Drew Nacino

“Gunitain ang ika-9 na anibersaryo ng pananalasa ng Super Typhoon Yolanda na may buong pag-asa at pagkakaisa”.

Ito ang bahagi ng mensahe ni Borongan Bishop Crispin Varquez ng Diocese of Borongan.

Ayon kay Varquez, mahalagang patuloy na gunitain, alalahanin at ipanalangin ang lahat ng mga nasalanta ng pananalasa ng kauna-unahang Super Typhoon sa bansa noong November 8, 2013.

Umabot sa mahigit 6,000 ang nasawi sa hagupit ng bagyo at nagdulot ng malawak na pinsala sa ari-arian ng mga mamamayan sa Eastern Visayas Region.

Dapat din anyang ipagpasalamat ang naging paggabay ng Panginoon at ng mga may mabubuting pusong indibidwal at organisasyon na tumulong sa muling pagbangon ng mga residente sa kalamidad.

Binigyang-diin ng Obispo na mahalaga ang mga aral na natutunan ng bawat isa mula sa pananalasa ng Bagyong Yolanda para sa pagharap sa mga krisis na posibleng maganap sa hinaharap.

Napapanahon na rin anyang mamulat ang bawat isa sa pangangalaga sa kalikasan bilang tugon sa panawagan ni Pope Francis na Ecological Conversion sa gitna ng patuloy na mga banta ng iba’t ibang kalamidad dulot ng Climate Change.

I-a-itemize ang lump sums na nakapaloob sa Proposed 2023 National Budget.

Ito ayon kay Senate President Juan Miguel Zubiri ang tiniyak ni Senate Committee on Finance Chairman Sonny Angara kaugnay ng lump sum allotment na balak silipin ni Senate Minority leader Koko Pimentel sa budget deliberation sa plenaryo.

Ayon kay Zubiri, ginarantiyahan ni Senator Angara na gagawin namang detalyado ang paggagamitan ng pondong nasa lump sums.

Una nang pinuna ni Pimentel ang halos P1-T lump sums sa panukalang budget na maaaring paghugutan ng pandagdag sa Calamity Fund.

Kabilang sa tinukoy ni Pimentel ang P500-B lump sum sa panukalang budget ng Department of Public Works and Highways;

P9.5-B Confidential at Intelligence Funds (CIF), kabilang ang P4.5-B CIF ng Office of the President, P500-M ng Office of the Vice President at P150-M sa Department of Education.

Iginiit ni Zubiri na maliwanag naman ang ruling ng Korte Suprema na nagbawal sa lump sums sa National Budget. —ulat mula kay Cely Ortega Bueno (Patrol 19)

Kailangan na ng moderno at isolated na bilangguan para sa mga nagkasala sa karumal-dumal na krimen upang mapigilan ang patuloy nilang paggawa ng krimen tulad ng nangyayari hanggang ngayon sa New Bilibid Prison.

Ito ang inihayag ni Senate President Juan Miguel Zubiri matapos ang pagsasampa ng kaso laban kina suspended Bureau of Corrections director-general Gerald Bantag at Deputy Security Officer Ricardo Zulueta kaugnay ng pagpaslang sa brodkaster na si Percy Lapid.

Sisikapin anya ng Senado na maihabol sa panukalang 2023 National Budget ang pondo para sa pagpapatayo ng super maximum security cell na bukod na kulungan para sa mga convicted sa heinous crimes.

Ayon kay Zubiri, nakausap na niya si Senator Sonny Angara na chairman ng Senate Committee on Finance para hanapan ito ng budget.

Nakausap na rin ng Pangulo ng Senado si Justice secretary Jesus Crispin Remulla na mayroon ng nakitang lugar para sa Super Maximum Security Cell o Super Max na katulad ng bilangguan sa Estados Unidos.

Sa sandaling aprubahan ng Senado ang budget para rito ay kailangan aniyang mapapayag ang kamara pagdating ng panukalang budget sa Bicameral Conference Committee. —ulat mula kay Cely Ortega Bueno (Patrol 19)

Kinumpirma ng World Health Organization na kabilang ang Pilipinas sa 10 bansang may pinakamataas na bilang ng mga batang hindi bakunado laban sa mga karaniwang sakit.

Ito, ayon kay Dr. Robert kezaala, medical officer ng Vaccine Preventable Diseases and Immunization ng WHO – Philippines, ang dahilan kaya’t puspusan ang kanilang pakikipagtulungan sa Pilipinas na tiyaking 80% hanggang 90% ng mga bata ay vaccinated.

Batay sa UNICEF report noong Hulyo, nasa 25M bata sa mundo ang hindi nakapagpabakuna kontra diphtheria, tetanus at pertussis noong 2021.

Kabilang anya sa mga dahilan ang pagdami ng mga batang naninirahan sa conflict zones kung saan malaking hamon ang immunization, pagdami ng misinformation at COVID-19 related issues.

Malaking bahagi o 18 mula sa 25M ng mga batang hindi naturukan kahit isang dose ng Diptheria Vaccine, ay naninirahan sa mga low at middle-income countries, gaya ng India, Nigeria, Indonesia, Ethiopia at Pilipinas.

Nagtakda naman ang DOH ng target na 95% para sa fully-immunized children pero umaabot pa lamang ito sa 34%.

Ilan sa mga itinuturong dahilan ng mababang immunization rate ang COVID-19 pandemic at mobility restrictions.

Pero dahil nagluwag na ng restriksyon sa bansa, muling hinimok ng DOH ang mga magulang na pabakunahan ang kanilang mga anak upang maiwasan ang mga karaniwang sakit.

