Drew Nacino

Matapos kuyugin sa social media kamakailan, pinanindigan ni dating Senador Panfilo Lacson ang kanyang pagtutol sa panukalang paid menstrual leave na isinusulong sa kamara.

 Iginiit ni Lacson na magiging counter-productive ang nasabing hakbang, lalo’t maaaring hindi maibigay ng mga employer ang dagdag na 24-day leave per year at maaaring magresulta sa tanggalan sa trabaho at pagsasara ng mga negosyo.

 Magugunitang umani ng batikos mula sa netizens ang social media post ng dating presidential candidate na dapat maghain na rin ng panukalang batas para sa menoupause at andropause allowances upang mapataas ang testosterone level ng mga manggagawa.

 Tila hindi anya napagtanto ng mga proponent ng House Bill 7758 o two-day-a-month menstrual-leave-with-pay at mga ordinaryong manggagawang babae sa bansa na may malaking epekto ang additional 24 days-leave with pay kada taon.

 Bukod pa kasi ito sa 105 days na maternity leave, 7 days na paternity leave, 5 days na sick leave, kabilang ang 13 hanggang 18 days na vacation leave kada taon.

 Binigyang-diin ng dating mambabatas na kung isasabatas ang naturang panukala ay maaaring mag-atrasan ang mga long-term investments ng mga prospective employers.

 Ipinunto ni Lacson na isang pro-labor measure ang bill lalo’t 49% ng populasyon ay babae pero dapat ikunsidera ang napakalaking epekto nito sa ekonomiya.

Ilang pinaghihinalaang improvised explosive device, rocket propelled grenades, at mga bala ang nahukay ng mga otoridad sa ikalawang paglusob sa compound ng hdj agri-venture corporation, na ang pangulo ay si dating Negros Oriental Governor Pryde Henry Teves.

Ayon sa PNP-CIDG, isang informant ang nagbigay ng tip sa kanila, kung saan isa umano ito sa nagbaon ng mga armas sa lugar.

Dahil dito, sinabi ng cidg na posibleng maharap si teves ng reklamo sa illegal possession of firearms, habang tinitignan pa ang pagsasampa ng reklamo sa paglabag sa Anti-Terrorism Act.

Noong Biyernes, nang nagsimulang magpatupad ng search warrant sa compound ang CIDG kung saan si Pryde ay isa sa mga may-ari ng compound.

Lalo pang nagmahal ang bigas sa ilang palengke sa Metro Manila.

 Batay sa price monitoring ng Department of Agriculture (DA), dalawa hanggang limang piso ang itinaas ng kada kilo ng bigas.

 Nangangahulugan ito na nasa 60 pesos na ang kada kilo ng pinakamahal na bigas sa mga palengke.

 Naglalaro na sa 50 hanggang 58 pesos ang kada kilo ng imported commercial rice na special; 43 hanggang 52 ang premium; 40 hanggang 46 ang well-milled at 37 hanggang 44 pesos ang regular milled.

 Sa local commercial rice naman, nasa 48 hanggang 60 pesos na ang special; 42 hanggang 49 ang premium; 38 hanggang 46 ang well-milled at 34 hanggang 40 pesos ang kada kilo ng regular milled.

 Inihayag ng samahang industriya ng agrikultura na ang pagtaas ng presyo ng bigas ay dulot ng mahal na pataba at langis.

 Nilinaw ni SINAG Chairman Rosendo So na hindi lang sa pilipinas nagmahal ang bigas kundi maging sa Thailand, Pakistan, Vietnam at India habang tumaas din sa $100 per metric tons ang world market price.

 Dahil dito, muling iginiit ni So na maaaring hindi pa kayanin ang 20 pesos na kada kilo na bigas na ipinapangako ni Pangulong Ferdinand Marcos Jr. at posibleng matagalan pa bago makamit.

Aabot sa 30 kilo ng shabu na nagkakahalaga ng mahigit kalahating bilyong piso ang nasabat mula isang Filipino at Tsino sa Angeles City, Pampanga.

 Kinilala ang mga naarestong suspek na sina Mark June Barsaga alyas Macmac, 23 anyos ng Purok 7, Lucena City, Quezon at Yi Xin Lo, 49 anyos ng Abad Santos Avenue, Tundo, Maynila.

 Ayon kay PDEA Director General Virgilo Lazo, nadakip ng pinagnasib na pwersa ng Philippine Drug Enforcement Agency at Intelligence Unit ng Angeles City Police Station 2 sina Barsaga at Yi sa buy-bust operation sa Pointsettia Avenue, Barangay Pampanga.

 Bukod sa mga iligal na droga, nakumpiska rin mula sa mga suspek ang boodle money; tatlong cellphones; dalawang I.D. At metallic grey Toyota Avanza na may plakang ABQ – 9912.

 Nakapiit na ang dalawa at nahaharap sa kasong paglabag sa RA 9165 o Comprehensive Drug Act of 2002.

Nanindigan ang grupong Malayang Konsyumer (MK) na walang problema sa suplay ng pagkain sa bansa, bagkus ang nakikita nilang nagpapahirap sa mga pamilyang Pilipino ay ang kartel, hoarders at profiteers.

Ito’y ayon kay Atty. Simoun Salinas, tagapagsalita ng MK, ang mga pumipigil at nagmamanipula ng presyo sa mga inaaning produktong pang-agrikultura sa merkado.

Nanawagan din si Salinas sa senado na agaran nang ipasa ang Senate Bill 1688 na inihain ni senador JV Ejercito, na layuning amyendahan ang R.A. 10845 o “Anti-Agricultural Smuggling Act of 2016”.

