Drew Nacino

Kakulangan ng mga bus at driver ang itinuro ng ilang operator na dahilan ng mahabang pila ng mga pasahero sa EDSA carousel, kasabay ng pagsisimula nang paniningil ng pasahe nitong Enero a – 1.

Una nang inihayag ng Land Transportation Franchising and Regulatory Board na ibinalik na sa normal level na 550 ang bilang ng mga bus sa EDSA carousel mula sa dating 758 noong holiday season.

Ayon kay samahan ng mga Transport Operators ng Pilipinas Executive Director at Metrolink Corporation Managing Director Patricia De Belen, maaaring dahilan ng kakulangan ng mga tsuper ay nagpahinga ang ilan sa mga ito noong bagong taon.

Ito anya ang unang beses na pumasada sila ng pasko kaya’t marami sa kanilang empleyado ang nagpasyang mag-leave sa trabaho noong linggo lalo’t holiday noong Enero a – 1 hanggang a – 2.

Idinagdag ng transport leader na posible ring nagkaroon ng “maintenance issues” na nagresulta sa kakulangan ng mga bus unit.

Idinagdag pa ni De Belen na kinailangan rin nila ng mas maraming konduktor lalo’t sinimulan nang maningil ng pasahe bunsod ng pagtatapos ng libreng sakay.

Umaasa naman ang mga operator na magiging normal na ang kanilang mga biyahe bukas at mapupunan ang kakulangan ng bus at driver.

Magbubukas ang Land Transportation Franchising and Regulatory Board (LTFRB) ng kabuuang 4,433 slots para sa registration ng transport network vehicle service o TNVS ngayong buwan.

Ayon kay LTFRB Technical Division Head Joel Bolano, sisimulan ang registration sa Lunes, Enero a – nwebe.

Layunin nitong mapigilan ang pagsusumite ng mga pekeng dokumento sa ride-hailing service applications.

Noon anya ay nauuna ang application kaya’t binaligtad na ito ng LTFRB at inuna ang pag-register para matulungan ng transport network companies ang mga aplikante na magsumite ng mga tunay na dokumento.

Sa pagkakataong ito ay face-to-face na ang registration upang maiwasan ang mga fixer na makisawsaw sa online applications.

Hindi magpapatupad ang Home Development Mutual Fund o Pag-ibig fund ng dagdag-kontribusyon ng mga miyembro nito ngayong taon.

Tiniyak ito ng Pag-ibig sa gitna nang kautusan ni Pangulong Bongbong Marcos na suspendihin ang dagdag kontribusyon sa PhilHealth.

Ito na ang ikatlong pagkakataon na sinuspinde ng nasabing government-owned and controlled corporation ang nakatakda sanang monthly premium hike.

Ayon sa Pag-ibig, nagpasya ang kanilang stakeholders noong 2019 na ipatupad ang contribution increase noon sanang 2021 pero ilang beses ipinagpaliban dahil sa covid-19 pandemic.

Hindi anila nagbabago ang premium rates simula pa noong 1986 habang ang kasalukyang minimum monthly contribution ng Pag-ibig members ay P200 na pinaghahatian ng employers at employees.

Samantala, tuloy ang contribution rate hike na 14 percent mula sa kasalukuyang 13% ng Social Security System ngayong taon.

Nilinaw ni Transportation Secretary Jaime Bautista na hindi obligasyon ng kagawaran at Civil Aviation Authority of the Philippines na bayaran o bigyan ng refund ang mga pasaherong apektado ng aberya sa NAIA.

Tugon ito ni Bautista sa hirit ni Albay Rep. Joey Salceda sa gobyerno, partikular sa DOTr at CAAP, na bayaran ang libu-libong pasaherong naperwisyo dahil sa power outage sa air traffic management system ng bansa.

Ayon kay Bautista, kailangang pag-aralang mabuti ang ligalidad nang pagbabayad ng danyos sa mga air traveller na naapektuhan ng airspace shutdown na bumuluga noong bagong taon.

Naka-atang anya sa mga airline company ang obligasyon ng pagbibigay ng refund dahil dito nagbayad ng pamasahe o binili ng mga pasahero ang kanilang ticket.

Gayunman, idinagdag ni Bautista na maaari pa rin namang “morally obligated” ang DOTr at CAAP na magbayad.

Kinumpirma ng Manila Police District na kakasa ito sa panawagan ni Interior Secretary Benhur Abalos na magsumite ng courtesy resignation ang lahat ng PNP generals at colonels.

Kinumpirma ni MPD Director, Brig. Gen. Andre Dizon na suportado niya ang panawagan ni Abalos bilang bahagi ng anti-corruption, anti-criminality drive upang tuluyang mawala ang mga anay sa hanay ng PNP.

Sa katunayan ay handa si Dizon na magbitiw pero wala itong ibinigay na eksaktong petsa kung kailan magsusumite ng courtesy resignation dahil abala pa siya sa paghahanda para sa pista ng itim na nazareno.

