Drew Nacino

Umapela ng dagdag-pondo ang Pagasa para sa pagsasaayos ng mga sirang doppler radar.

Sa pagtalakay sa P1.2 billion na 2023 proposed budget ng Pagasa, natanong ni Senator Nancy Binay kung may mga nasirang kagamitan nitong nakaraang paghagupit ng bagyong Paeng.

Tugon ni Senator Francis Tolentino na siyang dumipensa sa budget ng Department of Science and Technology sa plenaryo, wala namang nasirang equipment sa pananalasa ng nasabing bagyo.

Gayunman, noon pa anya ay mayroon nang apat na sirang doppler radar sa Basco, Batanes; Virac, Catanduanes; Tampakan South Cotabato at Iloilo.

Nilinaw naman ni Tolentino na kahit sira ay mayroon namang back-up equipment na nakatutulong din tuwing may bagyo.

Kailangan naman ng P400 million para sa pagsasaayos ng mga sirang doppler radar.

Kung makukumpuni ang mga nasabing aparato ay aabot na sa dalawampu’t isa ang doppler radar stations sa bansa at sapat na ito para masakop ang mga lugar na madalas dinaraanan ng bagyo. — Mula sa ulat ni Cely Ortega-Bueno

Isinulong sa Senado na mabigyan ng intelligence at confidential funds ang Department of Information and Communications Technology (DICT).

Ito’y makaraang magtanong si Senador Raffy Tulfo kung bakit walang intel funds ang DICT gayong kailangan umano nila nito kontra cybercrime, text scammers at iba pang krimen.

Bilang tugon, inihayag ni Senador Grace Poe, na nagdepensa sa budget ng DICT, sang-ayon siyang mabigyan ng intel funds ang nasabing kagawaran.

Ipinagmalaki pa ni Poe na masuwerte ang DICT dahil nakakatrabaho nila ang mga telecommunication companies na may sariling budget para rito.

Gayunman, ipinunto ni Tulfo na mahirap na umasa lang ang DICT sa telcos dahil lumalabas na may utang na loob pa ang ahensya sa mga ito.

Ito ang dahilan kaya’t inirekomenda ni Tulfo na bigyan ang DICT ng intelligence fund bagay na sinang-ayunan ni Poe at inihayag na isusumite nila sa Senate Finance Committee ang rekomendasyon. — Mula sa ulat ni Cely Ortega-Bueno (Patrol 19)

Asahan na ang mga long weekend sa susunod na taon matapos ilabas ng Malakanyang ang nirebisang listahan ng regular at special non-working holidays.

Ilan sa mga petsa ay pinalitan ni Pangulong Bongbong Marcos upang humaba ang bakasyon at makatulong sa ekonomiya.

Alinsunod ito sa proclamation 90 ng pangulo, na nag-amyenda sa naunang proclamation 42, na nilagdaan noong Biyernes.

Idineklarang regular holidays ang bagong taon sa January 1, araw ng Linggo; Huwebes Santo, April 6; Biyernes Santo, April 7 hanggang April 10 o Araw ng Kagitingan, na papatak ng Lunes kaya’t mahaba ang bakasyon; Labor Day, May 1; Independence Day, June 12 at National Heroes Day, August 28, na pawang nagkataong Lunes kaya’t mahaba rin ang weekend ng mga manggagawa;

Ginawa namang November 27 ang Bonifacio Day kaya’t magkakaroon ng 3 day long weekend; long weekend pa rin ang pasko, December 25 na papatak din ng lunes habang Sabado ang Rizal Day, December 30.

Special non-working days naman ang EDSA People Power Revolution, February 25, Sabado; Sabado De Gloria, April 8; magkasunod din ang bakasyon sa All Saints Day, November 1, Miyerkules at All Souls Day, November 2, Huwebes; Feast of the Immaculate Conception of Mary, December 8, Biyernes at huling araw ng taon, December 31, Linggo.

Ang bagong taon ay papasok sa linggo sa 2023 kaya’t nagdagdag ang pangulo ng special day sa ikalawang araw ng taon o January 2 para mas maraming maging oras ang mga pinoy kasama ang kanilang pamilya sa okasyon.

Posibleng matanggap na ng mga health care worker ang kanilang health emergency allowance (HEA) sa Disyembre.

Umaasa si DOH officer-in-charge Maria Rosario Vergeire na maibibigay ang allowance bago mag-Disyembre a – 25 upang kahit paano ay maging maligaya ang pasko ng mga healthcare worker.

Ayon kay Vergeire, lumiham na sila sa Department of Budget and Management upang humiling ng karagdagang P27 billion para sa HEA na sasaklaw sa mga nalalabing buwan na hindi nabayaran ang HEA.

Nakikipag-ugnayan din anya ang DOH sa DBM para sa pag-release ng pondo.

Hanggang nitong Oktubre, aabot na sa P11.5 billion ang natanggap ng DOH para sa allowance ng mahigit isa punto anim na milyong health care workers simula Enero hanggang Hunyo.

Karagdagang 810 covid-19 cases ang naitala sa bansa kahapon, ang pinaka-mababang daily tally sa nakalipas na halos 2 linggo.

