Drew Nacino

Lima ang nasawi habang dalawa ang sugatan makaraang matupok ang isang residential area sa Navotas City, kahapon.

Kinilala ang mga nasawing sina Teresa Lopez, 40-taong gulang; Thirdy Lopez, dalawang taon; Darlene Baluyot, 19; Asuncion Tongco Gonzales, 50 at Diorella Gonzales, 18-taong gulang.

Sugatan naman sina Carlos Oledan, 51-taon at Josefina Sarate, 64 na taong gulang.

Ayon kay Bureau of Fire Protection-NCR District Fire Director, Senior Supt. Pedro Balatero Jr., mag-a-alas-4 ng hapon nang magsimula ang sunog sa bahay ng isang Leticia Tagle sa Monroy Street, Barangay Navotas West.

Dakong ala-6 ng gabi nang umabot sa Task Force Alpha ang sunog at kumalat sa mga katabing bahay sa Cadorniga Street.

Dakong alas 8:30 na ng gabi nang tuluyang maapula ang apoy.

Pansamantalang nasa Community Isolation Facility 4 sa Centennial Park ang mahigit 100 apektadong pamilya.

Inaalam na ang sanhi ng pagkalat ng apoy at halaga ng mga natupok o napinsalang mga ari-arian.

Balik-bansa na si Pangulong Bongbong Marcos matapos dumalo sa 40^th at 41^st Association of South East Asian Nation (ASEAN) Summits sa Phonm Penh, Cambodia.

Pasado alas-12 kaninang hatinggabi nang dumating si Pangulong Marcos sa Villamor Air Base, Pasay City kasama ang ilang delegado ng Pilipinas.

Sa kanyang Arrival Speech, ibinahagi ng Punong Ehekutibo ang naging matagumpay at “interesanteng” pagbisita niya sa mga nasabing pulong.

Nagbigay anya ang ASEAN Summit sa kanya at kanyang mga counterpart ng pagkakataon upang ihayag ang kanilang mga posisyon at issue, gaya ng food supply at sumisipang presyo ng krudo.

Inihirit ng ilang manggagawa ang kanilang pagnanais bumalik sa Work-From-Home o Hybrid Set-up upang makatipid sa harap ng nagtataasang presyo ng bilihin at serbisyo.

Kabilang sa nananawagan ang mga nasa Business Process Outsourcing (BPO) na idinadahilan ang lumalaki nilang gastos sa pasahe kada araw.

Aminado si BPO Industry Employees Network spokesperson Mylene Caballona na halos lahat ng kanilang kasamahan ay nagresign upang maghanap ng mga permanenteng Work-From-Home set-up.

Dapat anyang magkaroon ng dayalogo sa pagitan ng mga employer at employee sa issue ng hybrid set-up, lalo para sa mga hindi talaga kinakaya ang magastos na pagko-commute araw-araw.

Samantala, hinimok naman ni Labor secretary Benny Laguesma ang mga employer na gamitin ang batas sa Telecommuting, na isa rin sa solusyon upang mabawasan ang bumibigat muling daloy ng trapiko.

Dapat din anyang magkaroon ng malinaw na kasunduan sa pagitan ng mga employer at empleyado sa nasabing issue upang matiyak na magiging balanse ang interes ng mga negosyo at kapakanan ng mga manggagawa.

Umapela si Pangulong Bongbong Marcos na mas paigtingin ang pagtutulungan sa pagitan ng Association of Southeast Asian Nations (ASEAN) at U.S. upang maharap pa ang mga isyung may kinalaman sa Maritime Security at Transnational Crime.

Sa kanyang pagharap sa 10th ASEAN-US Summit sa Phnom Penh, Cambodia, iginiit ni Pangulong Marcos ang patuloy na pagtutulungan ng mga ASEAN Member para labanan ang iligal na pangingisda.

Nais ding pabantayan nang maigi ng Pangulo ang karagatan laban sa pagtatapon ng basura upang hindi na lumala pa ang polusyon sa dagat.

Pinuri naman ng Punong Ehekutibo ang adbokasiya at mga proyekto ng Amerika na sugpuin ang Transnational Crime, Terrorism at Human Trafficking.

Samantala, kanya ring hiniling ang pagpapatuloy ng Capacity-Building Programs para sa mga law enforcer sa pamamagitan ng International Law Enforcement Academy at Senior Officials’ Meeting On Transnational Crime.

Nangangailangan ang Israel at Saudi Arabia ng mahigit 1,800 Filipino Workers sa Hospitality at Healthcare Industries.

Ayon sa Department of Migrant Workers, kailangan ng Israel ng 1,200 filipino housekeepers para sa hotels at hostels na may starting monthly salary na 5,300 new israeli shekels o P88,000.00.

Kabilang sa qualifications ang pagkakaroon ng National Certificate (NC) 2 sa housekeeping, 25-anyos pataas at naka-iintindi at nakapagsasalita ng Ingles.

Mahigit 600 nurses naman ang kailangan sa Saudi Arabia na mayroong starting salary na 4,000 riyals o P62,500.00.

Ilan sa mga kwalipikasyon ang pagkakaroon ng Bachelor’s Degree in Nursing, lisensya mula sa Professional Regulation Commission at isang taong experience matapos ang board examination.

Tinalakay na ng mga Regional Director ng Department of Labor and Employment at Regional Tripartite Wages and Productivity Boards (RTWPB) ang hirit na panibagong dagdag-sahod ng mga manggagawa.

