Drew Nacino

Nilinaw ng Southern Police District (SPD) na hindi kabilang si dating Pangulong Rodrigo Duterte sa 160 Persons of Interest (POI) sa pagpatay sa brodkaster na si Percival Mabasa o Percy Lapid.

Sa kabila ito ng pagtataka ng kapatid ni ka Percy na si Roy Mabasa, kung nasilip ng PNP ang paglitaw ng pangalan ni Duterte sa mga pinuna o tinalakay ng kanyang kuya sa dami ng episode ng programa nito.

Ayon kay SPD Director, Brig. Gen. John Kirby Kraft, batay sa imbestigasyon wala ang pangalan ni dating Pangulong Duterte sa mga nabanggit o binanatan ni Lapid.

Kinatigan naman ito ni Justice secretary Jesus Crispin Remulla at binigyang-diin na imposible at maituturing na political issue kung mapabilang ang dating Pangulo sa mga POI.

Nito lamang Lunes ay naghain ng kasong Murder ang PNP at NBI  laban kina suspended Bureau of Corrections director general Gerald Bantag at iba pa umano nitong kasabwat sa pagpatay umano kay Lapid.

Ini-sponsoran na sa Plenaryo ng Senado ang Committee report kaungay sa P5.268-T 2023 proposed National Budget na nakapaloob sa General Appropriations Bill (GAB).

Si Senate Committee on Finance Chairman Senator Sonny Angara ang nag-sponsor sa Committee report kung saan apat anyang P o 4Ps ang humuhulma sa budget ng bansa sa susunod na taon, ang Populasyon, Presyo, Projects at Payroll.

Tatlong P’s naman ang tinitingnan ni Angara na maaaring makapagpabago sa takbo ng ekonomiya sa susunod na taon, ang Pandemya, Putin at Paeng.

Ayon kay Angara, P1.597-T ay Automatic Appropriations habang ang P4.259-T ay binubuo ng P3.671-T na bagong Programmed Appropriations at P588-B Unprogrammed Appropriations.

Bagaman ito ang unang budget ng bagong administrasyon, popondohan pa rin ng 2023 GAB ang malalaking programa at proyekto ng nakaraang gobyerno.

Kabilang na rito ang Pantawid Pamilyang Pilipino Program; Universal Access to Quality Tertiary Education at Tulong Trabaho Fund; Build, Build, Build Infrastructure Program, na tatawaging “Build Better More.”

Ang Senate Finance Committee Report sa 2023 GAB ay alinsunod sa 8-point Socioeconomic Agenda na nakasaad sa medium term fiscal framework ng administrasyon.

Prayoridad ng Marcos Administration ang food security, partikular ang Department of Agriculture at attached agencies nito.   —ulat mula kay Cely Ortega Bueno (Patrol 19)

“Face the music!”

Ito ang hamon ni Senator Ronald “Bato” Dela Rosa kay suspended Bureau of Corrections director gerald Bantag matapos sampahan ng Murder Case kaugnay sa pagpaslang sa brodkaster na si Percy Lapid.

Ayon kay dela Rosa, makabubuting harapin ni Bantag ang kasong inihain ng NBI at PNP lalo’t kung sa paniniwala ng suspendidong BuCor chief ay wala siyang kinalaman sa krimen.

Kung talaga anyang inosente si Bantag ay tiyak naman mapapawalang-bisa ang kaso nito.

Una nang inihayag ni Bantag na mas pipiliin niyang mamatay kaysa makulong sa New Bilibid Prison dahil alam niya ang mangyayari sa kanya sa “oblo.”

Iginiit naman ng Senador na mahirap hamunin ang estado kaya dapat na panindigan ni Bantag ang kanyang salita at magpaka-lalaki sa sinabi na lalaban siya hanggang sa kamatayan. —ulat mula kay Cely Ortega Bueno (Patrol 19)

Itinurn-over na sa Philippine Air Force ang kauna-unahan nitong Ground-Based Air Defense System (GBADS) at bagong C-295 Medium-Lift Aircraft.

Personal itong sinaksihan ni Pangulong Ferdinand “Bongbong” Marcos Jr., sa Basa Air Base sa Floridablanca, Pampanga, kahapon.

Ayon kay PAF Spokesperson, Col. Ma. Consuelo Castillo, ang GBADS, na binili mula Israel ay bahagi ng Horizon 2 ng AFP Modernization Program na makadaragdag sa Integrated Air Defense System na isa sa pangunahing sistema ng Air Force.

Binubuo ito ng Spyder Air Defense System na armado ng mga short at medium range missiles bilang proteksyon laban sa aerial threats tulad ng combat aircraft, attack helicopter, unmanned air vehicles, incoming missiles, guided munition at rockets.

Maaari din itong gamitin upang i-neutralize ang Aerial Surveillance Threats at matitiyak na maipagtatanggol ang teritoryo partikular ang mahahalagang ground assets laban sa mga kalaban.

Makatutulong naman ang C-295 Medium Lift Aircraft, na binili mula Spain, upang mapalakas ang kakayahan ng Airforce na protektahan ang mga teritoryo ng bansa.

Pinasalamatan naman ni Pangulong Marcos ang Israel at Spain sa pagtulong sa kanyang administrasyon na palakasin ang defense capabilities upang protektahan ang soberanya ng Pilipinas.

Mina-madali na ng Department of Health ang pagbabakuna sa mahigit 100K sanggol na hindi pa nakatatanggap ng bakuna laban sa mga sakit, tulad ng Polio at Tigdas.

Kaugnay nito, inilunsad kahapon ng DOH-Metro Manila Center for Health Development ang Vax-Baby-Vax Routine Catch-up Immunization Campaign sa Lakeshore Hall, sa Taguig City.

