Drew Nacino

Ilalabas na ng Department of Justice ang pangalan ng bangkay ng mga preso mula New Bilibid Prison na nakatambak sa Eastern Funeral Homes sa Alabang, Muntinlupa City.

Ayon kay Justice Secretary Jesus Crispin Remulla, aabisuhan nila ang pamilya ng mga namatay pero kapag hindi makontak o hindi tumugon ay ipalilibing o ipapacremate na nila ang mga bangkay.

Sampu anya sa mga hindi pa nakukuhang bangkay ang inilibing na habang isandaan animnapu’t anim ay inilipat sa University of the Philippines – College of Medicine.

Bukas naman ay bibisitahin ng forensic pathologist na si Dr. Raquel Fortun ang punerarya.

Idinagdag ni Remulla na may arrangements ang DOJ sa U.P College of Medicine para sa pagdetermina sa mga bangkay na kailangan ng ilibing o i-cremate at kailangang isailalim sa autopsy.

Ang Eastern Funeral Homes ang natatanging punerarya na accredited ng Bureau of Corrections sa Muntinlupa City mula pa noong 2021 kung saan naipon ng tatlong buwan ang labi ng mga preso mula bilibid. — Mula sa ulat ni Cely Ortega-Bueno

Uutang ang pamahalaan ng P1.6 trillion upang mabuo ang panukalang P5.268 trillion national budget sa susunod na taon.

Ito ang inihayag ni Senate Committee On Finance Chairman Sonny Angara matapos tanungin Ni Senate Minority Leader Koko Pimentel kung paano popondohan ang panukalang budget para sa taong 2023.

Ayon kay Angara, ang P3.6 trillion na bahagi ng proposed national budget ay manggagaling sa mga buwis at kita ng pamahalaan.

Sa naturang halaga, ang P2.67 trillion ay inaasahang makokolekta ng Bureau of Internal Revenue, P765 billion naman ay inaasahang malilikom ng Bureau of Customs at 168.2 billion mula sa non-tax revenues.

gayunman, kinuwestyon ni Pimentel kung bakit mahigit 1.6 trillion ang uutangin ng gobyerno.

Tugon ni Angara, dinagdagan ang utang upang magkaroon ng buffer sa budget o standby funds at ang utang ay hindi lang para sa gastusin ng pamahalaan kundi para pambayad na rin sa principal at interest na pagkakautang ng bansa. — Mula sa ulat ni Cely Ortega-Bueno (Patrol 19)

Inalmahan ng grupo ng mga commuter ang planong pagsasapribado ng operation at maintenance ng MRT-3 kapalit ng mas maganda umanong serbisyo.

Ayon sa the passenger forum (TPF), bagaman aminado ang gobyerno na nalulugi ito sa MRT-3, dapat isapubliko rin ng Department of Transportation ang iba pang kinakaharap na problema ng railway system.

Inihayag ni Primo Morillo, convenor ng TPF, marami nang naranasan ang mga Filipino sa privatization na kalauna’y hindi pumapabor sa interes ng publiko, partikular ng mga pangkaraniwang mamamayan.

Iginiit ni Morillo na kung palugi na ang MRT-3 ay sinong pribadong kumpanya ang mangangahas na mag-o-operate at mag-maintain nito gayong ang layunin ng private sector ay kumita.

Dahil dito, asahan na anyang tataas pa ang pasahe na tila hindi na-aangkop sa gitna nang kinakaharap na economic crisis dulot ng covid-19 pandemic, inflation at giyera sa pagitan ng Russia at Ukraine.

Sa datos ng DOTr, aabot sa P9 billion ang operational at maintenance costs kada taon ng MRT-3 sa nakalipas na dalawang dekada.

Pero nasa P1.8 billion lamang ang taunang kinikita mula sa fare collection o 19% lamang ng annual expenses kaya’t lumalabas na nalulugi ang pamahalaan sa pag-o-operate ng MRT-3.

