Drew Nacino

Handa na ang ilang malls sa Metro Manila sa pinahabang shopping hours, sa gitna nang inaasahan nilang revenge shopping, 40 araw bago mag-Pasko.

Inaasahan ng SM Supermalls ang pagbabalik ng kanilang benta kahit na hindi na kapansin-pansin ang dagsa ng mga mamimili.

Ayon kay SM Supermalls Vice President for Corporate Marketing Grace Magno, talagang mga namimili lang ang pumupunta ngayon sa mga mall at nabawasan ang mga pumapasok lamang para magpalamig o mamasyal.

Hiniling naman ng Robinsons Malls na habaan pa ang kanilang mall hours sa proposal na napagkasunduan ng mga establisimyento sa Metropolitan Manila Development Authority.

Ayon kay Robinsons Malls Operations Director Myron Yao, nais nilang palawigin hanggang alas-12 ng hatinggabi ang kanilang mall hours.

Samantala, inihayag ni Ayala Malls Central Operations Cluster Head Pivi Diaz na kahit niluwagan na ang Covid-19 restrictions madalang pa rin ang mga mall-goer na nagtatanggal ng face masks.

Simula ngayong araw, alas-11 na ng umaga hanggang alas 11 ng gabi ang operating hours ng mga mall upang mabawasan ang mabigat na daloy ng trapiko habang papalapit ang holiday season.

Pinag-iisipan na ni Pangulong Bongbong Marcos na alisin na ang value added tax o vat sa utilities.

Inatasan na ng pangulo si House Committee on Ways and Means Chairman Joey Salceda na pag-aralan ang mga panukalang batas na humihiling na tanggalin na ang vat, partikular sa kuryente.

Ito’y upang mabawasan ang pasanin ng mga mamamayan sa gitna nang walang tigil na pagsipa ng inflation.

Una nang inihayag ni Salceda na noon pang Oktubre siya inatasan ng pangulo na pag-aralang maigi ang mga inihaing panukalang batas.

Samantala, kokonsultahin anya ng kumite ang Department of Finance, lalo’t nagawa naman na ng Kongreso ang nasabing hakbang sa mga water concessionaire.

Pinalawig pa nang tatlumpung taon ang subsidized na singil sa kuryente sa mga customer na mababa ang konsumo o tinatawag na lifeline rates.

Ito’Y makaraang lagdaan ng Department of Energy at Social Welfare and Development ang implementing rules and regulations ng Republic Act 11552, na nag-amyenda sa R.A. 9136 o “Electric Power Industry Reform Act of 2001” na kilala bilang epira.

Kabilang sa mga makikinabang sa extended lifeline subsidy ang mga kwalipikadong marginalized electricity end-users, partikular ang mga benepisyaryo ng 4ps program o mga kumokonsumo ng hindi lalagpas ng 100 kilowatt per hour.

Pinangunahan naman ng Energy Regulatory Commission ang ceremonial signing sa tanggapan nito sa Pasig City habang pinapurihan din ni ERC Chairperson Monalisa Dimalanta ang inter-agency team na bumalangkas ng i.r.r.

Sa panig naman ng DSWD, tiniyak ni Undersecretary for Special Concerns Vilma Cabrera ang tulong para sa maayos na implementasyon ng rules and regulations at tukuyin ang mga kwalipikadong benepisyaryo.

Nakasaad sa Section 1 ng RA 11552, na nag-amyenda sa Section 73 ng epira na sinusugan ng RA 10150, ang 20-year period ay pinalawig ng limampung taon.

Nangangahulugan ito na patuloy na makikinabang ang marginalized electricity end-users sa subsidiya sa ilalim ng lifeline program.

Nagsisimula nang mag-operate at magsupply ng tubig ang bagong Dam system na itinayo ng Prime Infra sa lalawigan ng Rizal.

Nitong Oktubre a – 25 nang pasinayaan ang commercial operations ng Wawa Bulk Water Supply Project Phase 1.

Nagsu-supply na ang phase 1 ng 80 million liters per day ng raw water sa Manila Water Company at Metropolitan Waterworks and Sewerage System.

Itinayo ang dam ng wawajvco (j-v-ko), na joint venture ng Prime Infra at San Lorenzo Ruiz Builders and developers Group, bilang bahagi ng P26 billion wawa bulk water supply project, na isa sa infrastructure flagship project ng pamahalaan.