Magugunitang tinawag ng kalihim ang kanyang apela na ‘radical approach’ na rekomendasyon ni PNP Chief, Gen. Rodolfo Azurin Jr.

Ito umano ang tanging paraan upang linisin ang hanay ng pulisya sa kanilang posibleng pagkaka-ugnay sa operasyon ng iligal na droga.

Bibigyan ng Bureau of Immigration (BI) ng panahon o “grace period” ang mga dayuhang naapektuhan ng aberya sa mga paliparan noong Enero a – 1.

Batay ito sa inilabas na abiso ng BI para sa pagpapalawig ng validity ng mga emigration clearance certificate (ECC) ng mga apektadong banyaga sa bansa.

Ayon kay BI Spokesman Melvin Mabulac, kung nag-expire na ang Visa ng mga dayuhang apektado, magkakaroon naman ng waiver batay sa kautusan ni Commissioner Norman Tansingco.

Nakasaad sa abiso na kikilalanin o i-o-honor pa rin hanggang January 12 ang Visa basta’t ipakita lang ang kanilang ticket ng kanseladong flight noong January 1 at mga sumunod na araw maging ang kanilang boarding pass.

Ang mga lalagpas naman umano sa deadline ay kailangang magpakita ng updated Visa para hindi magkaroon ng aberya sa kanilang pag-alis sa Pilipinas.

Bumaba pa sa 11,786 ang aktibong kaso ng covid-19 sa bansa.

Batay sa datos ng DOH, karagdagang 326 covid-19 cases ang naitala kahapon kumpara sa halos 200 cases at 12,362 active cases noong Martes.

Sumampa naman sa 4,650,569 ang total caseload, kabilang ang 3,988,000 recoveries.

Nakapagtala rin ng additional 10 fatalities kaya’t umakyat na sa 65,445 ang death toll.

Nangunguna pa rin ang National Capital Region sa may pinaka-maraming kaso sa nakalipas na dalawang linggo na 2,754; sinundan ng Calabarzon, 1,291 at Central Luzon, 617.

Sobra umanong kakaiba at napakalawak ang naging panawagan ni Interior Secretary Benjur Abalos.

Tugon ito ni Senate Minority Leader Koko Pimentel sa panawagan ni Abalos na mag-resign ang lahat ng PNP generals at coronels sa harap ng pangambang sangkot ang ilang mataas na opisyal sa illegal drug trade.

Ayon kay Pimentel, maaapektuhan ng naturang panawagan kahit na ang mga opisyal na inosente at mahusay ang paggampan ng tungkulin.

Iginiit ng senador na dapat ay case to case basis na lamang ang gawin sa mga police official na hinihinalang sangkot sa illegal drug trade.

Mas maigi anyang tukuyin, kasuhan at panagutin ang mga opisyal ng PNP na sangkot sa iligal na droga sa ilalim ng conspiracy theory maging ang mga nagpo-protekta sa mga pulis. — Mula sa ulat ni Cely Ortega-Bueno (Patrol 19)

Nanawagan si Senator Raffy Tulfo sa airline companies na hangga’t maaari ay bigyan ng special rate sa pamasahe ang mga returning overseas Filipino workers na nais makapiling ang kanilang pamilya pagkatapos ng mahabang panahong pagkakawalay.

Ayon kay Senator Tulfo, dumoble ang presyo ng pamasahe papasok at palabas ng bansa matapos magka-aberya ang communications, navigation and surveillance system for air traffic management ng Civil Aviation Authority of the Philippines.

Halimbawa na lamang anya nito ang flight na Manila-Japan, na dating P20,000 hanggang P45,000 pero umaabot na umano sa P90,000 hanggang P140,000 ang one-way ticket, na hindi na kakayanin ng mga o.f.w. na limitado lang ang budget.

Partikular na hinimok ni Tulfo ang Philippine Airlines at cebu Pacific na ikunsidera ang pagbibigay ng preferencial pricing system na pabor sa mga o.f.w. na itinuturing na mga bayani sa bansa.

Gayunman, nilinaw ng isang airline company na nakusap ng tanggapan ng senador, na ang biglaang pagtaas ng pamasahe ay dulot ng demand-based algorithm na pinagbabasehan ng mga airlines sa airfare increase. — Mula sa ulat ni Cely Ortega-Bueno (Patrol 19)

Pinalawig ng Land Transportation Franchising and Regulatory Board (LTFRB) ang validity ng special permit sa mga karagdagang provincial bus units.

Sa halip na sa Enero a – 3, inextend ng LTFRB hanggang a – 15 ang validity ng nasabing permit.

Ito ang inanunsyo ni LTFRB Technical Division Head Joel Bolano matapos ang isinagawang public briefing.

Ayon kay Bolano, napansin nila sa mga nagdaang holiday season na “late” nang umuuwi sa kanilang mga bahay mula sa probinsya ang ilang biyahero kaya’t pinalawig ang special permit ng provincial buses.

Noong Disyembre, mahigit animnaraan tatlumpung provincial buses ang binigyan ng special permits upang tugunan ang pangangailangan ng mga pasahero ng masasakyan sa holiday season.