Drew Nacino

Nagpadala umano ng mensahe ang kaanak ni suspended Bureau of Corrections director General Gerald Bantag upang makipag-dayalogo sa pamilya mabasa kaugnay ng akusasyon sa kanya bilang “mastermind” sa pagpaslang kay Percy Lapid o Percival Mabasa.

Ayon kay Atty. Toto Causing, tagapagsalita ng pamilya Mabasa, isang malayong kaanak ni Bantag sa Mountain Province ang nagpadala ng feelers sa posibilidad na makipag-usap sa kinatawan ng mga kaanak ni ka Percy.

Bukas naman anya sila sa lahat ng posibilidad maging ang pakikipag-dayalogo sa suspendidong BuCor chief upang mabusisi nang malalim ang katotohanan.

Gayunman, nilinaw ni Causing na kung anong mapag-uusapan ay wala pang kongkretong maipapa­ngako ang pamilya Mabasa kay Bantag dahil nakadepende ito sa kanyang mga sasabihin.

Una nang itinanggi ni Bantag ang mga akusasyon na siya ang nasa likod ng pagpapa-ambush at pagpatay sa Brodkaster.

Pinasisilip na ni Senador Francis Escudero sa Commission on Audit (COA) kung paano ginamit ng gobyerno ang inilaang pondo sa pagbili ng Covid-19 vaccines simula noong 2020.

Sa deliberasyon sa panukalang 2023 budget ng COA, inihayag ni Escudero na panahon na upang magkaroon ng audit report ang ahensya sa vaccination program lalo’t malaking bahagi nito ay mula sa pangungutang ng bansa.

Ayon kay Senate Finance Committee chairman Sonny Angara, sponsor ng COA budget, sa impormasyon ng ahensya, P2.6B ang pondo mula sa General Appropriations Act ang inilaang ipambili ng mga bakuna bukod sa continuing appropriations na P6.3B.

Mayroon din anyang pondo mula sa pangungutang sa Asian Development Bank at World Bank na umabot sa mahigit P70B.

Gayunman, sinabi ni Escudero na batay sa media reports ay umabot sa P300B ang inilaang pondo ng para sa mga bakuna na hanggang ngayon ay hindi pa rin na-i-uulat kahit ng DOH dahil sa Non-Disclosure Agreement NDA sa manufacturers.

Iginiit ng Senador na hanggang ngayon ay hindi alam ng lahat ang tunay na presyo ng mga bakunang binili at gaano talaga kalaki ang pondong ginugol dito.

Nababahala si Escudero na kung makalulusot ang pamahalaan sa audit sa vaccination program sa paggamit sa NDA ay posibleng gayahin ito at gamitin ding dahilan sa mga susunod na panahon ng iba’t ibang government agency. —ulat mula kay Cely Ortega Bueno (Patrol 19)

Isinailalim ng Office of the Ombudsman si National Irrigation Administration administrator Benny Antiporda sa anim na buwang preventive suspension matapos ang inihaing administrative complaints ng ilang NIA employees laban sa kanya.

Sa limang pahinang kautusan, inihayag ni Ombudsman Samuel Martires na batay sa kanilang pagsusuri sa records ay malakas ang kaso laban kay Antiporda.

Nag-ugat ito sa reklamo nina NIA Employees Lloyd Allain Cudal at Michelle Gonzales Raymundo na idinidiin ang kanilang superior sa Conduct Prejudicial to the Best Interest of the Service, Grave Misconduct, Harassment, Oppression at Ignorance of the Law.

Iginiit naman ni Antiporda na walang basehan ang reklamo at pawang alegasyon lamang.

Samantala, tiniyak ng NIA chief na haharapin niya ang mga reklamong ipinupukol sa kanya.

Kung talagang hindi maiwasan na may Confidential Fund ang ilang ahensya ng gobyerno, sana ay maging ehemplo ang Ombudsman sa pagrerereport at pag-liquidate bilang tumatanggap ng ganitong pondo simula noong 2018.

Ito ang panawagan ni Senate Minority Leader Koko Pimentel sa pagtalakay sa panukalang pondo ng Office of the Ombudsman para sa susunod na taon na nagkakahalaga ng P4.7B, kabilang ang P51.4M Confidential Fund.

Sa ganitong paraan inihayag ni Pimentel na maituturo ng Commission on Audit na tularan ang Tanodbayan ng ibang ahensya na may Confidential Fund.

Inihirit din ng Senador sa Ombudsman na mag-publish ng mga impormasyon ukol sa paglaban sa katiwalian para malaman ng taumbayan kung paano ito ginagawa.

Samantala, nagtataka ang mambabatas kung bakit gustong ipa-repeal ni Ombudsman Samuel Martirez ang Anti-Red Tape Act dahil sa tingin nila ay Constitutional naman ito. —ulat mula kay Cely Ortega Bueno (Patrol 19)

Iginiit ni Senator Jinggoy Estrada sa pamunuan ng Philippine National Police na huwag i-promote ang dating hepe ng PNP – Custodial Center dahil sa umano’y pag-pa-power-trip at panghihingi ng maraming pabor.

Ito ang hirit ni Estrada kina DILG secretary Benhur Abalos at PNP chief, Gen. Rodolfo Azurin na dumalo sa pagtalakay sa Plenaryo ng Senado sa panukalang 2023 budget ng PNP na dinaluhan.

