Drew Nacino

Inaasahang magiging “Maligaya pa rin ang Pasko” ng mga Pilipino sa kabila nang hindi maawat na pagbilis ng inflation rate.

Ito ang reaksyon ng ekonomistang si Astro del Castillo makaraang umabot sa 7.7% ang inflation rate noong isang buwan, na pinaka-mabilis sa nakalipas na halos 14 na taon.

Ayon kay Del Castillo, dapat matuto ang mga Pinoy na i-prayoridad ang pangangailangan, gaya ng pagkain sa halip na luho ngayong nakararanas ng economic crisis ang mundo.

Dapat din anyang paspasan ang produksyon ng pagkain dahil ito ang pangunahing naaapektuhan tuwing may tumatamang bagyo sa bansa.

Karagdagang 1,010 Covid-19 cases ang naitala sa bansa kahapon.

Ito na ang ikalawang sunod na araw na bumalik sa mahigit isanlibong karagdagang kaso ng Covid-19 ang naitatala ng Department of Health.

Dahil dito, umabot na sa 4,009,466 ang total case load kabilang ang 3,928,577 recoveries.

Pinaka-marami sa mga bagong infections o 198 ay mula sa Metro Manila.

Karagdagang 34 deaths din ang naitala ng DOH kaya’t sumirit sa 64,274 ang fatalities.

Samantala, sumadsad pa sa 16,615 ang active cases, ang pinaka-mababa simula noong July 14.

Sumampa na sa 156 ang nasawi sa pananalasa ng bagyong Paeng.

Kinumpirma rin ng National Disaster Risk Reduction and Management Council na 141 ang nasugatan habang 37 ang nawawala.

Tinaya naman sa halos 2M katao ang apektado kabilang ang nasa 1,000 indibidwal na nananatili sa evacuation centers.

Aabot na sa halos P170-M ang halaga ng tulong ang ipinamamahagi ng gobyerno.

Sa ngayon ay apat na rehiyon na ang nasa ilalim ng State of Calamity na tatagal ng anim na buwan upang mapabilis ang relief at recovery efforts ng gobyerno sa mga lugar na lubhang naapektuhan ng kalamidad.

Siyam na pagyanig ang naramdaman sa paligid ng Mount Kanlaon sa Negros Island sa nakalipas na magdamag.

Ayon sa PHIVOLCS, nananatili sa ilalim ng Alert level 1 ang Bulkan.

Mahigpit pa ring ipinagbabawal ang pagpasok sa 4-kilometer radius Permanent Danger Zone.

Ipinagbabawal din ang pagpapalipad ng anumang uri ng eroplano malapit sa bulkan dahil sa banta ng pagsabog ng bulkan.

Ang Kanlaon ang pinaka-aktibong bulkan sa Visayas at patuloy na binabantayan dahil sa posibleng phreatic eruption.

Hindi pa rin pinapayagan ang pagtuturok ng COVID-19 vaccine booster sa mga edad 5 hanggang 11.

Nilinaw ni DOH Officer-in-Charge Maria Rosario Vergeire na wala pang approval ng regulatory agencies sa bansa ang pagbibigay ng booster doses sa nasabing age group.

Ayon kay Vergeire, ipagbibigay-alam nila sa publiko sakaling magkaroon ng bagong polisiya na nagrerekomendang turukan ng booster ang mga edad 5 hanggang 11.

Batay anya sa datos ng DOH, nasa 5.2 million na bata sa ilalim ng naturang age group ang fully vaccinated na laban sa Covid-19.

Katumbas ito ng 48.02% ng target population para sa 5 hanggang 11 taon na 10.8 million.

Posibleng sumampa sa 9.1% hanggang 9.3% ang inflation rate sa Disyembre at manatiling mataas hanggang sa unang quarter ng susunod na taon.

Ito, ayon sa mga ekonomista, ay dahil pa rin sa mahal na global commodity prices at epekto ng mga nagdaang bagyo.

Inihayag ni Jonathan Ravelas, managing director ng E-Management for Business and Marketing Services at dating BDO Market chief strategist, na ngayong buwan ay posibleng umabot sa 8.4% ang inflation.

Gayunman, naka-depende ito kung hindi na muling magkakaroon ng mga kalamidad sa bansa sa nalalabing dalawang buwan.

Kinatigan din ni National Statistician Dennis Mapa ang forecast ni Ravelas ngayong buwan lalo’t patuloy na lumolobo ang halaga ng pinsala ng Bagyong Paeng sa agrikultura na isang hamon para sa gobyerno.

Sa tantsa naman ni ING Bank Senior Economist Nicholas Mapa, maaaring bumilis sa 8% ang inflation sa Disyembre lalo’t mayroon pa ring malaking epekto ang mataas na presyo ng bilihin dahil sa epekto ng bagyo.

