Drew Nacino

Dapat i-prayoridad ng gobyerno ang pag-resolba sa malaking “gap” o agwat ng presyo ng ibinebentang sibuyas ng mga magsasaka at mga nabibili ng mga consumer.

Ito ang ipinanawagan ng grupong Samahang Industriya ng Agrikultura (SINAG) sa Department of Agriculture makaraang pumalo na naman sa P600 ang kada kilo ng sibuyas sa ilang pamilihan.

Ayon sa SINAG, ang farmgate price ng sibuyas ay umaabot sa P250 hanggang P300 kada kilo habang ang retail price ay hindi dapat lumampas sa P400 kada kilo.

Gayunman, sumirit hanggang P720 ang pulang sibuyas sa ilang palengke, lalo sa Metro Manila.

Iginiit ng SINAG na sa halip hintayin ang mga bagong angkat na sibuyas, na maaaring maka-apekto sa farmgate prices kasabay ng pagsisimula ng anihan, dapat tutukan ng DA ang pagresolba sa malaking agwat ng farmgate at retail prices.

Ilang lugar sa Lalawigan ng Bulacan ang binaha makaraang magpakawala ng tubig ang angat at ipo dams sa Norzagaray.

Kabilang sa mga apektado ang mga Bayan ng Angat, San Rafael, Bustos, Baliwag, Pulilan, Plaridel, Calumpit, Paombong at Hagonoy.

Ayon sa PAGASA, nagbukas sila ng tatlong gate sa Angat ng 8.5 meters dahil malapit na nitong maabot ang spilling level habang ang Ipo ay nagbukas ng anim na gates na may 9.2 meters.

Hanggang kahapon ng umaga ay umabot sa 215.03 meters ang Reservoir Water Level (RWL) ng Angat kumpara sa Normal High Water Level (NHWL) na 212 meters.

Naitala naman ang 101.04 meters na RWL sa Ipo malapit sa NHWL na 101.10 meters.

Inihayag ni Ailene Abelardo, Hydrologist ng Hydro-Meteorology Division ng PAGASA, na magpapatuloy ang pagpapakawakala ng tubig dahil sa pag-ulang dulot ng amihan kahit mahina ito.

Isang motorcycle rider ang patay habang isang security guard ang sugatan matapos humarurot ang isang jeep at papasok sa lobby ng isang ospital sa Sta. Ana, Maynila.

Kinilala ng Manila Police District ang nasawing si Noe Ocenar Abaigar habang nasaktan ang guwardyang si Marvin Pelaez.

Naganap ang insidente sa kahabaan ng New Panaderos Exit sa harapan ng Trinity Women and Childrens Hospital, kahapon.

Batay sa imbestigasyon, na-flat umano ang gulong ng jeep na minamaneho ni Ronaldo Fanis at nagpagewang-gewang dahilan upang mawalan ng kontrol sa manibela.

Tumilapon ang rider nang mahagip ng jeep bago ito magtuloy-tuloy sa lobby ng naturang pagamutan.

Hawak na ng MPD si Fanis at nahaharap sa kasong Reckless Imprudence Resulting to Homicide and Injuries at Damage to Property.

Limang taxi driver ang inaresto ng Land Transportation Office-National Capital Region West makaraang tumangging magsakay ng mga pasaherong Balik-Metro Manila.

Kinumpirma ng LTO na ang pag-aresto sa mga nasabing tsuper ay bahagi ng kanilang “Oplan Isnabero”  partikular sa Parañaque Integrated Terminal Exchange maging sa Pasay City at ilang bahagi ng Metro Manila, kahapon.

Ayon kay LTO – NCR – West Director Roque Verzosa, magpapatuloy ang kanilang operasyon laban sa mga isnaberong taxi driver upang matiyak ang kaayusan at kaligtasan ng mga biyahero.

Sa ilalim ng Joint Administrative Order 2014-01, pagmumultahin ng P5,000 hanggang P15,000 ang sinumang tsuper na “hindi magseserbisyo sa publiko o tumangging magsakay” at kakanselahin ang Certificate of Public Conveyance.

Pina-alalahanan naman ni Verzosa ang mga taxi driver na gampanan ang kanilang responsibilidad kasabay ng pagdami ng mga pasaherong nangangailangan ng public transportation.

Bahagya muling umakyat sa 12,376 ang aktibong kaso ng Covid-19 sa bansa.

Ito’y makaraang makapagtala ang DOH ng karagdagang 467 covid cases kahapon.

Dahil dito, sumampa na sa 4,067,678 ang total caseload, kabilang ang 3,989,826 recoveries at 65,476 death toll.

Nananatili ang National Capital Region bilang may pinaka-maraming kaso sa nakalipas na dalawang linggo, 2,311; sinundan ng CALABARZON, 1,118; Central Luzon, 540 at Western Visayas, 337.

Itinanggi ng Philippine National Police ang ulat na mayroong “destabilization” plot sa militar dahilan nang ipinatupad na full alert status ng ahensya.

