Drew Nacino

Sisimulan na sa Disyembre a – nwebe ang overseas voting registration bilang preparasyon para sa midterm elections sa Mayo 2025.

Tinututukan na ng Comelec, Department of Foreign Affairs-Overseas Voting (DFA-OVS) secretariat at mga embahada at konsulado ng Pilipinas ang pagpaparehistro ng mga pinoy sa iba’t ibang panig ng mundo.

Kabilang sa mga nagsagawa ng training para sa registration ang Philippine Embassy sa Barcelona, Spain maging sa mga konsulada sa ibang panig ng Europa; Muscat, Oman at Istanbul, Turkey.

Ayon kay Atty. Zoilo Velasco, vice-chairman ng DFA-OVS, nagkaroon ng review sa Comelec rules and regulations sa overseas voters registration at pagsasanay sa pag-operate ng voting registration machine.

Magugunitang bumaba sa bumaba sa 1.6 million ang overseas voters ngayong taon kumpara sa 1.8 million noong 2019.

Magtatapos naman ang overseas absentee voters registration sa Setyembre a – 30 ng taong 2024.

“Bilang na ang mga araw niyo!”

Ito ang babala ni Senador Sherwin Gatchalian sa mga indibidwal o grupo na nagpapadala ng mga text scam at phishing messages.

Ayon kay Gatchalian, umaasa sila na mababawasan na ang bilang ng mga kawatan ngayong minamadali na ang implementing rules and regulations para sa implementasyon ng Sim Registration Law.

Nalalapit na anya ang pagpapatupad ng nasabing batas na magsisimula sa Disyembre a – 27.

Idinagdag pa ng senador na napansin nila na patuloy ang paglaganap ng mga scam at phishing messages kahit na naipasa na ang batas.

Magsasagawa naman ang National Telecommunications Commission ng public hearing sa Disyembre a – 5 kasama ang mga telecommunications providers at iba pang stakeholder para isapinal ang IRR.

Nakasaad sa batas na ang mga sim card ay naka-deactivate kapag ibinenta at maaari lamang i-activate kapag narehistro na kung saan kailangang magpakita ng valid i.d. — Mula sa ulat ni Cely Ortega-Bueno (Patrol 19)

Sinimulan na ng San Miguel Corporation (SMC) ang pagbibigay ng refund sa lahat ng mga motoristang naapektuhan ng aberya sa Southern Luzon Expressway, Star Tollway, NAIA Expressway at Skyway.

Ayon sa SMC Infra, saklaw ng refund ang mga motoristang dumaan sa mga nasabing expressway simula ala sais ng umaga hanggang alas dos ng hapon noong Huwebes, Nobyembre a – disi syete.

Nasirang fiber optic cables sa radio frequency identification o system ang dahilan ng aberya at mabigat na daloy ng trapiko sa ilang bahagi ng SLEX, Skyway, NAIAX at Star Tollway.

Samantala, ang mga motorista namang nakapagbayad ng cash ay bibigyan ng one-time free pass, na maaaring gamitin sa mga naturang expressway.

Magtatapos naman ang pagbibigay ng refund sa mahigit walumpung libong apektadong motorista hanggang Disyembre a – bente dos.

Nanawagan na kay House Speaker Martin Romualdez ang mga transport group na magpasa na ng batas na layuning maglaan ng 10% mula sa public transport consumers tax para sa public transport modernization.

Batay ito sa ipinadalang liham ng mga transport group kay Romualdez noong Martes.

Kabilang sa mga lumagda sina liga ng transportasyon at operators sa Pilipinas National President Orlando “Ka Lando” Marquez; FEJODAP President Ricardo “Boy” Rebaño; Pasang Masda President Roberto “Ka Obet” Martin at ACTO National President Levy De Luna.

Hiniling din ng mga transport group kina House Senior Deputy Speaker Gloria Macapagal-Arroyo at Committee on Transportation Chairman Romeo Acop na isponsoran ang panukalang batas.

Makatutulong anila ito sa mga operator at driver na makalikom ng pondo upang makabili ng mga bagong unit bilang bahagi ng modernisasyon.

Idinagdag pa ng mga nasabing grupo na gagamitin din ang pondo mula sa public transport consumers tax para sa pag-aaral ng mga anak ng mga puv o puj drivers at pabahay program sa mga operator at driver sa buong bansa.

Ni-reconvene na ng Department of Transportation ang technical working group (TWG) sa motorcycle taxi upang pangasiwaan at i-monitor ang patuloy na pilot implementation ng motorcycle taxi operations.

Sa department order ni transportation Secretary Jaime Bautista noong November 7, 2022, inihayag nitong kailangang magkaroon ng isang ahensyang mangangasiwa sa motorcycle taxi operations hangga’t walang batas na ipinapasa para rito.

Bubuuin ang TWG ng DOTr Assistant Secretary at hepe ng Land Transportation Office bilang Chairpersons; board member ng Land Transportation Franchising Regulatory Board bilang vice chair; hepe ng Inter-Agency Council for Traffic, chairperson ng Office for Transportation Cooperatives, chief ng LTO-Law Enforcement staff, chief ng LTFRB Technical Division at mga kinatawan mula sa DOTr Road Transport and Infrastructure Office o kanilang mga kinatawan bilang mga miyembro.

Ang secretariat naman ng TWG ay bubuuin ng mga kinatawan mula sa LTO at LTFRB.

Magiging bahagi rin ang mga kinatawan mula sa Metropolitan Manila Development Authority at Committees on Transportation ng Kamara at Senado ng TWG.

Ito’y upang matiyak ang whole-of-government approach sa pag-issue ng karagdagang guidelines para sa pagpapatuloy ng pilot implementation.

