Drew Nacino

Ipinauubaya na ng Department of Health sa Department of Education ang pagdedesisyon para sa mga estudyante kaugnay sa pagpapatupad ng Covid-19 protocols sa mga paaralan.

Tugon ito ng DOH matapos payagan na ng DepEd ang boluntaryong pagsusuot ng face masks sa mga silid-aralan.

Gayunman, nilinaw ng DOH na dapat isaalang-alang ng DepEd ang kaligtasan ng mga mag-aaral alinsunod sa Executive Order 3 at 7 ng Pangulo na nagpapahintulot sa optional use ng face masks sa indoor at outdoor areas para sa ilang health settings.

Pina-alalahanan naman ng DOH ang publiko na epektibo pa rin kontra COVID-19 ang patong-patong na proteksyon, gaya ng pagsusuot ng facemasks, pagtiyak na mayroong maayos na bentilasyon at pagpapabakuna.

Dumating na sa Maynila mula Puerto Princesa City, Palawan ang isa pang Person of Interest (POI) sa pagpatay sa brodkaster na si Percival Mabasa o Percy Lapid.

Dakong ala-7 kagabi nang dumating sa Ninoy Aquino International Airport-Terminal 3, Pasay City sakay ng Cebu Pacific Flight ang mga tauhan ng National Bureau of Investigation bitbit ang POI.

Muntik pang magkagirian ang mga tauhan ng NBI at Aviation Security Police dahil umano sa kawalan ng koordinasyon.

Armado ang mga tauhan ng NBI na ikina-alarma naman ng Aviation Police pero kalauna’y naayos din ang sigalot at humingi ng paumanhin ang mga taga-NBI.

Bagaman hindi pa pina-pangalan ang Person of Interest at matukoy ang naging partisipasyon nito sa pagpatay kay Lapid, inaasahang iimbestigahan naman ito sa pagkamatay ng ‘‘middleman’’ na si Jun Villamor. —ulat mula kay Raoul Esperas (Patrol 45)

Mahigit 7,000 lata ng beer, P50,000 cash, iba’t ibang uri ng armas at iligal na droga ang narekober sa inilargang “Oplan Galugad” sa New Bilibid Prison, Muntinlupa City.

Bukod sa mga alak na nagkakahalaga ng P1,000 bawat isa, nakasabat din ang mga prison guard ng mga baraha, cellphone at laptop.

Ayon kay Bureau of Corrections Officer-in-Charge Gregoio Catapang Jr., ang mga kontrabando ay isinuko ng mga gang leader matapos ang isang dayalogo.

Magugunitang nag-take over si Catapang bilang BuCor Director matapos ipag-utos ni Pangulong Bongbong Marcos ang suspensyon kay Director General Gerald Bantag.

Kaugnay ito sa pagkamatay ng bilanggong si Jun Villamor, na nagsilbi umanong ‘‘middleman’’ na nag-hire ng gunmen upang patayin ang brodkaster na si Percival “ka-Percy Lapid” Mabasa noong Oktubre.

Itinuro ng ilang witness si Suspended Bureau of Corrections Director Gerald Bantag bilang isa sa mastermind sa pagpatay sa brodkaster na si Percival “Percy Lapid” Mabasa.

Ito ang kinumpirma ni Danilo Pelagio, Legal Counsel ng kapatid ni ka Percy na si Roy Mabasa.

Ayon kay Pelagio, 3 Gang Leader sa New Bilibid Prison ang nagbunyag na isa si Bantag isa sa mga utak sa krimen.

Matapos anya ang pag-amin ng umano’y gunman na si Joel Escorial at pagpatay sa hinihinalang ‘‘middleman’’ na si Jun Villamor, ilan pang testigo at bilanggo ang lumutang upang ituro ang suspendidong BuCor Director.

Mayroon din umanong ebidensya ang mga testigo laban kay Bantag, kabilang na ang perang ibinayad sa gunman na naberipika naman sa pamamagitan ng bank deposits.

Isa rin anyang hindi pa pina-pangalanang tao ang nagbigay umano ng pera bilang kabayaran sa pagpatay kay ka-Percy.

Samantala, ibinunyag din ni Pelagio na ilan pang bagong suspek ang tinukoy ng mga imbestigador bilang mga kasabwat.

Umakyat na sa 122 ang patay sa Bagyong Paeng.

Pinaka-marami ang naitala sa Bangsamoro Autonomous Region in Muslim Mindanao na 61.

Ayon sa National Disaster Risk Reduction and Management Council (NDRRMC), 103 katao ang nasugatan habang 36 ang nawawala.

Umabot naman sa mahigit 3.3 milyong indibidwal ang naapektuhan ng kalamidad sa tinatayang 7,000 barangay.

Kabilang na rito ang halos 177,000 kataong nasa evacuation centers.

Niyanig ng lindol ang bayan ng Calayan, Cagayan kagabi.

Alas-9:07 nang tumama ang magnitude 5.2 at natunton ang sentro, 33 kilometers hilagang-kanluran ng Babuyan Islands.

