Drew Nacino

Muling ilalarga ng Commission on Elections ang voter’s registration sa limang piling malls sa Metro Manila simula sa Disyembre.

Ito’y matapos aprubahan ng Comelec en Banc noong Oktubre a – 26 ang operational plan ng ‘register anywhere project’ o RAP.

Ayon sa poll body, isasagawa ang “pilot test” ng nasabing proyekto tuwing Sabado at Linggo simula Disyembre a – disi syete hanggang Enero a – bente nwebe ng susunod na taon.

Nilinaw naman ni Comelec Spokesman Atty. Rex Laudiangco na walang registration sa December 24, 25, 31, 2022 at January 1, 2023 habang tutukuyin pa sa mga susunod na araw ang mga mall na pagdarausan nito.

Sa “pilot period” ng programa, lahat ng kuwalipikadong residente ay maaaring magtungo sa napiling mall upang magsumite ng application form, requirements at magpa-biometrics para makapagparehistro bilang botante.

Nobyembre a – 4 nang unang magsagawa ng demonstration ng rap ang poll body sa Maynila sa pangunguna ni Chairman George Erwin Garcia at Commissioner Rey Bulay.

Inirekomenda ng Bureau of Customs (BOC) na magkaroon ng ‘joint filing’ kasama ang Department of Agriculture laban sa mga kontrabando o misdeclared goods na nahaharang ng ahensya.

Ayon kay BOC Spokesman at Chief Customs Operation Person Arnold De La Torre, Jr., kasama na nilang nagmomonitor ang DA dahil ang aduwana lamang ang pinapayagang maghain ng kaso sa Department of Justice.

Sa sandaling isampa na anya ang kaso sa DOJ, ang Customs lang ang tumututok upang umusad ang kaso at magkaroon ng mataas na conviction rate.

Gayunman, ipinunto ni Dela Torre na kung ipatutupad at aamyendahan ang batas na may kaugnayan sa agricultural smuggling, dapat makasama ang DA sa pagtutok sa kaso upang mapalakas ito.

Naglunsad na ang National Irrigation Authority – Upper Pampanga River Integrated Irrigation Systems o NIA-UPRIIS operations personnel ng joint meeting orientation para sa planong cloud seeding operation sa Pantabangan dam sa Nueva Ecija.

Ito’y upang itaas ang kasalukuyang antas ng tubig ng dam bilang paghahanda sa panahon ng pagtatanim sa susunod na taon.

Kabilang sa mga nakipagpulong sina Department Manager engineer Rosalinda Bote, Philippine Air Force – 900th Air Force Weather Group Commander, Lt. Col. paul Michael Espera at Bureau of Soil and Water Management Team Head Corazon Ditarro.

Inihayag ni Bote na pandagdag lang sa lebel ng tubig ang isasagawang cloud seeding dahil positibo rin naman silang uulan hanggang buwan ng Enero.

Nasa 201 meters ang kasalukuyang lebel ng tubig sa nasabing water reservoir kumpara sa normal level nitong 221 meters.

Posibleng magtaas ang pamasahe sa MRT-3 ilang taon mula ngayon kung isasa-pribado ang operasyon nito.

Ayon sa Department of Transportation, layunin ng planong privatization ng operations at maintenance na  isaayos ang serbisyo ng MRT-3.

Inihayag ni DOTr Undersecretary Cesar Chavez na kabilang ito sa tinitingnan nilang opsyon bunsod nang napipintong pagtatapos ng build-lease-transfer contract ng MRT-3 sa taong 2025.

Gayunman, gobyerno pa rin naman anya ang magmamay-ari ng nasabing rail transit system at daraan pa sa konsultasyon bago maisakatuparan ang planong privatization.

Batay sa datos ng dotr, mas malaki ang ginagastos ng gobyerno kaysa kinikita nito sa pagpapatakbo ng MRT-3.

Aabot sa P9-B ang operational at maintenance costs kada taon ng MRT-3 sa nakalipas na 22 taon o simula pa noong taong 2000.

Pero nasa P1.7-B lamang ang annual revenue mula sa fare collection o 19% lamang ng annual expenses kaya’t lumalabas na nalulugi ang pamahalaan sa pag-o-operate ng MRT-3.

Halos 2,000 mga naka-tengga at abandonadong balikbayan boxes na ang naipamahagi na ng Bureau of Customs sa mga recipient nito.

Kinumpirma ni BOC spokesman at Customs Operations chief Arnaldo Dela Torre na simula pa noong Hulyo ay idineliver at kinuha ng mga recipient ang kanilang mga package mula sa mga warehouse.

Ilan sa mga balikbayan box ay naka-consign sa CMG International Movers and Cargo Services habang may iba pang naiwan dahil sa kakulangan ng impormasyon.

Naideliver ang mga bagahe sa tulong ng door-to-door Consolidators Association of the Philippines.

Maaari nang makabiyahe muli nang walang pangamba na huhulihin ng Land Transportation Office ang mga driver ng mga lumang Public Utility Jeep sa Bacolod City matapos magtigil-operasyon, kamakailan.

Tiniyak ito ni Vice Mayor El Cid Familiaran matapos tugunan ng LTO-Western Visayas ang hiling ni Bacolod Mayor Alfred Benitez na payagang pumasada sa loob ng 15 araw ang mga jeep kahit walang prangkisa o walang kumpletong mga dokumento.

