Drew Nacino

Nanawagan na ang Pilipinas sa US at China na ipagpatuloy ang dayalogo sa gitna ng pagbisita ni US House Speaker Nancy Pelosi sa Taiwan sa kabila ng marahas na pagtutol ng Chinese Government.

Kasalukuyang nasa Taipei si Pelosi at pinangungunahan ang Congressional Delegation sa Indo-Pacific Region, bilang bahagi ng kanyang high-level meetings sa Singapore, Malaysia, South Korea at Japan.

Matapos bumisita sa Malaysia, dumaan ng Pilipinas ang US Air Force Flight SPAR19 na sinakyan nina Pelosi.

Gayunman, nilinaw ni DFA spokesperson Teresita Daza na walang anumang request ang US Government na mag-stop-over ang delegasyon ng House Speaker sa Pilipinas.

Patuloy anya nilang mino-monitor ang sitwasyon at mahalaga ring matiyak ang pagpapatuloy ng pag-uusap ng Amerika at Tsina upang maiwasan ang anumang gulo sa Indo-Pacific Region.

Magugunitang nagbanta ang China na maglulunsad ng Military Operations sa Strait of Taiwan kung tatapak ng Taiwan si Pelosi, na pinaka-senior U.S. Government official sa bumisita sa nasabing isla sa nakalipas na dalawang dekada.

Ikinababahala ng Pilipinas ang nasabing sitwasyon, lalo’t katabi lamang nito ang Taiwan na mayroong sea border sa Northern Luzon.

Nagbabadya na namang tumaas ang singil sa kuryente sa mga susunod na linggo.

Ito’y kung pagbibigyan ng Energy Regulatory Commission (ERC) ang hiling na dagdag ng mga planta ng San Miguel na isa sa suppliers ng Meralco, dahil sa pagtaas ng presyo ng panggatong na coal at natural gas.

Ayon sa San Miguel Corporation, $65 per metric tons lang ang presyo ng coal na nakasaad sa kanilang kontrata subalit lumobo na ito sa mahigit $400 per metric ton.

Mahigit P10 Bilyong na umano ang lugi ng San Miguel pero P5.2 Billion lamang ang kanilang gustong mabawi mula Enero hanggang Mayo o katumbas ng dagdag-singil na 28 centavos per kilowatt hour sa loob ng anim na buwan.

Tiniyak naman ni ERC commissioner Rexie Baldo-Digal na kanilang babalansehin ang interes ng negosyo at kapakanan ng mga consumer na sasalo ng dagdag-singil.

Samantala, iginiit ni Power 4-People Coalition convenor Gerry Arances na kung hindi masusunod ang kontrata ay maaaring magkaroon ulit ng bidding process at kung hindi kaya ng San Miguel.

Aprubado na ng Department of Budget and Management ang pagpapalabas ng Special Allotment Release Order (SARO) na nagkakahalaga ng P4.1 billion para sa Department of Social Welfare and Development.

Ang nasabing halaga ay nakapaloob sa Targeted Cash Transfer o TCT Program na layuning maibsan ang epekto ng inflation sa mga pinakamahihirap na pamilya.

Ayon kay Budget secretary Amenah Pangandaman, ang pondo ay para sa second tranche ng mga benepisyaryo ng TCT Program na lubhang naapektuhan ng pagtaas ng presyo ng krudo at iba pang bilihin.

Apat na milyong Non-4Ps member ang tatanggap ng tig-P500 sa loob ng dalawang buwan.

Tiniyak naman ni Pangandaman na patuloy ang pagsuporta ng gobyerno hangga’t makakaya upang mapagaan ang buhay ng mga mahihirap na pamilya.

Isang malaking debris na mula umano sa Chinese Rocket ang narekober ng ilang mangingisda sa Occidental Mindoro.

Natagpuan ang nasabing debris, isandaang milya mula sa Barangay 7 sa Bayan ng Mamburao.

