Drew Nacino

Aminado ang Bureau of Corrections (BuCor) na nakatutulong ang gang system sa New Bilibid Prison sa Muntinlupa sa pamamahala at pagdidisiplina sa mga bilanggo.

Ito, ayon kay BuCor Acting Director General Gregorio Catapang Jr., ay dahil sa kakulangan ng tauhan.

Nasa 6K anya ang kapasidad ng Bilibid pero umaabot na sa 30,000 ang preso kaya’t mahirap bantayan ang mga ito.

Magugunitang tatlong gang sa NBP ang dawit sa pagpaslang sa brodkaster na si Percival Mabasa o Percy Lapid.

Una nang inamin ng umano’y gunman na si Joel Escorial na galing sa Bilibid ang utos na patayin si Mabasa at ilang oras matapos ang suspek sa media, namatay naman ang Bilibid inmate at sinasabing middleman sa krimen na si Jun Villamor.

Nito namang Miyerkoles, iprinisinta ng BuCor ang libu-libong kontrabado na isinuko at nakumpiska mula sa mga bilanggo, kabilang ang mga armas, cellphone, ilegal na droga at mahigit pitong libong lata ng beer.

Tiniyak ng PAGASA ang pagkakaroon ng improvement sa kanilang Weather Forecasting at Early Warning Systems sa gitna nang magkakasunod na pananalasa ng mga bagyo sa bansa.

Sa katunayan inihayag ni Dr. Esperanza Cayanan, Deputy Administrator for Research and Development ng PAGASA, na nagsasagawa na sila ng pilot study sa impact-based forecasting at warning services sa Metro Manila at Metro Cebu.

Layunin anya nito na mabawasan ang epekto ng mga weather-related hazard, gaya ng flashfloods at landslides.

Ayon kay Cayanan, kailangan talagang magkaroon ng improvement sa typhoon forecast advisories na dapat ipatupad sa lalong madaling panahon.

Tinukoy din ng PAGASA official ang malaking “gap” sa aspeto ng koordinasyon sa mga Local Government Unit, partikular sa pag-detect sa tumataas na water level sa ilang bahagi ng bansa.

Para anya ma-detect ang water levels, inaayos na ng pagasa ang early flood warning systems nito sa ilang lugar lalo’t kada tatlong oras nag-i-issue sila ng heavy rainfall warnings.

Matapos naman ang pitong taon simula nang isabatas ang PAGASA Modernization Act, tinukoy ni Cayanan ang ilang improvements sa ahensya gaya ng pagkakaroon ng 102 Automatic Weather Stations at 28 Lightning Detection Systems.

Gayunman, aminado ang PAGASA official na may kakulangan pa rin sila sa mga personnel kaya’t inirekomenda na rin niya ang pag-ha-hire ng karagdagang tauhan.

Boluntaryo na rin ang pagsusuot ng face masks sa mga workplace sa pribadong sektor bilang pagtalima sa kautusan ni Pangulong Bongbong Marcos na gawing optional ang face mask use sa indoor spaces.

Kinumpirma ni Labor Secretary Bienvenido Laguesma na nilagdaan na niya ang Labor Advisory 22, series of 2022, o Guidelines on the Voluntary Wearing of Face Masks in Workplaces.

Gayuman, nilinaw ni Laguesma na may mga exempted sa nasabing kautusan gaya ng healthcare facilities, partikular ang mga ospital, clinic at laboratoryo;

Medical transport vehicles, tulad ng ambulansya; public transportation mapa-lupa, tubig at himpapawid.

Para naman sa government workplaces, kailangan pang hintayin ang kautusan mula sa Civil Service Commission.

Lumobo pa sa P6.2-B ang halaga ng pinsala ng Bagyong Paeng sa agrikultura at imprastraktura.

Sa datos ng National Disaster Risk Reduction and Management Council, pinaka-malaki ang pinsala sa imprastraktura na umabot sa P3.5-B.

Ayon naman sa Department of Agriculture, sumampa na rin sa mahigit P2.7-B ang pinsala sa Agriculture Sector.

Kabuuang 82,830 hectares ng agricultural land ang nagtamo ng pinsala sa Bicol, Cordillera Administrative Region, Cagayan Valley, Central Luzon, CALABARZON, MIMAROPA, Western at Eastern Visayas, Zamboanga Peninsula, Central Mindanao at Soccsksargen regions.

Kabilang sa matinding pinadapa ang mga palayan na umabot sa 95,000 metric tons ang volume loss o P1.7-B ang halaga ng pinsala na sinundan ng high value crops, P555.4-M at fisheries, P201-M.

Pinaka-lubhang nasalanta ang sektor ng agrikultura at imprastraktura sa Bicol Region na umabot sa P1.2-B ang kabuuang halaga.

Nagpapatuloy ang pamamahagi ng ayuda ng D.A. sa mga apektadong magsasaka at mangingisda.

Kinumpirma ni Antique Governor Rhodora Cadiao na nahaharap sa kakulangan sa suplay ng krudo ang lalawigan.

Ito’y makaraang masira ang mga pangunahing tulay na nagdurugtong sa Antique patungong Aklan at Iloilo.

Ayon kay Cadiao, hindi makararating sa kanila ang gasoline supply dahil sa pagkasira ng Paliwan Bridge na nagdurugtong sa Aklan at Miag-Ao Bridge na patungo namang Iloilo.