Namumuro pa rin ang dagdag-pasahe sa MRT-3 kahit hindi isapribado ang operation at maintenance nito.

Ito ang nilinaw ng Department of Transportation matapos magpahayag ng pagkabahala ang publiko sa planong privatization upang mas mapabuti umano ang serbisyo ng naturang rail transit system.

Ayon kay DOTr Undersecretary Cesar Chavez, may privatization o wala ay posible ang pangambang fare hike dahil sa patuloy na pagtaas ng presyo ng spare parts at kuryente.

Hindi lamang anya kailangan bagkus hindi rin maiiwasan sa ngayon ang dagdag-pasahe at ang tanong na lang ay kung magkano ang itataas nito.

Ang planong pagsasapribado ay isa sa mga ikunukunsidera ng pamahalaan dahil sa napipintong pagtatapos ng build-lease-transfer contract ng Metro Rail Transit Corporation sa taong 2025.

Ipinaliwanag din ni Chavez na ang naturang issue ay daraan pa sa konsultasyon ng DOTr at National Economic and Development Authority bago isakatuparan.

Hinimok naman ni Justice Secretary Boying Remulla si suspended Bureau of Corrections Director Gerald Bantag na maghain na ng kontra-salaysay kung hindi pa ito nakalalabas ng bansa.

Ito ang tugon ni Remulla sa tanong kung nasa Pilipinas pa rin si Bantag, isa sa mga itinuturong mastermind sa pagpatay sa broadcaster na si Percy Lapid.

Ayon sa kalihim, hindi basta maaaring umalis ng bansa, lalo ang isang government official kapag walang travel authority maliban na lamang kung gagamit ng karaniwang passport.

Dapat din anyang iwasan ni Bantag ang pagbibigay ng sagot sa pamamagitan ng media bilang paggalang sa proseso ng batas.

Iginiit ni Remulla na dapat “magpaka-lalaki si Bantag at harapin ang mga ibinabatong alegasyon at iwasan ang maraming drama.

Nitong lamang Lunes ay naghain na ng murder complaints ang NBI at PNP laban kina Bantag, BuCor Deputy Security Officer Ricardo Zulueta at iba pa sa pagpatay kay Lapid at sa itinuturong middleman na si Jun Villamor na binawian ng buhay sa loob mismo ng New Bilibid Prison.

Hinikayat ni Roy Mabasa, kapatid ng pinatay na broadcaster na si Percy Lapid, si suspended Bureau of Corrections Director Gerald Bantag, na sagutin ang mga alegasyon laban sa kanya at magbigay ng mas marami pang impormasyon sa kaso.

Si Bantag ang isa sa mga sinampahan ng kasong murder makaraang ituro bilang isa sa mga mastermind umano sa pagpatay kay Lapid o Percival Mabasa.

Ayon kay Roy, hindi naman siya tutol na isailalim si Bantag sa witness protection program kung magbibigay ito ng mas marami pang pangalan na sangkot sa pagpatay sa kanyang kuya.

Ang kanila anyang layunin ay makapagbigay ng buong hustisya para sa kanyang utol at para maisakatuparan ay maaaring mapasailalim sa w.p.p. si Bantag basta’t pasok ito sa mga kwalipikasyon.

Gayunman, nilinaw ni Justice Secretary Boying Remulla na hindi kwalipikado ang suspendidong BuCor chief dahil isa itong law enforcer at kabilang sa itinurong utak sa krimen

Nagpapatuloy ang pagbuhos ng mga nakikiramay sa mga naulila ni Janice Pontillas, ang gurong nasawi sa pagkahulog ng sinasakyang bus sa Orani, Bataan.

Kabilang sa mga dumalaw sa burol ni Pontillas sa violago Homes Payatas si Quezon City 2nd District Rep. Ralph Tulfo, Quezon City habang kahapon dumating din si Councilor Candy Medina.

