Drew Nacino

Muling pina-alalahanan ng Civil Service Commission (CSC) ang mga kawani ng pamahalaan na bawal ang pagtanggap ng anumang regalo, ngayong nalalapit na ang Pasko.

Alinsunod sa Republic Act 3019 o Anti-Graft and Corrupt Practices Act, bawal sa isang government worker ang mag-solicit o manghingi ng regalo sa sinumang may transaksiyon sa pamahalaan.

Ayon kay CSC Commissioner Aileen Lizada, dapat magsilbing mabuting halimbawa ang mga government employee o head at iwasang mag-solicit o manghingi ng regalo sa sinumang may transaksyon sa gobyerno.

Ang sinumang kawani na mapatutunayang sangkot sa pagtanggap ng regalo o pabor ay posibleng masibak sa pamahalaan habang mananagot din sa batas ang mga magbibigay na pribadong indibidwal.

Bukas anya ang CSC para sa sumbong at reklamo hinggil sa “No Gift Policy” hindi lang ngayong Pasko kundi sa buong taon.

Sa panig naman ng Bureau of Internal Revenue (BIR) tiniyak nito ang mahigpit na pagpapatupad ng “No Gift Policy” o nagbabawal sa mga empleyadong tumanggap o humingi ng regalo.

Inihayag ni BIR – Southern NCR Director Jethro Sabariaga na malaking tulong ang digitalization sa pagproseso ng mga aplikasyon at dokumento On-line upang maiwasan ang panunuhol o pangingikil.

Asahan muli ang bawas-presyo sa mga produktong petrolyo bukas.

Ito, ayon kay Energy Assistant Director Rodela Romero, ay dahil pa rin sa Covid-19 surge sa China na pangalawa sa may pinaka-malaking konsumo ng krudo sa mundo.

Bumaba na naman anya ang Oil Demand ng China habang pataas nang pataas ang interest rate.

Inaasahang maglalaro sa P2.10 hanggang P2.30 ang kada litro ng diesel; .75 sentimos hanggang P1.00 sa gasolina habang P2.00 hanggang P2.20 sentimos sa kerosene o gaas.

Gayunman, aminado si Romero na wala pang katiyakan kung magpapatuloy ang rollback sa mga susunod pang linggo.

Plano na rin ng Civil Service Commission (CSC) na gayahin ang paraan ng Supreme Court na gawing Digitalized at Regionalized ang Civil Service Examination.

Hiniling ni CSC Chairman Karlo Nograles kay Chief Justice Alexander Gesmundo na payagan ang mga kinatawan ng Komisyon na mag-obserba sa operasyon ng bar examinations sa Command Center sa Ateneo De Manila University.

Ang naturang Command Center ang nag-mo-monitor sa idinaraos na bar examinations sa 14 na local testing centers.

Nakasaad sa liham ni Nograles na nais din ng CSC na gawing digital na ang Civil Service Exam mula sa nakagawiang pen and paper examinations.

Interesado rin ang komisyon na malaman ang mga paraan at operational procedures sa pagsasagawa ng localized at digitalized exam.

Tiniyak ng Bureau of Customs (BOC) na maihahatid na ang mga nalalabing abandonadong balikbayan box sa isang warehouse sa Bulacan bago mag-Pasko.

Ayon kay BOC spokesman Arnaldo Dela Torre Jr., sisimulan na nila ngayong linggo ang libreng delivery ng balikbayan box sa mga probinsya.

Tinatayang 2,000 balikbayan boxes pa anya ang natitira sa kanilang warehouse sa Balagtas.

Nagpapatuloy naman ang pagkuha ng mga recipient ng mga package sa naturang warehouse.

Kailangan lamang magdala ng Authorization Letter, valid ID at kopya ng passport ng nagpadala kung nais itong personal na kunin ang package.

Pawang nagmula sa Middle East ang mga balikbayan box na sinasabing inabandona ng foreign courier services.

Humingi na ng paumanhin ang Metropolitan Manila Development Authority (MMDA) sa pamilya ng motorcycle rider na namatay matapos maatrasan ng truck na hinatak ng mga MMDA Personnel sa Quezon City.

Kumalas umano ang tow bar ng tow truck ng MMDA sa truck ng buhangin na nasiraan sa kanto ng Aurora Boulevard at Broadway Avenue noong Sabado dahilan upang umatras papunta sa mga motorista.

Apat na rider ang naatrasan ng 14-wheeler truck subalit hindi pinalad ang biktimang si Dexter Cortez, 47-anyos, makaraang magtamo ng matinding pinsala sa binti.

