Drew Nacino

Lumobo sa mahigit 1.356 billion kilo ng imported meat products ang inangkat ng Pilipinas noong isang taon sa gitna nang problema sa supply at produksyon ng baboy.

Ito na sa ngayon ang pinaka-malaking bulto ng karneng baboy na inangkat sa kasaysayan ng bansa sa kabila ng pagkalat ng African Swine Fever.

Kumpara ito sa naitala ng Bureau of Animal Industry (BAI) na 1.165 billion kilo ng karneng inimport noong isang taon.

Ayon sa BAI, ang pagtaas ng overall meat imports ay dulot ng 28% growth sa pork imports noong isang taon na umabot sa 710.3 million kilograms.

Halos 400 million kilograms ng kabuuang inangkat na karne ay belly cuts, na pinatawan ng mas mababang taripa na kamakailan ay pinalawig ni Pangulong Bongbong Marcos hanggang katapusan ng Disyembre, 2023.

Una nang inihayag ng pamahalaan na layunin ng mas mababang taripa na makapag-import ng mas maraming agricultural products, gaya ng karne upang mapababa ang presyo ng mga nasabing bilihin.

Batay sa datos ng Consumer at Market data platform na Statista, pang-pito ang Pilipinas sa mga bansang may pinaka-malaking konsumo ng karne habang nangunguna ang China, sinundan ng Japan, Mexico, U.K, South Korea at U.S.

Posibleng bulalakaw ang bumagsak na unidentfied flying object na mistulang bolang apoy na namataan sa Palawan, noong Enero 7.

Ito ang nilinaw ng Philippine Space Agency (PhilSA) sa kabila ng mga pangambang missile o bahagi ng rocket mula China ang misteryosong bagay nang masaksihan ito ng ilang residente sa mga Bayan ng Bataraza at Rizal.

Namataan ang nasabing bagay gabi noong Sabado na sinundan ng isang malakas na pagsabog.

Ayon sa PhilSA, batay sa nakalap na impormasyon, kabilang ang CCTV footage, hindi malayong isa itong maliit na bulalakaw lalo’t kadalasang nagkaka-pira-piraso ang bahagi nito sa himpapawid bago bumagsak.

Ang mga malalaki namang bulalakaw ay kadalasang hindi nagkakapira-piraso at buo itong bumabagsak sa lupa at nagdudulot ng isang malakas na tunog, gaya ng kulog.

Itinanggi rin ng ahensya ang posibilidad na bahagi ng chinese rocket na long march 7A, na pinalipad noong Sabado, ang namataan dahil malayo umano ang flight path nito sa Palawan.

Nananatiling maayos at mapayapa ang pagdiriwang ng Pista ng Itim na Nazareno sa Quiapo, Maynila.

Ito ang tiniyak ni Quiapo Church Attached Priest, Father Earl Allyson Valdez matapos ang Walk of Faith na isinagawa kahapon mula sa Quirino Grandstand patungong simbahan ng Quiapo.

Bagaman wala pa ring Traslacion at patuloy ang dagsa ng mga deboto, kapansin-pansing tila mas disiplinado ang mga tao ngayong taon.

Sa panig naman ng Manila Police District, inihayag ng Hepe nitong si Brig. Gen. Andre dizon na patuloy na 24 oras na tinututukan ng 5,000 nakadeploy na Pulis ang seguridad sa buong lungsod.

Nananatiling buo ang suporta ng Armed Forces of the Philippines sa nagbabalik nilang hepe na si gen. Andres centino.

Tiniyak din ng AFP na mataas pa rin ang kanilang morale sa kabila ng pagpapalit ng liderato sa kabila ng kumakalat na ulat na Destablization plot.

Ayon kay AFP spokesman, Col. Medel Aguilar, normal ang sitwasyon at walang dapat na ikabahala ang publiko.