Dahil dito, sumampa na sa 4,200,900 ang total caseload habang bumaba sa 18,824 ang active cases ang naitala ng DOH.

Tumungtong naman sa 3,937,000 ang recoveries habang bahagyang umakyat na sa 64,432 ang death toll.

Nangunguna pa rin ang National Capital Region sa may pinaka-maraming kaso na 2,945 sa nakalipas na dalawang linggo; sinundan ng Calarbazon, 1,772; Western Visayas, 1,413 at Central Luzon, 1,046.

Inaasahang maipatutupad na simula December 27 ngayong taon ang Republic Act 11934 o subscriber identity module o Sim Registration Act.

Sa senate hearing sa budget ng Department of Information and Communications Technology, inihayag ni Senator Grace Poe na inaasahang ilalabas ng DICT ang implementing rules and regulation ng nasabing batas sa December 12.

Ayon kay Poe, Chairperson ng Senate Committee on public Services, magkakaroon din ng public hearing sa December 5 habang hinihintay din ng telcos ang IRR.

Ito’y upang mas maging malinaw kung paano masusugpo ang mga nagkalat na text scam at spam.

Oktubre a – diyes nang lagdaan ni Pangulong Ferdinand Marcos, Jr. ang Sim Registration Act bilang panlaban sa mga gumagawa ng krimen sa pamamagitan ng mga mobile phone, gaya ng text scams.

Dapat agarang aksyunan at busisiin ng kinauukulang ahensya ng gobyerno ang plano ng transport network vehicle service (TNVS) companies na magpataw ng dagdag na dalawang porsyentong commission rate.

Ayon kay Senate Committee on Public Services Chairperson Grace Poe, kawalang-konsyensya na sa gitna ng kahirapang nararanasan ang pagtaas ng kinakaltas na komisyon sa delivery riders at drivers ng ride-hailing apps.

Sa halip anya na bawasan ang kanilang kinikita, dapat pa ngang bigyan ang mga delivery rider at rider ng dagdag-benepisyo at social protection.

Ipinunto ni Poe na “vital frontliners” ang mga delivery rider at rider sa service sector dahil napanatili nilang gumugulong ang ekonomiya.

Una nang nanawagan sa LTFRB ang delivery riders at drivers ng ride-hailing apps na i-regulate ang pagtaas ng komisyon ng TNVS companies. — Mula sa ulat ni Cely Ortega-Bueno (Patrol 19)

Hindi na papayagan ang pagbiyahe sa ibang bansa ng mga taga-Climate Change Commission maliban na lang kung sobrang kailangan at dapat silang magsumite ng post travel reports.

Ito ang inihayag ni Senator Imee Marcos sa deliberasyon ng panukalang budget ng komisyon para sa susunod na taon na nagkakahalaga ng P120 million.

Ayon kay Senator Marcos, bubuo sila ng probisyon sa General Appropriations Act na nagtatakda ng patakaran sa pagbiyahe ng mga taga-Climate Change Commission.

Naka-dalawampung biyahe na anya ang mga taga-Climate Change Commission kaya’t nais mabatid ni Senate President Pro-Tempore Loren Legarda kung anu-anong komperensya ang kanilang dinaluhan.

Hiningan din ni Legarda ang post travel report sa mga travel abroad ng mga opisyal, staff, consultant at commissioner ng komisyon.

Sa kabila nito, inaprubahan naman sa pagtalakay ng Senado ang panukalang pondo ng Climate Change Commission para sa susunod na taon. — Mula sa ulat ni Cely Ortega-Bueno (Patrol 19)

Kinumpirma ng Commission on Human Rights (CHR) na dalawang United Nations special rapporteurs ang inaasahang bibisita sa bansa.

Ayon sa CHR, bibisita si UN special rapporteur on the Sale and sexual exploitation of children, child prostitution, child pornography, and other child sexual abuse material mama fatima singhateh simula November 28 hanggang December 2.

Susuriin ni Singhateh ang sitwasyon at paglaban o pagpigil sa sexual exploitation ng mga bata alinsunod sa international human rights standards.

Nakatakda ring dumating si Special Rapporteur on Freedom of Expression and Opinion Irene Khan sa susunod namang taon habang wala pang detalye hinggil dito.

Maaari nang daanan ng mga motorista ang unang bahagi ng 8-kilometer North Luzon Expressway (NLEX) connector road sa Disyembre.

Ayon kay NLEX President at General Manager Luigi Bautista, nasa nobenta porsyento nang kumpleto ang bahagi ng connector road project mula C-3, Caloocan City patungong España Boulevard, Maynila.

Nagkakahalaga ang proyekto ng P23.2 billion na mula 5th avenue-C3 road, España hanggang Sta. Mesa, Maynila.

Inaasahang matatapos ang konstruksyon nito at magiging “fully” operatonal sa ikalawang quarter ng taong 2023.

Sa sandaling ma-kumpleto, inaasahang bibilis na ang biyahe, partikular ng mga truck na nagmumula sa Central at Northern Luzon, pabalik o palabas ng Metro Manila at makababawas sa masikip na daloy ng trapiko.