Drew Nacino

Posibleng maulit ngayong taon ang rice crisis noong 2018.

Ito ang ibinabala ng grupong Federation of Free Farmers Cooperative (F.F.F.C.) Sa harap ng patuloy na pagsirit ng presyo at posibleng kakulangan sa supply ng bigas.

Ayon kay F.F.F.C. National Manager Raul Montemayor, ang mga scenario na nararanasan ngayon ay kahalintulad noong 2018.

Bagaman sapat ang supply ng bigas sa bansa hanggang hunyo, inihayag ni Montemayor na ang kakulangan ay maaaring maranasan sa lean months mula Hulyo hanggang Setyembre ngayong taon.

Gayunman, ang tangi anyang pinagkaiba ay may kapangyarihan ang national food authority na mag-import noong 2018 bagay na wala sa kanilang mandato ngayon dahil sa Rice Tariffication Law.

Idinagdag ni Montemayor na hindi dapat hayaan ng gobyerno na maulit ang krisis sa halip ay maghanap ng solusyon habang kanya ring ibinabala na maaaring samantalahin ng mga hoarder sakaling magkaroon muli ng rice crisis.

Nanindigan ang National Security Council (N.S.C.) na pagpapalakas sa kapabilidad ng Armed Forces of the Philippines ang layunin ng pinaigting na security cooperation ng Pilipinas at Estados Unidos.

Nilinaw din ng N.S.C. Na walang plano ang Pilipinas na makialam sa nagpapatuloy na tensyon sa pagitan ng China at Taiwan bilang pagkilala sa One China Policy at prinsipyo ng Association of Southeast Asian Nations (ASEAN).

Ayon sa ahensya, kaligtasan ng mahigit 100,000 Filipino sa Taiwan ang pangunahing prayoridad ng gobyerno.

Samantala, nakipagpulong na rin si N.S.C. Adviser Eduardo Año kay Chinese Ambassador Huang Xilian bilang pagtiyak na hindi para sa “offensive operations” laban sa China o pakikisawsaw sa issue sa Taiwan ang karagdagang Enhanced Defense Cooperation Agreement Sites (EDCA).

Sa kabila ng tila walang prenong pagtaas ng presyo ng pagkain, lalo ng bigas, aabot ng hanggang dalawang kutsarang kanin ang sinasayang ng mahigit 110 milyong Pilipino kada araw.

 Katumbas ito ng 7.2 billion pesos na halaga ng kaning nasasayang sa bansa kada taon.

 Batay sa datos ng Philippine Rice Research Institute (PhilRice), aabot sa dalawang milyon ang maaaring makakain mula sa mga nasasayang na kanin kada taon.

 Sa panig naman ng Department of Agriculture (DA), inaasahang aabot sa 80,000 metric tons ang rice shortage simula Hulyo hanggang Setyembre.

 Ipinaliwanag ni Agriculture Assistant Secretary Kristine Evangelista na sadyang mayroong mga panahon na kaunti ang inaaning palay o tinatawag na lean months o lean season kaya’t kailangang mag-import.

 Base sa monitoring ng D.A., aabot ng dalawa hanggang tatlong piso ang itinaas ng kada kilo ng bigas ngayong Abril kumpara sa piso noong isang buwan.

Hindi dapat maapektuhan ang security at territorial interest ng China at makisawsaw sa maritime dispute sa South China ang lumalalim na security alliance ng Pilipinas at Amerika.

Ito ang babala ng Tsina sa nagpapatuloy na pinaka-malaking military exercises sa pagitan ng Pilipinas at Estados Unidos na sinimulan noong Martes.

Ayon kay Chinese Foreign Ministry Spokesperson Wang Wenbin, hindi dapat maging target sa military drills ang anumang third party sa halip ay dapat makatulong sa pagpapanatili ng kapayapaan sa Asia-Pacific region.

Wala namang binanggit si Wang kung paano tutugon ang China kung mapagtanto nitong naka-umang sa kanila ang pinaigting na security alliance ng Pilipinas at Amerika.

Sa harap ng umiinit umanong maritime dispute sa West Philippine Sea, target ng Pilipinas at Estados Unidos na bumuo ng isang security road map para sa delivery ng U.S. Defense assistance sa susunod na lima hanggang sampung taon.

 Ito ang tinalakay sa pulong sa Washington D.C., sa Amerika nina Defense Secretary Carlito Galvez, Foreign Affairs Secretary Enrique Manalo sa kanilang counterpart na sina U.S. Defense Secretary Lloyd Austin at State Secretary Antony Blinken.

 Ayon kay Secretary Austin, kabilang sa mga i-de-deliver ang mga “priority defense platforms” gaya ng mga radar, drone, military transport aircraft, coastal at air defense systems.

 Gayunman, masyado pa anyang maaga upang talakayin kung anong mga partikular na defense assets ang i-po-posisyon ng U.S. Sa ilang piling base militar ng Pilipinas sa ilalim ng pinalawak na enhanced defense cooperation agreement.

 Ipinunto naman ni Secretary Manalo na layunin lamang ng EDCA sites na ayusin ang military interoperability, tugunan ang mga posibleng humanitarian disaster at rumesponde sa iba pang uri ng security challenges.

 Nakasaad din sa joint statement ng apat na opisyal na  mula sa dating 80 million dollars, itinaas na ng amerika sa 100 million dollars ang alokasyong pondo para sa pagasaayos ng edca sites na ilalaan bago magtapos ang taon.

