Drew Nacino

Isa na namang Philippine Coast Guard Vessel ang binuntutan at hinarangan ng isang Chinese Coast Guard Ship sa pinag-aagawang West Philippine Sea.

 Naganap ang insidente habang nagpa-patrol ang P.C.G. malapit sa Ayungin o Second Thomas Shoal, noong Linggo.

 Batay sa ulat ng Agence France Presse, na noo’y sakay naman ng BRP Malabrigo at nakasaksi sa insidente, maka-ilang beses silang binuntutan ng Chinese vessel.

 Dahil halos magkalapit lamang, muntik nang magbanggaan at magkagitgitan ang malapascua at malaking barko ng China Coast Guard.

Ayon kay BRP Malapascua Commanding Officer Rodel Hernandez, kung hindi niya pina-atras ang kanilang barko ay maaaring magkabanggaan sila ng Chinese vessel.

 Karaniwan na anyang hinaharang ng chinese vessels ang mga barko ng P.C.G. na nag-pa-patrol malapit sa Ayungin kung saan naka-himpil ang Philippine Marines lulan ng BRP Sierra Madre.

Ang Second Thomas Shoal ay dalawandaang kilometro lamang mula sa palawan at bahagi ng Philippine Exclusive Economic Zone.

Selyado na ng National Electrification Administration at Power Systems Incorporated ang isang kasunduan para sa operasyon ng power plant sa bayan ng San Jose bilang solusyon sa power crisis sa Occidental Mindoro.

 Sa sandaling magsimula ang operasyon ng planta, karagdagang 5 hanggang 6 megawatts ang kaya nitong i-generate para sa libreng kuryente sa loob ng dalawang buwan.

 Ipinaliwanag ng N.E.A. Na kinontrata nila ang P.S.I. bilang subsidiya ng national government, nangangahulugang hindi ipapasa ang gastos sa mga consumer.

 Ayon kay N.E.A. Administrator Antonio Almeda, sila ang sasagot sa operational cost sa unang dalawang buwan bilang tulong ng national government, sa pangunguna ni Pangulong Ferdinand Marcos Junior.

 Nitong Martes ay binisita ni Almeda ang lalawigan upang inspeksyunin ang planta ng P.S.I. Na inaasahang mag-ge-generate ng anim hanggang pitong oras na kuryente kada araw.

 Ang pag-re-renta anya sa planta ang kanilang nakitang solusyon sa energy crisis sa lalawigan.

 Nakasaad din sa naturang kasunduan na mabibigyan ang D.M.C.I. Power corporation ng sapat na panahon upang makapag-supply ng 17 megawatts sa Occidental Mindoro Electric Cooperative sa ilalim ng emergency power supply agreement hanggang March 31, 2024.

Ibinabala ng PAGASA na posibleng tumindi pa ang nararanasang init ng panahon sa mga susunod na linggo.

Ayon sa PAGASA, maaaring pumalo sa 56 degrees celsius ang heat index sa Muñoz City at 50 degrees celsius sa Cabanatuan City, Nueva Ecija.

Ipinaliwanag ng nasabing weather bureau na karaniwan nang naitatala tuwing mayo ang pinaka-mataas na temperatura sa bansa.

Halimbawa na lamang noong Mayo a – uno ng isang taon, umabot sa 55 degrees celsius ang heat index sa Dagupan City, Pangasinan.

Kahapon, umabot naman sa 43 degrees celsius ang heat index sa dagupan maging sa Ninoy Aquino International Airport sa Pasay City.

Dahil sa patuloy na pagtaas ng temperatura na umaabot na sa extreme danger level, pinag-iingat ng pagasa ang publiko, lalo ang mga senior citizen at may sakit sa puso laban sa heat stroke o heat stress.

Matapos ang ilang linggong pananahimik, nagsalita na si PNP Chief, Gen. Rodolfo Azurin Junior laban sa alegasyong nagkaroon ng cover-up sa drug raid sa lungsod ng maynila noong Oktubre.

 Itinanggi rin ni General Azurin na may sabwatan upang pagtakpan ang pagnanakaw umano ng ilang pulis sa mahigit apatnapung kilo ng shabu mula sa nakumpiskang halos isang tonelada sa naturang drug raid.

 Ayon kay Azurin, maituturing na isang maliit na bahagi lamang ng puno si Master Sergeant Rodolfo Mayo Junior, na pangunahing sangkot sa drug case.

 Dismayado rin ang Chief PNP sa mga alegasyon ni Interior Secretary Benhur Abalos na pinagtakpan ng ilang senior police officers ang pagkakasabat sa malaking bulto ng shabu na nagkakahalaga ng 6.7 billion pesos na pinaka-malaking drug bust sa kasaysayan ng bansa.

 Samantala, pinayuhan ni Azurin si Secretary Abalos na suriing mabuti ang mga impormasyon na nakararating sa kanya bago bumuo ng ispekulasyon.

Nananatiling tikom si Negros Oriental 3^rd District Rep. Arnolfo Teves Junior kaugnay sa kanyang kinaroroonan.

Sa gitna ito ng pahayag ni Senate Majority Leader Joel Villanueva sa hearing ng Senate Public Order and Dangerous Drugs Committee na posibleng nasa south korea ang suspendidong mambabatas.

Ayon kay Congressman Teves, hindi muna siya mag-ko-komento hinggil sa kanyang kinaroroonan pero mga otoridad naman na ang makatutuklas nito.

