Drew Nacino

Ipinahiwatig na ni Trade Secretary Alfredo Pascual ang pagpayag sa hirit ng mga manufacturer na magtaas ng suggested retail price (SRP) sa ilang basic necessities at prime commodities.

Ayon kay Pascual, kinikilala ng Department of Trade and Industry ang mga panawagan ng mga manufacturing company na payagan na silang magtaas ng presyo.

Ito, anya, ay upang makapagpatuloy ang kanilang mga kumpanya na apektado rin ng pagmahal ng commodities sa buong mundo, lalo na ang mga nag-aangkat para sa kanilang produksyon.

Aminado ang kalihim na dapat intindihin na kailangang pagalawin na ang presyo alinsunod sa nangyayari sa merkado upang maiwasan ang tanggalan ng mga tao sa mga kompanya para makatipid.

Anumang araw mula ngayon ay ilalabas na ng DTI ang panibagong srp sa ilang food products, gaya ng de-latang sardinas, karne, gatas at kape.

Kung bahagya nang napawi ang luha ng mga mamimili sa bigat sa bulsa ng presyo ng sibuyas, nagmahal naman ang lokal na bawang.

Batay sa price monitoring ng Department of Agriculture, bagaman may supply pa ng native na bawang ang ilang pamilihan sa Metro Manila, sumisipa naman ang presyo nito hanggang P400 per kilo.

Kumpara ito sa P100 na kada kilo ng imported garlic na karaniwang nagmumula sa China o Taiwan.

Ipinaliwanag ng Samahang Industriya ng Agrikultura (Sinag) na karaniwang numinipis ang supply ng bawang hanggang Pebrero dahil Marso pa ang anihan.

Gayunman, naniniwala si Sinag Chairman Rosendo So na malabong sumirit hanggang P600 o P700 ang kada kilo ng bawang gaya ng nangyari sa sibuyas, lalo’t nasa P80 hanggang P100 ang imported.

Maaari anyang wala nang bumili ng lokal na sibuyas kung lalo pa itong magmamahal.

Hindi dapat payagan ng pamahalaan na imbestigahan ng mga kinatawan ng International Criminal Court (ICC) Ang sinumang opisyal ng Pilipinas.

Ito ang binigyang-diin ni Chief Presidential Legal Counsel Juan Ponce Enrile matapos payagan ng ICC ang hiling ng prosecutor nito na ipagpatuloy ang imbestigasyon sa madugong war on drugs.

Ayon kay Enrile, bilang abogado ng pangulo, hindi niya kikilalanin ang kapangyarihan ng ICC dahil wala itong hurisdiksyon sa Pilipinas, makaraang kumalas ang bansa sa Rome Statute na nagtatag sa nasabing international tribunal.

Sa katunayan, dapat anyang ipaaresto ang mga ICC investigator na pupunta sa Pilipinas para silipin ang nangyari sa mga biktima ng giyera kontra droga.

Iginiit ng dating senate president na masyado ng nakiki-alam ang ICC sa usaping panloob ng Pilipinas at sa halip na agarang magdesisyon ay dapat munang  humingi ng permiso para makapasok ang kanilang mga imbestigador sa bansa.

Tinatayang 400,000 litro ng krudo na tinangkang ipuslit sa bansa ang nasabat Tawi-Tawi.

Nagsasagawa ng maritime patrol sa Turtle Islands ang mga otoridad nang maharang ang dalawang sasakyang pandagat na kargado ng 400,000 liters ng diesel.

Ayon kay Joint Task Force Tawi-Tawi Commander, Brig. Gen. Romeo Ricadio, namataan ng 112^th Marine Company at Taganak Municipal Police ang foreign vessel na Marnia Penang at isang local vessel na Jaslyn Stacy Legazpi na nakadaong sa Lihiman Island.

Aminado naman ang kapitan ng Jaslyn Stacy na si Rodrigo Sarol na nagkarga sila ng krudo mula sa marnia penang at sa katunayan ay may naiwan pang 200,000 liters.

Napag-alamang nagmula sa Malaysia ang Marnia Penang na may 16 na crew habang nagmula sa Navotas City ang Jaslyn Stacy na may 13 crew.

Mahigit 1.3 milyong kabahayan, lalo sa mga liblib na lugar ang nanganganib makaranas ng rotating power interruptions ngayong taon.

Ito’y dahil hirap pa rin ang National Power Corporation (NPC) na bayaran ang kanilang konsumo sa krudo.

Aminado si Energy Secretary Rafael Lotilla na lumaki ang gastos sa krudo at maaaring maka-apekto ito sa power supply, partikular sa mga lugar na hindi konektado sa grid.

Inihayag ng Department of Energy at NPC na ang 2023 forecast fuel requirements para sa small power utilities group (SPUG) ay P11.4 billion.

Gayunman, P7.5 billion lamang ang available budget dahil ang fuel price assumption ay nasa P55 per liter lamang nang nilikha ang pondo subalit kalauna’y sumampa sa P74 ang kada litro.

Ibinabala rin ng kalihim na kung walang karagdagang pondo, tiyak maaapektuhan ng power outages ang mga residente sa mga SPUG area.

Dahil kakapusin sa krudo, magbabawas ng operating hours ang mga planta na maaaring abutin na lamang ng 15 oras kada araw kumpara sa kasalukuyang 24 oras, na magreresulta naman sa 5 oras lamang na supply ng kuryente kada araw.