Tiniyak ni Prime Infra Chairman Enrique Razon sa gobyerno ang pangakong matapos sa tamang oras ang mahalagang water infrastructure na tutulong upang masiguro ang sapat na supply ng tubig sa customers ng Manila Water.

Sa katunayan anya ay natapos nila nang maaga ang phase 1 ng proyekto sa gitna ng covid-19 pandemic o bago ang target completion schedule.

Sa oras naman na matapos ang phase 2 sa taong 2025, inaasahang makapag-su-supply ang dam ng 518 million liters ng raw water per day, na kailangan ng nasa kalahating milyong kabahayan sa east zone concession area.

Mahigit 100 pamilya ang apektado ng demolisyon ng nasa animnapung kabahayan at iba pang istruktura sa Tundo, Maynila.

Sa kabila ito ng hiling ng Office of the City Legal Office ng Maynila na ipagpaliban ang pagpapagiba sa mga istrukturang nakatirik sa isang ektaryang lupang pagmamay-ari ng isang pribadong kumpanya.

Dakong alas otso ng umaga kahapon nang magsimulang mag-empake at bakantehin ng mga residente ng Juan Luna at Coral streets sa barangay 59, Zone 1 ang kanilang mga bahay matapos matanggap ang court order kasabay ng basbas ng City Engineering Office na simulan agad ang demolisyon.

Ayon kay Engr. Ed Balayan, building inspector ng City Engineering Office, walang naipakitang temporary restraining order mula sa Supreme Court ang Tondo Central Neighborhood Association.

Ito’y kahit nakipagpulong ang asosasyon sa pamumuno ng kanilang pangulong si Ronaldo Bautista kina manila Vice Mayor Yul Servo at 1st Distrist Rep. Ernesto Dionisio hinggil sa pagpapaliban sa demolisyon matapos maghain ng petisyon sa SC si Jaime David, na isa ring residente at miyembro ng asosasyon.

Nilagdaan ni City Legal Officer Veronica Lladoc ang nasabing kasunduan kung saan dapat ipagpaliban ang demolsyon sa naturang lugar na pag-aari ng Meridian Cargo Forwarders dahil sa nakabinbing petition for review sa Korte Suprema.

Gayunman, walang nagawa ang mga residente kaya’t nakiusap na lamang sila na bigyan sila ng sapat na oras upang makapag-empake at mailipat ang kanilang mga gamit bago gibain ang kanilang bahay.

Samantala, sumaklolo naman ang DSWD at Housing and urban Development sa mga apektadong residente.

Bahagyang umakyat sa 16,526 ang aktibong kaso ng covid-19 kahapon kumpara sa 15,989 noong Miyerkules.

Ito’y makaraang makapagtala muli ng karagdagang 1,267 ang Department of Health, dahilan upang lumobo sa 4,14 0,000 ang total caseload.

Dalawampung porsyento ng pinaka-bagong kaso o 283 ay mula sa Metro Manila.

Samantala, pito ang nadagdag sa fatalities kaya’t sumampa sa 64,329 ang death toll habang umabot na sa 3,933,000 ang recoveries.

Tiniyak ng chairman ng House Committee on Ways and Means na pag-aaralan nitong maigi ang mga panukala ng makabayan bloc na layuning tanggalin ang value added tax sa ilang utilities sa kondisyon na itataas ang franchise taxes sa gitna ng patuloy na pagsipa ng inflation.

Ayon kay Albay 2nd District Rep. Joey Salceda, chairman ng naturang kumite, seryosong tututukan ang mga panukala basta’t hindi mababawasan ang koleksyon ng gobyerno dahil ang kinikita mula sa buwis ay gagamitin sa social programs.

Publiko anya ang nakikinabang sa pamamagitan ng edukasyon, kalusugan at imprastraktura, lalo sa kanayunan tuwing gumagastos ang gobyerno.

Ipinunto pa ng kongresista na maaaring gayahin ang sistema sa water concessionaires, kung saan tinanggal ang 12% vat sa consumer bill pero itinaas ang franchise taxes ng mga nasabing kumpanya kaya napigilan ang posibleng decrease bunsod ng vat exemption.

