Drew Nacino

Posibleng tumaas na rin ang multang ipinapataw sa mga paglabag sa batas trapiko simula sa susunod na taon.

Ito ang pinag-aaralan ng MMDA sa pagsusulong nila ng Single-Ticketing System upang maging pare-pareho ang multang pinapataw ng mga Local Government Unit.

Kabilang ito sa pinag-usapan mga MMDA, Land Transportation Office at LGU kahapon at planong ipatupad sa simula Enero ng susunod na taon.

Sa sandaling maipatupad, ang hindi pagsusuot ng helmet sa motorsiklo ay papatawan ng multang P1,500.00 at hindi otorisadong helmet ay magiging P3,000.00.

Magkakaroon din ng multa sa mga backrider, lalo kapag nakatsinelas, sandals o nakapaa lamang, P500.00 sa unang offense; P700.00 sa ikalawang offense at P1,000.00 sa ikatlong paglabag at kukumpiskahin na ang lisensiya.

Ang loading at unloading sa hindi otorisadong lugar ay magiging P1,000.00 na ang multa mula sa dating P500.00 lamang.

Ang mga kaskasero o overspeeding, pagmumultahin naman ng P1,000.00 habang ang nag-counterflow ay P2,000.00 kung walang nadisgrasya at P5,000.00 kung may nahagip o nasirang ari-arian at paglabag sa Number Coding at mga traffic sign ay P500.00.

Sa kabila nito, tiniyak ng LTO na mapapadali na ang pagbabayad ng multa dahil papayagan na ang digital payment o sa mga Bayad Center.

Tatargetin ng DSWD ang mga sindikato sa likod ng pagdagsa ng mga indigenous people o katutubo sa metro manila tuwing mag-pa-pasko para manglimos.

Ito ang kinumpirma ni DSWD secretary Erwin Tulfo kasabay ng nagpapatuloy na pagsagip ng ahensya sa mga katutubo, tulad ng mga aeta at badjao na madalas nakikitang sumasampa sa mga jeep upang manghingi ng pera sa mga pasahero.

Ayon kay Tulfo, mayroong grupo na nag-a-accommodate sa mga Indigenous People (I.P.) kaya’t nakikipag-ugnayan na ang DSWD sa mga Local Government Unit upang matiyak na hindi na mabibiktima muli ang mga katutubo.

Batay anya sa pagtaya ng Kagawaran, nasa P4,000 hanggang P5,000 kada araw ang kinikita ng mga I.P. sa panlilimos.

Sa ngayon ay nasa 130 I.P., na karamiha’y Tausug ang pinauwi sa kani-kanilang probinsya simula pa noong Huwebes.

Nilinaw naman ng Kalihim na hindi mismo sa mga katutubo i-aabot ang perang ipinangako ng DSWD kundi ang provincial Social Welfare Office ang inatasang mamamahagi ng P10,000 na ayuda.

Nakatakdang magpadala si Pangulong Ferdinand Marcos Jr., ng “Note Verbale” sa China matapos umanong kumpiskahin ng Chinese Coast Guard ang rocket debris na narekober ng Philippine Navy sa Pag-asa Island.

Ayon kay Pangulong Marcos, hindi nagtutugma ang ulat ng Philippine Navy at ulat mula sa China dahil ang salitang “sapilitang kinuha” ay ginamit ng navy na hindi naman kasama sa Chinese Navy Report.

Kailangan anyang resolbahin ang isyu kahit kumpleto ang tiwala niya sa Navy at naniniwala siya sa kanilang salaysay.

Aminado naman ang Pangulo na posibleng maging ugat ng malaking gulo ang isang pagkakamali na hindi dapat mangyari. —ulat mula kay Gilbert Perdez (Patrol 13)

Lusot na sa Commission on Appointments (CA) si Public Works and Highways secretary Manuel Bonoan.

Papuri kay Bonoan ang inihayag ng ilang ang mambabatas na miyembro ng C.A. kung saan kanilang inihayag ang pagiging mapagpa-kumbaba at simple ng kalihim.

