Drew Nacino

Para daw maipakita ng administrasyon na talagang para sa sambayanang Filipino at sa mga susunod na henerasyon ang paglikha ng Maharlika Investment Fund (MIF).

Hinamon ni Senate Minority Leader Koko Pimentel ang Malakanyang na magpatawag ng referendum para sa Maharlika Investment Fund Bill.

Sa ganitong paraan ay makikita anya ang kumpiyansa na talagang makikinabang dito ang taumbayan at malalaman kung suportado ito ng mayorya  ng mga Filipino.

Sa pag-aanalisa ni Pimentel, sa halip na makabuti, makakasama ang paglikha ng Maharlika Investment Fund sa ekonomiya, sa bansa, sa taumbayan at sa kinabukasan ng bansa.

Ipagsasapalaran anya dito ang pera ng bayan  sa hindi pa klarong investments, samantalang maayos namang nagagamit at kumikita ang mga pondong pinagdiskitahang gamitin dito.

Tinutukoy ang 50 billion pesos na manggagaling sa landbank of the Philippines, 25 billion mula sa Development Bank of the Philippines, P25- B mula sa National Government at mga dibidendo ng Bangko Sentral ng Pilipinas.

Ayon kay Pimentel, mayroon ditong panganib dahil may history ng corruption ang bansa at ang Maharlika Bill ay patatakbuhin ng iilang tao.

Pwede anya itong kwestyunin sa Korte Suprema dahil sinertipikahan na pangulo na urgent measure gayung walang Public Calamity o Emergency.

Gumulong na sa plenaryo ng kamara at nakatakdang pagdebatehan ang House Bill 8218 na nagsusulong ng pagtatatag ng Philippine Atomic Energy Regulatory Authority o pagkakaroon ng Nuclear Energy ng bansa.

Ayon kay House Special Committee on Nuclear Energy Chairman at Pangasinan 2nd District Rep. Mark Cojuangco, ang pagtatag ng philatom ang tugon sa panawagan ni Pangulong Bongbong Marcos na isakatuparan ang pagkakaroon ng nuclear energy.

Ito, anya, ay bilang solusyon sa patuloy na lumalaking energy requirement ng pilipinas, lalo’t 55 % ng coal na ginagamit upang patakbuhin ang mga power plant ay imported.

Sa sandaling maisabatas, ang philatom ang magsisilbing independent body na magpapatupad ng mga regulasyon sa nuclear technologies upang matiyak ang ligtas at maayos na paggamit ng nuclear energy.

Una nang ipinaliwanag ni Cojuangco na kung mayroon nang nuclear energy sa bansa ay hindi na magbabayad ng mahal na kuryente.
Kung nuclear power ay nasa ¢35  per kilowatt hour lamang ang babayaran kumpara sa kasalukuyang gamit na coal na nasa P10 per kilowatt hour.

Inaalmahan ng mga residenteng naninirahan sa dalampasigan ng Nasugbu, Batangas ang pagkasira umano ng kanilang kapaligiran at karagatan, na naka-aapekto na sa kanilang kabuhayan.

Ito’y dahil sa hinihinalang black sand mining operations sa kanilang lugar, partikular sa barangay Bucana.

Ayon sa ilang barangay official, unti-unti nang kinakain ng sand mining ang baybayin at una sa posibleng maapektuhan ang mga beach resort, gaya ng Villa Fortuna, joyful paradise at bahagi ng Recuerdos De Playa.

Batay sa mga nakalap na dokumento ng Dwiz-Aliw 23, nagsasagawa ng dredging at desilting operations upang palalimin ang Bucana River na nasa pagitan ng mga bayan ng Nasugbu at Lian, na dumadaloy hanggang Tagaytay City, Cavite.

Pinangungunahan ito ng sinasabing australian firm na PH-AU Diversified solution group of companies incorporated.

Kinontrata ng provincial government ang PH-AU na mag-transport at mag-dispose ng 37,800 cubic meters ng buhangin at silt materials na nahuhukay o nakukuha sa loob ng 2 hectares na bahagi ng 19.9 hectares ng Bucana river.

Gayunman, ipinagtataka ng mga residente at mga mangingisda kung bakit sinimulan ng dredger ang paghahakot ng buhangin sa fortune island patungong ilog gayong dapat magmula ito sa ilog palabas ng dagat.