Isinumbong ng Senador na noong nakakulong sila ni Senator Bong Revilla Jr., sa Custodial Center, may scalawag anyang police official na madalas sa kanilang bumisita at humingi ng maraming pabor.

Pero nang maging hepe na ito ng Custodial Center, inihayag ni Estrada na hindi na bumisita ang Police official at nag-power trip pa kung saan hindi pinapasok ang kanilang pamilya, abogado at iba pang bisita.

Bilang tugon sinabi ni Senator Sonny Angara na nag-dedepensa sa PNP Budget na ayon kay Azurin ay nakatalaga na ngayon sa Cotabato City ang tinutukoy na Police official ni Estrada. —ulat mula kay Cely Ortega Bueno (Patrol 19)

Inatasan na ng mga DepEd official sa Western Visayas ang 21 schools divisions sa rehiyon na suriing maigi ang water sources sa kanilang mga paaralan.

Bilang tugon laban sa Cholera sa gitna nang patuloy na pagtaas ng kaso nito sa Negros Occidental.

Ayon kay DepEd-Western Visayas director Ramir Uytico, hindi dapat inumin ng mga mag-aaral at guro ang tubig sa mga paaralan.

Inihayag naman ni Negros Occidental Schools Division spokesman Ian Arnold Arnaez na inabisuhan na sila ng kanilang Medical Officer na si Dr. Joey Villarosa na isinama ang Cholera Precautions Procedures for School Based Management of Water Sanitation and Hygiene.

Pinagsusumite na anya nila ng sanitation permit at health card ang mga operator at manggagawa ng canteens sa elementary at secondary schools sa lalawigan upang matiyak ang kaligtasan ng mga estudyante, maging ng Teaching at Non-teaching staff.

Sa ngayon ay mayroon ng 28 cholera cases sa lalawigan.

Sumampa na sa mahigit P100B ang kita sa sektor ng turismo matapos ang pagbisita ng nasa dalawang milyong turista simula nang buksan muli ang bansa para sa leisure travel noong Pebrero.

Naitala ng Department of Tourism ang nasabing bilang hanggang nitong Lunes, Nobyembre a – 14 kung saan mahigit 73% o halos 1.5 million ay foreign tourists habang 538,000 ang Overseas Filipinos.

Nahigitan na ng tourism revenue ngayong taon ang kinita sa nasabing sektor na P95.7B sa kaparehong panahon noong 2021.

Inihayag ni Tourism secretary Christina Frasco na nalampasan din ng pinaka-bagong bilang ng tourist arrival ang 1.7 million tourist projections ng ahensya ngayong taon.

Patunay anya ito na mayroong malaking demand sa travel and leisure sa bansa na kabilang sa ipina-prayoridad ng Marcos administration upang tuluyang makabangon ang ekonomiya.

Nangunguna sa may pinaka-maraming tourist arrivals ay mula sa U.S., 385,000; South Korea, 285,000 at Australia, 96,000.

Itinalaga ni Pangulong Bongbong Marcos si Romeo Lumagui Jr., bilang Commissioner ng Bureau of Internal Revenue (BIR).

Nanumpa si Lumagui, na isang Tax Lawyer, sa kanyang tungkulin, kahapon.

Bago itinalaga bilang BIR Chief, nagsilbi muna siya bilang Deputy Commissioner ng ahensya.

Nagsilbi rin si Lumagui sa iba’t ibang puwesto at tungkulin gaya ng Technical Assistant to the Commissioner at Tax Fraud Head para sa Revenue Region 6-Manila, Revenue Region 4-Pampanga at Revenue Region 7-B, East NCR. —ulat mula kay Gilbert Perdez (Patrol 13)

Bigo pa ring masungkit ang premyo sa 6/58 UltraLotto na lumobo na sa P234.2M.

Sa ginanap na draw kagabi ng Philippine Charity Sweepstakes Office, walang nakahula sa winning combination na 10 – 41 – 29 – 46 – 58 – 13.

Pitong mananaya naman ang masuwerteng nakakuha ng second prize na tig-P120,000.00 habang 681 bettors ang nakasikwat ng third prize na tig-P2,000.00.

Samantala, wala ring nanalo sa SuperLotto 6/49 na may jackpot na P37.9M makaraang walang makatumbok sa kombinasyong 9 – 13 – 15 – 7 – 40 – 43.

Pero may 14 na bettors naman ang naka-tsamba ng second prize na tig-P50,000.00 habang 877 ang dumagit ng third prize na tig-P1,200.00.

Naalarma ang isang eksperto sa pagtaas ng bilang ng mga obese o sobrang taba at overweight o sobra ang timbang sa bansa.

Una nang inihayag ng Department of Science and Technology Food and Nutrition Research Institute na dumami ang mga overweight at obese sa bansa ngayong taon.

Ayon kay DOST-FNRI senior research Charina Javier, noong 2021, ang 3.9% ng mga bata sa pre-school ay overweight kung saan apat sa bawat isandaan ang obese o katumbas ng isa sa sampung bata.

Matapos anya ng Covid-19 pandemic ay tumaas ang obesity rate sa lahat ng age group habang nasa 40% ng adult filipinos ay sobra ang timbang o labis ang katabaan.

Aminado si Javier na hangga’t hindi pa bumababa ang overweight prevalence sa bansa ay naka-aalarma ito.

Hinikayat naman ng eksperto ang mga magulang na isali ang kanilang mga anak sa physical activities, lalo sa urban areas kung saan mas marami ang overweight at obese.