Drew Nacino

Dapat nang i-require ng gobyerno sa mga biyahero mula China ang pre-departure covid-19 test.

Ito ang panawagan ng grupong OCTA Research sa gitna nang pagluluwag ng travel restrictions sa China sa kahit matindi umanong covid-19 surge ang nararanasan sa naturang bansa.

Iminungkahi ni OCTA Research Fellow Dr. Guido David ang naturang hakbang lalo’t mayroon na ring kahalintulad na test ang US at Japan dahil sa dumaraming kaso sa China.

Ayon kay David, mataas ang “immune escape” ng mga subvariants ng covid-19 at kahit bakunado na ay maaari pa ring dapuan ng virus nang hindi nagpapakita ng anumang sintomas.

Sa ilalim ng kasalukuyang health protocols, hindi isasailalim sa covid-19 test ang mga pasaherong dumarating ng Pilipinas hangga’t sila ay fully vaccinated.

Para naman sa mga unvaccinated at partially vaccinated passengers, dapat magpakita ng negatibong covid-19 test results, pero kung wala ay sasailalim sila sa test pagdating.

Ipinadala na sa Philippine Genome Center ang swab samples ng walong pilipinong biyahero mula China na nag-positibo sa covid-19.

Sasailalim sa whole genome sequencing ang swab samples upang mabatid kung anong variant ng covid-19 ang dumapo sa mga nabanggit na pinoy.

Ayon sa Department of Health, inaasahang mailalabas ang resulta sa susunod na linggo habang nagsasagawa na rin ng contact tracing katuwang ang Bureau of Quarantine.

Nito lamang miyerkules nang kumpirmahin ng DOH na positibo sa covid-19 ang walong hindi bakunadong pinoy na dumating mula China noong December 27, 2022 hanggang January 2, 2023.

Nagpatupad ng temporary ban ang Department of Agriculture (DA) sa pag-angkat o pagpasok ng anumang poultry products mula sa walong bansa sa gitna ng o h5n1 o avian influenza outbreak.

Epektibo ang ban sa lahat ng poultry products, gaya ng manok at sisiw mula Taiwan, Ecuador, Moldova, Peru, Czech Republic, Denmark, Ireland at Poland.

Agaran ding sinuspinde ng DA ang processing, evaluation ng application at issuance ng sanitary at phytosanitary import clearance ng mga nabanggit na produkto.

Ipinag-utos naman kagawaran na kumpiskahin ang lahat ng shipment mula sa mga nasabing bansa kung saan ilang kaso ng avian influenza ang naitala.

Wala umanong naging malaking epekto sa operasyon ng Bank of the Philippine Islands (BPI) ang naranasang technical glitch ng kanilang mga depositor at customer.

Nito lamang December 30 hanggang 31 nang ma- duplicate ang ilang atm, cash accept machine deposits at e-commerce debit transactions ng BPI pero agad din itong naresolba ng bangko.

Humingi na ng paumanhin ang BPI sa kanilang mga depositor at customer kasabay ng pasasalamat sa pasensya at kanilang pag-unawa.

Aminado si BPI President at CEO Jose Teodoro Limcaoco na walang perpektong sistema subalit dahil sa nangyari ay kanilang aayusin at pag-iigihin ang serbisyo sa customers.

Sa ngayon anya ay balik na sa normal ang operasyon ng kanilang web at mobile app platforms.

Ang BPI, ang ikatlong pinaka-malaking bangko sa bansa.

Posibleng magsimula nang bumaba ang presyo ng mga gulay sa mga susunod na linggo.

Ito, ayon sa Samahang Industriya ng agrikultura (Sinag), ay dahil magsisimula na ang anihan ng sibuyas sa ikalawang linggo o Enero a – 15 kasabay ng inaasahang pagmura ng fertilizer.

Inihayag ni Sinag Chairman Rosendo So na malaki ang impluwensya ng international commodity prices sa lokal na presyo ng fertilizer kaya’t maaaring magmura na ang mga gulay.

Mula anya sa dating P2,500 noong isang taon, sumadsad na sa P800 ang kada 50-kilo ng bag ng pataba.

Idinagdag ni So na maaaring sa Pebrero o Marso ay maramdaman na ang murang gulay, kabilang ang sibuyas.

Nito lamang Disyembre ay sumirit sa 8.1% ng inflation rate, na pinaka-mataas simula noong Pebrero 1999, dahil sa mas mahal na pagkain kabilang ang mga gulay, lalo ng sibuyas.

Hindi umano maka-aapekto sa Senate Blue Ribbon Committee report ang pag-abswelto ng Office of the President sa apat na agriculture at Sugar Regulatory Administration officials na nasangkot sa sugar importation fiasco.