Una nang inihayag ni Chamber of M,ines of the Philippines Executive Director Ronald Recidoro na kapansin-pansing may ilang contractor na nag-de-dredging ng ilog pero kinukuha ang buhangin gayong dapat ay iniiwan o inihihiwalay lamang ito.

Isa anya ito sa mga halimbawa ng black sand mining na mahigpit na ni-re-regulate sa pilipinas at maaari lamang isagawa sa mga partikular na lugar.

Sa ilalim ng Republic Act 7942 o Philippine Mining Act of 1995, ipinagbabawal ang mining sa offshore areas sa loob ng 500 meters habang 200 meters naman kapag sa onshore areas.

Samantala, nakikipag-ugnayan na ang Dwiz-Aliw 23 kay Batangas Governor Hermilando Mandanas at Department of Environment and Natural Resources upang mabigyang linaw ang katangungan ng mga taga-Nasugbu.

Aprubado na ng kamara sa botong 284-0 ang panukalang makatutulong sa pagtugon sa epekto ng climate change sa bansa.

Aamyendahan ng House Bill 7754 ang Section 43 ng Presidential Decree 705 o “Revised Forestry Code of the Philippines” upang mapaikli ang paghihintay para muling mataniman ng puno ang mga inabandonang fishpond.

Mula sa limang taon ay gagawin na lamang itong tatlong taon.

Ayon kay House Speaker Ferdinand Martin Romualdez, sa ilalim ng bill ay inaatasan ang Department of Agriculture at Department of Environment and Natural Resources na maglabas ng guidelines para sa implementasyon nito.

Ang panukala ay inihain nina Agusan del Sur representatives Alfelito “Alfel” Bascug at Eddiebong Plaza, at Bulacan Rep. Linabelle Ruth Villarica.

Ang House Committee on Natural Resources na pinamumunuan ni Cavite Rep. Elpidio Barzaga ang tumalakay sa nasabing bill.

Nagtataka ang samahang industriya ng agrikultura sa pasya ng Department of Agriculture na ipagpaliban ang pagpapatupad ng suggested retail price upang mapababa ang presyo sa mga pamilihan.

Para sa sibuyas na pula, target ipatupad ang S.R.P. na P150 per kilo para sa pula at P140 para sa puti.

Ayon kay SINAG Executive Director Jayson Cainglet, maaaring may mas malaking rason sa anunsyo ni Agriculture Senior Undersecretary Domingo panganiban na pigilan ang S.R.P. sa sibuyas.

Tila pino-protektahan anya ng D.A. ang cartel sa hakbang na ito kaya’t kanilang kinukwestyon ang dahilan sa pagpapaliban ng pagpapatupad ng S.R.P.

Ipinagtataka rin ni Cainglet kung bakit hindi pinirmahan ni Panganiban ang draft order gayong nagkasundo naman sila sa meeting noong March 19, na ipatupad ang S.R.P. sa sibuyas.

Nangangahulugan anya ito na hindi sigurado ang mga D.A. official sa kapangyarihan ng kanilang ahensya.

Ipinunto naman ng sinag na matapos i-anunsyo ang desisyon na magpatupad ng srp, bahagyang bumaba ang retail prices ng sibuyas sa iba’t ibang palengke sa Metro Manila.

Naglunsad ng consultative meeting ang Bureau of Customs at US Embassy-Manila Special Operations Command Pacific Indo-PacCom Augmentation Philippines Information Team upang paigtingin ang kooperasyon at pagbabantay sa border ng dalawang bansa.

Tinalakay sa pulong ang mga oportunidad ng Pilipinas at US upang palakasin ang law enforcement, maritime operation, imbestigasyon at paggamit ng mga makabagong teknolohiya.

Dumalo sa meeting sina Customs Commissioner Bienvenido Rubio, Deputy Commissioner Teddy Raval, mga hepe ng iba’t ibang dibisyon, E.S.S., Financial Management Office, External Affairs Office at Interim Training Development Division.

Sa panig ng Amerika, dumalo naman si Jason Perez, Officer-in-charge ng Special Operations Command Pacific at Patrick Braun, hepe ng Information Support Team.

Isinusulong ng Aduwana ang pagpapatibay ng relasyon nito sa iba’t ibang ahensya upang mas mapaganda ang naihahatid nitong serbisyo sa bansa.

Umakyat na sa 11 ang bilang ng mga sugatan habang nasa P300-M ang halaga ng pinsala sa sunog sa Manila Central Post Office.