Hindi tinanggap ni International Criminal Court Prosecutor Karim Khan ang mga inilatag na argumento ng gobyerno ng Pilipinas, hinggil sa war on drugs ng nakaraang Duterte administration.

 Sa 59 na pahinang tugon ni Khan, ipinunto nitong nabigo ang Pilipinas na patunayang nagkaroon ng pagkakamali sa desisyon ng I.C.C. Pre-trial chamber na payagang ipagpatuloy ang imbestigasyon sa drug war.

 Ayon sa prosekusyon, tila inengganyo at kinunsinte ni dating Pangulong Rodrigo Duterte at iba pang government official, sa pangunguna ng P.N.P. ang pagpatay sa mahigit 5,000 katao sa ilalim ng giyera kontra droga, na maituturing umanong crime against humanity.

 Dahil dito, hiniling ni Khan sa appeals chamber na ibasura ang apela ng Pilipinas na isinumite noong Marso at pahintulutan na ang pagpapatuloy ng imbestigasyon ng prosekusyon alinsunod sa Article 18 ng Rome Statute.

Nabawasan na ang pagtagas ng langis mula sa lumubog na MT Princess Empress sa Oriental Mindoro.

Ito ang kinumpirma ni Philippine Coast Guard (PCG) Commandant, Admiral Artemio Abu sa kanyang pagharap sa panibagong pulong sa Department of Justice (DOJ) hinggil sa update ng oil spill.

Ayon kay Admiral Abu, mula sa naunang 23 butas na nakita ng Remotely Operated Vehicle (ROV), mayroon na lamang ngayong 11 leakages ang barko.

Anim naman anya ang sumailalim sa ‘bagging operations’ o sinasakluban ng supot ang butas na sumasalo sa sumisirit na langis.

Ipinaliwanag ni Abu na ang apat ay hindi na nilagyan ng bag, dahil kahit may butas ay wala namang lumalabas na langis, habang ang isa pa ay hindi na nilagyan ng bag dahil hindi magawa ang bagging operations sapagkat napakabagal ng pagtagas ng langis.

Dahil dito, idineklara ni Abu na kontrolado na ang leakage mula sa lumubog na barko pero kanyang tiniyak na magpapatuloy ang P.C.G., mga lokal na pamahalaan at iba pang ahensya sa clean-up operations upang hindi na kumalat pa ang tumagas na industrial fuel.

PHOTO COURTESY: PCG

Pinagtitipid ng grupong Federation of Free Farmers Cooperative (FFFC) ang mga Pinoy sa pagkain ng kanin sa harap ng patuloy na pagtaas ng presyo ng bigas at numinipis na supply nito.

 Ito ang nakikitang paraan ni F.F.F.C. Chairman at dating Agriculture Secretary Leonardo Montemayor upang makatipid ang mga Pinoy.

 Magugunitang inihayag ng Philippine Rice Research institute na aabot sa 7.2 billion pesos ang halaga ng nasasayang na kanin ng mga Pilipino kada taon.

Pinayuhan din ni Montemayor ang publiko na hangga’t kaya ay bawasan ang pagkonsumo ng “extra-rice” pero aminado siyang maaaring mahirapan tayong mga Pinoy mag-adjust dahil kanin ang ating pangunahing pagkain.

 Bababa ang singil ng Meralco ngayong buwan ng 11 pesos 80 centavos per kilowatt hour o katumbas ng 24 pesos tapyas sa bill para sa mga kabahayang may buwanang konsumo na 200 kilowatt per hour.

 Mula sa 11 pesos 43 centavos per kilowatt hour noong Marso, magiging 11 pesos 31 centavos per kilowatt hour na ang singil ng meralco sa kuryente ngayong buwan.

 Ayon sa Meralco, bumaba ang generation charge ng 6 pesos per kwh ngayong buwan sa kabila ng pagdagdag ng 20 sentimos na singil para sa unang installment ng deferred generation cost na hindi siningil noong marso.

 Kinausap din ng nasabing power distributor ang Energy Regulatory Commission (ERC) at suppliers nito noong Marso para ipagpaliban ang paniningil ng 1.1 billion peso generation charge at gawing installment ito upang mapagaan sa bulsa ng mga consumers.

 Malaki rin ang naging epekto ng pagbaba ng presyo ng kuryente sa wholesale electricity spot market at ng presyo mula sa power supply agreements ng Meralco upang maibsan ang epekto ng deferred generation charges.

Nilinaw muli ng Metropolitan Waterworks and Sewerage System (MWSS) na walang water crisis sa bansa.

 Ito’y sa kabila ng araw-araw na water service interruption o mahinang pressure ng tubig sa ilang lugar sa Metro Manila.

 Ayon sa M.W.S.S., malayo naman sa critical level ang angat dam na pinagkukunan ng 90% supply ng tubig ng Metro Manila at mga karatig lugar.

 Una na ring inihayag ng ahensya na sapat ang water supply hanggang matapos ang taong 2023.

 Gayunman, iginiit ni dating M.W.S.S. Chairman at National Water Resources Board Executive Director Dondi Alikpala na dapat maghanda para sa susunod na taon dahil sa epekto ng El Niño phenomenon.

 Ibinabala ni alikpala na kung kakapusin ang mga pag-ulan ngayong taon ay maaaring hindi makamit ang safe level ng water storage na gagamitin para sa susunod na tag-init sa taong 2023.

 Sa datos ng PAGASA Hydro-Meteorology Division hanggang kahapon, bumaba pa sa 199.13 meters ang water level sa angat kumpara sa 199.37 meters noong Lunes o 12.87 meters na ang ibinaba mula sa normal high water level na 212 meters.