Drew Nacino

Nilinaw ng Department of Agriculture (DA) at Bureau of Plant Industry (BPI) na walang oversupply ng kamatis sa bansa.

Ito’y sa gitna ng viral social media post kung saan nakita ang mga kamatis na itinapon basta-basta sa isang bakanteng lote sa Nueva Vizcaya.

Ipinaliwanag ni BPI Spokesperson Jose Diego Roxas, isolated case lamang ang naturang insidente at hindi pasok sa nakasanayang kalidad ang mga kamatis na itinapon.

Ayon kay Roxas, gusto ng buyers ay medium to large at semi-ripe pero maliliit at over-ripe ang mga nakita kaya hindi nabili at sa halip na ibalik sa origin ay itinapon na lamang dahil mas mahal ang gastos sa krudo.

Kakulangan anya sa processing plants para gumawa ng tomato products tulad ng tomato paste at sauce ang iniinda ng bansa ngayon at hindi ang oversupply.

Ito rin umano ang dahilan kaya’t nag-aangkat ang Pilipinas ng processed tomato products.

Dalawang masuwerteng mananaya ang maghahati sa P73.4M na premyo sa 6/45 Mega Lotto ng Philippine Charity Sweepstakes Office (P.C.S.O.)

Kapwa natumbok ng mga lucky better ang winning combination na 37 – 29 – 42 – 21 – 27 – 5 sa PCSO draw, kagabi.

45 bettors naman ang nakasikwat ng second prize na tig-P32,000.

Ang Mega Lotto draw ng PCSO ay tuwing Lunes, Miyerkules at Biyernes alas-9 ng gabi.

Samantala, bigo namang masungkit ang mahigit P29M jackpot prize sa 6/55 Grand Lotto makaraang walang makahula ng kombinasyong 40 – 8 – 45 – 6 – 23 – 41.

Nagpasaklolo na ang TV host-actor na si Luis Manzano sa National Bureau Investigation upang imbestigahan ang Flex Fuel Petroleum Corporation.

Nagpadala ng liham ang aktor kay NBI Director, Atty. Medardo De Lemos sa pamamagitan ng kanyang legal counsel na si Atty. Regidor Caringal noon pang November 8, 2022.

Ayon kay Luis, nagdesisyon siyang alisin na ang kanyang interes at nag-resign na rin bilang Chairman of the Board ng mga korporasyon ng ICM Group na pinamumunuan ni Ildefonso “Bong” Medel.

Si Medel ay isa sa mga malapit na kaibigan at chief executive officer ng ICM Group na nagpapatakbo rin ng Flex Fuel.

Aminado ang aktor na marami umanong investors ng flex fuel ang lumalapit sa kanya upang mabawi ang mga perang inilagak sa naturang kumpanya.

Samantala, itinanggi rin ni Manzano na sangkot siya sa scam o itinakbo ang P100M na pera ng mga investor at sa katunayan ay si Medel ang may utang sa kanya na P66M.

Nauwi sa tensyon ang pagsasagawa ng “human barricade” ng ilang residente sa Sibuyan Island, Romblon habang iprinoprotesta ang umano’y iligal na aktibidad ng Altai Philippines Mining Company sa kanilang lugar.

Nagkagirian ang mga pulis at environmental defenders, kabilang ang ilang residente matapos umanong tangkaing lumabas sa sinasabing barikada ang isang truck na kargado ng nickel ores.

Aminado si Elizabeth Ibañez, Coordinator ng Sibuyanons Against mining, na ikinagulat nila ang pagtulong ng mga pulis upang makalabas ang truck na magbi-biyahe ng mga nickel.

Ayon kay Ibañez, walang permit ang Altai Mining upang makapag-operate sa Sibuyan.

Enero a – 28 nang mag-barikada ang mga residenteng kontra mining sa tapat ng itinatayong pier ng Altai sa Sitio Bato España, San Fernando, Romblon.

Kabilang sa kailangang ipresenta ng kumpanya ang barangay clearance, municipal business permit, DENR Foreshore Lease Contract at PPA permit para makapagtayo ng Private Port.

Nagsasagawa na ng imbestigasyon ang Department of Education kaugnay sa pagbili ng mga overpriced umanong DSLR cameras.

Ito ang tiniyak ni DepEd spokesperson, Atty. Michael Poa bilang tugon sa social media post ng isang photo-journalist na ikinumpara ang biniling Canon EOS 1500d ng DepEd na nagkakahalaga ng P155,929.

Kumpara ito sa presyo sa mismong Canon Philippines at mga online store na naglalaro lamang sa P22,000 hanggang P33,000.

Ayon kay Poa, hindi pa nila mabatid kung anong camera ang ginagamit ng kagawaran, lalo’t sa kanyang pagkaka-alam ay walang entry-level cameras kundi mga mark 4 sa kanilang Public Affairs Service sa Central Office.

Bagaman binura na ang nasabing post, kinuwestyon ng netizens, partikular ng mga photo-journalist at enthusiast ang quotations para sa entry-level dslr.

Kabilang na rito ang quotation sa proposal request para sa isang mirrorless DSLR camera na nagkakahalaga ng P170,000 noong september 2022 sa Agusan del Norte.

Nilinaw naman ni Poe na kinansela na ng DepEd – Caraga ang pagbili ng nasabing camera na gagamitin sana para sa broadcast-livestream dahil nagbigay ang Regional Information Communications Technology ng mga camera.

Pinagpapaliwanag ng Alliance of Concerned Teachers ang Department of Education sa pagbili nito ng overpriced umanong mga DSLR camera.