Ayon sa mga opisyal ng barangay Payatas, plano ng pamliyang ilibing ang biktima sa Lunes, Nobyembre 14, isang araw matapos umano ang anibersaryo nilang mag-asawa.

Samantala, nilinaw ng Orani Municipal Police na nakasalalay pa rin sa pamilya ni Teacher Janice ang pasya kung kakasuhan o hindi ang driver ng naaksidenteng bus.

Pina-iimbestigahan ni Senador Robin Padilla ang pagkamatay ng nasa dalawampung miyembro ng tribong Teduray dahil sa pagguho ng lupa dulot ng bagyong paeng sa Maguindanao.

Sa gitna ito ng report na mula sa baybayin ng datu odin sinsuat ay puwersahang inilipat ang mga teduray sa paanan ng bundok minandar sa Maguindanao del Norte na bantad sa landslides.

Iginiit ni Padilla sa kanyang inihaing Senate Resolution 280, na dapat malaman ang katotohanan sa likod ng ulat na nasawi ang dalawampu’t apat at nasaktan ang higit tatlumpung miyembro ng tribo na puwersahang ni-relocate sa paanan ng mount minandar.

Dapat din anyang malaman kung bakit hindi naprotektahan ang mga Teduray sa karapatan nila sa kanilang ninunong lupain o ancestral domain.

Nais din malaman ng senador kung sino sa National Commission on Indigenous Peoples (NCIP) o Ministry of Indigenous People Affairs ng Bangsamoro Autonomous Region in Muslim Mindanao ang may kapabayaan sa pagtiyak sa karapatan ng mga katutubo na manatili sa kanilang lupain. — Sa ulat ni Cely Ortega-Bueno (Patrol 19)

Kinuwestyon ni Senador Francis Tolentino ang malaki pa ring share ng National Capital Region sa 2023 proposed national budget.

Sa budget deliberations, pinalilinaw ni Tolentino kung bakit laging ang NCR ang may pinakamalaking bahagi sa national budget sa gitna ng pagsisikap na paliitin ang gap sa pagitan ng mga rehiyon.

Batay anya sa regional allocation ng expenditure program para sa 2023, ang Metro Manila ang may pinakamataas na alokasyon na katumbas ng 18.8% o P989 billion ng P5.286 trillion budget.

Sa kabila nito, nilinaw ng senador na mahal niya ang National Capital Region dahil naging Regional Development Council Chairperson pa siya ng NCR.

Pero ipinaliwanag ni senate Finance Committee Chairman Sonny Angara na pangunahing dahilan ng malaking pondo sa NCR ang personnel services dahil karamihan sa central offices ng gobyerno ay nasa Metro Manila. –Mula sa ulat ni Cely Ortega-Bueno (Patrol 19)

Sumampa na sa mahigit P8.9 billion ang halaga ng pinsala ng bagyong Paeng sa sektor ng agrikultura at imprastraktura.

Ayon sa National Disaster Risk Reduction and Management Council, pinaka-malaki ang naitalang pinsala sa mga imprastraktura, gaya ng mga kalsada at tulay na halos P4.7 billion na.

Kabilang sa matinding naapektuhan ang mga imprastraktura sa Calabarzon, na lumobo na sa P1.2 billion ang halaga ng pinsala; MIMAROPA, P997 million; Bicol, P793 million at Cordillera P736 million.

Sumirit naman sa halos P4.3 billion ang damage sa mga pananim kung saan ang Cagayan Valley Region ang pinaka-napuruhan matapos magtala ng P1.2 billion na halaga ng pinsala; sinundan ito ng Bicol, P924 million; Calabarzon, P7326 million at Central Luzon, P430 million.

Dahil dito, aabot na sa 109,000 farmers at fisherfolks ang nasalanta ng kalamidad habang mahigit 121 hectares na ng agricultural land ang naapektuhan.