Ayon kay Familiaran, papayagang makabiyahe muli ang mga jeepney driver basta’t magpapa-miyembro sila sa mga transport cooperative alinsunod sa National Program o PUJ Modernization.

Pinangunahan ng bise Alkalde ang dayalogo sa PUJ driver kasama sina City Administrator, Atty. Pacifico Maghari III; Secretary to the Mayor, Atty. Joseph Karol Chui at LTO-Bacolod head Renato Novero.

Nito lamang Lunes nang magpasya ang mga tsuper na magtigil-pasada dahil sa inilargang operasyon ng LTO at Land Transportation and Franchising Regulatory Board laban sa mga luma at kakarag-karag na jeep.

Naglaan na ang Pag-Ibig fund ng P5-B Calamity Loan Fund bilang tulong sa mga miyembrong naapektuhan ng bagyong Paeng.

Ito ang inanunsyo ni Secretary Jose Rizalino Acuzar ng Department of Human Settlements and Urban Development at chairman ng Pag-ibig Fund Board of Trustees.

Ayon kay Acuzar, 344,000 miyembro ang apektado sa Regions 4-A, 5, 6, Bangsamoro Autonomous Region in Muslim Mindanao at iba pang lugar na nasa ilalim ng State of Calamity.

Eligible anya ang mga ito na humiram ng pera sa ilalim ng nasabing programa.

Sa ilalim ng Pag-Ibig Calamity Loan, maaaring umutang ang miyembro ng hanggang 80% ng kanilang total Pag-Ibig savings, na binubuo ng kanilang monthly contributions.

Bilang konsiderasyon sa sitwasyon ng mga apektadong miyembro, 5.95% per annum lamang ang interes na pinaka-mababang rate ang ipapataw.

Maaari namang bayaran ang Calamity Loan sa loob ng tatlong taon.

Sinupalpal ni Senator Ronald “Bato” dela Rosa ang anumang tangkang pagdawit kay dating Pangulong Rodrigo Duterte sa pagpatay sa hard-hitting broadcaster na si Percy Lapid.

Iginiit ni dela Rosa na maaari namang magbigay ng ispekulasyon ang kahit sino pero tanging kay suspended Bureau of Corrections director general Gerald Bantag ang bagsak ng imbestigasyon.

Kung kasama anya ang dating Pangulo sa mga Persons of Interest ay kataka-takang ngayon lamang nito isinagawa ang krimen gayong kayang-kaya naman nitong ipag-utos ang pagpatay noong siya pa ang nasa kapangyarihan.

Binigyang-diin ng Senador na wala namang motibo si  dating Pangulong Digong at retirado na ito sa pulitika.

Umapela naman ang mambabatas sa publiko na igalang ang imbestigasyon ng Philippine National Police at National Bureau of Investigation at iwasang magbitaw ng akusasyon lalo kung walang matibay na ebidensya. —ulat mula kay Cely Ortega Bueno (Patrol 19)

Hindi dapat pansinin ng mga Filipino sa social media ang mga clickbait link, lalo ang mga nagtatanong na “Ikaw ba ‘tong nasa video?’ upang maiwasan ang mabiktima ng Phishing Scheme.

Ito ang babala ng Philippine National Police sa mga Pinoy netizen sa gitna nang nagkalat na clickbait, gaya sa Facebook at TikTok.

Ayon kay PNP Spokesperson, Col. Jean Fajardo, hindi na dapat i-click ang mga account na nagpapadala ng mga spam message lalo kung hindi naman kilala ng mga user.

Idi-na-divert anya ng link ang user sa ibang page o account, na maaaring kumuha ng access sa personal accounts ng isang netizen, kabilang ang kanilang virtual cash wallets.

Samantala, inaalam na ng PNP Anti-Cybercrime Group kung sino o anong grupo ang nasa likod ng pagpapakalat ng nasabing scam.

Dapat nang paigtingin ang Anti-Smuggling Operations matapos ang pagsadsad ng mill gate price ng asukal sa halos P1,000 kada 50 kilo sa nakalipas na tatlong linggo.

Ito ang panawagan nina Aurelio “Bodie” Valderrama, Pangulo ng Confederation of Sugar Producers Associations; Enrique Rojas, Pangulo ng National Federation of Sugarcane Planters at Danilo Abelita, Pangulo ng Panay Federation of Sugarcane Farmers.

Nakababahala anila ang paglagpak ng mill gate price ng asukal para sa mga producer na patuloy na nahihirapan sa lumalaking production cost.

Kabilang sa kanilang itinurong dahilan ang posibleng paglaganap ng Sugar Smuggling na sinabayan pa ng paglobo ng imbentaryo ng asukal bunsod ng imports at nagpapatuloy na milling operations.

Hinimok din nila ang stakeholders na solusyonan ang bumabagsak na produksyon bunsod ng masamang panahon at nagmamahal na production costs sa pamamagitan ng suporta ng gobyerno, gaya ng pamamahagi ng fertilizer at fuel subsidies.

Sa ngayon ay nasa P2,800 hanggang P2,900 ang kada kaban ng asukal kumpara sa P3,600 hanggang P3,800 pesos noong mga nakalipas na buwan.