Drew Nacino

Kinumpirma ng Philippine Egg Board Association (PEBA) na tumigil na sa operasyon ang ilan pang maliliit na poultry farm owners at egg producers sa bansa.

Ito ang isa sa itinuro ni PEBA Chairman at United Broilers Raisers Association President Gregorio San Diego na dahilan nang pagtaas ng presyo ng itlog sa mga pamilihan, partikular sa Metro Manila.

Ayon kay San Diego, nagkaroon ng over-production noong 2021 pero bagsak ang presyo kasabay ng pagmahal ng patuka na sinundan ng bird flu outbreak noon namang isang taon.

Kung sosobra anya ang produksyon ay malulugi sila kaya’t maraming small at medium producers ang tumigil na sa operasyon habang nagbawas ng volume ang malalaking poultry farm.

Namemeligro pang madagdagan ang singil ng Meralco sa mga susunod na buwan makaraang magtapos kahapon ang kanilang emergency power supply agreement (EPSA) sa isa sa mga planta ng gnpower dinginin limited ng aboitiz.

Dahil dito, huhugot na ang nasabing power distributor ng 670 megawatts mula sa mas mahal na wholesale electricity spot market (WESM) simula ngayong araw na posibleng mag-reflect February o March billing period.

Una nang hiniling ng Meralco sa GNpower na palawigin ang kanilang epsa subalit wala umanong naging tugon ang nasabing subsidiary ng Aboitiz power.

Sa ilalim ng EPSA, kukunin ang 300 megawatt power sa planta ng GNpower sa Mariveles, Bataan na may fixed price na P5.95 per kilowatt hour.

Bukod sa nagtapos na kontrata, magkakaroon naman ng maintenance shutdown ang Malampaya gas production platform simula Pebrero a –4 hanggang a – 18.

Ang Malampaya ang nagsusupply ng natural gas sa mga plantang pinagkukunan ng kuryente ng Meralco kaya’t asahan na ang mas mataas na bill sa Marso kung kailan inaasahang magsisimula ang tag-init.

Gagamit muna ang mga planta ng mas mahal na imported fuel at dahil dito ay magiging P9.04 per kilowatt hour na ang magiging singil ng Santa Rita at San Lorenzo power plants sa Meralco kumpara sa kasalukuyang mahigit P4 lamang.

Posibleng masipa sa pwesto ang barangay chairman sa Tondo, Maynila makaraang manggulpi ng tauhan ng MMDA nang pumalag sa clearing operation sa Dagupan Street, kahapon.

Ipinagharap ng reklamong “direct assault” si Chairman Rommel Bravo ng Barangay 51, Zone 4.

Ayon sa Manila Police District, mag-aalas-9:00 ng umaga nang magsagawa ng clearing operation ang MMDA nang mamataan ang “car wash” sa tabi ng bangketa.

Sinita ito ng MMDA nang biglang sumulpot si Bravo kung saan binigwasan nito ang isang MMDA Metro Aide 1 kaya nagkaroon ng komosyon.

Inihayag naman ni MMDA Traffic Czar Bong Nebrija na nasa tabi ng barangay hall ang car wash na sinasabing pag-aari ng punong barangay.

Noong isang linggo pa anya sila nag-abiso na magkakaroon ng clearing operation sa dagupan kung saan ilang beses na rin isinagawa ang naturang operasyon sa lugar.

Ipinag-utos na ni Interior Secretary Benhur Abalos sa opisyal ng DILG–Pangasinan na mag-leave sa trabaho matapos lumutang ang balitang pangha-harass umano ng mga pulis sa ilang onion farmer.

Hindi umano ipinaalam kay abalos ni DILG–Pangasinan Director Virgilio Sison ang direktiba nito sa Bayambang Municipal Police na imbestigahan at kumuha ng karagdagang impormasyon sa sinasabing pagpapakamatay ng limang magsasaka ng sibuyas.

Pinagpapaliwanag din ng kalihim si Sison habang nagsasagawa ng imbestigasyon ang kagawaran.

Batay sa ulat, hinarass umano ng PNP ang magsasakang mula Bayambang na si Merly Gallardo matapos itong tumestigo sa senado kaugnay sa mahal na presyo ng sibuyas.

Ibinunyag ito ni Senador Imee Marcos kasabay ng babala sa pambansang pulisya na huwag paki-alaman ang mga testigo ng mataas na kapulungan ng kongreso.

“Electro-Mechanical Malfunction” ang naging mitsa ng Air Traffic System glitch sa Ninoy Aquino International Airport (NAIA) noong bagong taon.

Ayon kay Information and Communications Technology Secretary Ivan John Uy, tinalakay na ang issue nang pulungin ni Pangulong Bongbong Marcos ang Department of Transportation.