Ayon kay Barangay 7 chairman Jimmy Patal, Hulyo a – 26 nang mabingwit ng mga mangingisdang tauhan ng kanyang biyenang si Erick Tamboong ang naturang debris.

May watawat anya ito ng China at may nakasulat pang chinese characters pero isa lamang ang nakaya nilang maisakay sa bangka at maiuwi sa Mamburao.

Ipinarating na rin sa Philippine Coast Guard na may pinasabog umano sa Sulu Sea at posibleng napadpad ang mga debris malapit sa kanilang lugar.

Inihayag naman ni Philippine Coast Guard spokesman, Commodore Armand Balilo na hindi pa nila matukoy sa ngayon kung saan galing ang naturang debris habang nagsasagawa na sila ng inquiry upang ma-beripika ang pinanggalingan nito.

Aabot sa P18 Billion ang kailangan ng Department of Education para sa pagsasaayos ng mga paaralang nasira bunsod ng mga nagdaang kalamidad.

Ayon kay DepEd spokesman Michael Poa, ilalaan ang nasabing halaga sa restoration ng mga pasilidad na naapektuhan ng mga Bagyong Odette, Agaton at magnitude 7 na lindol sa Northern Luzon.

Una na anya silang humiling sa Department of Budget and Management ng P16 Billion para sa reconstruction ng mga paaralan.

Pero dahil nagkaroon ng lindol, karagdagang P1.7 Billion o higit ang kailangan para sa mga napinsalang eskwelahan sa Northern Luzon, partikular sa Cordillera at Ilocos Regions.

Naghahanap na rin ang DepEd ng “quick intervention” para tugunan ang mga problema sa silid-aralan na nasira ng mga kalamidad, lalo’t malapit nang magbukas ang klase.

Plano naman ng kagawaran na magtayo ng mga temporary learning spaces at naghahanap na sila ng mga lugar kung saan maaaring magsagawa ng klase.

Sa tantsa ng DepEd, aabot sa 9K paaralan ang bahagyang napinsala o tuluyang nasira sa Northern Luzon dahil sa lindol.

Aminado ang Department of Health (DOH) na bigong maabot ang target na populasyon na maturukan ng booster sa inilunsad na ‘pinaslakas’ campaign noong Hulyo 26.

Inihayag ni DOH Officer-In-Charge Maria Rosario Vergeire na simula July 26 hanggang 31 ay nakapagbakuna lamang ng 1,984 senior citizens sa buong bansa at 195,000 individuals para sa kanilang unang booster shots.

Kung titingnan anya ang mga numero ay hindi pa sukat o hindi pa naaabot ang daily targets na 397,000 individuals.

Nagpapasaklolo naman ang DOH sa mga ahensya ng gobyerno, pribadong sektor at mga local government units upang paigtingin ang kampanya at magtuloy-tuloy na maabot  ang target population upang mabuo ang Wall of Immunity.

Tinatayang 500 pamilya ang nawalan ng bahay matapos sumiklab ang sunog sa residential area sa likod ng Central Market sa Sta. Cruz, Maynila, kahapon.

Dakong ala-1:00 ng hapon nang magsimulang kumalat ang apoy sa isa sa mga bahay sa Fogoso Street at matapos ang kalahating oras ay umabot sa ika-limang alarma.

Bukod sa mga residente, ilang pasyente rin ng kalapit na Fabella Hospital ang nagsilikas.

24 na firetruck naman at dalawang ambulansya ang rumesponde.

Ayon kay Fire Senior Supt. Crosbee Gumowang, director ng Bureau of Fire Protection-NCR District 1, pasado alas-3:00 naman ng hapon nang tuluyang maapula ang apoy.

Inaalam na anya ang sanhi ng sunog at halaga ng mga natupok o napinsalang mga ari-arian.

