Drew Nacino

Sa harap ng umiinit umanong maritime dispute sa West Philippine Sea, target ng Pilipinas at Estados Unidos na bumuo ng isang security road map para sa delivery ng U.S. Defense assistance sa susunod na lima hanggang sampung taon.

 Ito ang tinalakay sa pulong sa Washington D.C., sa Amerika nina Defense Secretary Carlito Galvez, Foreign Affairs Secretary Enrique Manalo sa kanilang counterpart na sina U.S. Defense Secretary Lloyd Austin at State Secretary Antony Blinken.

 Ayon kay Secretary Austin, kabilang sa mga i-de-deliver ang mga “priority defense platforms” gaya ng mga radar, drone, military transport aircraft, coastal at air defense systems.

 Gayunman, masyado pa anyang maaga upang talakayin kung anong mga partikular na defense assets ang i-po-posisyon ng U.S. Sa ilang piling base militar ng Pilipinas sa ilalim ng pinalawak na enhanced defense cooperation agreement.

 Ipinunto naman ni Secretary Manalo na layunin lamang ng EDCA sites na ayusin ang military interoperability, tugunan ang mga posibleng humanitarian disaster at rumesponde sa iba pang uri ng security challenges.

 Nakasaad din sa joint statement ng apat na opisyal na  mula sa dating 80 million dollars, itinaas na ng amerika sa 100 million dollars ang alokasyong pondo para sa pagasaayos ng edca sites na ilalaan bago magtapos ang taon.

Hindi tinanggap ni International Criminal Court Prosecutor Karim Khan ang mga inilatag na argumento ng gobyerno ng Pilipinas, hinggil sa war on drugs ng nakaraang Duterte administration.

 Sa 59 na pahinang tugon ni Khan, ipinunto nitong nabigo ang Pilipinas na patunayang nagkaroon ng pagkakamali sa desisyon ng I.C.C. Pre-trial chamber na payagang ipagpatuloy ang imbestigasyon sa drug war.

 Ayon sa prosekusyon, tila inengganyo at kinunsinte ni dating Pangulong Rodrigo Duterte at iba pang government official, sa pangunguna ng P.N.P. ang pagpatay sa mahigit 5,000 katao sa ilalim ng giyera kontra droga, na maituturing umanong crime against humanity.

 Dahil dito, hiniling ni Khan sa appeals chamber na ibasura ang apela ng Pilipinas na isinumite noong Marso at pahintulutan na ang pagpapatuloy ng imbestigasyon ng prosekusyon alinsunod sa Article 18 ng Rome Statute.

Nabawasan na ang pagtagas ng langis mula sa lumubog na MT Princess Empress sa Oriental Mindoro.

Ito ang kinumpirma ni Philippine Coast Guard (PCG) Commandant, Admiral Artemio Abu sa kanyang pagharap sa panibagong pulong sa Department of Justice (DOJ) hinggil sa update ng oil spill.

Ayon kay Admiral Abu, mula sa naunang 23 butas na nakita ng Remotely Operated Vehicle (ROV), mayroon na lamang ngayong 11 leakages ang barko.

Anim naman anya ang sumailalim sa ‘bagging operations’ o sinasakluban ng supot ang butas na sumasalo sa sumisirit na langis.

Ipinaliwanag ni Abu na ang apat ay hindi na nilagyan ng bag, dahil kahit may butas ay wala namang lumalabas na langis, habang ang isa pa ay hindi na nilagyan ng bag dahil hindi magawa ang bagging operations sapagkat napakabagal ng pagtagas ng langis.

Dahil dito, idineklara ni Abu na kontrolado na ang leakage mula sa lumubog na barko pero kanyang tiniyak na magpapatuloy ang P.C.G., mga lokal na pamahalaan at iba pang ahensya sa clean-up operations upang hindi na kumalat pa ang tumagas na industrial fuel.

PHOTO COURTESY: PCG

Pinagtitipid ng grupong Federation of Free Farmers Cooperative (FFFC) ang mga Pinoy sa pagkain ng kanin sa harap ng patuloy na pagtaas ng presyo ng bigas at numinipis na supply nito.

 Ito ang nakikitang paraan ni F.F.F.C. Chairman at dating Agriculture Secretary Leonardo Montemayor upang makatipid ang mga Pinoy.

 Magugunitang inihayag ng Philippine Rice Research institute na aabot sa 7.2 billion pesos ang halaga ng nasasayang na kanin ng mga Pilipino kada taon.

Pinayuhan din ni Montemayor ang publiko na hangga’t kaya ay bawasan ang pagkonsumo ng “extra-rice” pero aminado siyang maaaring mahirapan tayong mga Pinoy mag-adjust dahil kanin ang ating pangunahing pagkain.

 Bababa ang singil ng Meralco ngayong buwan ng 11 pesos 80 centavos per kilowatt hour o katumbas ng 24 pesos tapyas sa bill para sa mga kabahayang may buwanang konsumo na 200 kilowatt per hour.

 Mula sa 11 pesos 43 centavos per kilowatt hour noong Marso, magiging 11 pesos 31 centavos per kilowatt hour na ang singil ng meralco sa kuryente ngayong buwan.

 Ayon sa Meralco, bumaba ang generation charge ng 6 pesos per kwh ngayong buwan sa kabila ng pagdagdag ng 20 sentimos na singil para sa unang installment ng deferred generation cost na hindi siningil noong marso.

 Kinausap din ng nasabing power distributor ang Energy Regulatory Commission (ERC) at suppliers nito noong Marso para ipagpaliban ang paniningil ng 1.1 billion peso generation charge at gawing installment ito upang mapagaan sa bulsa ng mga consumers.