Pagdating naman sa issue ng cybersecurity, wala anyang kahit anong cyber-related incident na naging sanhi ng insidente noong Enero 1.

Samantala, inihayag ni Transportation Secretary Jaime Bautista na ipinag-utos na ni Pangulong Marcos sa ahensya na paspasan ang pagbuo ng kasunduan sa maintenance provider na Sumitomo-Thales, na target i-modernize ang Aviation Safety System ng bansa.

Mahigit 65,000 pasahero ang naapektuhan matapos makansela ang halos 300 flights dahil sa pagpalya ng air traffic system sa NAIA sa pagpasok pa lamang ng taong 2023.

Tumaas ang deployment ng mga Overseas Filipino Worker (OFW) noong isang taon.

Inihayag ito ni Migrant Workers Undersecretary Hans Cacdac sa kanyang pagharap sa Senate Subcommittee on Economic Affairs Hearing.

Ayon kay Cacdac, nasa 50% hanggang 70% ang itinaas ng Land-Based Deployment habang tumaas ng 10,000 ang deployment ng seafarers noong Nobyembre 2022 kumpara sa kaparehong panahon noong 2021.

Gayunman, mas mababa pa rin anya ang naitalang bilang ng OFW deployment noong isang taon kumpara noong bago ang COVID-19 pandemic.

Umaasa ang MMDA Na maipatutupad na ngayong unang quarter ng taon sa National Capital Region ang single ticketing system para sa traffic violations.

Magbibigay-daan ito sa standard fines para sa dalawampung common violations, kabilang ang pagbalewala sa traffic signs, beating the red light at counterflow.

Ayon kay MMDA Traffic Discipline Office Director for Enforcement, Atty. Victor Nuñez, layunin din ng single-ticketing na magkaroon ng interconnection sa Land Transportation Office ang 17 LGU sa Metro Manila.

Papayagan anya sa bagong ticketing system ang violators na magbayad sa pamamagitan ng digital payment channels.

Noon lamang isang linggo inaprubahan ng Metro Manila Council ang final draft ng single ticketing system.

Hindi na palalawigin ng Department of Agriculture ang implementasyon ng P250 suggested retail price (SRP) sa sibuyas.

Ito’y dahil sa inaasahang pagbaba ng presyo bunsod ng pagdating ng mga inangkat na sibuyas mula China at pagsisimula ng anihan ngayong linggo.

Nito lamang disyembre nang ipatupad ang P250 srp sa gitna nang sumisirit na presyo ng nasabing agricultural product.

Una nang inihayag ng Bureau of Plant Industry na dumating na sa bansa ang unang batch ng imported onions na maaari nang ibenta ngayong linggo.

Nagsimula nang dumating ang mga puti at pulang sibuyas na inangkat mula sa China.

Kinumpirma ng Department of Agriculture na mahigit 1,200 metric tons, na bahagi ng nasa 5,000 metric tons na imported onions, ang dinidiskarga apat na araw bago ang emergency shipment deadline sa January 27.

Itinakda ang naturang deadline para sa emergency shipment ng 21,000 metric tons ng sibuyas upang maiwasan umanong magambala ang anihan ng lokal na sibuyas.

Layunin ng importasyon na mapababa ang presyo ng nasabing produkto sa mga pamilihan at mapatatag ang supply.

Ayon kay DA Deputy Spokesman Rex Estoperez, sumasailalim pa sa second border inspection ng Bureau of Plant and Industry ang 48 container ng sibuyas na dumating simula noong Biyernes, Enero 20.

Ang inspeksyon anya ay requirement upang matiyak na walang nahahalong sibuyas sa ibang agricultural product bago ibenta sa merkado.

Inaasahang darating din ngayong linggo ang iba pang batch ng mga inangkat na sibuyas mula China.

Gayunman, limitado lamang ang imported onions sa Ports of Manila, Subic, Cebu, Davao at Cagayan De Oro City.

Nagmahal pa nang 50 sentimos ang presyo ng itlog sa ilang pamilihan sa Metro Manila.

Ito, ayon sa Philippine Egg Board, ay kahit stable ang presyuhan sa farm gate.

Dahil dito, nasa P8.50 hanggang P10 na ang kada piraso ng itlog sa Balintawak at Mega Q Mart sa Quezon City, depende sa laki.

Tumaas din ng piso ang kada piraso ng itlog na maalat kaya aabot na sa P16 ang presyo nito.

Una nang inihayag ng Samahang Industriya ng Agrikultra na nagmahal ang production cost ng itlog at apektado ang supply sa Metro Manila dahil sa pagkalat ng bird flu virus sa ilang lalawigan sa Luzon.