Inalmahan ng iba’t ibang transport groups ang mabigat umanong multang nagpatong-patong dahil sa traffic violations resulta ng No – Contact Apprehension Policy (NCAP) sa iba’t ibang local government unit, lalo sa Metro Manila.

Ang ilang multa umaabot pa sa isang milyong piso, na para sa mga transport group ay masyado ng malaki at nakakalula at karamihan sa mga violation ay Obstruction of Pedestrian Lane at Disobedience to Traffic Control Signs.

Iginiit ng Liga ng Tranportasyon at Operators sa Pilipinas (LTOP) at Lawyers for Commuters’ Safety and Protection (LCSP) na dapat repasuhin at pag-aralan muli ang NCAP.

Nagbanta si LCSP President, Atty. Ariel Inton na kung babaliwalain ng gobyerno ang kanilang suhestyon, maaaring malagas ang mga bumibyaheng PUV sa mga kalsada.

Sa panayam naman ng DWIZ kay LTOP National President Orlando “Ka Lando” Marquez, inihayag nitong may problema sa pagpapatupad ng ncap, partikular ang magkaka-ibang halaga ng multa sa bawat lungsod.

Dapat anya ay magkaroon ng unified implementation ng No-Contact Apprehension Policy ang mga LGU sa Metro Manila at iba pang lungsod upang maiwasan ang perwisyo.

Posibleng mabigyan na rin ng benepisyo ang mga single o hindi kasal na mayroong dependents, gaya ng natatanggap ng mga single parent sa ilalim ng Republic Act 11861 o Expanded Solo Parents Welfare Act.

Ito’y kung maisasabatas ang House bill 1364 na ini-akda ni PBA partylist Rep. Margarita Nograles na layuning amyendahan ang Expanded Solo Parents Welfare Act.

Inihain ni Nograles ang Bill noong July 6, na kinabibilangan ng tatlong partikular na benepisyo alinsunod sa Expanded Solo Parents Welfare Act.

Una ay ang educational benefits sa ilalim ng section 9, na nagbibigay mandato sa Department of Education, Commission on Higher Education at Technical Education and Skills Development Authority na magkaloob ng scholarships sa solo parent at dalawa nitong dependents;

Monthly cash pension na 1,500 pesos sa ilalim ng section 15, kung ang solo parent ay minimum wage earner at walang natatanggap na iba pang cash subsidies mula sa gobyerno;

Flexible work from home schedule sa ilalim ng section 12, na nag-a-atas sa mga employer ng single parents na payagan ang flexible working hours at iba pang konsiderasyon tulad ng telecommuting kung hindi naman ito naka-a-apekto sa productivity ng empleyado at kumpanya.

Ipinunto ng kongresista na responsibilidad ng gobyerno na protektahan ang kapakanan ng mga single person, lalo’t kung ito’y breadwinner ng pamilya na sumasalo rin ng mga responsibilidad gaya ng mga solo parent.—mula sa ulat ni Tina Nolasco (Patrol 11)

Nanganganib ang sangkatauhan sa oras na sumiklab ang nuclear war.

Ito ang ibinabala ni United Nations Secretary-General Antonio Guterres sa pagsisimula ng conference ng mga bansang kasama sa nuclear non-proliferation treaty sa New York, USA.

Ayon kay Guterres, sakaling magkaroon ng isang pagkakamali at gumamit ng armas nukleyar sa Russia-Ukraine war, Korean peninsula o Middle East, tiyak na mas marami ang mamamatay.

Aminado ang UN Chief na mas mataas ang peligrong hatid ngayon ng nuclear weapons kumpara noong “cold war” dahil mas marami na ang mga bansang nagtataglay ng mapaminsalang mga armas.

Ang pag-waksi anya sa nuclear weapons ang tanging garantiya na hindi na ito gagamitin.

Bukod sa US, Russia, China, France, UK, mayroon na ring mga armas nukleyar ang India, Iran, Pakistan, North Korea habang pinaniniwalaan ding mayroon na ring nuclear weapons ang Israel.