Drew Nacino

Magsasagawa ng “walk of faith o lakad pananampalataya” sa Enero 2023 bilang bahagi ng pagdiriwang ng pista ng itim na Nazareno.

Ayon kay Quiapo Church Attached Priest Fr. Earl Allyson Valdez, bagaman ipagpapaliban ang nakagawiang traslacion ng poong Nazareno ay magkakaroon naman ng walk of faith sa enero a – 8 o isang araw bago ang pista.

Magsisimula anya ito sa pamamagitan ng banal na misa alas dose ng hatinggabi sa Quirino grandstand na susundan ng walk of faith.

Kasalukuyang isinasapinal ang rutang daraanan mula grandstand patungong Quiapo church.

Sa kabila nito, ipinaalala ni Valdez sa mga debotong lalahok sa walk of faith na magdala ng kandila at mahigpit na sundin ang ipatutupad na health protocols.

Napagkasunduan din ng pamunuan ng menor basilica ng Quiapo at lokal na pamahalaan ng Maynila ang mahigpit na pagpatupad ng pagsusuot ng face mask.

Ito na ang ikatlong taon na ipinagpaliban ang tradisyunal na traslacion ng poong Hesus Nazareno dahil pa rin sa covid-19 pandemic.

Naging mainit din ang sagutan nina Senators Cynthia Villar at Raffy Tulfo sa issue ng rice tarrification o liberalization law.

Ito’y makaraang punahin ni Tulfo ang kabiguan umano ng nasabing batas na tulungan ang mga magsasaka at mapababa ang presyo ng agricultural products, partikular ng bigas.

Sa Senate hearing ng 2023 DA budget kung saan sponsor si Villar, iginiit nito na nakatulong ang rice tarrification law sa mga magsasaka.

Kahit siya anya ang nag-akda ng naturang batas, hindi siya nagsisisi dahil kumikita naman ang mga maliit na magsasaka upang mapatatag ang supply ng pagkain.

Binigyang-diin ni Villar na masusi niyang pinag-aralan ang batas at ikinumpara ang produksyon ng palay ng Pilipinas sa Vietnam.

Samantala, dahil mainit ang sagutan ng dalawa, sinuspinde ni Senate President Juan Miguel Zubiri ang sesyon at nang bumalik sinabi ni Tulfo na magpi-privilege speech na lang siya ukol sa isyu. —Mula sa ulat ni Cely Ortega-Bueno (Patrol 19)

Nagkasagutan at nagkainitan sina Senators Raffy Tulfo at Cynthia Villar sa deliberasyon ng panukalang budget ng Department of Agriculture para sa susunod na taon.

Ito’y makaraang mapag-usapan ang ginagawa ng mga private developer na pag-convert sa mga sakahan bilang residential at commercial areas.

Tinanong ni Tulfo si Villar bilang sponsor ng DA budget kung ano ang plano ng ahensya ngayong lumiliit na ang mga lupang sakahan dahil binibili ng malalaking developer at ginagawang subdivision.

Iginiit ni Villar na sa capital towns at mga lungsod lang daw sila bumibili, dahil doon bibili ng bahay ang mga tao para madali nilang maibenta.

Sagot ni Tulfo, nanggaling siya sa lalawigan ng Isabela at mayroon siyang pruweba na kino-convert ang farm lands bilang subdivision at nangyayari umano ito sa maraming lugar.

Gayunman, iginiit ni Villar na dapat unawain ni Tulfo ang agrikultura bilang negosyo rin dahil binibili ng developer ang lupa sa mataas na halaga. — Mula sa ulat ni Cely Ortega-Bueno (Patrol 19)

Makabubuting gamitin ng Department of Environment and Natural Resources (DENR) ang kanilang confidential at intelligence funds sa pagresolba sa gulo at mga isyu sa masungi georeserve sa lalawigan ng Rizal.

Ito ang mungkahi ni Senator Raffy Tulfo matapos mapaulat na inokupa ng isang security agency ang masungi nitong Setyembre.

Ayon kay Tulfo, P13.9 million ang confidential at intelligence funds na nakapaloob sa panukalang P23.13 billion budget ng DENR sa susunod na taon.

Gamit anya ang nasabing pondo, pwede nang alamin ng ahensya kung sinu-sino ang mga armadong lalaki at grupo na umokupa sa masungi georeserve at umano’y nananakot o nagtataboy ng mga naninirahan at nagbabantay doon.