 Malaki rin ang naging epekto ng pagbaba ng presyo ng kuryente sa wholesale electricity spot market at ng presyo mula sa power supply agreements ng Meralco upang maibsan ang epekto ng deferred generation charges.

Nilinaw muli ng Metropolitan Waterworks and Sewerage System (MWSS) na walang water crisis sa bansa.

 Ito’y sa kabila ng araw-araw na water service interruption o mahinang pressure ng tubig sa ilang lugar sa Metro Manila.

 Ayon sa M.W.S.S., malayo naman sa critical level ang angat dam na pinagkukunan ng 90% supply ng tubig ng Metro Manila at mga karatig lugar.

 Una na ring inihayag ng ahensya na sapat ang water supply hanggang matapos ang taong 2023.

 Gayunman, iginiit ni dating M.W.S.S. Chairman at National Water Resources Board Executive Director Dondi Alikpala na dapat maghanda para sa susunod na taon dahil sa epekto ng El Niño phenomenon.

 Ibinabala ni alikpala na kung kakapusin ang mga pag-ulan ngayong taon ay maaaring hindi makamit ang safe level ng water storage na gagamitin para sa susunod na tag-init sa taong 2023.

 Sa datos ng PAGASA Hydro-Meteorology Division hanggang kahapon, bumaba pa sa 199.13 meters ang water level sa angat kumpara sa 199.37 meters noong Lunes o 12.87 meters na ang ibinaba mula sa normal high water level na 212 meters.

Tatalakayin pa ang mga limitasyon ng paggamit ng estados unidos sa bagong Enhanced Defense Cooperation Agreement Sites (EDCAs) sa Pilipinas.

 Ito ang nilinaw ni Foreign Affairs Secretary Enrique Manalo sa issue kung papayagan ng Pilipinas ang U.S. na itago ang military assets nito upang ipagtanggol ang taiwan sakaling salakayin ng China.

 Ayon kay Secretary Manalo, isasapinal pa ng dalawang bansa ang mga detalye sa access ng U.S. Armed Forces sa apat na bagong EDCA sites, kung saan maaaring pansamantalang itago ang military logistics sa rotational basis.

 Nakadepende anya ang magiging desisyon access sa EDCA sites sa gugulong na diskusyon hinggil sa mga uri ng aktibidad at terms of reference sa mga itinalagang lugar.

 Noon lamang isang linggo nang i-anunsyo ng pamahalaan ang lokasyon ng apat na karagdagang EDCA sites, dalawa sa Cagayan, isa sa Isabela habang isa sa Palawan.

Pinawi ng Metropolitan Waterworks and Sewerage System (MWSS) ang pangamba ng publiko na magkakaroon ng krisis kahit may nararanasang kakulangan sa supply ng tubig.

 Sa harap ito ng bumababang water level sa Angat dam, na pinagkukunan ng 90% ng supply ng Metro Manila at mga karatig lalawigan.

 Kampante si MWSS Administrator Leonor Cleofas na magiging sapat ang tubig sa Angat at iba pang reservoir, gaya ng Laguna de Bay at Wawa dam, sa kabila ng nararanasang tagtuyot.

 Ayon kay Cleofas, above 180-meters pa ang water level sa angat, nangangahulugang prayoridad pa rin ang alokasyon para sa inuming tubig sa halip na para sa irigasyon.

Posibleng nasa 300,000 litro na lamang o katumbas ng isang tangke ang natitirang industrial oil mula sa lumubog na MT Princess Empress sa Oriental Mindoro.

 Ito ang kinumpirma ng Philippine Coast Guard (PCG) sa gitna nang nagpapatuloy na bagging operation upang mapigilang kumalat pa ang tumagas na langis mula sa barko.

 Ayon kay PCG Spokesman, Rear Admiral Armand Balilo, hinihintay pa nila ang official report hinggil sa bagging operation na inaasahang lalabas ngayong araw.

 Tiniyak naman ni Balilo na hindi tumitigil ang pagresponde ng PCG Sa oil spill upang hindi na ito lalong kumalat.

 Pebrero a–28 nang lumubog ang MT PRincess Empress sa karagatang sakop ng mga bayan ng Naujan at Pola.

Namemeligrong matuyot sa buong tag-init ang mga residenteng sineserbisyuhan ng Maynilad sa Metro Manila at ilang bahagi ng lalawigan ng Cavite.

 Bunsod ito ng araw-araw na water service interruption bilang paghahanda sa posibleng epekto ng EL Nino phenomenon ngayong taon batay na sa projection ng PAGASA.

 Ayon kay Maynilad Spokesperson Jennifer Rufo, 90% ng kanilang supply ay nagmumula sa Angat at Ipo dams na inaasahang mababawasan hangga’t walang mga pag-ulan na magre-replenish sa mga dam.

 Malalaman pa lamang anya sa simula ng tag-ulan kung magiging sapat ito upang mapuno ang mababawas na tubig sa mga nasabing water reservoir ngayong tag-init.

 Umapela naman ang maynilad sa National Water Resources Board na huwag munang magbawas ng alokasyon ng tubig.

 Sa kabila nito, tiniyak ng Maynilad na nagpapatuloy ang kanilang supply augmentation measures gaya ng pagtatayo ng mga deep well at treatment facilities.

 Samantala, simula kahapon ay nakararanas na ng malawakang service interruption sa ilang bahagi ng Caloocan, Valenzuela, Quezon City, Maynila, Malabon, Navotas, Makati at Pasay.

 Ngayong araw naman nagsimula ang interruption sa las piñas, parañaque, maging sa Bacoor, Imus, Cavite City, Noveleta, Rosario at Kawit, Cavite.