Drew Nacino

Tila nabudol ang Philippine Gaming Corporation o PAGCOR ng kinuha nilang 3rd party auditor para suriin ang kita ng Philipine Offshore Gaming Operations (POGO) sa bansa upang matukoy kung tama ang binabayaran nilang buwis.

Ito ang inihayag ni Senate Committee on Ways and Means chairman Sherwin Gatchalian makaraang matuklasan na ang ibinigay na bank certificate ng na 3rd party auditor na Global Com-R.C.I., ay hindi rehistrado sa Bangko Sentral ng Pilipinas.

Iginiit ng Senador Gatchalian na mahalaga ang 3rd party auditor dahil dito kinukuha ang datos kung magkano ang dapat na bayarang buwis ng mga POGO; kung mali ang binibigay nilang datos o mali ang kinokolekta ng Bureau of Internal Revenue.

Lumitaw anya na kwestyunable ang kredibilidad ng Global Com-R.C.I. dahil wala itong technical capability, walang opisina at walang resibo.

Dismayado rin ang mambabatas matapos aminin ng PAGCOR na hindi nila na-check ang background ng nasabing kumpanya nang pumasok sa P6-B Consultancy Contract noong 2017.

Naghihinala naman ang Senador na nakipag-kuntsabahan sa pogo ang Global Com-R.C.I. at maaaring bawiin na ang pinasok na kontrata ng PAGCOR dahil sa dami ng violations nito. — ulat mula kay Cely Ortega-Bueno (Patrol 19)

Nilinaw ng Department of Agriculture na hindi pa maaaring ibenta sa mga palengke at ilan pang pamilihan ang mga bagong dating na sibuyas na inangkat mula China.

Ayon kay DA Deputy Spokesman Rex Estoperez, sumasailalim pa sa second border inspection ng Bureau of Plants and Industry ang unang batch ng imported onions na dumating noong Biyernes, Enero 20.

Sa kabila nito, umaasa anya sila sa kagawaran na magmumura na ang sibuyas sa pagdating ng mga shipment bukod pa sa pagsisimula ng anihan.

Ikinukunsidera rin ng DA na magpataw ng price cap sa imported onions, pero aminado si Estoperez na dapat tiyaking hindi ito mababa sa local production cost upang hindi maapektuhan ang kita ng mga magsasaka.

Pinag-aaralan na ng kagawaran na ipako sa P100 hanggang P150 ang presyo ng kada kilo ng sibuyas kumpara sa cost of production na hindi aabot ng P100.

Nais muling bigyan ng pagkakataon ni Pangulong Bongbong Marcos si dating DSWD secretary Erwin Tulfo na makapaglingkod sa gobyerno.

Tugon ito ng Pangulo matapos mabigo si Tulfo na makalusot sa makapangyarihang Commission on Appointments.

Ayon kay Pangulong Marcos, naging maayos ang pamumuno at performance ni Tulfo bilang kalihim ng DSWD at hindi matatawaran ang dedikasyon nito sa trabaho.

Aminado si PBBM na may iba siyang plano para sa dating kalihim subalit hindi bilang isang presidential adviser.

Pinaiimbestigahan na ng Department of the Interior and Local Government (DILG) sa regional offices nito ang pang-ha-harass umano ng PNP sa isang onion farmer.

Partikular na inatasan ng DILG ang Region 1 at Pangasinan Provincial Offices nito na imbestigahan ang ulat na puwersahang pina-pipirma ng mga pulis ng waiver si Nanay Merly Gallardo matapos tumestigo sa Senado kaugnay sa mala-gintong presyo ng sibuyas.

Pinaalalahan ni Interior Secretary Abalos ang pulisya na sumunod sa rule of law at magkaroon ng protocols upang maiwasan ang hindi pagkakaunawaan sa pagitan ng PNP at mga sibilyan.

Dalawang araw matapos ibahagi sa Senado ang sinapit ng kanilang buhay dahil sa pagpapakamatay ng kanyang mister bunsod ng pagkalugi sa sibuyas, isinumbong ni Nanay Merly na ilang pulis ang walong beses na pumunta sa kanilang bahay sa Bayambang, Pangasinan.