Kamakailan ay inihayag ng Philippine Statistics Authority na bumilis sa 7.7% ang inflation rate noong Oktubre, dahil sa pag-alagwa ng pasahe sa public transportation, presyo ng krudo, pagkain at iba pang pangunahing bilihin.

Ito na ang pinaka-mabilis na paggalaw ng presyo ng mga bilihin sa nakalipas na 14 na taon.

Nagtipon sa Baguio City ang mga supporter ng suspendidong si Bureau of Corrections (BuCor) director-general Gerald Bantag, isa sa 160 persons of interest sa pagpatay sa brodkaster na si Percival Mabasa o Percy Lapid.

Ipinanawagan ng mga taga-suporta ni Bantag na agaran itong ibalik bilang hepe ng BuCor.

Mayroon anilang integridad si Bantag kaya’t pinili ito ni dating Pangulong Rodrigo Duterte na Pangasiwaan ang BuCor.

Umapela naman si Baguio City Mayor Benjamin Magalong sa mga taga-suporta ni Bantag na maging mahinahon at iwasang magbato ng mga akusasyon kaninuman lalo’t kung hindi napapatunayan.

Inaasahang maghahain ngayong araw ang National Bureau of Investigation ng reklamo laban sa mga posibleng sangkot sa krimen.

Nakatakdang sampahan ng reklamo ngayong araw ng National Bureau of Investigation ang mga posibleng sangkot sa pagpatay sa brodkaster na si Percival “Percy Lapid” Mabasa.

Kahapon nagsagawa ng final briefing ang mga opisyal ng Departments of Justice at Interior and Local Government bago ihain ang mga reklamo laban sa mga idinadawit sa krimen.

Kabilang sa mga dumalo sina Secretaries Jesus Crispin Remulla ng DOH at Benjur Abalos ng DILG; NBI director Medardo de Lemos, PNP chief, Gen. Rodolfo Azurin Jr., at NCRPO director, Brig. Gen. Jonnel Estomo.

Ayon kay Abalos, isinagawa ang final briefing upang maging “Airtight” ang lahat ng isasampang kaso.

Una nang inihayag ng DOJ at DILG na mayroong 160 persons of interest sa pagpatay kay Lapid, kabilang na si suspended Bureau of Corrections director-general Gerald Bantag.

Isa rin si Bantag sa mga itinuturong mastermind ng umano’y gunman na si Joel Escorial at pinaslang na ‘middleman’ na si Jun Villamor.

Iginiit ng Department of Human Settlements and Urban Development ang kanilang panawagan sa mga mambabatas na magkaroon ng P36 billion Interest Subsidy Fund.

Ito’y upang masimulan ang pagtatayo ng mahigit isang milyong housing units para sa unang taon ng Pambansang Pabahay para sa Pilipino Program ni Pangulong Ferdinand “Bongbong” Marcos.

Layunin ng programa na matugunan ang housing backlog na inaasahang aabot sa 6.5 million units sa katapusan ng taon at posibleng tumaas pa sa 10.9 million sa pagtatapos naman ng taong 2028.

Ayon kay Human Settlements secretary Jose Rizalino Acuzar, malaki ang magiging kontribusyon ng nasabing proyekto sa Eight-point Economic Agenda ng Administrasyon, partikular sa paglikha ng trabaho.

Nasa 1.7M trabaho anya ang malilikha sa oras na simulan ang programa at batay sa kanilang datos ay nasa walong manggagawa ang kailangan para sa pagtatayo ng isang housing unit.

Binigyang-diin ni Acuzar na maaaring magresulta sa  mas maunlad na “Economic Activities” sa 80 industriya sa housing sector sa sandaling umarangkada ang konstruksyon ng mga bahay.

Patay ang isang hindi pa nakikilalang pasahero habang sugatan ang 11 iba pa sa pagsabog ng Improvised Explosive Device (IED) sa loob ng bus sa Tacurong City, Sultan Kudarat.

Dakong alas 11:30 kahapon ng umaga nang maganap ang pagsabog sa yellow bus line sa Purok Yellow Bell, Barangay New Isabela.

Ayon kay 6th Infantry Division Spokesman, Lt. Col. Dennis Almorato, nagmula ang bus sa Kidapawan City, North Cotabato nang sumabog ang IED malapit sa St. Louis Hospital.

Wala pang indibidwal o grupong umaako sa pambobomba pero ang mga ganitong insidente ay maka-ilang beses nang isinisi sa mga terorista na may kaugnayan sa Bangsamoro Islamic Freedom Fighters.

Inaalam na anya kung paano naipuslit ng bomber sa bus ang IED na idinetonate sa pamamagitan ng cellphone.

Kilala rin ang yellow bus line sa madalas puntiryahin ng mga pambobomba na kagagawan umano ng mga extortionist.