Siniguro naman ng mamababatas na hindi papasanin ng mga consumer ang franchise tax dahil ipinagbabawal ito alinsunod sa national internal revenue code.

Kabilang sa inihain ng Makabayan bloc ang House Bill 59954 na layuning alisin ang vat sa system loss charge component sa electric bills at House Bill 5995 na magtatanggal naman sa vat sa generation, transmission at distribution charge sa kuryente.

Dahil sa kawalan ng performance o walang magandang nagagawa, piso lang umano ang dapat ang ibigay na budget sa Optical Media Board (OMB) para sa taong 2023.

Ito ang inihayag ni Senator Jinggoy Estrada makaraang igiit na batay sa kanilang pagsasaliksik ay lumitaw na zero performance ang namumuno sa OMB na si Jeremy Marquez.

Ayon kay Estrada, sa nakalipas na isang taon ay walang koleksyon, walang naaaresto na mga violator ang OMB.

Ito, anya, ang dahilan kaya’t ipapanakula niya sa budget deliberation sa plenaryo sa susunod na linggo na bigyan ng pisong budget ang OMB.

Binigyang-diin ng mambabatas na bago naupo si Marquez bilang hepe ng OMB ay nakakolekta ang ahensya ng P560,000 noong 2018; P1.8 million noong 2019; P350,000 noong 2020 at P2.3 million noong 2021 sa administrative penalties. –Mula sa ulat ni Cely Ortega-Bueno (Patrol 19)

Tinutugis na ng mga otoridad ang dalawa pang kasabwat ng naarestong suspek sa pambobomba sa isang bus sa Tacurong City, Sultan Kudarat.

Ayon kay Soccsksargen Regional Police Director Brig. Gen. Jimili Macaraeg, hindi sila titigil hangga’t hindi nasasakote ang mga kasabwat ng suspek na si Esmael Daomilang.

Sa katunayan anya ay hinigpitan pa nila ang seguridad sa buong rehiyon at inatasan ang lahat ng police units na tiyakin ang seguridad ng publiko, bente kwatro oras.

Itinuro naman ni Col. Dennis Almorato, Commander ng civil-Military Battalion ng 6th infantry division ang teroristang grupong Dawlah Islamiyah na nasa likod ng pagpapasabog sa yellow bus line.

Nagkaroon anya ng premature explosion dahil sensitibo ang improvised explosive device na agad sumabog kahit hindi pa nakabababa ng bus ang suspek dahilan upang mapabilang ito sa mga nasugatan.

Ayon kay Raymundo, sumakay ng bus ang suspek sa bayan ng Buluan, Maguindanao Del Sur taliwas sa inisyal na imbestigasyon na sa Cotabato ito sumakay.

Nasa likurang bahagi naman ng sasakyan ang mga kasama ni Daomilang kung saan ang isa ay bumaba sa barangay San Pablo, Tacurong habang ang isa ay tumakas matapos ang pagsabog.

Patungo sanang Kidapawan City mula General Santos City ang bus nang sumabog ang i.e.d. sa Tacurong na ikinasawi naman ng isang pasahero at ikinasugat ng labing-isang iba pa kabilang ang suspek na naputulan ng paa.

Naaresto na ng pulisya ang isa sa mga suspek sa sa pambobomba sa isang bus sa Tacurong City, Sultan Kudarat na ikinasawi ng isang lalaki at ikinasugat ng labing-isang iba pang pasahero.

Kinilala ni Soccsksargen Regional Police Director Brig. Gen. Jimili Macaraeg ang suspek na si Esmael Daomilang, singkwenta’y singko anyos, residente ng bayan ng Buluan, Maguindanao Del Sur.

Batay anya sa mga nakalap na ebidensya at testimonya ay si Daomilang ang may dala ng itim na sling bag at backpack na pinaglagyan ng improvised explosive device.

Kabilang din ang suspek sa mga lubhang nasugatang pasahero ng yellow bus line na patungo sanang General Santos City mula Kidapawan City noong linggo.

Bantay-sarado na ng pulisya sa ospital ang suspek na napag-alamang naputulan ng paa matapos ang insidente.

Nitong Miyerkules ay sinampahan na si Daomilang ng kasong paglabag sa Anti-Terrorism Act of 2020.