Matapos ang mahigit 5 taon, hinatulang guilty ng Korte ang isang pulis kaugnay sa pag-torture at pagtatanim ng ebidensya sa dalawang nasawing teenagers sa drug war ng nagdaang administrasyon.

Sa desisyon ng Caloocan City Regional Trial Court Branch 122, napatunayang nagkasala si Patrolman Jeffrey Perez sa mga kasong isinampa kaugnay sa pagpatay sa mga biktimang sina Carl Arnaiz at Reynaldo ‘Kulot’ De Guzman, noong 2017.

Hinatulan si Perez ng 4 na taong pagkakakulong dahil sa pagtorture kay Arnaiz, disi nwebe anyos at apatnapung taong pagkakabilanggo dahil din sa pagtorture kay De Guzman, katorse anyos.

Life imprisonment naman ang hatol sa pulis matapos mapatunayag tinaniman nito ng iligal na droga sina Arnaiz at De Guzman at isa pang reclusion perpetua dahil sa pagtatanim ng baril bilang ebidensya kay Carl.

Ipinag-utos naman ng Korte kay perez na bayaran nito ng tig-P2 million ang mga naulila nina Arnaiz at De Guzman bilang moral at exemplery damages.

Si Arnaiz ay napatay ng mga pulis-Caloocan matapos umanong holdapin ang isang taxi-driver noong August 18, 2017 habang natagpuan ang bangkay ni Kulot sa isang bakanteng lugar sa Gapan, Nueva Ecija na tadtad ng saksak at binalot din ng packaging tape ang ulo nito.

Nagdeklara na rin ng cholera outbreak sa isa pang barangay sa Bacolod City, Negros Occidental.

Kinumpirma ni City Epidemiology and Surveillance Unit Head Dr. Grace Tan na nakapagtala na rin ng dalawang cholera cases sa barangay Mandalagan.

Ayon kay Tan, idineklara ang outbreak matapos mag-positibo sa ‘vibrio cholera’ bacteria ang dalawang water sources sa nasabing lugar.

Ilang kubeta na malapit anya sa dalawang balon ang pinagmulan ng kontaminasyon.

Pina-alalahanan naman ni Tan ang mga residente tiyaking ligtas ang ginagamit na tubig upang makaiwas sa gastrointestinal diseases.

Samantala, nagsasagawa na ng water sampling, chlorination at monitoring ang lokal na pamahalaan sa naturang barangay.

Malabong humantong ang Pilipinas sa “recession” o pagbagsak ng ekonomiya.

Ito ang tiniyak ni Secretary Benjamin Diokno bilang tugon sa tanong ng Commission on Appointments kung ano ang mga plano ng Department of Finance upang mabawasan ang epekto ng nagbabadyang global recession.

Sa kanyang pagharap sa makapangyarihang komisyon para sa kanyang ad interim appointment, isa sa mga itinurong dahilan ng kalihim, ang “young population” ng bansa sa labor sector.

Halimbawa na lamang anya nito ang unemployment rate na 5%, na pinaka-mababa bago pa magsimula ang covid-19 pandemic.

Binigyang-diin ni Diokno na sa gitna ng pagsasa-prayoridad ng gobyerno sa agrikultura, pagbuhay sa mining, power industry at manufacturing bukod pa sa pagpapadala ng overseas workers ay malabong magkaroon ng recession sa bansa.

Iginiit ng DOF chief na “manageable” ang utang bansa at hindi dapat ikabahala sa kabila ng patuloy na paglobo nito o malabong matulad sa Sri Lanka dahil mayroong malakas na economic strategy ang Pilipinas sa susunod na 6 na taon.

Hindi dapat makaapekto sa interes ng ibang bansa ang naging ugnayan ng Pilipinas at Estados Unidos.

Reaksyon ito ng China matapos ang pagbisita ni U.S. Vice President Kamala Harris sa Pilipinas kamakailan.

Ayon kay Chinese Foreign Ministry Spokesperson Zhao Lijian, hindi sila tutol sa normal na pakikipag-ugnayan ng Pilipinas at Amerika basta’t hindi ito makasisira- sa interes ng ibang bansa.

Dapat anyang maging pabor sa bawat isa ang kooperasyon at ugnayan ng mga bansa upang mapanatili ang kapayapaan sa rehiyon.

Si Harris na ang pinakamataas na opisyal ng amerika na nakabisita sa Palawan na pinakamalapit naman na teritoryo ng Pilipinas sa pinag-aagawang Spratly Islands kung saan claimant din ang China.

Posibleng irekomenda ng Senate Committee on Ways and Means ang total ban ng Philippine Offshore Gaming Operator (POGO) sa bansa.

Ito ang inamin ni Senator Sherwin Gatchalian, chairman ng kumite, matapos ang tatlong pagdinig hinggil sa mga issue sa POGO.

Ayon kay Gatchalian, marami pang nabunyag sa kanilang ginawang pagdinig kahapon tulad ng hindi tamang nakokolektang buwis sa POGO dahil sa kwestyunableng kredibilidad ng 3rd party auditor.

Lumitaw anya na mas malaki ang idinideklara ng pogo kaysa sa Philippine Amusement and Gaming Corporation habang mababa sa Bureau of Internal Revenue (BIR) kaya mali ang nakokolektang buwis.

Una nang inihayag ng senador na target nilang maipalabas at maisumite sa plenaryo ang committee report o rekomendasyon kung tuluyan na bang paaalisin o pananatilihin sa bansa ang mga pogo.

Dahil dito, namemeligrong mawalan ng trabaho ang nasa 20,000 pinoy POGO workers. —Mula sa ulat ni Cely Ortega-Bueno (Patrol 19)