Sa ilalim nito, ang mga nasa likod ng hoarding, profiteering, kartel at iba pang pang-aabuso sa merkado ng agri-products ay ituturing din bilang isang uri ng economic sabotage, na papatawan ng mas mabigat na parusa.

Gayunman, binatikos ng grupo at iginiit ang pagbasura sa bersiyon ni Senator Lito Lapid na pagbabago sa R.A. 10845.

Sa Senate Bill 1812 ni Senador Lapid, nais nitong isama ang tobacco at cigarette products sa hanay ng mga produktong agrikultura na mahigpit na babantayan sa ilalim ng nasabing batas.

Samantala, binigyang-diin ng malayang konsyumer na bagaman smuggling ng mga pangunahing pagkain ang malaking problema, hindi umano ito ang tanging suliraning dapat pagtuunan ng pansin.

Binalaan ng Department of Health – Western Visayas Center for Health Development ang publiko laban sa pagtaas ng kaso ng hand, foot at mouth disease.

Simula Enero 1 hanggang Pebrero 4, nakapagtala na ng 2,350 H.F.M.D. cases sa nasabing rehiyon kumpara sa 132 cases sa parehong panahon noong isang taon.

Ayon kay Airene Legarda, Medical Technologist 2 at D.O.H. Regional Food and Water Borne Disease Program coordinator, nakatuon sila sa hygiene at sanitation dahil mabilis kumalat ang naturang viral disease.

Ang pagpapatuloy anya ng face-to-face activities ay maaaring isa sa dahilan ng pagtaas ng bilang ng mga kaso.

Batay sa datos ng Regional Epidemiology and Surveillance unit, ang lalawigan ng Iloilo ang may pinakamaraming kaso, 1,132; Antique, 240 at Negros Occidental, 331.

Samantala, kabilang naman sa mga pinaka-lantad sa sakit ang mga batang edad isa hanggang lima.

Asahan na ang mas mahal na mga pagkain, gaya ng ulam sa mga restaurant, fastfood maging sa mga karinderya dahil sa malakihang dagdag-presyo sa Liquefied Petroleum Gas (LPG).

Aminado si Eric Teng, Pangulo ng Restaurant Owners of the Philippines, na “walang sinuman ang ligtas” sa nagmamahalang presyo ng mga produkto at serbisyo.

Gayunman, nilinaw ni Teng na hangga’t maaari ay hindi nila nais magtaas ng presyo bilang tugon sa price hike ng mga produkto dahil maka-aapekto ito sa kanilang benta.

Bukod anya kasi sa mahal na krudo, tila wala na ring pahinga ang mga consumer sa patuloy na pagmahal ng mga pagkain, partikular ng mga sangkap sa ulam, gaya ng bawang at iba pang bilihin.

Pinalagan ng China ang pagbisita sa Pilipinas ni US Defense Secretary Lloyd Austin at mga aktibidad nito sa bansa.

Ayon sa Chinese Embassy, “pinaiinit ng pagbisita ni Austin sa Pilipinas ang regional tension at ginugulo ang regional peace sa asya”.

Inakasuhan din ng embahada ang Estados Unidos na patuloy nitong pinalalakas ang “puwersa militar na itinututok sa indo-pacific region para lamang sa sarili nitong interes”.

Dinungisan din umano ni Austin ang China sa issue ng maritime dispute sa South China sea upang isulong ang “Anti-China Political Agenda” nito sa pagbisita sa Pilipinas.

Ang nasabing hakbang ay taliwas umano sa paghahangad ng mga regional countries ng kapayapaan, pag-unlad at kooperasyon sa Tsina.

Humingi na ng paumanhin ang Overseas Workers Welfare Administration (OWWA) sa post sa kanilang official Facebook page hinggil sa buhay pag-ibig ni Administrator Arnell Ignacio.

Aminado ang OWWA Na nagkamali ito nang i-post sa kanilang official Facebook page ang pa-“Survey” hinggil sa lovelife ni Ignacio kahit wala itong kinalaman sa kanilang mandato.

Bagaman burado na ang nasabing post, na-screenshot ito at ipinaskil online nang maraming netizen.

Naglabas naman ng samu’t saring reaksyon ang publiko at kinuwestyon ang OWWA pero wala pang pahayag si Ignacio kaugnay sa insidente.

Magugunitang itinalaga ni Pangulong Ferdinand Marcos Jr. ang komedyante bilang Executive Director Admininistrator 5 ng OWWA noong Agosto 2022.

Dalawang buwan bago tuluyang ipatupad ang Public Utility Vehicle Modernization Program, nakatakda nang talakayin ng Land Transportation Franchising and Regulatory Board (LTFRB) Sa Lunes ang kahihinatnan ng mga hindi pa tumatalima sa programa.

Ayon kay LTFRB Board member Riza Marie Paches, pag-u-usapan ng board ang findings ng technical working group na nilikha nito upang alamin ang iba’t ibang scenario na maaaring mangyari pagsapit ng Abril a – primero.

Sa nasabing petsa, kailangan nang magpa-miyembro ang mga jeep at UV express sa mga transport cooperative sa ilalim ng puv modernization program.

Hindi naman idinetalye ni Paches ang limang scenario na maaaring mangyari dahil maaari lamang malito ang mga nasa transport sector.

Bagaman hindi pa ipinag-uutos na palawigin ang deadline, tinitingnan na anya ng board ang posibilidad.

Nilinaw din ng LTFRB Official na hindi naman pagbabawalang pumasada sa kanilang mga ruta ang mga PUV na bigong sumunod sa modernization program pero may ilang proseso silang dapat pagdaanan.

Batay sa datos ng ahensya hanggang nitong Enero – bente sais, nasa 11,000 jeepney units at UV express ang kabilang na sa mga kooperatiba sa Metro Manila pa lamang.