Drew Nacino

Nagpahayag ng pagkabahala ang Pilipinas sa Live Ammunition Drills na isinasagawa ng People’s Liberation Army ng China malapit sa Taiwan.

Ayon sa Department of Foreign Affairs (DFA), ang nasabing aktibidad ng Tsina ay maaaring maging mitsa ng mas malaking gulo, lalo’t napakalapit ng Taiwan sa Pilipinas.

Binigyang-diin ng DFA na dapat huminahon ang magkabilang-panig, manaig ang diplomasya at ipagpatuloy ang dayalogo upang maiwasan ang sigalot.

Bukod sa paligid ng Taiwan, ang biglaang military exercises na inaasahang tatagal hanggang linggo ay maaari ring isagawa malapit sa karagatan ng Batanes, na nasa pinaka-dulong hilaga ng Pilipinas.

Samantala, inabisuhan na ng China ang lahat ng airlines at mga barko na iwasang dumaan sa paligid ng Taiwan sa susunod na tatlong araw dahil sa posibleng peligrong dulot ng military exercises.

Sinimulan na ng China ang kanilang pinaka-malaking military exercises, bilang pagpapakita ng pwersa matapos ang pagbisita ni US House Speaker Nancy Pelosi sa Taiwan.

Nagpalipad ng mga long-range ballistic missile at nagdeploy ng mga fighter jet at warships ang China sa Strait of Taiwan, ilang minuto matapos umalis ng Taiwan si Pelosi, kahapon.

Kinumpirma ng Taiwan Defense Ministry na 11 missiles ang bumagsak malapit sa kanilang karagatan o sa Strait of Taiwan.

Bukod sa mga barkong pandigma, nagdeploy din ang Taiwan ng mga fighter jets at missile defense system bilang tugon.

Samantala, nagbagsakan ang ibang missile sa karagatang malapit sa Okinawa Islands, maging sa Senkaku Islands na pinag-aagawan ng Japan at China.

Agad namang iprinostesta ng Japan ang naging aksyon ng China at inalerto na ang kanilang Self-Defense Force lalo’t inaasahang tatagal ang military drills ng People’s Liberation Army hanggang Linggo.

Isang ten-wheeler truck na kargado ng 60 sako ng dumi ng manok ang nagdulot ng mabigat na daloy ng trapiko makaraang tumigild sa C-5 kalayaan sa Makati City.

Pumalya umano ang preno ng truck kaya’t nawalan na ng kontrol ang driver habang pumutok din ang isa sa mga gulong ng sasakyan.

Ayon sa MMDA, patungo sanang Baguio City mula sa San Jose, Batangas ang truck na magdedeliver ng mga dumi ng manok na gagamiting pataba.

Dahil sa bigat, natagalang alisin ang tumagilid na sasakyan at inabot ng anim na oras bago tuluyang naalis sa kalsada, dakong ala-7:00 ng umaga kahapon.

Posibleng sa unang bahagi pa ng susunod na taon ipatupad ang pagtaas sa buwanang social pension ng indigent senior citizens.

Ayon kay National Commission of Senior Citizens (NCSC) Chairman  Franklin Quijano, malabong ipatupad ang dagdag-pensyon ngayong kalagitnaan ng taon, lalo’t kung wala pang budget.

Kung ilalabas naman anya ay dapat may budgetary process na aaprubahan ng kongreso.

Alinsunod sa batas, itataas na sa 1,000 pesos ang buwanang social pension ng mga mahihirap na senior citizen mula sa 500 pesos.

Nasa apat punto isang milyong mahihirap na lolo at lola ang makikinabang sa dagdag-pensyon.

Walo ang patay sa karambola ng mga sasakyan sa General Santos City, kahapon.

Dakong alas-4:00 ng hapon nang maganap ang aksidente sa highway sa Barangay Tinagacan.

Tumilapon ang mga hindi pa nakikilalang biktima habang nagkalat ang ilang bahagi ng mga nawasak na sasakyan sa kalsada.

