Drew Nacino

Tiniyak sa publiko ni Tourism Secretary Christina Frasco na nakikipag-ugnayan na sila sa mga concerned agencies hinggil sa umano’y overpriced na seafoods sa Virgin Island sa Panglao, Bohol.

Ito’y makaraan ang viral post ng isang Vilma Uy sa social media ang 26,100 pesos na ginastos ng kanyang mga kaibigan sa pag-order ng seafood, prutas at softdrinks sa isang kainan sa Virgin Island.

Ayon kay Frasco, seryoso nilang tinitingnan ang issue dahil mahalaga ito para sa kapakanan ng mga turista na patuloy na sumusuporta sa iba’t ibang destinasyon at recovery ng tourism industry ng bansa.

Bagaman batid anya nila ang kinakaharap na mga hamon ng mga tourism-related business na unti-unting bumabangon matapos ang travel restrictions, dapat panatilihin ang kalidad ng serbisyo at makatarungang presyo para sa mga turista.

Kabilang sa mga katuwang ng DOT ang Department of Trade and Industry upang matiyak na nasusunod ang makatuwirang pricing standards para sa consumer protection.

Nakikipag-ugnayan na rin ang regional office ng DOT sa mga local government unit upang makapagbigay ng standard guide para sa serbisyo sa mga turista.

Inihatid na sa kanyang huling hantungan si dating Lamitan City Mayor Rose Furigay.

Daan-daang katao ang nakipaglibing at dumalo sa funeral rites kahapon para sa pinaslang na dating alkalde.

Ayon sa Lamitan City Health Office, mayroon pa sanang ibang mga nais makipaglibing pero pinagbawalan na bilang bahagi ng anti-COVID-19 protocols ng local government.

Bukod sa mga residente mula Lamitan at iba pang mga bayan sa Basilan, dumalo rin ang mga kinatawan ng Basilan Provincial Police Office, local executives mula sa iba’t ibang panig ng lalawigan at AFP-Western Mindanao Command.

Kabilang si Furigay, sa tatlong pinaslang at pangunahing target ng suspek sa pamamaril na si Dr. Chiao-Tiao Yumol sa Ateneo De Manila University sa Quezon City noong July 24.

Nakatakda na namang magpatupad ng price adjustment sa tinapay.

Ito, ayon kay Asosasyon ng Panaderong Pilipino Director Jam Mauleon, ay dahil sa pagtaas ng presyo ng asukal.

Isa anya sa mga negosyong sapul ng price increase ang mga panadero na gumagamit na asukal sa halos lahat ng klase ng tinapay.

Ipinaliwanag ni Mauleon na kailangan nilang magpatupad ng adjustment upang “maka-survive” ang kanilang hanapbuhay.

Maliban sa asukal, nag-abiso na rin ng dagdag-presyo sa supermarkets ang mga manufacturer ng 28 produkto kahit hindi naman umano ito basic goods.

Inihayag naman ni Trade Undersecretary Ruth Castelo na malapit nang desisyunan ng Department of Trade and Industry (DTI) ang hirit na increase ng sangkaterbang basic goods na noong nakaraang administrasyon pa humihiling.

Tiniyak ni Castelo na sakaling payagan ng DTI, hindi naman anya sobra-sobra ang magiging dagdag-presyo sa mga pangunahing bilihin.

Tumungtong na sa mahigit 100 pesos ang kada kilo ng puting asukal sa ilang supermarket dahil umano sa kakulangan ng supply.

Sa pag-iikot ng DWIZ sa ilang supermarket sa Metro Manila kahapon, nasa 100 hanggang 105 pesos na ang kada kilo ng refined sugar o primera habang 75 hanggang 80 pesos ang brown o segunda.

Gayunman, hindi pa umaabot sa 100 pesos ang primera habang nasa 60 hanggang 70 pesos naman ang kada kilo ng segunda sa ibang supermarket habang aabot sa 90 pesos ang kada kilo ng primera at 70 pesos ang segunda sa palengke.

Aminado si Philippine Amalgamated Supermarkets Association, Incorporated President Steven Cua na sadyang hindi nagbibigay ang mga supplier ng rason nila sa pagtataas ng presyo.

Inihayag naman ng Sugar Regulatory Administration na hanggang August 19 na lang ang supply ng asukal pero may parating naman na mula Negros habang inaayos na ang importasyon ng asukal sa mga susunod na linggo.

Ayon kay SRA Adminstrator Hermenegildo Serafica, kailangang mag-angkat alinsunod sa utos ni Pangulong Bongbong Marcos dahil naapektuhan ng Bagyong Odette ang mga sugar mill kaya’t humina ang produksiyon.

Samantala, umapela naman si Serafica sa mga consumer na iwasang mag-panic buying ng asukal.

Sinimulan na ng Commission on Elections ang pag-imprenta sa official ballots para sa mga plebisito sa apat na local government units.