Iginiit ng senador na hindi basta maaaring magsawalang-bahala ang DENR sa sitwasyon.

Sa budget deliberations ng senado, sinabi ni Environment Secretary Antonia Yulo-Loyzaga na nagpapatulong na sila sa DILG upang maresolba ang isyu at may initial findings na sila mula sa sariling imbestigasyon.

Pinaaksyunan din ni Tulfo sa DENR ang umano’y pagpwersa sa mga katutubo sa Rizal at Quezon Provinces na lumagda sa memorandum of agreement at tanggapin ang P1 million para umalis sa lupain na kailangan umano ng metropolitan Waterworks and Sewerage System para sa Kaliwa dam project. — Mula sa ulat ni Cely Ortega-Bueno (Patrol 19)

Isinulong sa Senado na mabigyan ng intelligence at confidential funds ang Department of Information and Communications Technology (DICT).

Ito’y makaraang magtanong si Senador Raffy Tulfo kung bakit walang intel funds ang DICT gayong kailangan umano nila nito kontra cybercrime, text scammers at iba pang krimen.

Bilang tugon, inihayag ni Senador Grace Poe, na nagdepensa sa budget ng DICT, sang-ayon siyang mabigyan ng intel funds ang nasabing kagawaran.

Ipinagmalaki pa ni Poe na masuwerte ang DICT dahil nakakatrabaho nila ang mga telecommunication companies na may sariling budget para rito.

Gayunman, ipinunto ni Tulfo na mahirap na umasa lang ang DICT sa telcos dahil lumalabas na may utang na loob pa ang ahensya sa mga ito.

Ito ang dahilan kaya’t inirekomenda ni Tulfo na bigyan ang DICT ng intelligence fund bagay na sinang-ayunan ni Poe at inihayag na isusumite nila sa Senate Finance Committee ang rekomendasyon. — Mula sa ulat ni Cely Ortega-Bueno (Patrol 19)

Asahan na ang mga long weekend sa susunod na taon matapos ilabas ng Malakanyang ang nirebisang listahan ng regular at special non-working holidays.

Ilan sa mga petsa ay pinalitan ni Pangulong Bongbong Marcos upang humaba ang bakasyon at makatulong sa ekonomiya.

Alinsunod ito sa proclamation 90 ng pangulo, na nag-amyenda sa naunang proclamation 42, na nilagdaan noong Biyernes.

Idineklarang regular holidays ang bagong taon sa January 1, araw ng Linggo; Huwebes Santo, April 6; Biyernes Santo, April 7 hanggang April 10 o Araw ng Kagitingan, na papatak ng Lunes kaya’t mahaba ang bakasyon; Labor Day, May 1; Independence Day, June 12 at National Heroes Day, August 28, na pawang nagkataong Lunes kaya’t mahaba rin ang weekend ng mga manggagawa;

Ginawa namang November 27 ang Bonifacio Day kaya’t magkakaroon ng 3 day long weekend; long weekend pa rin ang pasko, December 25 na papatak din ng lunes habang Sabado ang Rizal Day, December 30.

Special non-working days naman ang EDSA People Power Revolution, February 25, Sabado; Sabado De Gloria, April 8; magkasunod din ang bakasyon sa All Saints Day, November 1, Miyerkules at All Souls Day, November 2, Huwebes; Feast of the Immaculate Conception of Mary, December 8, Biyernes at huling araw ng taon, December 31, Linggo.

Ang bagong taon ay papasok sa linggo sa 2023 kaya’t nagdagdag ang pangulo ng special day sa ikalawang araw ng taon o January 2 para mas maraming maging oras ang mga pinoy kasama ang kanilang pamilya sa okasyon.

Posibleng matanggap na ng mga health care worker ang kanilang health emergency allowance (HEA) sa Disyembre.

Umaasa si DOH officer-in-charge Maria Rosario Vergeire na maibibigay ang allowance bago mag-Disyembre a – 25 upang kahit paano ay maging maligaya ang pasko ng mga healthcare worker.

Ayon kay Vergeire, lumiham na sila sa Department of Budget and Management upang humiling ng karagdagang P27 billion para sa HEA na sasaklaw sa mga nalalabing buwan na hindi nabayaran ang HEA.

Nakikipag-ugnayan din anya ang DOH sa DBM para sa pag-release ng pondo.

Hanggang nitong Oktubre, aabot na sa P11.5 billion ang natanggap ng DOH para sa allowance ng mahigit isa punto anim na milyong health care workers simula Enero hanggang Hunyo.