Dahil dito, ipinag-utos na ng Gobernadora ang pagpapatupad ng “No-Full Tank” policy na nagdulot naman ng bahagyang panic sa mga residente.

Sisikapin naman anya nilang maisaayos ang tulay sa loob ng dalawang linggo.

Mahigit isang buwan bago mag-Pasko, nagmahal na ang mga produktong pang-Noche Buena.

Sa pag-iikot kahapon ng Department of Trade and Industry, tumaas ang presyo ng lahat ng Noche Buena products, gaya ng Hamon at Quezo de Bola.

Kabilang din sa nagmahal ang Pasta, tulad ng Elbow Macaroni na P40 na ang kada 400 grams kumpara sa P34 noong isang taon at spaghetti, P41 kumpara sa dating P35 kada pakete.

Inihayag naman ni Trade Assistant Secretary Ann Claire Cabochan na dahil sa dagdag-presyo, pinag-aaralan ng DTI kung maglalabas sila ng Price Guide sa Noche Buena items.

Samantala, wala pa ring pasya ang kagawaran sa hirit na dagdag-singil ng manufacturers ng basic at prime commodities, kabilang ang Pinoy Tasty at Pinoy Pandesal.

Gayunman, ilang Non-basic items ang kapansin-pansing nagmahal ngayong Nobyembre.

Kampante naman si Philippine Amalgamated Supermarkets Association President Steven Cua na inaasahang daragsa pa rin ang mga mamimili habang papalapit ang holiday season, kahit may price hike.

Pinamamadali na ni Senator Bong Revilla, Jr. sa Department of Public Works and Highways ang pagkumpuni sa mga nasirang imprastruktura, gaya ng mga tulay at dike dahil sa hagupit ng Bagyong Paeng.

Si Revilla ang Chairman ng Senate Committee on Public Works at kabilang siya at kanyang pamilya na pawang taga-Cavite na matinding nasalanta ng bagyo.

Sa kanyang sulat kay DPWH Secretary Manuel Bonoan, tinanong ng Senador kung kakayanin ba ang repair sa loob ng anim na araw.

Inihalimbawa naman ng Senador ang nangyaring magnitude 9.1 na lindol sa Japan noong March 2011, na umabot lang umano ng anim na araw ang pag-repair sa mga kalsada.

Pinagsusumite rin ng mambabatas si Bonoan ng report sa kabuuang pinsala ng mga pampublikong imprastruktura kabilang ang mga tulay, dike, flood control structures.

Tiniyak naman ni Revilla na hihingin niya sa Senate Committee on Finance na isama sa 2023 National Budget ang pondo para sa repair ng mga imprastruktura. —ulat mula kay Cely Ortega Bueno (Patrol 19)

Tiniyak ng Department of Agriculture ang tulong para sa mga magsasaka at mangingisdang naapektuhan ng Bagyong Paeng.

Kabilang sa ipamamahagi ng DA ang libreng punla at fingerlings habang may nakalaan ding Quick Response Fund para sa rehabilitasyon ng mga apektadong lugar.

Maaari ring mangutang ang mga nasalantang magsasasaka ng hanggang P25,000 nang walang interes sa ilalim ng Survival and Recovery Loan Program.

Batay sa datos ng Kagawaran, mahigit 53,000 magsasaka at mangingisda ang naapektuhan ng bagyo.

Hanggang kahapon, umabot na sa P2.7-B ang pinsala ng Bagyong Paeng sa sektor ng agrikultura.

Ilang paaralan sa Quezon City ang mananatili sa blended learning sa kabila ng full implementation ng face-to-face classes.

Itinurong dahilan ni Quezon City Schools Division chief Jenny Corpuz ang kakulangan ng silid-aralan.

Ayon kay Corpuz, 10 sa 158 paaralan sa lungsod ang hindi makabalik sa tradisyunal na sistema ng pagtuturo.

Ang mga ito ay ang Justice Cecilia Munoz Palma High School; Bagong Silangan; Batasan; Balara; San Bartolome; Novaliches;   Doña Rosario; New Era; Emilio Jacinto High Schools at Ismael Mathay Senior High School.

Hindi naman anya mahihirapan sa blended learning ang mga estudyante dahil may ipinamigay na tablet ang lokal na pamahalaan.

Samantala, hinikayat ni Corpuz ang mga mag-aaral na patuloy na magsuot ng face mask sa kabila ng pagpayag ng Department of Education na gawing optional ang pagsusuot nito sa mga indoor area, gaya ng silid-aralan, alinsunod sa Executive Order 7.

Tiniyak ng Department of Trade and Industry na sapat ang suplay ng mga pangunahing produkto sa kabila ng epekto ng Bagyong Paeng.

Ayon sa DTI, nakikipagtulungan na sila sa Philippine Chamber of Food Manufacturers upang masiguro na patuloy na nasusuportahan ang suplay ng basic necessities at prime commodities.

Muli namang pina-alalahanan ni DTI Secretary Alfredo Pascual ang mga negosyante na tumalima sa price freeze sa basic necessities sa mga lugar na nasa ilalim ng State of Calamity.

Sa ilalim ng Price Act, otomatikong hindi gagalaw ang presyo ng mga bilihin sa mga lugar na nasa State of Calamity maliban na lamang kung aalisin ito ng Pangulo.

Kahapon ay isinailalim na ni Pangulong Bongbong Marcos sa State of Calamity sa bisa ng Proclamation 84 ang CALABARZON, Bicol, Western Visayas at Bangsamoro Autonomous Region in Muslim Mindanao.