Karagdagang 938 Covid-19 cases ang naitala ng Department of Health sa bansa kahapon.
Kasabay nito ang bahagyang pagbaba muli ng aktibong kaso sa 18,179 kumpara sa 18,647 noong linggo.
Dahil dito, sumampa na sa 4,026,000 ang total caseload kabilang ang 3,944,000 recoveries at 64,485 deaths.
Nangunguna pa rin ang Metro Manila sa mga rehiyong may pinaka-maraming kaso sa nakalipas na dalawang linggo na 3,457; sinundan ng CALABARZON, 2,032 at Western Visayas, 1,498.
Aprubado na sa Senado ang resolusyon para sa paglikha ng Select Oversight Committee on Intelligence and Confidential Funds.
Ito ay ang Senate Resolution 302 na ini-akda ni Senate President Juan Miguel Zubiri at nag Co-Author lahat ng mga senador.
Ang nasabing Kumite na pamumunuan mismo ni Zubiri ay masusing magbabantay at bubusisi kung paano ginagamit ng ilang ahensya ng gobyerno ang ibinigay sa kanila na Confidential at Intelligence Funds (CIF).
Magiging miyembro ng Oversight Committee sina Senate Majority Leader Joel Villanueva, Minority Leader Koko Pimentel, Senators Ronald Dela Rosa at Sonny Angara.
Sa kanyang sponsorship, inihayag ni Zubiri na ipagpapatuloy ngayong 19th Congress ang naging tradisyon sa mga nakalipas na kongreso na bantayan ang CIF lalo’t sa ilalim ng 2023 budget ay mayroong P9.28-B na CIF.
Iginiit ni Zubiri na responsibilidad nila na maging mapagmatyag para malaman paano gagamitin ang naturang pondo dahil hindi ito dumaraan sa Regular Auditing Rules at Procedures ng commIssion on Audit. —ulat mula kay Cely Ortega Bueno (Patrol 19)
Naniniwala si Justice Secretary Jesus Crispin Remulla na hindi pa handa ang Pilipinas pagdating sa “Same-Sex Marriage”.
Tugon ito ni Remulla sa rekomendasyon ng ilang United Nations Human Rights Council Members na gawing ligal ang Abortion, Divorce at isabatas ang Sexual Orientation, Gender Identity and Expression Equality Bill.
Ayon sa Kalihim, hindi pa handa ang kultura at magiging taliwas sa kultura ng mga Filipino ang inirerekomenda ng nasabing konseho ng U.N.
Itinuro naman ni Remulla ang Kongreso na maaaring magpasa ng batas hinggil dito at magiging polisiya na ng bansa kung tatanggapin ito o hindi.
Samantala, iginiit ni Justice Undersecretary Raul Vasquez dapat lang ibasura ang rekomendasyon ng mga U.N. Council Member dahil sa national identity, relihiyosong paniniwala at kultural na tradisyon ng Pilipinas.
“Good” news para sa mga motorista at consumer.
Sa ika-apat na sunod na linggo, muling umarangkada ang tapyas-presyo ng mga kumpanya ng langis sa kanilang mga produkto.
Epektibo alas 12:01 kaninang hatinggabi buena manong ipinatupad ng Caltex ang P2.15 rollback sa kada litro ng diesel, P0.40 sa gasolina habang P2.10 centavos sa kerosene.
Ala-6 naman ngayong umaga inilarga ng Shell, Petron, Seoil, PTT Philippines, Phoenix Petroleum, Jetti, Flying V at Petrogazz ang kahalintulad na price adjustment.
Samantala, alas-8 mamayang umaga rin ipatutupad ng Cleanfuel ang rollback sa presyo ng kanilang produkto.
Una nang inihayag ng Department of Energy na ang pagbaba ng Oil Demand sa China bunsod ng nararanasang panibagong Covid-19 surge ang dahilan nang bawas-presyo.
Kasado sa Disyembre a – 5 ang public hearing para sa deliberasyon ng Implementing Rules and Regulations (IRR) ng Subscriber Identity Module o SIM Registration Act.
Inimbitahan na ng National Telecommunications Commission ang lahat ng stakeholders sa public consultation para sa Republic Act 11934, na magsisimula alas-2 ng hapon.
Layunin ng R.A. 11934 na obligahin ang mga mobile communication users na irehistro ang kanilang sim card at mapigilan ang mga krimen gaya ng Text Scam at Spam.
Sa ilalim ng unang full draft ng IRR para sa public consultation, lahat ng existing sim subscribers ay dapat magparehistro sa loob ng anim na buwan simula nang ipatupad ang nasabing batas.
Inaasahan namang mailalabas ang IRR sa Disyembre a – 12 sa Plenary Deliberation at tuluyang maipatupad ng Department of Information and Communications Technology sa Disyembre a – 27, ngayong taon.