Nanumpa na bilang bagong Undersecretary ng Department of Health si dating PNP chief, Ret. Gen. Camilo Cascolan.

Mismong kay DOH Officer-in-Charge Maria Rosario Vergeire nanumpa si Cascolan, kahapon.

Gayunman, aminado ang DOH na hindi pa mabatid kung anong assignment ang ibibigay sa dating hepe ng Pambansang Pulisya.

Si Cascolan ay itinalaga ni Pangulong Ferdinand Marcos Jr., bilang isa sa Undersecretary ng Kagawaran ng Kalusugan sa kabila ng mga batikos sa kaniyang appointment.

Iginiit ng ilang grupo na isang insulto sa hanay ng mga medical professional ang pagkakatalaga kay Cascolan.

Pero nilinaw ng Pangulo na hindi kailangan maging doktor ang itatalagang Undersecretary ng DOH, bagkus sapat na ang pagkakaroon ng background sa public administration dahil hindi naman kalusugan ang tututukan ng retiradong heneral.

Lumobo pa sa mahigit P7.6-B ang halaga pinsala ng Bagyong Paeng sa agrikultura at imprastraktura.

Ayon sa National Disaster Risk Reduction and Management Council, pinaka-malaki o P4.5-B ang natamong pinsala sa imprastraktura, na kinabibilangan ng mga kalsada at tulay.

CALABARZON ang pinaka-matinding hinagupit ng bagyo magtamo ng P1.2-B na halaga ng pinsala sa imprastraktura na sinundan ng MIMAROPA, P997-M at Bicol region, P797-M.

Tinaya naman sa P3.1-B ang agricultural damages, kabilang ang mahigit 92,000 hectares ng pananim na winasak ng bagyo.

Pinaka-matinding naapektuhan ang sektor ng agrikultura sa Region 5 o Bicol na umabot sa P924-M ang halaga ng pinsala; CALABARZON, P726-M at Central Luzon, P430-M.

Batay sa datos ng Department of Agriculture, halos 82,000 magsasaka at mangingisda ang apektado ng kalamidad.

Nasa 16,000 pang pamilya o halos 67,000 indibidwal na apektado ng Bagyong Paeng ang nananatili sa 246 na evacuation centers sa bansa.

Batay ito sa datos ng Disaster Response Operations Monitoring and Information Center ng DSWD hanggang kahapon.

Karamihan sa mga nasa evacuation center ay mga nasiraan ng bahay.

Aabot na sa 47,300 kabahayan ang napinsala kabilang ang nasa 4,200 lubhang nagtamo ng sira.

Umabot na rin sa P236-M na halaga ng food at non-food items ang ipinamahagi ng DSWD at Local Government Units sa mga biktima ng kalamidad simula noong isang linggo.

Hinimok ng Department of Education ang publiko na iwasang magpakalat ng mga hindi beripikadong balita o mensahe sa social media.

Ito’y matapos ang bomb threat na bumulabog sa klase sa Signal Village Elementary at National Highschool sa Taguig City, kahapon.

Ayon sa DepEd-National Capital Region Division of Taguig City and Pateros, nagdulot ng panic at takot sa publiko ang kumalat sa Facebook na bantang pambobomba.

Dahil dito, sinuspinde ang klase sa mga nasabing paaralan.

Gayunman, batay sa imbestigasyon ng PNP-Explosive Ordnance Disposal Team at Taguig City Public Order and Safety Office, wala namang nakitang pampasabog sa mga gusali ng eskwelahan.

Napag-alaman ding “dummy account” lamang ang ginamit ng nasa likod ng pagpapakalat ng bomb threat.

Samantala, balik-klase na ang mga mag-aaral ng Signal Village Elementary at Highschool ngayong araw habang hinigpitan na ang seguridad sa paligid ng paaralan.

Hinimok nina Secretaries Benhur Abalos ng DILG at Jesus Crispin Remulla ng DOJ ang mga itinuturong mastermind sa pagpatay sa brodkaster na si Percy Lapid, na sumuko na sa mga otoridad.

Ito’y makaraang maghain kahapon ng Two Counts of Murder sa mga nasa likod nang pagpatay kina Mabasa at sa umano’y ‘middleman’ na si Jun Villamor.

Kabilang sa mga tinukoy na utak sa krimen sina suspended Bureau of Corrections director-general Gerardo Bantag at BuCor deputy security officer Ricardo Zulueta.

Ayon kay Abalos, dapat pamarisan nina Bantag at Zulueta ang gunman na si Joel Escorial na sumuko dahil sa takot sa kanyang buhay na maaaring mangyari rin sa dalawang BuCor official.

Para naman anya sa mga nakaka-alam kung nasaan sina Bantag at Zulueta ay ipagbigay-alam ang kinaroroonan ng dalawa kung mayroon man silang impormasyon.

Una nang iginiit ng suspendidong hepe ng kawanihan ng mga bilangguan na mas nanaisin pa niyang mamatay kaysa makulong.

Paunti-unti nang dumarating ang relief supplies sa Lalawigan ng Antique matapos ma-isolate dahil sa pagkasira ng ilang tulay dulot ng Bagyong Paeng.

Ayon kay Antique Provincial Risk Reduction and Management office chief Broderick “Boyet” Train, paspasan na ang pagkukumpuni ng DPWH sa mga nasirang tulay upang makatawid ang mga tao at mga sasakyan.

Natugunan na rin anya kahit paano ang kanilang problema sa supply ng krudo.

Gayunman, aminado si Train na labis ding kailangan ng kanilang mga kababayang magsasaka ang tulong mula sa Department of Agriculture.