Dahil dito, umalma si senator Imee Marcos at iginiit na hindi dapat paki-alaman ng PNP at national Task Force to End Local Communist Armed Conflict ang mga testigo ng mataas na kapulungan ng Kongreso.

Aprubado na ng Metro Manila Mayors at traffic management officials ang final draft ng Metro Manila Traffic Code para sa panukalang single ticketing system.

Inaasahan na ang full implementation ng panukalang single ticketing system ngayong unang quarter ng taon.

Ayon kay MMDA Chairman Romando Artes, kabilang sa draft ang napagkasunduan na standardized penalties para sa halos dalawampung pinaka-karaniwang traffic violation at inter-connectivity requirements sa Land Transportation Management System (LTMS) ng LTO.

Napagkasunduan din sa pulong kahapon na maglalaan ang MMDA ng pondo para sa pagbili ng hardware at IT requirements para sa seamless at rollout ng integration ng local government units sa ltms.

Samantala, inihayag ni Metro Manila Council Chairman at San Juan City Mayor Francis Zamora na magkakaroon ng isa pang meeting upang mapag-aralan pa ang mga napagkasunduan ng technical working group na lumikha ng Metro Manila traffic code.

Posibleng hindi na kasuhan ng Bureau of Customs (BOC) ang sampung flight attendant ng Philippine Airlines na nahulihan ng mga puslit na sibuyas noong Enero a – 10.

Ayon kay BOC Spokesman at Customs Operation Chief Arnaldo Dela Torre Jr, sa ngayon ay walang isasampang kaso laban sa mga naturang flight attendant alinsunod sa batas.

Ipinaliwanag ni Dela Torre na kinukumpiska lamang ng mga otoridad ang anumang produktong ipinapasok sa bansa na hindi deklarado sa ilalim ng Presidential Decree 433 o plant Quarantine Decree of 1978.

Magugunitang inihayag ng Bureau of Plant Industry na posibleng maharap sa disciplinary sanctions ang sampung flight attendant.

Kabilang sa mga hindi deklaradong agricultural products na ipinuslit ang isang buriki ng sibuyas na tumitimbang ng 27 kilos, lemon at strawberry mula Riyadh, Saudi Arabia at Dubai, United Arab Emirates.

Kamakailan ay pinuna ng ilang senador ang Aduwana dahil pawang maliliit ang hinuhuli gayong maraming container van na kargado ng smuggled na sibuyas at iba pang agri-products ang umano’y pinalulusot sa pier.

Bahagyang dumami ang mga pamilyang nagugutom sa bansa.

Batay ito sa last quarter survey na isinagawa ng Social Weather Stations (SWS) noong Disyembre a – diyes hanggang a –katorse ng isang taon.

Lumabas sa survey na nasa 3 milyon o 11.8% ng mga pamilyang pilipino ang nakaranas ng involuntary hunger o gutom at walang makain o minsan nang nakaranas ng gutom sa nakalipas na tatlong buwan.

Kumpara ito sa 11.3% o 2.89 million families noong October 2022 at 11.6% o 2.95 million families noong June 2022.

Gayunman, ang survey result noong huling bahagi ng nasabing taon ay bahagyang mababa sa 12.2% o 3.1 million families noong Abril.

Pinaka-mataas na bilang ng pamilyang nakaranas ng gutom ay mula sa Mindanao, 12.7%; sinundan ng Visayas, 12%; Metro Manila, 11.7% at balance Luzon at 11.3%.

Samantala, sa 11.8%, 2.4 million o 9.5% families ang nakaranas naman ng moderate hunger o minsan lamang magutom habang 2.3% o halos 600,000 families ang nakaranas ng matinding kagutuman o laging gutom.

Nasa apatnapung opisyal ng Department of Finance, Bureau of Customs at iba pang ahensya ng gobyerno ang ipatatawag sa isasagawang imbestigasyon ng House Committee on Ways and Means sa talamak na smuggling ng mga produktong agrikultura sa bansa.

Pursigido si Committee Chairman at Albay 2nd District Rep. Joey Salceda na mabigyang-linaw at karampatang aksyon ang pamamayagpag umano ng mayayamang smuggler.