Kinumpirma ni Labor secretary Bienvenido Laguesma na kabilang sa ikinukunsidera ng RTWPB ang kapasidad ng mga negosyo na magbigay ng wage increase at consumer price index.

Bukod anya sa umento, maaari ring palawigin ng gobyerno ang subsidiya sa mga minimum wage earner matapos sumipa sa 7.7% ng inflation rate nitong Oktubre.

Tiniyak ni Laguesma na masusing pinag-aaralan ng wage boards ang umiiral na wage rates upang makasabay sa anumang “developments” sa sektor ng paggawa.

Aminado naman ang Kalihim na sinimulan na rin nilang buksan ang naturang issue sa private sector pero kanyang nilinaw na ang minimum wage adjustments ay maaari lamang ipatupad isang beses kada taon.

Hunyo nang ipatupad sa labing-apat na rehiyon, kabilang sa Metro Manila, ang dagdag-sahod ng mga manggagawa.

Ipa-sa-subpoena na ng mga Prosecutor ng Department of Justice si suspended Bureau of Corrections Director Gerald Bantag at ilan pang sangkot umano sa pagpatay sa broadcaster na si Percival “Percy Lapid” Mabasa at bilanggong si Cristito “Jun” Villamor Palana.

Ayon kay DOJ Senior Assistant State Prosecutor Charlie Guhit, nakatakdang ilabas ngayong araw ang subpoena, na hudyat nang pagsisimula ng preliminary investigation sa mga reklamong Murder na isinampa laban kina Bantag.

Kabilang din si BuCor Deputy Security Officer Ricardo Zulueta sa “Principals by Inducement” sa pagpatay kay Lapid at Palana na bilanggo mula sa New Bilibid Prison, Muntinlupa City na nagsilbi umanong “middleman” sa pagpaslang sa mamamahayag.

Bukod sa kanila, “Principals by Indispensable Cooperation” naman ang mga bilanggong sina Denver Batungbakal Mayores, Alvin Cornista Labra, Aldrin Micosa Galicia at Alfie Penaredonda.

Samantala, sa pagpatay kay Palano, “Principals by Direct Participation” ang mga presong sina Christian Dizon Ramac, Ricky Lamigo Salgado, Ronnie Pabustan Dela Cruz at Joel Alog Reyes.

I-ko-consolidate naman ang dalawang Murder Complaints sa reklamong inihain ng PNP noong October 18 laban sa self-confessed gunman na si Joel Escorial at apat nitong kasabwat na sina Edmon at Israel Dimaculangan, isang alyas “Orly” o “Orlando” at Christopher Bacoto, na inmate sa Bureau of Jail Management and Penology.

Bigo pa ring masungkit ang premyo sa 6/58 UltraLotto na P224M.

Ito’y makaraang walang makatumbok ng winning combination na 43 – 46 – 50 – 16 – 09 – 17 sa draw ng Philippine Charity Sweepstakes Office kagabi.

Sa kabila nito, anim na bettors ang nanalo ng second prize na tig-P120,000 habang 717 players ang nakasikwat ng third prize na tig-P2,000.00.

Samantala, wala ring nakadagit ng premyo sa SuperLotto 6/49 na P34M sa draw kagabi.

Bagaman walang masuwerteng nakasapol ng kombinasyong 48 – 13 – 15 – 19 – 14 – 37, anim na bettors naman ang nakakuha ng second prize na tig-P50,000.00 habang 680 players ang sumungkit ng third prize na tig-P1,200.00.

Halos P252-M na halaga ng shabu ang nasabat ng PNP mula sa mag-asawang suspek sa isinagawang buy-bust operation sa Imus City, Cavite.

Kinilala ang mga inarestong sina Datu Ali Dayo Sampulna, 38- anyos at Almira Karao Sampulna, 30- anyos, kapwa residente ng Cotabato City.

Ayon kay PNP – Drug Enforcement Group chief, Brig. Gen. Narciso Domingo, nakumpiska mula sa dalawa ang nasa 37 kilos ng shabu nang matiyempuhan ang mga ito sa Happy Homes Subdivision, Barangay Buhay na Tubig.

Sa Quezon City naman, tinatayang kalahating kilo ng shabu na nagkakahalaga ng P3.4-M ang nasabat din sa buy-bust operation mula sa isang MILF Commander sa Barangay Bagong Pagasa.

Kinilala ng Philippine Drug Enforcement Agency ang MILF Commander na si Mansawi Muntilala, 38- anyos, Barangay Chairman ng Boto Ambulong, Marawi City, Lanao del Sur.

Nahaharap ang tatlong suspek sa mga kasong paglabag sa Comprehensive Dangerous Drugs Act of 2022.

Karagdagang 1,858 na kaso ng Covid-19 ang naitala sa bansa kahapon kumpara sa 1,232 cases noong Sabado.

Ito’y sa kabila ng pagbaba ng positivity rate sa nakalipas na isang linggo.

Pinaka-marami sa mga bagong kaso o 349 ay mula sa Metro Manila kaya’t umakyat sa 19,176 ang active cases.

Nakapagtala rin ang Department of Health ng 5 additional deaths dahilan upang sumampa na sa 64,387 ang bilang ng fatalities.

Umakyat naman sa 4,018,000 ang total caseload kabilang ang 3,934,000 recoveries.

Samantala, nangunguna pa rin ang National Capital Region sa may pinaka-maraming kaso sa nakalipas na dalawang linggo na 2,849; sinundan ng CALABARZON, 1,685; Western Visayas, 1,367 at Central Luzon, 1,011.