Ito, ayon kay Blue Ribbon Committee Chairman, Senator Francis Tolentino, ay dahil sa iba at hiwalay sa ginawa nilang investigation report ang internal motu propio administrative investigation report ng Malakanyang na isang hiwalay na sangay ng gobyerno.

Nilinaw ni Tolentino na ang Blue Ribbon Committee Report sa naturang isyu ay resulta nang ginawa nilang serye ng public hearings kung saan ito ay inadopt “unanimously” ng mga senador.

Mayroon na anyang mga naging Supreme Court ruling na nagsabing kahit binasura ang kasong administratibo sa isang opisyal ng pamahalaan ay hindi ito nangangahulugan na hindi na maaaring ipagharap ng kasong kriminal sa kaparehong reklamo.

Idinagdag ni Senator Tolentino na independent proceedings ang ginawang internal investigation ng Office of the President, maging ang imbestigasyon ng senado at anumang gagawing imbestigasyon ng Office of the Ombudsman sa nasabing issue. — Mula sa ulat ni Cely Ortega-Bueno (Patrol 19)

Bumilis ang internet speed sa Pilipinas sa huling buwan ng taong 2022.

Batay ito sa pinakabagong datos na inilabas ng global speed monitoring firm speedtest na Ookla.

Sa pinakabagong speedtest global index report ng Ookla, tumaas ang mobile download at fixed broadband speeds sa bansa noong Disyembre.

Tumaas ang mobile median download ng bansa sa average na 25.12 megabits per second kumpara sa 24.04 mbps noong Nobyembre.

Samantala, bumilis din ang fixed broadband median download speed level sa 87.13 mbps noong Disyembre mula sa 81.42 mbps na naitala noong Nobyembre.

Nakaalis na ng bansa ang lahat ng overseas filipino workers na kabilang sa mga biyahero sa Clark International Airport, Pampanga na naapektuhan ng airspace shutdown noong bagong taon.

Kabilang ang dalawandaan limampung ofw na pawang pasahero sa Clark, na patungong Qatar at United Arab Emirates, sa mahigit limampu’t anim na libong biyaherong naapektuhan ng flight cancellations.

Kinumpirma ni Atty. Falconi Millar, Regional Director ng Overseas Workers Welfare Administration-Region 3 na agad nilang inasikaso at sinaklolohan ang mga stranded na ofw.

Nito anyang Enero a – 3 ang flight ng huling batch ng mga stranded ofw na apektado.

Tiniyak naman ni Millar ang kahandaan ng OWWA na tumugon sa pangangailangan ng mga ofw kahit sa hindi inaasahang pagkakataon.

Hinimok ng DOH ang mga deboto na mahigpit na sumunod sa health at safety protocols upang maiwasang maging covid-19 superspreader event ang Pista ng Itim na Nazareno sa Lunes, Enero a – nwebe.

Ipinaliwanag ni DOH – NCR Director Gloria Balboa na anumang aktibidad na mayroong mass gathering ay maaaring maging superspreader ng sakit.

Bagaman hindi anya nangangahulugan na magiging superspreader event ang Pista ng Nazareno, maaari pa rin itong mangyari dahil sa pagsisiksikan at pagkukumpulan ng mga deboto.

Pinapurihan naman ni Balboa ang mga opisyal ng simbahan ng Quiapo makaraang maglagay ng mga safeguards upang mabawasan ang peligro nang hawaan.

Inabsuwelto ng Office of the President (OP) ang kaso ng mga dating opisyal ng Sugar Regulatory Administration (SRA) na sangkot umano sa nabulilyasong importasyon ng 300,000 metric tons ng refined sugar noong Agosto.

Kabilang sa mga inabsuwelto sina dating Agriculture Undersecretary Leocadio Sebastian, dating SRA Administrator Hermenegildo Serafica ng SRA board at board members Roland Beltran at Aurelio Gerardo Valderrama Jr.

Naharap sa mga kasong grave misconduct, grave dishonesty, at conduct prejudicial to the best interest of the service ang mga respondent na nagbitiw sa kani-kanilang pwesto matapos sumingaw ang issue.

Sa sampung pahinang desisyong pirmado ni Executive Secretary Lucas Bersamin, pinagsabihan lamang ng OP ang mga respondent na mas maging maingat sa paggampan sa kanilang mga tungkulin.

Ipinunto rin ng OP na ang issuance ng Sugar Order 4 ay ginawa “in good faith” o walang masamang intensyon at nagkaroon lamang ng miscommunication sa pag-aakalang ng mga respondent na otorisado silang pumirma.