DWIZ 882

Sugatan ang isang lalaki matapos barilin ng kaniyang kapatid sa barangay Margaay sa bayan ng Navacan sa Ilocos Sur.

Batay sa imbestigasyon ng Narvacan Police, dumating ang 50 anyos na lasing na biktima sa kanilang bahay at inaway ang kaniyang magulang.

Dahil dito, nagising ang 52 anyos na suspek na hindi nagustuhan ang nagyari kaya binaril ang biktima.

Ilan ulit na ring inaaway ng biktima ang kaniyang magulang na walang namang dahilan.

Nasugatan sa kaliwang binti ang biktima na nagpapagaling na sa ospital.

Kusa namang sumuko sa pulisya ang suspek at nahaharap sa kasong Frustrated Homicide, paglabag sa Comprehensive Firearms and Ammunitions Act at COMELEC Gun Ban. —sa panulat ni Abby Malanday

Pinuri ng Bangko Sentral ng Pilipinas (BSP) ang pagkakaaresto sa isang grupo na nang-hack umano ng mahigit 400 accounts ng BDO.

Ayon sa BSP, umaasa sila na sa pamamagitan nito ay maibabalik ang tiwala ng publiko sa online banking.

Lumabas naman sa imbestigasyon na sangkot din umano sa ibang modus ang mga nadakip.

Ito ay ang pagtatawag sa mga may-ari ng accounts para hingin ang kanilang one-time pin (OTP) para mabuksan ang kanilang account. —sa panulat ni Abby Malanday

Pumalag ang provincial health officer mula sa Northern Samar sa naging desisyon na isailalim sa alert level 4 ang kanilang lalawigan.

Ayon kay Dr. Ninfa Caparroso-Kam, health officer ng lalawigan, malayo ang kanilang average daily attack rate (ADAR) at average number of new cases sa critical level.

Habang nasa 84 hanggang 100 lang ang pagdoble ng kaso sa kanilang lugar na malayo sa dapat na panuntunan para isailalim sa alert level 4 ang isang lugar.

Ilan sa nakitang dahilan ni Caparroso-Kam sa pagkakamali ay ang pagkasama ng mga frontliners na may mild symptoms at nasa isolation facilities sa kanilang bed tracker account.

Agad namang nakipag-usap ang provincial government sa IATF para igiit ang kanilang hinaing. —sa panulat ni Abby Malanday

Nilinaw ng Commission on Elections (COMELEC) na committed dapat ang mga kandidato sa pagkapangulo at pangalawang pangulo na dumalo sa COMELEC debates na magsisimula sa susunod na mga buwan.

Ginawa ito ni COMELEC spokesperson James Jimenez matapos tumangging dumalo si presidential aspirant Bongbong Marcos sa presidential interview ng isang TV network.

Ayon kay Jimenez, committed dapat ang kanilang pagdalo para sa mga botanteng boboto sa kanila.

Pero dagdag ni Jimenez, hindi naman ito required batay sa batas.

Mula Pebrero hanggang Abril gaganapin ang presidential debate bago ang may 2022 Elections. —sa panulat ni Abby Malanday

Posibleng tumaas pa ang presyo ng langis sa bansa sa mga susunod na linggo.

Batay sa fuel price forecast nitong Enero a-25 hanggang 31, posibleng tumaas sa 1.80 pesos hanggang 1.90 pesos kada litro ng Diesel.

Habang ang Gasolina ay inaasahang tataas sa 1.40 pesos hanggang 1.50 pesos kada litro.

Nasa ika-apat linggo na ang bansa sa pagtaas ng presyo ng langis. —sa panulat ni Abby Malanday

Inirekomenda na ng Philippine Baking Industry Group (PhilBaking) sa Department of Trade and Industry (DTI) na taasan ang presyo ng ilang produktong tinapay sa bansa.

Kasunod ito ng pagtaas ng presyo ng harina sa merkado sa 1,030 kada sako mula sa dating presyo nito noong Disyembre na 800 piso.

Nasa 1,100 kada sako naman ang itinaas ng class A na harina.

Batay sa rekomendasyon, dapat taasan ang Pinoy Tasty ng 4.50 pesos habang 3.50 pesos ang Pinoy Pandesal.

Maaaring hatiin ang epektibidad nito sa dalawang bahagi, sa Pebrero a-1 at sa Abril a-4.

Sakaling magpatuloy ang pagtaas ng presyo ng harina, posibleng tumaas na sa tatlong piso mula sa dalawang piso ang pandesal.

Naglabas ang Bangko Sentral ng Pilipinas (BSP) ng updated na guidelines sa pag-aayos ng mga electronic payments o e-payments sa ilalim ng National Retail Payment System (NRPS) framework.

Ayon kay BSP governor Benjamin Diokno, ang bagong hanay ng mga patnubay na ito ay inaasahang magpapalakas sa credit at settlement risk management para e-payments.

Sinabi pa ng BSP governor, na ang mga alituntunin sa pag-aayos ay nagbibigay ng mga responsibilidad at pinakamababang kinakailangan na dapat sundin ng mga financial institutions.

Idinagdag pa ni Diokno ang pagpapalabas ng mga alituntunin ay para tiyakin na ang mga sistema ng pagbabayad ay pinapatakbo sa isang ligtas, mahusay at maaasahan na paraan. —sa panulat ni Kim Gomez

Inatasan ni Department of Agriculture secretary William Dar ang National Dairy Authority (NDA) at Philippine Carabao Center (PCC) na pataasin ang produksyon ng gatas upang tumugma sa tumataas na demand sa merkado.

Ayon kay Dar, kailangang muling gamitin ang mga estratehiya upang mapalakas ang produksyon ng gatas at hindi umasa sa mga importasyon mula sa ibang bansa.

Matatandaang, nilagdaan ng agriculture department ang magkasanib na declaration ng Pilipinas at France para sa agricultural corporation sa dairy industry.

Kaugnay nito, binanggit ng punong chief agriculture ng France na tutulong sila sa pagbibigay ng mga kabuhayan para sa ating mga lokal na magsasaka at kooperatiba ng pagawaan ng gatas. —sa panulat ni Kim Gomez