Drew Nacino

Sinimulan nang talakayin ng Land Transportation Franchising and Regulatory Board (LTFRB) ang hirit ng ilang transport group na magpataw ng surcharge ang mga jeep at bus tuwing rush hour.

Humarap na sa LTFRB ang transport groups gaya ng Pasang Masda, ACTO at ALTODAP para sa unang pagdinig ng petisyon.

Sa petisyong inihain ng mga transport group, P1.00 ang idaragdag sa pasahe sa jeep, habang P2.00 sa bus, simula ala singko  hanggang alas otso ng umaga at alas kwatro ng hapon mula alas otso ng gabi, maliban tuwing linggo at National Holiday.

Gayunman, sa susunod na taon pa aasahan ang desisyon kung aaprubahan o ibabasura ang petisyon para sa surcharge.

Pinagsusumite muna ng LTFRB ng Memorandum sa loob ng 30 araw habang sa Pebrero a – 2 pa ang susunod na hearing.

Sinimulan nang buksan ng Lokal na Pamahalaan ng Marikina ang Christmas Shoe Bazaar na may temang: #PaskongSapatosSaMarikina.

Pinangunahan ni Mayor Marcelino “Marcy” Teodoro ang aktibidad kasama ng iba pang opisyal ng lungsod, at mga miyembro ng Philippine Footwear Federation Inc. (PFFI).

Sa ilalim ng Ordinance no. 191 Series of 2022, ang Christmas Shoe Bazaar ay tatagal hanggang sa January 14, 2023 na magsisimula alas-9 ng umaga hanggang alas-7 ng gabi at matatagpuan sa Marikina Freedom Park malapit sa Marikina City Hall at Legislative Building.

Layunin ng naturang programa na matulungang makabawi ang mga lokal na Sapatero na lubhang naapektuhan ng pandemya.

Plano naman ng Marikina LGUs na gawing Perpetua o habang buhay na libre at walang babayaran sa puwesto ang mga magnenegosyo sa lugar dahil mismong ang lokal na pamahalaan na ang gagastos para rito.

Bukod pa dito, target din na maihatid ang Marikina Shoe Bazaar sa iba pang panig ng bansa upang mai-promote ang affordable at matitibay na sapatos na gawa ng mga Marikenyo.

Hindi titigilan ng Bureau of Internal Revenue (BIR) ang paghahabol sa lahat ng klase ng negosyante, kabilang na ang Online sellers, kaugnay sa pagbabayad ng tamang buwis.

Ayon kay BIR Deputy Commissioner Marissa Cabreros, kabilang sa kanilang kampanya ang pagpapa-rehistro ng mga influencer, vlogger at online sellers sa ahensiya.

Kung hindi anya naka-deklara, hindi rin maaaring hindi masulatan ang mga ito.

Inihayag naman ni Cabreros na nasa 1,000 influencers at vloggers na ang nagparehistro sa BIR

Ipinaliwanag din ng BIR official na iba ang obligasyon ng pagrerehistro sa pagbabayad ng buwis.

Nilinaw ng ahensya na bagaman noong isang taon pa sila nagbigay ng palugit at kahit late mag-register, hindi umano sila nagpapataw ng penalty.

Samantala, ipinaalala ni Cabreros na nakasaad sa Tax Code na kung kelan kumita at may kinita, kailangang nakapagreport at nagbayad ng buwis ang mga dapat magbayad.

Nanumpa na si dating Build, Build, Build chairperson at Karambolistang si Anna Mae Yu Lamentillo bilang Undersecretary ng Department of Information and Communications Technology.

Personal na nanumpa si Lamentillo kay DICT secretary Ivan John Uy, kahapon.

Si Lamentillo ay nagsilbi munang Assistant Secretary ng ahensya at nangasiwa sa Communications and Media, International Relations at Partnerships gaya ng pagpasok sa Pilipinas ng Satellite-Internet Service Provider na Starlink ng bilyonaryong si Elon Musk.

Tiniyak naman ng bagong DICT official ang pagpapabilis pa ng digital connectivity sa bansa sa pamamagitan ng pagsasaayos sa digital infrastructure.

Nagsisimula na umanong bumaba ang presyo ng asukal sa gitna nang pagdating ng 150,000 metric tons na imported sugar at nagpapatuloy na milling season ng local producers.

Inihayag ni Pablo Luis Alcoza, Sugar Planters Representative sa Sugar Regulatory Administration Board na nararamdaman na ng buong merkado ang pagbabago ng demand at supply, lalo’t nasa “peak” na ng milling season.

Ayon kay Alcoza, posibleng maglaro sa P90.00 ang presyo ng refined sugar, P80.00 sa washed habang P70.00 sa brown sugar.

Maaari anyang sa Huwebes ay mabatid kung talagang nag-stabilize ang presyo ng asukal o walang ipinagbago.

Batay sa datos ng Department of Agriculture noong Oktubre, nasa P100.00 ang kada kilo ng primera o refined sugar; P75.00 sa segunda o washed sugar at P80.00 ang brown sugar sa Metro Manila.