Ayon sa PHIVOLCS, tectonic ang origin ng pagyanig at may lalim na 56 kilometers.

Naramdaman ang Intensity 3 sa Calayan, Abulug at Aparri, Cagayan; Ivana, Uyugan at Sabtang, Batanes habang Intensity 2 sa Basco, Batanes.

Bagaman walang naitalang pinsala, inaasahan naman ang aftershocks.

Inihirit ng United Federation of Sugar Producers (UNIFED) sa gobyerno na taasan ang Suggested Retail Price (SRP) ng asukal.

Ito’y makaraang maapektuhan ng Bagyong Paeng ang libu-libong ektaryang tubuhan sa Visayas at upang makabawi ang sugar producers.

Ayon kay UNIFED president Manuel Lamata, hiling nila na itaas sa P85 hanggang P90 ang SRP ng kada kilo ng asukal mula sa kasalukuyang P70.

”increase so bale P85-P90 yung retail ang bagsak dito sa amin sa millgate price sa mga planter baka makuha namin yung P60.00, so, kung makuha namin yung P60.00 po pwede na, may fighting chance na kami to survive. Alam mo naman yung cost of production namin sobrang taas…patuloy pa yung assessment ng governor namin dito sa Negros. Kasi 3 probinsiya po yung natamaan, 3 isla e, yung Cebu, Tanay, at buong Negros…”

Bagaman tanggap naman anya nila kung hindi pagbibigyan ang kanilang hiling na dagdag-presyo, posible namang magkaroon epekto ang bagyo sa supply ng asukal sa susunod na taon.

”well wala naman tayong magawa kung hindi talaga kaya ng Gobyerno e pagtiyagaan natin, definitely changes, we will suffer loses baka hindi na tayo makatanim ng ganyan kalaki for next year siguradong bababa yung production natin kung ganon, kung wala ka na kikitain bakit ka pa magtatanim, huwag na hintay ka nalang..”    si UNIFED President Manuel Lamata, sa panayam ng DWIZ.

Muling ipinaalala ng Departments of Energy at Trade and Industry na umiiral ang price freeze sa mga lugar na nasa ilalim ng State of Calamity matapos ang pananalasa ng Bagyong Paeng.

Ayon sa DTI, dalawang buwan epektibo ang price freeze sa mga pangunahing bilihin sa mga lugar na nasa ilalim ng State of Calamity.

Pagmumultahin at makukulong naman ang mga negosyanteng magpapatupad ng dagdag-presyo.

Bukod sa basic goods, pasok din sa price freeze o walang taas-presyo ng Liquefied Petroleum Gas at Kerosene sa gitna nang inilargang price increase sa LPG simula kahapon.

Nilinaw ni Department of Energy – Oil Industry Management Bureau Assistant Director Rodela Romero na tanging puwede ay rollback sa presyo.

Dahilan ng price hike sa LPG ang pagsisimula nang pag-iimbak ng heating fuel ng mga bansang naghahanda para sa winter o taglamig.

Ilan pang bansa ang nagsimula nang magpaabot ng tulong sa Pilipinas matapos ang pananalasa ng Bagyong Paeng.

Kabilang sa mga naunang sumaklolo ang U.S. at China habang nangako rin ng tulong ang Japan at Australia.

Ayon sa U.S. Embassy, nasa 10,000 family food packs ang kanilang ipinadala sa South Cotabato sa pamamagitan ng DSWD.

Nag-donate rin ang Chinese Embassy ng unang batch ng disaster relief materials, na kinabibilangan ng libu-libong distilled bottled water, instant noodles, bigas at kape, sa Datu Odin Sinsuat, Maguindanao Del Norte.

Magkakaloob naman ang Australia ng Life-Saving Family Kits sa mga pinaka-apektadong komunidad sa Bangsamoro Autonomous Region in Muslim Mindanao na ipadadala sa pamamagitan ng Philippine Red Cross.

Kabilang sa mahigit 500 family kits, ang emergency household gaya ng sleeping kits, jerry cans, hygiene kits at tarps para sa mga naapektuhang pamilya sa Maguindanao at Zamboanga.

Samantala, inihayag ng United Nations-Office for the Coordination of Humanitarian Affairs na umabot na sa P51-M ang halaga ng ayudang ipinamahagi ng government at humanitarian partners.

Karagdagang 676 covid-19 cases ang naitala ng Department of Health kahapon kasabay nang pagdagsa ng mga tao sa iba’t ibang sementeryo para sa Undas sa gitna ng pinaluwag pang face mask policy.

Ito na sa ngayon ang pinaka-mababang daily tally na naitala ng DOH simula noong June 28.

Bumaba naman sa 19,340 ang aktibong kaso kumpara sa 20,227 noong Lunes.

Sa mga pinaka-bagong infections, 141 ay mula sa Metro Manila na nangunguna pa rin sa may pinaka-maraming kaso sa nakalipas na dalawang linggo.

Samantala, nasa 4,005,000 thousand na ang total caseload, kabilang ang 3,921,000 recoveries habang nadagdagan ng 35 ang death toll kaya’t umakyat sa 64,109 ang fatalities.