Drew Nacino

Nasa apatnapung opisyal ng Department of Finance, Bureau of Customs at iba pang ahensya ng gobyerno ang ipatatawag sa isasagawang imbestigasyon ng House Committee on Ways and Means sa talamak na smuggling ng mga produktong agrikultura sa bansa.

Pursigido si Committee Chairman at Albay 2nd District Rep. Joey Salceda na mabigyang-linaw at karampatang aksyon ang pamamayagpag umano ng mayayamang smuggler.

Inaasahang gigisahin ng Kongresista at iba pang miyembro ng mababang kapulungan ng Kongreso sina Finance Secretary Ben Diokno at Customs Commissioner Yogi Ruiz sa naturang issue.

Ayon kay Salceda, “hindi na katanggap-tanggap” ang sitwasyon dahil bukod sa pinagmumulan ito ng korapsyon, ito rin ang pumapatay sa lokal na industriya, sa gitna ng nararanasang krisis sa pagkain.

Handa anya sila sa Kongreso na pangalanan at ibunyag ang sinumang mga sangkot sa tamang panahon pero sa ngayon ay kanila munang po-protektahan ang kanilang resource persons.

Magugunitang napaulat na mayroon umanong tatlo hanggang apat na malalaking smuggler ang nag-o-operate sa bansa.

Kabilang sa tututukan ang operasyon ng isang alyas “amina” na tinaguriang “smuggling queen” dahil malakas umano ang kapit sa Department of Finance at BOC.

Ibinunyag na ni Senator Raffy Tulfo ang mga umano’y oil smuggler sa bansa.

Sa consultative meeting kaugnay sa estado ng implementasyon ng fuel marking program ng Bureau of Internal Revenue at Customs, isa-isang pinangalanan ni Senador Tulfo ang sinasabing smuggler.

Kahit walang ebidensya, diretsahang tinanong ni Tulfo si BOC Special Agent 2 Anthony Escandor kung kilala nito sina don Rabonza, Sonny Qiu, Jackie Chu, Aron Uy, Lindon Tan, Alex Cua, Bogs Violago, Jong Mangundadatu at Dondon Alahas.

Gayunman, walang napiga ang senador kay Escandor sa dahil hindi umano nito kilala ang mga nabanggit na pangalan.

Nakalulungkot anya na tila hindi alam ng mga taga-aduwana ang kanilang tungkulin na habulin ang mga smugglers.

Dahil dito, plano ng mambabatas na magpatawag ng hiwalay na pagdinig kaugnay sa issue ng oil smuggling o hilingin sa Senate Blue Ribbon Committee na mag-imbestiga.

Karagdagang 251 covid-19 cases ang naitala ng Department of Health habang bumaba pa sa 10,863 ang aktibong kaso kahapon.

Ito na ang ikalimang sunod na araw na mas mababa pa sa 300 covid-19 cases ang naitala sa bansa.

Bahagya namang umakyat sa 4,710,151 ang total caseload.

Kabilang na rito ang 3,994,000 recoveries habang sumampa sa 65,654 ang death toll matapos madagdagan ng 17 fatalities.

Samantala, nangunguna pa rin ang National Capital Region sa may pinaka-maraming kaso sa nakalipas na dalawang linggo, 1,626; sinundan ng Calabarzon, 812; Central Luzon, 414 at Cagayan Valley, 336.

Inilarga na ng Social Security System ang probisyon ng RA 11199 o ang Social Security Act of 2018 na nagtataas ng kontribusyon ng mga miyembro upang matiyak ang financial viability ng SSS para sa mga manggagawa sa pribadong sektor.

Ayon kay SSS President at Chief Executive Officer Rolando Ledesma Macasaet, sa ilalim ng batas, agad na magkakaloob ng benepisyo sa may labingtatlong milyong manggagawa at matitiyak ang viability ng SSS fund para magkaloob sa kanila ng social security protection.

Alinsunod din sa batas, magtataas ng contribution rate ng 1% kada dalawang taon hanggang sa maabot ang 15% sa taong 2025.