Inihayag naman ni Army Spokesman, Col. Xerxes Trinidad, Professional Organization ang sandatahang lakas at nirerespeto at sinusuportahan nila ang  anumang desisyon ng commander-in-chief na si Pangulong Ferdinand Marcos Jr.

Kampante anya sila na susuportahan ni Centino ang Philippine Army upang maging ‘world-class land force’ sa taong 2028, Philippine Navy at Airforce, sa pag-protekta sa interes ng bansa.

Naniniwala ang National Telecommunications Commission (NTC) na hindi na kailangan pang palawigin ang anim na buwang sim registration sa bansa.

Kumpiyansa si NTC director Imelda Walcien na matatapos nila ng mga telecommunication company ang pagrerehistro sa halos 169M sim cards hanggang sa deadline nito na April 26.

Alinsunod sa batas, mayroon lamang 180 araw ang mga telco upang irehistro ang mga sim cards o simula noong Dis. 27 ng nakaraang taon.

Gayunman, kung mabibigo anya ang mga telco na matapos ang registration, maaari namang palawigin ng Department of Information and Communications Technology ang proseso ng apat pang buwan.

Hanggang nitong Biyernes, halos 15M sim cards na ang nakarehistro o 9% ng kabuuang 168.98 million sim cards na ginagamit sa bansa.

Binubuo ito ng 7.2 million mula sa Smart; 6.3 million sa Globe habang 1.2 million sa DITO telecommunity.

Nakikiisa si Pangulong Ferdinand “Bongbong” Marcos Jr., sa mga Pilipinong Katoliko sa pagdiriwang ng Pista ng Itim na Nazareno, ngayong araw, Enero 9.

Hangad ni Pangulong Marcos ang ligtas, makabuluhan at taimtim na pagdiriwang ng mga deboto ng kapistahan ni Nuestro Padre Señor Jesus De Nazareno.

Kasabay ng pagpapamalas anya ng mga mananampalataya ng kanilang debosyon sa Poong Nazareno, dapat alalahanin ang malalim na ugat ng ating kultura sa paggapi ng mga matitinding pagsubok at kapighatian.

Idinagdag ng Punong Ehekutibo na sa pamamagitan ng pananampalataya ay nalulupig natin ang anumang nagbabadyang unos upang magbigay-daan sa buhay na puno ng biyaya at katatagan.

Dapat din anyang magsilbing inspirasyon si Hesu Kristo at magsilbing sentro ng pag-ibig, pag-asa at kahabagan, lalo ngayong panahon ng kagipitan at kapighatian. —ulat mula kay Gilbert Perdez (Patrol 13)

Posibleng maulit sa ilang bahagi ng Metro Manila ang krisis sa tubig noong 2019.

Ito ang ibinabala ng Metropolitan Waterworks and Sewerage System (MWSS) sa sandaling maudlot ang konstruksyon o operasyon ng kaliwa dam matapos ang taong 2027.

Ayon kay MWSS chief regulator Patrick Lester Ty, kabilang ang Kaliwa Dam sa bagong water source projects na pinaka-mahalaga upang matiyak ang walang-patid na supply ng tubig, partikular sa west concession zone.

Saklaw nito ang mga customer ng Maynilad sa Caloocan, Malabon, Navotas, Valenzuela, ilang bahagi ng Quezon City, Maynila, Makati, Pasay, Parañaque, Las Piñas, Muntinlupa, maging sa Bacoor, Imus, Kawit, Rosario at Noveleta, Cavite.

Kung hindi anya makapag-se-serbisyo sa publiko ang nasabing water reservoir matapos ang taong 2027, magkakaroon ng problema sa supply na gaya nang nangyaring krisis noong 2019.

Isinusulong ng MWSS ang development ng kontrobersyal na New Centennial Water Source-Kaliwa Dam Project sa Tanay, Rizal na layuning mapigilan ang nagbabadyang water crisis sa Metro Manila at iba pang lugar.

