos ni Leachon at sinabing hindi sila ang nagpatupad ng naturang batas.

Nilinaw din ni Bello na exempted ang mga manggagawa dahil sila ang nagbibigay mas mahalagang serbisyo upang maiangat ang negosyo at ekonomiya ng bansa. —sa panulat ni Angelica Doctolero

Itinanggi ni Department of Labor and Employment (DOLE) secretary Silvestre Bello, III na may nagaganap na paniningil ng “medical bond” sa mga hindi bakunadong job applicant.

Ayon kay Bello, hindi sila naniningil ng medical bond sa mga aplikanteng unvaccinated na sinasabing galing umano sa Inter-Agency Task Force (IATF) at DOLE na sinasabing pirmado pa ng ilang government officials.

Sinabi ni Bello na mali ang pirma at iligal ang nasabing paniningil dahil walang tinatawag na “medical bond” sa kanilang ahensya.

Dagdag pa ni Bello na walang dapat na babayaran na kahit anong employment process ang mga aplikante at labas ang kanilang ahensya sa naturang isyu.

Nilinaw naman ni Bello na karapatan ng mga employer na mamili ng mga aplikanteng fully-vaccinated pero hindi nila puwedeng pilitin ang mga empleyado na magpabakuna o tanggalin sa trabaho dahil wala ring batas na nagmamandato sa pagbabakuna.

Gayunpaman, maari namang hingan ng negatibong RT-PCR test result ang unvaccinated workers para makabalik sa kanilang trabaho base narin sa IATF guidelines. —sa panulat ni Angelica Doctolero