Sa ilalim ng bagong contribution rate, ang employers ang aako ng 1% increase na nangangahulugan ang kanilang contribution sa ngayon na 9.5% at ang nalalabing 4.5% ay ibabawas sa mga empleyado.

Nilinaw naman ni Macasaet na hindi apektado ang mga empleyadong sumasahod ng hindi aabot ng P25,000 kada buwan na bumubuo naman sa 78% ng SSS-paying employee members.

Posibleng isailalim muli sa red alert status ang Luzon grid habang papalapit ang tag-init.

Ito, ayon kay Energy Undersecretary Rowena Cristina Guevara, ay kung kahit isang power plant lamang ang mag-force outage dahil sa inaasahang pagnipis ng supply ng kuryente sa pagpasok ng tag-init sa Marso.

Nangangahulugan ito na mayroong kakulangan sa supply na maaaring magresulta sa power interruptions habang ang yellow alert ay nangangahulugang kakapusan ng power reserves o ancillary services.

Magugunitang pinagmulta ng Energy Regulatory Commission ang National Grid Corporation of the Philippines ng P5.1 million sa paglabag sa DOE circular hinggil sa pangongontrata ng ancillary services, kaakibat ng kanilang bantang pag-revoke sa kanilang prangkisa.

Ilan lamang ang Occidental Mindoro, na kabilang sa spug areas o mga lugar na hindi konektado sa power grid, sa madalas putaktehin ng brownout dahil sa patay-sinding planta ng Occidental Mindoro Consolidated Power Corporation (OMCPC).

Hindi pa kasi nababayaran ng National Power Corporation ang daan-daang milyong pisong utang nito sa OMCPC upang maging fully operational ang kanilang planta na pinagagana ng diesel.

Dahil dito, umaapela na si occidental Mindoro Vice Governor Diana Tayag kay Pangulong Bongbong Marcos na resolbahin na ang matagal na nilang problema sa supply ng kuryente.

Umaasa si Tayag na matutugunan ni Pangulong Marcos ang problema lalo’t ito ang may kapangyarihang mag-utos sa DOE at NAPOCOR na solusyonan ang power crisis sa lalawigan.

Nanganganib muling tamaan ng krisis sa kuryente ang ilang lalawigang hindi konektado sa power grid o mga “spug areas” dahil sa kakapusan ng budget para sa mahal na diesel, na nagpapatakbo sa mga planta.

Ilan sa inilatag na hakbang ng National Power Corporation (NAPOCOR) ay bawasan ang operasyon ng mga diesel power plant upang pagkasyahin hanggang katapusan ng 2023 ang budget.

Ipinanawagan naman ng grupong National Association of Electricity Consumers for Reforms Incorporated (NASECORE) sa Department of Energy na resolbahin na agad ang kakulangan sa power reserves.

Sa gitna ito nang nagbabadyang pagnipis ng supply sa Luzon grid, lalo sa tag-init.

Iginiit ni NASECORE President Pete Ilagan kay energy Secretary Raphael Lotilla na dapat nang seryosohin ang issue at puwersahin ang National Grid Corporation of the Philippines (NGCP) na gampanan ang mandato nito.

Ito’y upang matiyak ang 24 oras na delivery ng kuryente sa pamamagitan ng paghugot ng power reserves o ancillary services.

Aminado si Ilagan na mas nakakatakot ang katamaran o kakulangan ng aksyon ng DOE kumpara sa pagkukulang ng NGCP sa pagtiyak na may sapat na reserbang kuryente.

Nabigo anya ang NGCP na matiyak ang energy reserves sa pamamagitan ng competitive bidding na nagresulta sa red at yellow alerts.

Dismayado rin ang NASECORE dahil hinayaan ng kagawaran na humantong sa ganitong sitwasyon at paglimita sa papel nito bilang forecaster ng power situation sa halip na gumawa ng mga solusyon at ipatupad ang batas.