Layunin nitong makahabol sa pagbabakuna sa mga sanggol makaraang matengga ang immunization bunsod ng iba’t ibang dahilan, gaya ng kakulangan sa suplay ng bakuna at mga restriksyon dulot ng COVID-19.

Sa datos ng DOH, nasa 137K sanggol na edad hanggang 23 buwang gulang ang hindi pa nababakunahan laban sa mga tinatawag na vaccine-preventable diseases, tulad ng polio, tigdas, beke, rubella, diphtheria at Hepatitis B.

Itinalaga rin bilang Ambassador naman ng Austria si dating presidential daughter Luli Arroyo-Bernas, unica iha ni dating Pangulo at ngayo’y pampanga 2^nd District Rep. Gloria macapagal-arroyo.

Bukod sa Austria, magsisilbi ring embahador si Arroyo-Bernas sa Slovakia, Croatia at Slovenia.

Oktubre a – 19 nang ilabas ang appoitnment papers ng dating presidential daughter.

Ang nakababatang Arroyo ay nagsilbing Chairperson ng National Museum Board of Trustees.

Nakikipag-ugnayan na ang Bureau of Customs  sa Department of Migrant Workers upang papanagutin ang  consolidators o freight forwarding entities na nag-abandona sa libu-libong balikbayan boxes mula Middle East.

Ito’y makaraang dagsain ng sandamakmak na tao ang isang bodega sa Balagtas, Bulacan, sa pag-aakalang matatanggap na nila ang mga natenggang package na ipinadala ng kanilang mga kaanak.

Gayunman, nilinaw ng isang Representative ng warehouse hindi pa i-re-release ang mga bagahe dahil ipadadala ito mismo sa address ng recipient kaya’t nagkagulo ang mga naghintay sa bodega.

Ayon kay BOC spokesman Arnaldo Dela Torre Jr., iniimbestigahan at tinutukoy na nila ang mga nagpabayang kumpanya upang masampahan ng kaukulang kaso laban.

Magpapatupad din anya sila ng mas mahigpit na mga polisiya upang maiwasang maulit ang insidente.

Ipinaliwanag ni Dela Torre na planong lumikha ng Aduwana ng inventory ng balikbayan boxes bago ang delivery at dapat ding abisuhan ng ahensya ang mga recipients ng packages.

Plano ng gobyerno na mag-angkat ng mas murang fertilizers mula China upang ipamahagi nang libre sa mga magsasakang Filipino.

Ito ang ibinunyag ng Malacañang matapos pulungin ni Pangulong Bongbong Marcos ang mga opisyal ng Departments of Agriculture na kanyang pinamumunuan bilang kalihim, Trade and Industry at Philippine Trade and Investment Center (PTIC).

Tinalakay sa nasabing pulong ang mga hakbang upang matulungan ang mga magsasaka at mapababa ang presyo ng mga pagkain.

Ayon kay PTIC president at chief executive officer Emmie Liza Perez-Chiong, nasa 150,000 metric tons ng fertilizer ang planong bilhin mula China ngayong taon.

Nagkakahalaga ito ng mahigit P4-B o $70-M na katumbas ng $470 kada metriko tonelada.

Aangkatin anya ang mga pataba sa pamamagitan ng Government-to-Government Agreement na mas mura kumpara sa kasalukuyang $650 per metric tons.

Inihayag naman ng Office of the Press Secretary na isang Memorandum of Agreement sa pagitan ng DA at PTIC ang binabalangkas na magiging batayan para sa planong importasyon.

Nagtatago na ang Deputy Security Officer ng Bureau of Corrections (BuCor) na si Ricardo Zulueta, isa sa itinuturong sangkot sa pagpatay sa brodkaster na si Percival Mabasa o Percy Lapid.

Ito ang ibinunyag ni Justice secretary Boying Remulla matapos maghain ng kasong murder laban kina Zulueta, suspended BuCor director-general Gerald Bantag at iba pang Persons Deprived of Liberty kaugnay sa pagpatay kay Lapid at umano’y ‘middleman’ na si Cristito Palana.

Ayon kay Remulla, si Zulueta umano ang nagpaabot ng abiso na patayin na si Lapid.

Mag-i-issue anya ng Subpoena kina Bantag at Zulueta habang maglalabas na ng lookout order sa lahat ng sangkot na indibidwal.

Inihayag din ng Kalihim na tinutunton pa nila si Zulueta maging si Bantag na ang pinaka-huling address ay nasa Caloocan City.

Nilinaw naman ni PNP chief, Gen. Rodolfo Azurin Jr., na malaya pang makagala si Bantag dahil wala pang inilalabas na arrest warrant laban dito.

Itinalaga ni Pangulong Ferdinand Marcos Jr. si dating CNN Beijing Bureau chief Jaime Florcruz bilang bagong Philippine Ambassador to China.

Si Florcruz ay kabilang sa listahan ng mga nominado na kamakailan lamang ay inilathala ng Commission on Appointments.

Nakasaad sa dokumento na itinalaga ang dating mamamahayag noong Oktubre a – 19.

Gayunman, wala pang isinasapublikong appointment papers ang Malacañang hinggil sa pagkakatalaga kay Florcruz.

Bukod sa China, si Florcruz ay magkakaroon ng “concurrent jurisdiction” sa North Korea at Mongolia.

Sa edad na 71, si Florcruz ay nagsilbi bilang Beijing Bureau chief ng time magazine at correspondent ng Newsweek sa China.

Nito lamang Abril nang mabakante ang posisyon bilang Philippine Ambassador to China matapos pumanaw si Ambassador Jose Santiago “Chito” Sta. Romana sa edad na 74.