Drew Nacino

Tatlong medalya ang hinakot ng isang pulis mula Bohol sa katatapos lamang na World Police and Fire Games na ginanap sa Netherlands.

Sinikwat ni Staff Sgt. Maria Caress Arnejo ang gold medal sa over 60 kilogram 30 plus category ng Karate.

Silver naman ang dinagit nito sa 10,000-meter run women’s master 30 plus category habang bronze sa karate kata kyu bet 18 plus category.

Aminado si Arnejo na naging atleta siya noong nasa kolehiyo pa bago maging pulis.

Samantala, ibinulsa rin ni Staff Sgt. Rodel bustamante ng Davao Del Sur, ang isang gold medal makaraang talunin ang pambato ng Malaysia sa men’s masters 40 plus 5,000-meter walk, na isang track and field event.

Halos 10,000 atleta na kabilang sa uniformed services, tulad ng mga pulis, bombero at corrections officer mula sa 70 bansa ang lumahok sa isang linggong World Police and Fire Games.

Handa umano si US President Joe Biden na isulong ang panibagong nuclear arms deal sa Russia.

Ito ang tiniyak ni Biden matapos ang pahayag ni Russian President Vladimir Putin na walang mananalo sakaling sumiklab ang isang nuclear war sa Ukraine.

Sa pulong ng mga foreign diplomat sa treaty on the non-proliferation of nuclear weapons sa united nations headquarters, idinagdag ni Putin na hindi dapat humantong sa nuclear war ang sitwasyon.

Tumatalima naman anya ang Russia sa tratado at handa rin silang bumuo ng panibagong kasunduan para sa ikapapayapa umano ng mundo.

Walo ang patay, kabilang ang isang sanggol, sa karambola ng dump truck, motorsiklo at multi-purpose vehicle sa Nasugbu, Batangas, kahapon.

Kinilala ang mga nasawing sina Hipolito Sangalang, residente ng barangay Sta. Ana, Calatagan, Batangas at driver ng kulay titanium gray na Mitsubishi Xpander GLX na may plakang NVF-5726;

Mga sakay niyang sina Amado Santos; Evelyn Santos; Jerson Santos; Jayvee Santos; Catherine Ampo at apat na buwang gulang na si Candy Santos maging ang driver ng Yamaha Aerox motorcycle na si Eduard Ferrer, residente ng barangay Balibago, Sta. Rosa, Laguna.

Sugatan naman ang driver ng Shacman truck na si Ben Bryan Constantino, residente ng bagong Barrio, Caloocan City; mga pahinanteng sina Jr. Aranzado at Faustino Cuenco, kapwa residente ng San Ildefonso, Bulacan.

Ayon sa Police Regional Office-4A, patungo sanang Nasugbu mula Mexico, Pampanga ang truck na pag-aari ng WEA Worldwide Ventures na may plakang NGU-2433, na kargado ng buhangin nang maganap ang trahedya, pasado ala-6 ng umaga.

Binabagtas nina Constantino ang national highway sa Sitio Lodlod, barangay Aga nang mag-overtake sa isang sasakyan pero nawalan umano ng kontrol sa preno ang driver at inararo nito ang isang fruit stand at kasalubong na MPV at motorsiklo.

Pawang natabunan ng buhangin ang pitong sakay ng Mitsubishi Xpander na kapwa agad binawian ng buhay.

Iniimbestigahan na ng awtoridad ang nasabing aksidente.

Lumobo na sa mahigit sa P704.7-M ang pinsalang dulot sa imprastruktura ng magnitude 7 na lindol na yumanig sa Northern Luzon.

Sa pinakahuling datos ng NDRRMC, pinaka-malaking pinsala ang naitala sa Cordillera Administrative Region, P302-M; Ilocos Region P393-M at Cagayan Valley Region, P8.5-M.

Tinataya naming nasa 381,000 individuals ang apektado kabilang ang nasa 50,000 individuals na lumikas.

Samantala, bukod sa sampung namatay, nasa 400 ang bilang ng nasugatan.

Mula sa 24,901 damaged houses, 24,547 sa mga ito ang bahagyang napinsala habang 354 ang lubhang napinsala o totally damaged.

Asahan na ang panibagong price rollback sa Liquefied Petroleum Gas (LPG) ngayong unang linggo ng Agosto.

Kabilang sa mga nagpatupad ng tapyas-presyo ang Petron, Shell at Eastern Petroleum.