Ayon sa comelec, nitong Martes inilarga ang pag-i-imprenta ng election paraphernalia para sa plebisito sa ratipikasyon ng paglikha sa Barangay New Canaan mula sa Barangay Pag-Asa sa Alabel, Sarangani sa August 20;

Conversion ng bayan ng Calaca, Batangas bilang Component City sa September 3; ratipikasyon ng paghahati ng Maguindanao Province sa Maguindanao Del Norte at Maguindanao Del Sur sa September 17

At ratipikasyon ng pagsasama ng 28 barangay at isa pang barangay sa Ormoc City sa October 8.

Inihayag ng poll body na isinasagawa ang pag-imprenta sa National Printing Office sa Quezon City.

Dumami ang volcanic sulfur dioxide gas emission sa Taal Volcano.

Ayon sa PHIVOLCS, umabot sa 12,125 tonnes ang volcanic sulfur dioxide gas emission mula sa bulkan kahapon ng umaga.

Naobserbahan ng PHIVOLCS ang pagdami ng sulfur dioxide simula noong July 15 habang ang “increased degassing” ay namataan sa pamamagitan ng pag-akyat ng usok sa main crater lake sa nakalipas na tatlong araw.

Inaasahan din ang airborne volcanic gas na dadako sa Northwest ng Taal Volcano Island Base habang ang volcanic smog sa Western Taal Caldera ay napaulat na mabigat sa mga bayan ng Laurel at Barangay Banyaga, Agoncillo sa Batangas.

Samantala, napaulat din ang pag-alingasaw ng asupre sa Tagaytay City at Bugaan East sa bayan ng Laurel, Batangas.

Inabisuhan na ng PHIVOLCS ang mga residente na limitahan ang exposure sa smog, partikular ang mga may hika at iba pang sakit sa baga at puso.

Itinalaga na ni Pangulong Bongbong Marcos si Carlo Dimayuga bilang acting Chairman ng Metropolitan Manila Development Authority (MMDA).

Kinumpirma ni Press Secretary Trixie Cruz-Angeles na pinalitan ni dimayuga si MMDA Chairman Romando Artes.

Agosto 1 nilagdaan ni Pangulong Marcos ang appointment ni Dimayuga.

Agad namang nanumpa ang bagong opisyal kay Executive Secretary Vic Rodriguez.

Tinatayang 650,000 magsasaka at benepisyaryo ang makikinabang sa panukala ni Pangulong Bongbong Marcos na pahintulutan ang mga umiiral na Agrarian Reform Loan.

Ito ang tiniyak ni Agrarian Reform Secretary Conrado Estrella matapos ipanawagan sa kongreso ni Pangulong Marcos sa kanyang unang State of the Nation Address na magpasa ng batas na mag-aamyenda sa Section 26 ng Comprehensive Agrarian Reform Law of 1998.

Ayon kay Estrella, nais ng pangulo na maipasa ang batas “sa lalong madaling panahon” upang makalaya ang mga benepisyaryo ng repormang agraryo mula sa utang.

Naniniwala rin anya si PBBM na nakakakuha ito ng suporta mula sa kongreso dahil ilang mambabatas na ang nagpahayag ng intensyong ihain ang panukalang batas.

Sa ilalim ng bagong Emancipation Act, iko-condone na ng gobyerno ang lahat ng amortization fees, kabilang ang interes ng mga Agrarian Reform Beneficiaries.

Gayunman, bago ito gawin ay maglalabas ang punong ehekutibo ng isang executive order para magkaroon ng moratorium sa pagbabayad ng amortization, maging ang mga interes.

Nilinaw naman ng kalihm na ang mga benepisyaryong maagap sa pagbabayad ng kanilang amortization fees at interes ay bibigyan ng insentibo sa anyo ng mga rebate o karagdagang support services.

Patuloy na mino-monitor ng Malakanyang ang hakbang ng China bilang tugon sa pagbisita ni US House Speaker Nancy Pelosi sa Taiwan.

Ayon kay Press Secretary Trixie Cruz-Angeles, kapwa nakatutok ang Department of Foreign Affairs at Armed Forces of the Philippines sa sitwasyon.

Gayunman, tumangging magkomento si Cruz-Angeles sa panawagan ni Chinese Ambassador Huang Xilian sa Pilipinas na mahigpit na sundin ang One-China Policy.

Kagabi umalis na ng Taiwan si Pelosi at bumiyahe patungong South Korea at Japan kasabay nang inilargang military exercises ng China sa paligid ng Strait of Taiwan.

Dumami ang mga pamilyang Filipino na ikinukunsidera ang kanilang sarili bilang mahirap.

Batay sa Social Weather Stations (SWS) survey, umabot sa 48% o 12.2 million ang self-rated poor families noong Hunyo kumpara sa 43% o 10.9 million noong Abril.

Isinagawa ang National Survey noong June 26 hanggang 29 ngayong taon sa 1,500 respondents sa Metro Manila, Balance Luzon, Visayas at Mindanao.

Aabot naman sa 31% ang nasa “borderline poor” at 21% ang ikinikunsidera ang kanilang sarili bilang hindi mahirap.

Samantala, nasa 8.8% o 2.2 milyon sa mga pamilya ang bagong mahirap.