Kakulangan umano sa pumapasadang mga driver ang naka-aapekto sa presyo ng singil ng mga Transport Network Vehicle Service (TNVS).
Ito ang paliwanag ni Jun De Leon ng Grupong LABAN TNVS sa gitna ng mga reklamo ng mga pasahero sa mahal na pasahe sa mga TNVS.
Ipinunto ni De Leo na aprubado naman anya ng Land Transportation Franchising and Regulatory Board ang “surge” sa pamasahe kapag mataas ang demand sa mga sasakyan.
Marami na rin anyang drayber ang hindi pumapasada dahil sa mataas na presyo ng gasolina, maging ang nagbabadyang pagtaas ng komisyon na kukunin ng mga TNVS companies mula sa mga tsuper.
Nilinaw ni De Leon na hindi sa driver napupunta ang dagdag singil tuwing may surge o mataas ang demand sa mga sasakyan.
Ito ang dahilan kaya’t nananawagan sila sa LTFRB na i-regulate na rin ang mga TNVS para sa kapakanan ng mga tsuper at ng pasahero.
Pinanindigan ni U.S. Vice president Kamala Harris ang pangako ng Amerika na ipagtatanggol ang Pilipinas sakaling magkaroon ng armadong pag-atake sa West Philippine Sea.
Sa kanyang pakikipagpulong kay Pangulong Ferdinand “Bongbong” Marcos Jr. sa Malacañang kahapon, binanggit ni Harris ang 1951 mutual defense treaty na batayan upang ipagtanggol ng Amerika ang Pilipinas.
Ang nasabing tratado ang pinakamatagal na defense-pact na layuning palakasin ang defense at security relations ng sa pagitan ng mga tropang Pilipino at Amerikano.
Nagpasalamat naman si Pangulong Marcos kay Harris sa pangako ng Amerika na ipagtanggol ang Pilipinas laban sa anumang armadong pag-atake sa pinag-aagawang karagatan.
Kampante ang Philippine Statistics Authority na makakamit ang target nitong 50 million physical at digital National I.D. cards ngayong taon.
Ayon sa PSA, dumarami ang idini-daspatch na Philippine Identification Cards sa post office para sa delivery nitong third quarter.
Umabot na sa 2.53 million ang idinidispatch na PhilSys ID ng PSA at Bangko Sentral ng Pilipinas noong Setyembre kumpara sa 1.86 million noong Hulyo at 2.24 million noong Agosto.
Nagpasalamat naman si PSA undersecretary Dennis Mapa sa BSP sa walang-sawa nitong commitment upang matiyak na tuloy-tuloy ang produksyon ng card.
Sa 50 million target ngayong taon, 30 million sa mga ito ay physical id cards habang 20 million ay digital versions ng PHILID.
Sasagutin ni Saudi Crown Prince Mohammed Bin Salman ang mahigit P4.6 Billion na hindi pa nababayarang sahod ng nasa 10,000 OFW na nagtrabaho sa construction companies sa Saudi Arabia na nabangkarote noong 2015 at 2016.
Ito ang kinumpirma ni Pangulong Bongbong Marcos matapos ang kanilang bilateral meeting ni Prince Mohammed sa sidelines ng Asia Pacific Economic Cooperation (APEC) summit sa Bangkok, Thailand, kamakailan.
Ayon kay Pangulong Marcos, isang magandang Pamasko ang pahayag ng Prinsipe ng Saudi para sa mga OFW na matagal naghihintay sa nakatengga nilang sweldo.
Tiniyak din anya ng Labor Minister ng Saudi na hindi na ito mauulit sa mga manggagawang Filipino na pupunta sa nasabing bansa habang magkakaroon ng insurance system para sa mga manggagawa.
Samantala, napag-usapan naman ng Punong Ehekutibo at Crown Prince ang mga Pinoy na patungong Saudi Arabia at iba pang oportunidad para sa pamumuhunan.
Bahagya muling bumaba sa 18,647 ang aktibong kaso ng Covid-19 sa bansa kahapon kumpara sa 18,864 noong Sabado.
Nakapagtala ang Department of Health ng karagdagang 1,063 daily Covid-19 cases, kahapon kaya’t lumobo naman sa 4,025,000 ang total caseload.
Ito na ang ika-apat na sunod na araw na mahigit 1,000 lamang ang mga bagong kaso ng naturang sakit.
Sumampa naman sa 3,942,000 ang recoveries habang 8 additional deaths ang naitala dahilan upang bahagyang umakyat sa 64,476 ang fatalities.
Samantala, nangunguna pa rin ang National Capital Region sa mga rehiyong may pinakamaraming kaso sa nakalipas na dalawang linggo, 3,551; sinundan ng CALABARZON, 2,062 at Western Visayas, 1,587.