Nito lamang linggo nang umani ng iba’t ibang reaksyon ang social media post ng isang photojournalist na ikinumpara ang biniling Canon EOS 1500d ng Deped na nagkakahalaga ng P155,929 pesos sa modelong mabibili lang ng P23,000 hanggang P33,000 pesos sa online stores.

Ayon kay Vladimir Queta, Chairperson ng Alliance of Concerned Teachers, dapat may managot o maparusahan at imbestigahan ng gobyerno ang nasabing alegasyon.

Pinasisilip din ng grupo sa Commission on Audit ang naturang isyu.

Samantala, tiniyak naman ni Deped spokesperson Michael Poa na nag-iimbestiga na ang kagawaran.

Ipinag-utos na ng Court of Appeals (CA) Ang pagpapalawig sa suspensyon ng 670-megawatt Power Supply Agreement (PSA) Sa pagitan ng Meralco at San Miguel-subsidiary na South Premiere Power Corporation (SPPC).

Sa January 25 resolution, pinabigyan ng C.A. 13th division ang aplikasyon ng SPPC para sa Writ of Preliminary Injunction (WPI) Dahil tatagal lamang ng dalawang buwan ang TRO na inisyu ng Korte noong Nobyembre.

Ang WPI ay isang legal remedy na layuning mapigilan ang anumang “pinsala” sa magkabilang partido bago pag-aralan ang kanilang claims o kaso at i-adjudicate o desisyunan.

Ipinunto ng Appellate Court na may pangangailangan para sa agarang issuance ng WPI upang maiwasan ang matinding pinsala sa SPPC, na “napuwersang ipagpatuloy ang pag-supply ng kuryente sa Meralco para sa kabutihan ng lahat nang hindi man lamang nababawi ang ipinuhunan”.

Kinailangang maglagak ng P100 million bond ang SPPC upang “sagutin ang anumang damages na maaaring matamo ng respondents” dahil sa injunction habang inatasan ang magkabilang partido na pumasok sa negosasyon sa ilalim ng PSA.

Nag-ugat ang desisyon ng CA Sa pagbasura ng Energy Regulatory Commission sa hirit ng San Miguel at Meralco na itaas ang generation charge dahil sa nagmamahal na coal at natural gas na ginagamit upang mapatakbo ang mga plantang nag-poproduce ng kuryente.

Nananatiling “manageable” ang covid-19 situation sa bansa.

Tiniyak ito ni DOH officer-in-charge Maria Rosario Vergeire sa kabila ng pasya ng World Health Organization na ipagpatuloy ang pagpapatupad ng global public health emergency.

Kampante si Undersecretary Vergeire sa pangangasiwa sa mga covid case sa bansa dahil sa mababang hospital admission rate maging ang severe at critical infections.

Ayon kay Vergeire, kung tutuusin ay mas preparado ngayon ang gobyerno kumpara noong taong 2020.

Naka-adopt na rin anya ang mga Filipino sa sitwasyon sa pamamagitan ng pagsusuot ng face masks habang umakyat na sa 94% ang vaccination rate para sa primary doses.

Gayunman, naiintindihan ng DOH ang desisyon ng WHO na ituring pa rin ang covid-19 pandemic bilang public health emergency of international concern dahil sa banta ng mga bagong variants; Average na 10,000 hanggang 30,000 deaths per day sa mundo at kakulangan ng reports at datos sa ilang bansa, gaya sa China.

Kinumpirma ni PNP Chief Gen. Rodolfo Azurin, Jr. na pansamantalang ipagpapaliban ang rekomendasyon ng internal affairs service na sibakin sa serbisyo si Master Sergeant Rodolfo Mayo, Jr.

Si Mayo na miyembro ng PNP-Drug Enforcement Group ay nahulihan umano ng P6.7 billion na halaga ng shabu sa Maynila noong Oktubre ng nakaraang taon.

Ayon kay General Azurin, pina-rerebisa niyang maigi ang kaso, anggulo, proseso at documentation upang matiyak na walang ‘loopholes’ at hindi mababasura dahil lamang sa teknikalidad.

Inatasan na rin ang discipline, Law and Order Division ng Directorate for Investigation and Detection Management sa pangunguna ni Maj. Gen. Eli Cruz na tiyaking hindi mababago o mababaligtad ang rekomendasyon ng IAS na sibakin si Mayo.

Hindi na anya dapat makabalik ang scalawag na pulis sa serbisyo dahil sa teknikalidad at kawalan ng due process.

Samantala, walang nakikitang dahilan si Azurin upang tanggalin sa puwesto bilang hepe ng PNP-Drug Enforcement Group si Brig. Gen. Narciso Domingo matapos na maaresto si Mayo.

Kinundena ni Kuwaiti Foreign Minister, Sheikh Salem Abdullah Al-Jaber Al-Sabah ang pagpatay sa overseas Filipino worker na si Julleebee Ranara sa Kuwait.

Ito’y kahit pa mismong kababayang Kuwaiti ni Al – Sabah ang gumahasa at pumatay umano kay Ranara.

Sa pagbisita ni Philippine Charge D’ Affaires to Kuwait Jose Cabrera III sa Ministry of Foreign Affairs, nagpaabot din ng pakikiramay si Sheik Salem sa pamilya ng ofw at gobyerno ng Pilipinas.

Ayon kay Foreign Affairs Undersecretary Eduardo De Vega, tiniyak ni Al – Sabah na mapaparusahan ang disi syete anyos na suspek na anak ng amo ng biktima, na naaresto kamakailan.