Lusot na sa ikatlo’t huling pagbasa sa Kamara ang panukalang batas na magpapataw ng buwis sa digital transaction sa foreign Digital Service Providers (DSP) gaya ng Netflix at Spotify.

Sa botong 253-4 at 1 abstention, inaprubahan sa plenaryo ng mababang kapulungan ng kongreso ang House Bill 4122, na magpapataw ng 12% Value-Added Tax sa digital transactions sa bansa.

Gayunman, nakasaad sa bill na 5% lamang ang ipapataw sa mga DSP ng gobyerno.

Exempted naman sa buwis ang Educational Services na subscription-based ang purchasing at rendering services.

Ipinatupad na ng Department of Health ang Cancer Assistance Fund (CAF) na layuning magbigay ng suporta para sa mga pasyenteng may Cancer at para sa mga Cancer Survivors.

Ito’y bilang bahagi ng National Integrated Cancer Control Act, alinsunod sa Special Provision 13 ng inaprubahang budget ng DOH sa ilalim ng General Appropriations Act para sa fiscal year 2022.

Ayon kay DOH-OIC Maria Rosario Vergeire, ang implementasyon ng CAF ay dapat saklaw ang mga outpatient at inpatient services, pero hindi limitado sa diagnostics, therapeutic procedures, medicines, treatment at management services at iba pang cancer care services.

Ipinatupad anya ang CAF upang umakma sa umiiral na financial support mechanisms sa pampubliko at pribadong pasilidad.

Saklaw ng CAF ang breast, childhood, gynecologic, liver, adult blood, head and neck, lung, prostate, renal at urinary bladder cancers.

Para maka-avail, kailangang magsumite ang pasyente at tagapag-alaga nito ng requirements sa mga natukoy na access site kung saan ang mga serbisyo ng CAF ay available.

Kabilang sa requirement ang mga reseta, treatment protocols at medical abstracts na dapat munang sumailalim sa pagsusuri bago ang aprubahan at mag-avail ng mga serbisyo.

Tuloy ang pagbulusok ng fertility rate o bilang ng mga nagkakaroon ng anak sa bansa sa nakalipas na mga taon, sa kabila ng inaasahang pagtungtong sa 8-B ng populasyon sa mundo ngayong araw.

Batay ito sa datos na nakalap ng Commission on Population and Development (POPCOM) mula sa Philippine Statistics Authority – National Health Demographic Survey (NHDS) ngayong taon.

Nakasaad dito na ang Total Fertility Rate (TFR) ngayon ng mga Filipinang edad 15 hanggang 49 ay 1.9 children kumpara sa 2.7 children noong 2017.

Nangangahulugan ito na hindi na aabot sa dalawa ang anak ng bawat babae kumpara sa anim noong dekada sitenta.

Lumabas din sa NHDS data na karamihan ng mga Pinay ay ayaw nang magkaroon ng anak, kung saan 17% ang nagsabing nais nilang ipagpaliban ang pagkakaroon ng ikalawang anak.

Ayon kay POPCOM Officer-In-Charge at Executive Director Lolito Tacardon, ang pagbulusok ng fertility rate ay oportunidad upang i-maximize ang pagkakataon na pabagalin ang birth rate, kasabay ng mga hamon upang panatilihin ang developments.

Maikukumpara na rin anya ang TFR ng Pilipinas sa mga upper middle-income countries na 1.8 hanggang 1.5 children gaya ng Thailand.

Walang Filipinong napaulat na nasawi o nasugatan sa pambobomba sa Istanbul, Turkey.

Ayon sa Department of Foreign Affairs, batay sa mga ulat na natanggap nila sa Philippine Embassy at Consulate sa Ankara, nananatiling ligtas ang mga Pinoy sa nasabing bansa.

Patuloy anilang mino-monitor ng embahada at konsulada ang sitwasyon ng mga Pinoy sa Turkey.

Naganap ang pambobomba kahapon sa isang kilalang shopping district sa Istanbul kung saan anim na ang nasawi habang nasa 80 ang sugatan.

Isinisi naman ng Turkish Government ang terrorist attack sa separatistang grupo na Kurdish YPG Militia.

Posibleng maharap sa reklamong Grave Threats at Act of Terrorism ang 16-anyos na Grade 9 student at kasabwat nito na nasa likod umano ng bomb threat sa isang paaralan sa Taguig City noong isang linggo.

Ayon sa Taguig City Police, gumamit ng peke o dummy Facebook account ang babaeng suspek at nagkomento sa Facebook live ng LGU noong Nobyembre a–7.

Nagbanta umano ang dalagita sa komento na papatayin ang mga mag-aaral ng Signal Village National High School.

Dahil dito, sinuspinde ang klase at pinauwi ang mga estudyante habang nag-inspeksyon ang mga otoridad subalit walang nakitang bomba.

Galit ang tinitingnang motibo ng estudyante sa kaniyang pananakot.

Natukoy ng PNP-Anti-Cybercrime Group ang mga suspek sa pamamagitan ng Internet Protocol Address, eksaktong lokasyon at mobile number.