Iginiit ni PNP spokesperson, Col. Jean Fajardo na walang katotohanan ang kumakalat online na memorandum na nagsasabing nasa pinakamataas na alert status ang bansa.

Ito’y dahil umano sa mga isyu sa headquarters ng Armed Forces of the Philippines sa Camp Aguinaldo.

Sa kabila nito, kinumpirma ni Fajardo na naka-heightened alert ngayon ang PNP kasabay ng Pista ng Itim na Nazareno.

Nilinaw din ng tagapagsalita ng Pambansang Pulisya na ang mga kumakalat na larawan ng mga armored vehicles sa loob ng kanilang headquarters sa Kampo Crame ay bahagi lamang ng seguridad sa pagdiriwang.

Samantala, ipinag-utos na ni PNP chief, Gen. Rodolfo Azurin Jr., ang imbestigasyon upang matukoy kung kanino nanggaling ang dokumento at inabisuhan ang publiko na huwag basta magbahagi ng impormasyon na hindi naman beripikado.

72 heneral at koronel mula sa National Capital Region Police Office (NCRPO) ang pasado sa isinagawang surprise drug test.

Kinumpirma ni NCRPO chief, Maj. Gen. Jonnel Estomo na sumailalim ang mga opisyal sa drug examination sa Camp Bagong Diwa sa Bicutan, Taguig City.

Negatibo ang mga nasabing opisyal batay sa resulta ng PNP Crime Laboratory Field Office.

Ang nasabing hakbang ay alinsunod sa panawagan ni Interior Secretary Benhur Abalos na magsumite ng courtesy resignation ang lahat ng heneral at koronel upang masawata umano ang iligal na droga sa hanay ng PNP.

Matapos ang dalawang taong mahigpit na protocols sa gitna ng covid-19 pandemic, umarangkada na ang isang linggong pagdiriwang ng sinulog 2023 sa Cebu City.

Lumarga ang unang araw ng aktibidad sa pamamagitan ng Novena mass at penitential walk with Jesus para kay Señor Sto. Niño bilang hudyat nang pagsisimula ng ika-apatnaraan limampu’t walong taong kapistahan.

Sa pagtaya ng Cebu City Police, nasa tatlundaan libong deboto ang dumalo sa misa at dumagsa sa penitential walk mula sa Fuente Osmeña hanggang Basilica Minore Del Sto. Niño, kahapon.

Ayon kay Cebu City Police Director, Col. Ireneo Dalogdog, wala namang naitalang “untoward incident” sa opening ceremony.

Ito, anya, ay bunsod ng pagpapatupad ng mahigpit na seguridad upang matiyak ang maayos at mapayapang pagdiriwang.

Magtatagal ang kapistahan hanggang sa linggo, Enero a – 15 kasabay ng traslacion kung saan inaasahang daragsa ang mahigit dalawang milyong deboto.

Posibleng bumalik sa Department of Agriculture si dating Undersecretary Leocadio Sebastian matapos absuweltuhin ng Malakanyang sa sugar importation fiasco.

Ito ang inihayag ni DA Deputy Spokesperson Rex Estoperez matapos ibasura ng Office of the President (OP) ang administrative complaint laban kay Sebastian at iba pang opisyal ng Sugar Regulatory Administration.

Kinabibilangan ito nina dating SRA board Administrator Hermenegildo Serafica, Board Members Roland Beltran at Aurelio Gerardo Valderrama Jr.

Ayon kay Estoperez, tinatalakay na nila sa kagawaran ang posibleng pagbabalik ni Sebastian o kung anong magiging posisyon nito sakaling italaga muli ni Pangulong Bongbong Marcos, na nagsisilbi namang DA secretary.

Nirerespeto anya nila anuman ang desisyon ng OP na absweltuhin ang sina sebastian maging ang pasya kung pababalikin ito sa DA.

Gayunman, hinimok ni Estoperez ang dating DA official na makipag-usap muna sa OP upang mas maging malinaw ang issue.

Aabot na sa P10 billion ang halaga ng mga nasabat na iligal na droga sa unang anim na buwan sa panunungkulan ni Pangulong Bongbong Marcos.

Batay ito sa 2022 year-end report ng Department of the Interior and Local Government.

Ayon kay Interior Secretary Benjur Abalos, mahigit tatlumpung libong drug suspects naman ang inaresto ng philippine national police sa mahigit dalawampu’t apat na libong anti-drug operations.

Katuwang ng PNP sa mga nasabing operasyon ang Philippine Drug Enforcement Agency.

Nakapagtala rin ng maliit na bilang ng napatay sa police anti-drug operations sa nakalipas na anim na buwan.

Magugunitang nanawagan si Abalos na magsumite ng courtesy resignation ang lahat ng police general at colonel bilang bahagi ng paglilinis sa hanay ng PNP sa gitna nang ulat na nabuhay muli ang “ninja cops.”