Inaasahang gigisahin ng Kongresista at iba pang miyembro ng mababang kapulungan ng Kongreso sina Finance Secretary Ben Diokno at Customs Commissioner Yogi Ruiz sa naturang issue.

Ayon kay Salceda, “hindi na katanggap-tanggap” ang sitwasyon dahil bukod sa pinagmumulan ito ng korapsyon, ito rin ang pumapatay sa lokal na industriya, sa gitna ng nararanasang krisis sa pagkain.

Handa anya sila sa Kongreso na pangalanan at ibunyag ang sinumang mga sangkot sa tamang panahon pero sa ngayon ay kanila munang po-protektahan ang kanilang resource persons.

Magugunitang napaulat na mayroon umanong tatlo hanggang apat na malalaking smuggler ang nag-o-operate sa bansa.

Kabilang sa tututukan ang operasyon ng isang alyas “amina” na tinaguriang “smuggling queen” dahil malakas umano ang kapit sa Department of Finance at BOC.

Ibinunyag na ni Senator Raffy Tulfo ang mga umano’y oil smuggler sa bansa.

Sa consultative meeting kaugnay sa estado ng implementasyon ng fuel marking program ng Bureau of Internal Revenue at Customs, isa-isang pinangalanan ni Senador Tulfo ang sinasabing smuggler.

Kahit walang ebidensya, diretsahang tinanong ni Tulfo si BOC Special Agent 2 Anthony Escandor kung kilala nito sina don Rabonza, Sonny Qiu, Jackie Chu, Aron Uy, Lindon Tan, Alex Cua, Bogs Violago, Jong Mangundadatu at Dondon Alahas.

Gayunman, walang napiga ang senador kay Escandor sa dahil hindi umano nito kilala ang mga nabanggit na pangalan.

Nakalulungkot anya na tila hindi alam ng mga taga-aduwana ang kanilang tungkulin na habulin ang mga smugglers.

Dahil dito, plano ng mambabatas na magpatawag ng hiwalay na pagdinig kaugnay sa issue ng oil smuggling o hilingin sa Senate Blue Ribbon Committee na mag-imbestiga.

“Huwag ninyong pakialaman ang testigo ng Senado sa imbestigasyon sa mataas na presyo ng sibuyas.”

Ito ang panawagan ni Senator Imee Marcos sa PNP, Department of Interior and Local Government at sa National Task Force To End Local Armed Conflict (NTF-ELCAC).

Sa gitna ito ng sinasabing utos ng DILG at NTF-ELCAC na papirmahin ng sinumpaang-salaysay o affidavit na bumabaliktad na sa kanilang ibinunyag sa Senado ang mga tumestigo.

Ayon kay Senator Marcos, natatakot na ang mga magsasaka ng sibuyas sa biglaang pagkatok ng pulis noong Miyerkules ng gabi hanggang kahapon ng umaga para papirmahin sa isang affidavit na nagsasabing binabawi na ang kanilang ibinunyag sa imbestigasyon ng Senado noong Lunes.

Kinuwestyon ng senador ang NTF-ELCAC kung itinuturing ba nilang CPP-NPA ang mga hamak na magsasaka sa mga liblib na lugar.

Hinaharass anya ng mga pulis sa Bayambang, Pangasinan si Nanay Merly o Merlita Gallardo na nabalo o na-biyuda makaraang magsuicide ang mister matapos malugi nang malaki sa pagtatanim ng sibuyas.

Pinapipirma umano si Nanay Merly ng affidavit na nakasaad na hindi totoo ang kanyang naging testimonya sa Senado at tinanong kung bakit ito dumalo sa imbestigasyon.

Napag-alaman ng presidential sister na inatasan kahapon ng Pangasinan Provincial Office ang Bayambang lgu na beripikahin ang testimonya na may limang magsasakang nagpakamatay dahil sa pagkalugi sa sibuyas.

Gayunman, may written report ang Bayambang Chief of Police na nagsasabing ang mister lang ni Nanay Merly na dating kagawad ang nagpatiwakal. —- Mula sa ulat ni Cely Ortega-Bueno (Patrol 19)