Tiniyak ni Acting MMDA Chairman Romando Artes na hindi na mauulit ang nasabing aksidente at pag-iigihin ang kanilang towing services.

Inatasan na ni Artes si MMDA General Manager Procopio Lipana na pamunuan ang imbestigasyon.

Nagsasagawa na rin ng imbestigasyon ang Quezon City Police District habang hawak na nila ang driver ng tow truck.

Sinalakay ng National Bureau of Investigation ang kumpanyang namimirata umano ng Japanese Firm Computer Program na nakabase sa Cebu.

Nasagawa ang NBI – Cebu District Office ng Warrant to Search, Seize and Examine Computer Data, laban sa mga may-ari, empleyado at occupants ng kompanya sa apas Barangay Lahug, Cebu City.

Wala namang naaresto ang NBI pero nakumpiska ang ilang computer units, laptops, removable storage media, servers at routers.

Hinihintay pa ng ahensya ang resulta ng forensic examinations sa mga nakumpiskang aparato para sa paghahain ng kasong paglabag sa Anti-Cybercrime Law laban sa mga empleyado at may-ari ng kompanya.

Nag-ugat ang operasyon nang makatanggap ng reklamo ang NBI- mula sa Japanese Corporation na mayroong ibang kompanya ang iligal na gumagamit sa kanilang computer program.

Ang nasabing Japanese Firm ay nakikibahagi sa pagbebenta at pag-e-export ng mga sasakyan mula sa Japan patungo sa iba’t ibang bansa.

Tututok sa pagpapatatag ng Security Alliance at Economic Relationship ang magiging sentro ng pulong sa pagitan nina Pangulong Ferdinand “Bongbong” Marcos at U.S. Vice President Kamala Harris.

Kinumpirma ng White House na tatalakayin din sa pulong ang mga issue kaugnay sa Digital Economy at paggamit ng Clean Energy.

Nakatakda namang humarap si Harris sa Civil Society Activists mamaya bilang bahagi ng nagpapatuloy na suporta sa Human Rights at Demokrasya ng Amerika habang bukas ay bibisita ito sa Palawan, partikular sa teritoryong malapit sa pinag-aagawang Spratly Islands.

Si Harris ang pinaka-mataas na U.S. official na bibisita sa Palawan.

Kagabi ay dumating sa bansa ang Bise Presidente ng Amerika mula sa Asia Pacific Economic Cooperation Summit sa Bangkok, Thailand.

(video courtesy of Raoul Esperas Patrol 45)

Bigo pa ring mapanalunan ang premyong P258-M sa 6/58 Ultra Lotto ng Philippine Charity Sweepstakes Office.

Sa draw kagabi ng P.C.S.O., walang nakatumbok sa winning combination na 41 – 52 – 36 – 53 – 49 – 15.

Pero 12 masuwerteng mananaya naman ang sumungkit ng second prize na tig-P120,000.00 habang 539 na iba pa ang nakasikwat ng third prize na tig-P2,000.

Binobola ang Ultra Lotto tuwing alas-9 ng gabi ng Martes, Biyernes at Linggo.

Samantala, lumobo naman sa P48.2 million ang premyo sa 6/49 Super Lotto makaraang wala ring makadagit ng kombinasyong 8 – 29 – 06 – 38 – 43 – 26.

Libu-libong residente sa ilang bahagi ng Sarangani Province, General Santos City at Davao Region ang apektado ng pagbaha.

Kabilang sa mga nalubog ang mga reisdente sa coastal barangay ng Buayan, Gensan.

Nalubog din ang ilang barangay sa tabing-ilog sa bayan ng Malungon, Sarangani.

Una nang inihayag ng pagasa na ang pag-ulan sa mga nasabing lugar ay bunsod nang walang tigil na ulan dulot ng inter-tropical convergence zone at low pressure area.

Agad inatasan ni Pangulong Bongbong Marcos ang ilang ahensya ng gobyerno na sumaklolo sa mga biktima ng flashfloods at landslides sa Davao Region, ilang bahagi ng Sarangani at General Santos City.

Ayon kay Pangulong Marcos, nakatutok na ang NDRRMC, DPWH at DSWD sa sitwasyon at namamahagi na ng relief supplies sa mga apektadong pamilya.

Pinatitiyak din ng punong ehekutibo sa DSWD na ibiibigay agad ang mga kailangang tulong ng lahat ng evacuees.

Kasalukuyang dumadalo ang pangulo sa Asia-Pacific Economic Cooperation Summit sa Thailand.

Ang flashfloods at landslides sa ilang bahagi ng Mindanao ay dulot ng malakas na ulan dala ng inter-tropical convergence zone.