Ayon sa Petron, simula hatinggabi kahapon Agosto 1, singko sentimos ang kaltas sa kada kilo ng kanilang LPG.

Tatapyasan din nang P1.15 centavos ang kada kilo ng Auto LPG.

Alas 12:01 kaninang hatinggabi naman nang ipatupad ng Eastern Petroleum ang P1. 70 sentimos na rollback sa kada kilo ng kanilang LPG o P18.70 centavos sa kada 11 kilogram na tangke.

Samantala, P2.09 sentimos ang bawas-presyong ipinatupad ng Shell sa kada kilo ng Solane LPG ngayong araw.

Aabot hanggang P30, 000 ang cash aid na matatanggap ng mga biktima ng lindol sa Abra upang muling makapagtayo ng bahay.

Ito ang tiniyak ni Assistant Secretary Avelino Tolentino III, ng Department of Human Settlements and Urban Development (DHSUD).

Ayon kay Tolentino, nakadepende ang halaga sa pinsala, kung saan ang pinakamababang pwedeng matanggap ay 5,000 pesos.

Nasa 20, 500 kabahayan ang napinsala o nawasak habang aabot sa 54, 000 pamilya ang apektado pero kanila pa itong i-ba-validate.

Dalawang Filipino ang natagpuang patay sa Dubai, United Arab Emirates.

Kinumpirma ni Consul General Marford Angeles, tagapagsalita ng Philippine Embassy na may injury sa leeg ang isa sa mga Pinoy nang madiskubre noong July 27.

Ayon kay Angeles, nakikipag-ugnayan na ang Philippine Consulate General sa Dubai Police at ipinagbigay-alam na rin sa mga kaanak ang sinapit ng kanilang mga mahal sa buhay.

Kasalukuyang hawak na ng Attention to Nationals ng konsulada ang kaso ng dalawang hindi pa pinangalanang mga Pinoy.

Malabong makadalo si Foreign Affairs Secretary Enrique Manalo sa 55th Association of Southeast Asian Nations Foreign Ministers Meeting and Related Meetings sa Phnom Penh, Cambodia ngayong linggo.

Ito’y makaraang kumpirmahin ni Manalo na nagpositibo siya sa COVID-19.

Ang nasabing aktibidad anya ang kanya sanang unang asean engagement bilang kalihim ng Department of Foreign Affairs (DFA).

Sa kabila nito, tiniyak ng kalihim na hindi maaapektuhan ang partisipasyon ng Pilipinas dahil si DFA Undersecretary for Bilateral Relations and ASEAN Affairs Maria Theresa Lazaro ang hahalili sa kanya bilang kinatawan ng bansa.

Nagsimula ang naturang event noong July 29 hanggang August 5.

Natanggap na ng bus operators na nagbibigay ng libreng sakay sa Edsa Busway ang karagdagang 445.66 million peso compensation sa ilalim ng third phase ng Service Contracting Program (SCP).

Ayon kay Land Transportation Franchising and Regulatory Board (LTFRB) Chairperson Cheloy Garafil, ang nasabing halaga ay bayad sa ika-6 hanggang ika-13 linggo ng SCP Phase 3.

Gayunman, pino-proseso pa anya ang bayad para sa ika-14 at ika-15 linggo.

Tiniyak ni Garafil na nakikipag-ugnayan na sila sa mga Public Utility Bus (PUB) consortia na nag o-operate sa Edsa Busway upang masimulan ang payment process para sa week 15 at 16 na nagtapos noong huling linggo ng Hulyo.

Una nang inireklamo ng mga PUB drivers at operators ang atrasadong bayad sa ilalim ng programa.

Sa kabila nito, siniguro rin ng LTFRB Chief na magpapatuloy ang kanilang pagtugon sa mga issue kaugnay sa kasalukuyang Public Land Transportation System.

Mas pabor si Pangulong Bongbong Marcos na bigyan ng ayuda ang mga election worker kaysa bigyan ng tax exemptions ang honoraria, allowances at iba pang benepisyo na ibinibigay sa mga ito.

Ito’y sa kabila ng kanyang desisyong i-veto ang panukalang batas na layuning magbigay ng tax exemption sa allowances, honararia at iba pang financial benefits ng mga poll worker.

Matapos ang kanyang talumpati sa “Pinas-Lakas” Nationwide Booster Vaccine Campaign kontra COVID-19 sa Pasig Sports Complex, nilinaw naman ni Pangulong Marcos na hindi niya kinalilimutan na bigyang pansin ang kapakanan ng mga nagsilbi noong halalan.