Nagpahayag din ng buong suporta ang lahat ng miyembro ng Komite kung saan sina Senate President Juan Miguel Zubiri at Surigao Del Sur Rep. Johnny Pimentel ay 1000% ang suporta kay bonoan.

Matapos makalusot sa committee level, agad isinalang sa Plenary Session si Bonoan para sa kanyang official confirmation.

Samantala, tinawag naman ng ilang C.A. member ang atensyon ng kalihim hinggil sa mga contractor na sumasali sa bidding at nanggugulo pero sumasahod;

Extortion na kinasangkutan ng NGO na Crime and Corruption Watch ng DPWH usapin sa Right of Way at ang pagpopondo sa mga tulay at iba pang imprastraktura na nasira ng bagyo at lindol na hindi na naisama sa 2023 National Budget. —ulat mula kay Cely Ortega Bueno (Patrol 19)

Tinalikuran na ni DSWD secretary Erwin Tulfo ang pagiging American Citizen ngayong taon bago italaga sa naturang ahensya.

Ito ang ginawang paglilinaw ni Tulfo matapos ang Executive Session kaugnay ng kanyang Confirmation ng Commission on Appointments (CA).

Bagaman aminado si Tulfo na sa ngayon ay Filipino Citizen siya, may ilang C.A. member ang kumuwestyon sa “timing” ng pag-renounce o pagtalikod niya sa pagiging American Citizen.

Napag- alaman kasi na naging enlisted si Tulfo ng U.S. Army mula 1988 hanggang 1992 at nasa Active Military Service na naka-himpil sa Europe mula 1992 hanggang 1996.

Pagdating naman sa kanyang Conviction sa 4 counts ng Libel, inihayag ng kalihim na pinag-uusapan pa ng C.A. kung hihingin ang opinyon ng Department of Justice dahil tinatawag ito ng ilan na Morale Turpitude.

Gayunman, ilang miyembro ng komisyon ang nagsabi na akma lamang ang Morale Turpitude sa halal na opisyal at hindi sa appointed gaya ni Tulfo.

Samantala, inungkat din ni Surigao del Norte 2nd District Rep. Johnny Pimentel ang lovelife ng Kalihim partikular ang relasyon nito sa kanyang 10 anak sa apat na babae.

Inihayag naman ng Kalihim na bagaman hiwalay na ay maayos pa rin ang pakiki-tungo niya sa mga nanay ng kanyang mga anak.

Nasa kamay na anya ng C.A. ang pagdedesisyon sa kanyang kumpirmasyon at bagaman ipagpapatuloy ito, wala pang ibinigay na petsa ang komisyon at kahit bigo pang makumpirma, tuloy ang kanyang pagtatrabaho bilang Kalihim ng DSWD —ulat mula kay Cely Ortega Bueno (Patrol 19)

Tinututukan na ng Department of Migrant Workers (DMW) ang sitwasyon ng mga Pinoy na ni-recruit para magtrabaho sa Call Center sa ibayong-dagat pero ginawang scammer.

Ayon kay D.M.W. Undersecretary Hans Leo Cacdac, ipinag-utos na ni Secretary Susan “Toots” Ople na ibigay ang kailangang tulong sa nasabing mga Overseas Filipino Worker.

Tugon ito ng kagawaran naging Privelege speech ni Senator Risa Hontiveros na 12 O.F.W. ang nasagip sa tulong ng Department of Foreign Affairs mula sa isang chinese syndicate na naka-base sa Myanmar.

Inihayag ni Cacdac na nakikipag-ugnayan na ang D.M.W. sa D.F.A. at iba pang kinauukulang ahensya para matulungan ang mga O.F.W. na nasa katulad na sitwasyon.

Target ng Energy Regulatory Commission (ERC) na pansamantalang tanggalin o bawasan ang ilang charge sa bill sa kuryente ng simula Disyembre.