Pagkalat ng mga smuggled na frozen chicken ang itinuturong dahilan nang pagnipis ng supply ng itlog at pagtaas ng presyo nito sa bansa.

Ito ang inihayag ni Albay 2^nd District Rep. Joey Salceda sa gitna nang “nangingitlog” na problema sa local poultry industry.

Ayon kay Salceda, ang problema sa itlog ay anak ng problema sa supply ng manok at ang pagkaunti ng mga nag-aalaga nito o populasyon ng manok ang puno’t dulo ng egg shortage at price increase sa bansa.

Una nang inihayag ni Philippine Egg Board President Irwan Ambal na 20% ang ibinaba ng populasyon ng paitluging manok sa Luzon simula noong Enero ng nakaraaang taon dahil sa bird flu outbreak.

Sinabi naman ni Samahang Industriya ng Agrikultura (SINAG) Chairman Rosendo So na aabot na sa P15-B ang nawalang kita sa poultry industry noong 2022 dahil sa pagpasok ng P25.4-B na halaga ng smuggled meat, kabilang ang P4-B na halaga ng frozen chicken.

Dahil dito, hinimok ni So ang gobyerno na buhayin ang Pre-Boarding Inspection Process para sa imported products upang mapigilan ang pagpupuslit ng agricultural products.

Aminado ang LPG Marketers Association (LPGMA) na sadyang walang magagawa ang Pilipinas sa hindi maawat na pagtaas ng presyo ng mga produktong petrolyo, partikular ang LPG.

Inihayag ni LPGMA President Arnel Ty sa DWIZ na nakaasa lamang kasi ang bansa sa oil importation kaya’t tila imposibleng mapababa ang presyo ng mga produktong petrolyo.

Pinayuhan anya sila ng kanilang mga supplier na maaantala ang pagpapadala ng dalawa hanggang tatlong linggo dahil sa pagtaas ng demand pero ang sitwasyon ay kaya namang mapangasiwaan.

Ipinaliwanag naman ni Ty na dahil lumaki ang demand sa Liquified Petroleum Gas, nagbabadya ring sumirit ang presyo nito sa merkado sa Pebrero, kasabay ng pagbubukas ng ekonomiya ng Tsina at Chinese Lunar New Year.

Humihiling ng fuel subsidies mula sa gobyerno ang ilang transport group kasabay ng kanilang paghihintay sa desisyon sa nagpapatuloy na fare hike petitions sa gitna ng walang prenong oil price hike.

Ayon kay Samahan ng mga Tsuper at Operators sa Pilipinas Convenor Danilo Yumul, dapat regular na ibigay ang subsidiya sa mga tsuper, gaya nang ginagawa sa ibang programa ng gobyerno.

Partikular na tinukoy ni Yumul ang 4Ps, senior citizen at TUPAD Program na buwanang nakatatanggap ng pondo.

Sila anyang mga tsuper ay nagtataas lamang ng pasahe tuwing nagmamahal ang krudo kaya’t dapat ipagpatuloy ang fuel subsidies para maging consistent kahit magkano man ang itaas ng presyo ng langis.

Bukas muling ilalarga ng mga kumpanya ng langis ang ikatlong sunod na linggong price hike.

Patuloy ang pagbaba ng presyo ng sibuyas sa ilang pamilihan, gaya sa Metro Manila bunsod nang pagdating ng imported suplay sa bansa.

Batay sa monitoring ng Department of Agriculture (DA), umaabot na ng P170 hanggang P300 na lamang ang kada kilo ng presyo ng ilang uri ng sibuyas sa Metro Manila.

Nasa P240 hanggang P250 naman ang presyo ng local red onions habang P200 hanggang P250 naman ang kada kilo ng imported.

Ayon kay DA Assistant Secretary at Spokesperson Rex Estoperez, sa ngayon ay wala silang nakikitang kakulangan sa suplay ng sibuyas sa bansa dahil sa pagsisimula nang anihan sa unang linggo ng Pebrero.

Magugunitang umabot hanggang P720 ang kada kilo ng sibuyas sa Metro Manila dahil sa kakulangan ng suplay nito noong Disyembre.

Paliit na nang paliit ang kinikita ng mga tsuper ng jeep kasabay ng pagtaas ng presyo ng mga produktong petrolyo.

Ito ang inihayag ni Pinagkaisang Samahan ng mga Tsuper at Operator Nationwide (PISTON) National President Mody Floranda kaugnay sa panibagong serye ng oil price hike na ilalarga bukas.

Ayon kay Floranda, nasa P300 hanggang P400 na lamang ang arawang kita ng mga jeepney driver kumpara sa tinatayang family living wage na P1,100.

Batay anya sa mismong pag-aaral ng Ibon Foundation, dapat ay P1,133 kada araw ang kailangan ng isang pamilya para lamang matugunan ang pangangailangan sa loob ng isang araw, gaya ng pagkain.

Sa oil trading sa nakalipas na limang araw, posibleng tumaas ng 60 hanggang 80 centavos ang kada litro ng diesel habang P1.20 hanggang P1.40 sa gasolina.

Ito na ang ikatlong sunod na linggong magpapatupad ng price increase ang mga kumpanya ng langis ngayong unang buwan ng taon.