Si Teves ang itinuturong “mastermind” Sa pamplona massacre, kung saan kabilang sa pinaslang si dating Negros Oriental Governor Roel Degamo.

Hindi na mag-a-angkat ang National Food Authority (NFA) ng 330,000 metric tons ng bigas para sa buffer stock nito.

 Ito ang nilinaw ng Department of Agriculture matapos umani ng batikos ang ikinakasang importasyon ng N.F.A. Dahil lalabagin nito ang rice tariffication law.

 Kinumpirma ni Agriculture Undersecretary Mercedita Sombilla na sa halip mag-angkat, inabisuhan nila ang n.f.a. Na bumili sa mga local farmer.

 Tiniyak din ni Usec. Sombilla sa mga consumer na may sapat na rice supply hanggang katapusan ng taon.

 Bagaman papasok ang lean months sa ikatlong quarter ng taon, inaasahang madaragdagan ang supply dahil sa pagsisimula ng anihan sa ika-apat na quarter o simula Oktubre.

 Tatagal naman anya ng 45 araw ang total supply pagsapit ng katapusan ng taon, kabilang ang in-import ng private sector.

 Samantala, itinanggi rin ng opisyal ang mga ulat na tataas pa ng sais pesos ang kada kilo ng bigas dahil sa katunayan ay nagsimula nang bumaba ang presyo nito sa world market.

Posibleng maulit ngayong taon ang rice crisis noong 2018.

Ito ang ibinabala ng grupong Federation of Free Farmers Cooperative (F.F.F.C.) Sa harap ng patuloy na pagsirit ng presyo at posibleng kakulangan sa supply ng bigas.

Ayon kay F.F.F.C. National Manager Raul Montemayor, ang mga scenario na nararanasan ngayon ay kahalintulad noong 2018.

Bagaman sapat ang supply ng bigas sa bansa hanggang hunyo, inihayag ni Montemayor na ang kakulangan ay maaaring maranasan sa lean months mula Hulyo hanggang Setyembre ngayong taon.

Gayunman, ang tangi anyang pinagkaiba ay may kapangyarihan ang national food authority na mag-import noong 2018 bagay na wala sa kanilang mandato ngayon dahil sa Rice Tariffication Law.

Idinagdag ni Montemayor na hindi dapat hayaan ng gobyerno na maulit ang krisis sa halip ay maghanap ng solusyon habang kanya ring ibinabala na maaaring samantalahin ng mga hoarder sakaling magkaroon muli ng rice crisis.

Nanindigan ang National Security Council (N.S.C.) na pagpapalakas sa kapabilidad ng Armed Forces of the Philippines ang layunin ng pinaigting na security cooperation ng Pilipinas at Estados Unidos.

Nilinaw din ng N.S.C. Na walang plano ang Pilipinas na makialam sa nagpapatuloy na tensyon sa pagitan ng China at Taiwan bilang pagkilala sa One China Policy at prinsipyo ng Association of Southeast Asian Nations (ASEAN).

Ayon sa ahensya, kaligtasan ng mahigit 100,000 Filipino sa Taiwan ang pangunahing prayoridad ng gobyerno.

Samantala, nakipagpulong na rin si N.S.C. Adviser Eduardo Año kay Chinese Ambassador Huang Xilian bilang pagtiyak na hindi para sa “offensive operations” laban sa China o pakikisawsaw sa issue sa Taiwan ang karagdagang Enhanced Defense Cooperation Agreement Sites (EDCA).

Sa kabila ng tila walang prenong pagtaas ng presyo ng pagkain, lalo ng bigas, aabot ng hanggang dalawang kutsarang kanin ang sinasayang ng mahigit 110 milyong Pilipino kada araw.

 Katumbas ito ng 7.2 billion pesos na halaga ng kaning nasasayang sa bansa kada taon.

 Batay sa datos ng Philippine Rice Research Institute (PhilRice), aabot sa dalawang milyon ang maaaring makakain mula sa mga nasasayang na kanin kada taon.

 Sa panig naman ng Department of Agriculture (DA), inaasahang aabot sa 80,000 metric tons ang rice shortage simula Hulyo hanggang Setyembre.

 Ipinaliwanag ni Agriculture Assistant Secretary Kristine Evangelista na sadyang mayroong mga panahon na kaunti ang inaaning palay o tinatawag na lean months o lean season kaya’t kailangang mag-import.

 Base sa monitoring ng D.A., aabot ng dalawa hanggang tatlong piso ang itinaas ng kada kilo ng bigas ngayong Abril kumpara sa piso noong isang buwan.

Hindi dapat maapektuhan ang security at territorial interest ng China at makisawsaw sa maritime dispute sa South China ang lumalalim na security alliance ng Pilipinas at Amerika.

Ito ang babala ng Tsina sa nagpapatuloy na pinaka-malaking military exercises sa pagitan ng Pilipinas at Estados Unidos na sinimulan noong Martes.

Ayon kay Chinese Foreign Ministry Spokesperson Wang Wenbin, hindi dapat maging target sa military drills ang anumang third party sa halip ay dapat makatulong sa pagpapanatili ng kapayapaan sa Asia-Pacific region.

Wala namang binanggit si Wang kung paano tutugon ang China kung mapagtanto nitong naka-umang sa kanila ang pinaigting na security alliance ng Pilipinas at Amerika.