Sinabi ng Bureau of Fire Protection(BFP), na ang mga nasugatan ay kinabibilangan ng mga bumbero na sina; Fire Officer-2 Joel Libutan, Fire Officer-1 Carlo Abrenica, Senior Fire officer-2 Julio Erlanda, Fire Officer-2 Jeremy Roque, at Fire Officer-1 Josaphat Araña.

Nasaktan din ang Fire volunteer na si Toto Doslin at sibilyan na si Elain Dacoycoy.

Dagdag ng BFP, nakaranas ang mga sugatan ng first-degree burns, pamamaga at paglambot ng mga kalamnan, mga reaksiyong alerhiya, posibleng bali, o laceration at iba pa.

Aabot naman sa dalawang istruktura ang nasunog na pinaniniwalaang nagsimula ang apoy sa basement kaya’t umabot sa pinakamataas na palapag.

Nagsumite na ng resignation bilang Land Transportation Office Chief si Assistant Secretary Jay Art Tugade, epektibo Hunyo 1.

Tinukoy ni Tugade ang pagkaka-iba ng paraan ng pamamahala ang L.T.O. at Department of Transportation.

Nasa kamay na anya ngayon ni Transportation Secretary Jaime Bautista ang pagpili ng bagong L.T.O. Chief.

Kumpiyansa naman ang nagbitiw na opisyal na makakami ng liderato ni Secretary Bautista ang hangaring ayusin ang mga sektor ng transportasyon  para sa ika-uunlad ng bansa.

Nagbitiw si Tugade sa harap ng mga kinakaharap na kontrobersya ng L.T.O. gaya ng shortage ng driver’s license cards at plaka ng mga sasakyan.

Samantala, tinanggap na ni Secretary Bautista ang resignation ni Tugade.

Pinasalamatan naman ng kalihim si Tugade sa mga ibinahagi nitong pagbabago sa L.T.O. sa loob ng 7 buwang panunungkulan na malaking tulong sa publiko.

Wala pang pangalan na napipisil ang kalihim bilang susunod na LTO Chief, pero magpapasa siya sa Office of the President ng rekomendasyon.

Binawian na ng buhay ang Filipino boxer na nag-collapse sa ring at na-comatose matapos manalo sa kanyang laban noong sabado sa Imus City, Cavite.

 Nalagutan ng hininga si Kenneth Egano, 22 anyos na bantamweight prospect matapos magtamo ng head injuries sa 8-round fight kontra Jason Facularin sa Imus Sports Gymnasium.

 Kinumpirma ng Games and Amusements Board na pumanaw si Egano, na tubong-General Santos City, habang naka-confine dahil sa brain hemorrhage sa Imus Doctors Hospital, kahapon.

 Bumagsak ang boksingero habang hinihintay ang desisyon sa kanyang laban kay Facularin sa undercard ng “blow-by-blow” Boxing show na ipino-promote ni Filipino Boxing Legend at dating senador Manny Pacquiao.

 Sinagot naman ni Pacquiao ang lahat ng gastos sa pagpapagamot kay Egano.

 Tinalo ni Egano, si Facularin via unanimous decision, at may final record na 7-1, kabilang ang 3 knockouts.

Suportado ng Kamara ang hangarin ni Pangulong Ferdinand Marcos Jr. na palakasin ang ugnayan ng Pilipinas at Estados Unidos upang mapanatili ang kapayapaan sa Indo-Pacific Region.

Ito ang tiniyak ni House Speaker Martin Romualdez matapos nitong salubungin si Pangulong Marcos Jr. sa Joint Base Andrews Airport sa Maryland, U.S.A.

Nasa Amerika ang pangulo upang makipagpulong kay U.S. President Joe Biden at sa iba pang opisyal ng Estados Unidos at mga negosyanteng nakabase roon.

Inihayag ni PBBM na nais nitong linawin ang magiging papel ng U.S. sakaling tumaas o lumawak ang tensyon sa Indo-Pacific Region.

Lilinawin din anya ni Pangulong Marcos Jr. kay Biden na ang nais ng Pilipinas ay mapanatili ang kapayapaan sa rehiyon, lalo’t may epekto ang geopolitical tensions sa paglago ng ekonomiya.

Una nang bumiyahe si Romualdez sa amerika noong nakaraang buwan upang plantsahin ang nakatakdang pagdating ni Pangulong Marcos Jr.