Drew Nacino

Hindi malayong tumaas muli ang COVID-19 cases matapos ang May 9 elections

Ito ang ibinabala ni National Task Force Against COVID-19 Medical Adviser, Dr. Ted Herbosa sa gitna ng inaasahang pag-arangkada ng kampanya para sa local positions simula March 25.

Ayon kay Herbosa, kung datos ang pagbabatayan ay hindi imposibleng matulad ang Pilipinas sa India at South Korea na nakaranas ng COVID-19 surge matapos ang kani-kanilang halalan.

Gayunman, maiiwasan ang ganitong scenario kung patuloy na tumataas ang vaccination rate ng bansa.

Isang panibagong COVID-19 variant ang nagdiskubre sa Israel.

Ayon sa Ministry of Health ng Israel, dalawang kaso ng bagong COVID-19 variant ang naitala.

Gayunman, nilinaw ng ahensya na hindi sila gaanong nababahala sa bagong strain na wala pang pangalan.

Ang naturang strain na pinagsamang dalawang sub-variants ng omicron ay natunton sa dalawang pasaherong dumating sa Ben Gurion International Airport.

Mild lamang ang sintomas na may kasamang pananakit ng ulo, kasu-kasuan ang dala ng bagong variant at hindi kailangan ng special medical response.

Nilinaw ng PHIVOLCS na walang banta ng tsunami sa Pilipinas matapos ang magnitude 7.3 na lindol sa Japan.

Ayon sa PHIVOLCS, posible lamang ang matataas na alon o tsunami para sa mga baybaying nasa layong 300 kilometers mula sa sentro ng pagyanig.

Wala namang nasugatan o napinsala sa pagyanig pero mahigit dalawang milyong kabahayan ang walang kuryente habang sinusuri na rin ang Fukushima Dai-Ichi Nuclear Power Plant.

Nito lamang Lunes, niyanig naman ang Pilipinas ng magnitude 6.4 na naramdaman sa Metro Manila at Southern Luzon.

Balik na sa normal ang walk-in transactions ng lahat ng Philippine Embassies at Consulates sa iba’t ibang panig ng mundo, simula Marso a–21.

Ito ang kinumpirma ni Foreign Affairs Undersecretary Brigido Dulay alinsunod sa utos ni Foreign Affairs Secretary Teodoro Locsin , Jr.

Indikasyon ito na bumalik na sa pre-pandemic level ang operasyon ng lahat ng embahada at konsulada.

Inilarga ang nasabing hakbang kasabay ng pagsisimula ng DFA na mag-accommodate ng passport walk-in applicants sa courtesy lane sa lahat ng consular office sa bansa.

Asahan na ang pagtagaktak ng pawis makaraang ideklara ng pagasa ang na pagsisimula ng tag-init sa Pilipinas.

Inihayag ng PAGASA na tuluyan nang nagwakas ang Northeast Monsoon o Amihan season kasabay ng pag-ihip ng Easterlies o hangin mula sa Pacific Ocean dahilan upang mangingibabaw ang mainit na panahon.

Inabisuhan naman ng State Weather Bureau ang publiko na mag-ingat, lalo sa paglabas ng bahay upang mabawasan ang heat stress at ugaliin ang palagiang pag-inom ng tubig.

Ibinabala rin ng Department of Health (DOH) na maaaring magresulta sa heat stroke ang tumitinding init ng panahon.

Karaniwang naitatala tuwing tag-init ang pinaka-mataas na temperatura at heat index sa kalagitnaan ng dry season.

Pinag-aaralan na ng Malakanyang ang mungkahing magpatupad ng four-day work week upang mabawasan ang matinding epekto ng walang-prenong oil price increase.

Ayon kay Acting Presidential Spokesman Martin Andanar, kailangang maging maingat sa pagsusuri ng naturang hakbang at dapat ding balansehin ang rekomendasyon.

Una nang iminungkahi ni Socio-Economic Planning Secretary Karl Kendrick Chua na ipatupad ang 4-day work week upang makatipid ang publiko sa gastos sa pagko-commute.

Nilinaw ng Department of Labor and Employment (DOLE) na maaari namang magpatupad ang mga employer ng four-day work week kahit walang bagong batas o department order.

Ayon kay DOLE Undersecretary Benjo Benavidez, nakapag-issue na sila ng mga labor advisory na nagpapahintulot sa mga employer na magpatupad ng flexible work arrangements, simula pa noong isang taon.

Kabilang na rito ang work-from-home, pagbabawas ng araw ng trabaho at job rotation.

Ipinunto ni Benavidez na nasa pagpapasya na ng mga employer kung paano i-reregulate o isasagawa ang kanilang operasyon.

Bagaman maaari naman anyang panatilihin ang walong oras kada araw na duty kahit mayroong four-day work week, dapat itong pagkasunduan ng employers at employees.

Maaaring magpatupad ang gobyerno ng 4-day work week sa gitna ng walang prenong pagtaas ng presyo ng mga produktong petrolyo.

Ito ang inirekomenda ni Socio-Economic Planning Secretary Karl Kendrick Chua sa kanyang pagharap sa Talk to the People ni Pangulong Rodrigo Duterte.

Ayon kay Chua, Director-General ng National Economic and Development Authority (NEDA), makatitipid ang publiko sa gastos sa pag-ko-commute at mga motorista sa konsumo sa krudo kung mayroong 4-day work week.

Nasubukan naman na anya noong dekada nobenta ang nasabing hakbang na naging epektibo kontra sa oil price increase na idinulot ng giyera sa Iraq.

Bumababa na ang vaccination numbers sa bansa simula pa noong Nobyembre.

Inamin ni Vaccine Czar Carlito Galvez, Jr. sa Talk to the People ni Pangulong Rodrigo Duterte na sa katunayan ay lima hanggang anim na milyon na COVID-19 vaccine doses na lamang ang ituturok ngayong Marso.

Noong isang taon anya ay problema ang supply pero nagsisimula nang magkaroon ng demand issue dahil gumaganda na ang kalagayan ng bansa, indikasyong nagiging kampante ang mga mamamayan sa pagpapabakuna.

Ayon kay Galvez, mayroong patuloy na pagbaba ng daily vaccination output bunsod ng mababang turn-out sa pagtuturok ng booster sa kabila ng mataas na porsiyento ng vaccine willingness na 80%.

Sa ngayon ay aabot na sa mahigit 139 million COVID-19 vaccine doses na ang naiturok habang 64.6 million na ang fully vaccinated.

Samantala, mayroong good turn-out ang pediatric vaccination na 8.7 million fully vaccinated para sa mga edad dose hanggang disi syete at 1.2 million first dose ang naiturok para sa lima hanggang labing-isang taon.