Gayunman, tinututulan ito ng ilang grupo, kabilang ang mga katutubong Dumagat-Remontado, dahil maraming komunidad ang maaapektuhan at makasisira ang proyekto sa kanilang ancestral domain.

Asahan na ngayong buwan ang panibagong dagdag-singil ng Meralco.

Ito’y dahil sa mas mahal na kuryente sa Wholesale Electricity Spot Market (WESM), na kabilang sa nag-susupply sa MERALCO matapos suspendihin ng South Premiere Power Corporation (SPPC) ang kanilang Power Supply Agreement (PSA) noong Disyembre.

Ayon kay MERALCO Vice President and Utility Economics Department head Lawrence Fernandez, bukod pa ito sa pagtatapos ng December Distribution Refund at tumaas na foreign exchange rate.

Bagaman makatutulong anya ito sa dollar-denominated portion ng generation charges, mas malaki pa rin ang epekto sa singil ng mahal na supply mula sa wesm.

Aabot sa karagdagang 670 megawatts ang hinugot ng nasabing power distributor sa wesm makaraan ang suspensyon ng fixed price PSA sa SPPC. na subsidiary ng San Miguel Corporation dahil sa Temporary Restraining Order ng Court of Appeals.

Sa kabila nito, sinelyuhan naman ng MERALCO ang emergency power supply deal sa joint venture ng Aboitiz at Ayala Group noong Disyembre 15 upang mabawasan ang epekto ng mas mataas na singil.

Gayunman, hanggang sa Enero 25 lamang ngayong taon epektibo ang Emergency PSA.

Ipinanawagan na sa gobyerno ng grupong Alliance of Concerned Teachers (ACT) na i-prayoridad ang dagdag-sahod ng mga manggagawa, lalo ng mga nasa sektor ng edukasyon.

Ito, ayon kay ACT– NCR president Vladimir Quetua, ay dahil sa patuloy na pagsirit ng inflation rate sa bansa sa nakalipas na sampung buwan.

Paliit na anya nang paliit ang kinikita ng mga uring manggagawa dahil sa nagmamahalang mga bilihin kaya’t dapat tutukan ng pamahalaan ngayong taon ang dagdag-sweldo.

Kabilang sa mga dapat pagtuunang-pansin ni Pangulong Bongbong Marcos ang pag-sertipika bilang urgent sa wage at salary increase bills na inihain sa kongreso.

Sisimulan namang talakayin ang mga nasabing panukala sa sandaling magbalik sesyon sa Ene. 23.

Muling nagmahal ang sibuyas sa ilang palengke sa Metro Manila, ilang araw bago ang anihan.

Sa Balintawak Market, umabot sa P560 ang kada kilo ng sibuyas habang nasa P600 sa Kamuning Market sa Quezon City matapos magka-ubusan ng supply, kahapon.

Ito ang dahilan kaya’t ilang mamimili ang pumila sa Kadiwa Store sa tanggapan ng Department of Agriculture kung saan mas mura o P170 ang kada kilo.

Gayunman, 800 kilo lamang ang ibinentang sibuyas na mula sa Nueva Ecija na agad namang naubos.

Magugunitang inihayag ng grupong Samahang Industriya ng Agrikultura na posibleng magmura na ang sibuyas dahil sa inaasahang pagsisimula ng anihan sa Ene. 15.

Samantala, nagmahal naman ng P10 hanggang P20 ang ilang gulay gaya ng ampalaya P120 kada kilo mula sa dating P100; repolyo, P80 mula sa dating P70;

Patatas, P130; Kamatis, P100; Talong, P120, Carrots P100, kada kilo at Sitaw, P15 kada tali habang walang masyadong paggalaw sa presyo ng mga karneng manok, baboy, baka at isda.

Ang pagtaas ng presyo ng mga pagkain ang pangunahing dahilan ng pagbilis sa 8.1% ng inflation rate sa bansa noong Disyembre.