Ito’y bilang preparasyon umano sa nagbabadyang pagtaas ng singil sa mga susunod na buwan dahil sa pagtatapos ng mga refund sa Meralco Bill.

Inihayag ni ERC Chairperson, Atty. Monalisa Dimalanta na kabilang sa unang maaaring suspendehin ang Feed-in-Tariff Allowance na katumbas ng halos P0.04 kada kilowatt hour.

Maaari rin anyang pababain ang transmission charge, na kasalukuyang nasa P0.82 kada kilowatt hour sa mga customer ng MERALCO.

Dahil ito sa nakatakdang pagtatapos sa Disyembre ng 1 sa 4 na refund sa Meralco Bill habang dalawang iba pa ang mawawala sa Enero at Pebrero ng susunod na taon.

Sinibak na ng Partido Federal ng Pilipinas (PFP) si dating Presidential Executive Secretary, Atty. Vic Rodriguez bilang miyembro ng nasabing partido.

Kinumpirma ng PFP na nagpasyahan nila ang naturang hakbang nitong Nobyembre a – 11.

Ito’y dahil umano sa “incompetence” bilang public servant, pagsuway sa partido, pag-abuso sa tiwalang ini-atang sa kanya ng Pangulo at ng PFP pag-abandona at kawalan ng katapatan.

Nilinaw naman ng PFP na hindi nakibahagi si Pangulong Bongbong Marcos sa pagpapasya na palayasin si Rodriguez pero inabisuhan sa desisyon bagay na kanyang hindi tinutulan.

Samantala, itinalaga bilang bagong Executive Vice President ng Partido si Special Assistant to the President Anton Lagdameo.

Aprubado na sa ikatlo’t huling pagbasa sa Kamara ang panukalang batas na magbibigay ng karagdagang proteksyon, seguridad at benepisyo sa mga nagtatrabaho sa media industry.

Sa botong 252 at walang tumutol, inaprubahan ng mga kongresista ang House Bill 454 o “Media Workers’ Welfare Act,” na consolidation ng limang magkakatulad na panukala.

Ayon kay House Speaker Martin Romualdez, itinuturing ng Kongreso ang Media, na tinaguriang “fourth estate”,   na mahalagang katuwang sa pagtataguyod ng bansa at pagbibigay proteksyon sa demokrasya.

Sakaling isabatas, sasaklawin ng bill ang lahat ng Media Workers at Media entities sa pribadong sektor.

Alinsunod sa panukala, dapat ay mas mataas ang sahod ng Media Workers sa itinatakdang minimum wage ng Regional Tripartite Wage and Productivity Board.

Entitled din ang mga nasabing manggagawa sa Overtime at Night Shift pay sa ilalim ng Labor Code at iba pang batas; maging miyembro ng Social Security System, Pag-Ibig Fund at PhilHealth.

Nakasaad pa sa nasabing panukala na dapat ay otomatikong regular employee na ang isang manggagawa matapos ang anim na buwan simula nang magtrabaho.

Ipinahinto na ni Bureau of Corrections (BuCor) Officer-in-Charge Gregorio Catapang ang konstruksyon sa extension building ng kanilang Headquarters sa Muntinlupa City.

Ayon kay Catapang makasaysayan ang nasabing gusali kaya’t hindi na dapat masira ang façade o harapan nito.

Hindi anya ito ang unang beses na ipinag-utos niya ang pagpapatigil sa konstruksyon.

Aminado si Catapang na kung nasa opisina siya ay humihinto ang pagsasaayos sa façade pero kapag wala o nasa ibang lugar siya ay bigla namang ipinagpapatuloy ang konstruskyon.

Samantala, ipinauubaya na ng BuCor official sa Department of Justice ang pagsasampa ng kaso laban sa mga indibidwal na sangkot paghuhukay sa New Bilibid Prison.

Nagpa-alaman din ni Catapang na 50% ng lupang nabungkal sa Excavation Project ay dinadala sa Caloocan City.