Ayon kay Maj. Rissa Hernaez, Spokesperson ng Gensan Police, isang commuter van ang biglang lumihis sa kabilang lane nang biglang sumabog ang kaliwang gulong nito.

Binangga ng van ang isang 16-wheeler wing van truck habang damay din ang isang Ford pick-up.

Patungo sanang Davao City ang commuter van habang biyaheng Gensan ang truck.

Naniniwala ang isang opisyal ng National Security Council (NSC) na hindi pa gaanong naka-babahala ang umiinit na tensyon sa pagitan ng China at Taiwan.

Ipinaliwanag ni NSC Deputy Director General Michael Eric Castillo na noon pa naman may word war ang Taiwan at China at madalas ding nagsasagawa ng mga military exercises ang dalawang bansa.

Gayunman, nito lamang anyang Martes lalong uminit ang sitwasyon nang bumisita sa Taipei si US House Speaker Nancy Pelosi na nag-udyok sa China na muling maglunsad ng live firing drills sa Strait of Taiwan.

Sa panayam ng DWIZ kay Castillo, inihayag nitong kung mayroon mang dapat ika-alarma ang Pilipinas, ito ay ang kaligtasan ng nasa 200,000 OFW sa Taiwan na maaaring maipit sa gulo.

Sakali namang sumiklab ang armed confrontation, tanging ang Armed Forces of the Philippines (AFP) anya ang makapaglalatag ng contigency plan, lalo’t napakalapit ng Pilipinas sa Taiwan.

Kumbinsido rin si Castillo na malabong simulan ng China ang isang armed conflict sa US dahil lamang sa issue ng Taiwan na matagal ng gustong bawiin ng Chinese Government.

Tila hindi rin anya interesado ang Amerika na tangkaing makipag-giyera sa Tsina dahil tiyak na maka-aapekto ito sa ekonomiya ng mundo, lalo’t sa Taiwan nagmumula ang 77% ng mga semi-conductor sa mundo.

Inihain sa Kamara ang panukalang batas na magpapataw ng parusa sa mga gumagamit ng bangketa para sa commercial o personal purposes.

Ito ang House Bill 1252 o Unobstructed Sidewalks Act na ini-akda ni Pangasinan Congressman Ramon Guico Junior.

Alinsunod sa bill, kabilang sa mga ipagbabawal na gawin sa sidewalks ang paliligo, paglalaba at pagsasampay ng damit,  pagbebenta ng mga pagkain at iba pang produkto;

Pagparada ng mga sasakyan at pagtatayo ng talyer, pagtatapon ng mga basura, paglalagay ng basketball court, paglalagay ng funeral services o burol, at pagsusugal.

Ayon kay Guico, sa oras na maging batas ang kanyang panukala, papatawan ng multang 10,000 hangggang 30,000 pesos o kaya’y pagkakakulong na anim na buwan hanggang isang taon ang mga lalabag.

Multang aabot naman sa 100,000 hanggang 500,000 pesos ang parusa sa mga lokal na opisyal na mabibigong ipatupad ang batas.

Ang mga pampubliko anyang lugar gaya ng sidewalks ay hindi dapat ginagamit sa mga personal na mga aktibidad kaya ang mga pedestrian ay walang magawa kundi dumaan sa kalsada na peligroso para sa kanila.

Dapat maghanda na ng contingency plans ang Pilipinas sakaling lumala ang sigalot sa Indo-Pacific Region.

Inihayag ni National Security Council Deputy Director General Michael Eric Castillo na hindi malayong maipit ang Pilipinas sa namumurong sagupaan ng China at Taiwan.

Nilinaw ni Castillo na hindi pa naman kailangang maghanda ang Pilipinas sa digmaan, dahil nakasaad sa konstitusyon na iwinawaksi ng bansa ang giyera bilang instrumento ng pambansang polisiya.

Ang kailangan anyang tutukan ay ang preparasyon upang agarang magkaroon ng kapabilidad ang bansa na tumugon sa anumang hindi inaasahang mga kaganapan.

Kabilang sa tinukoy ni Castillo na posibleng pag-ugatan ng gulo sa rehiyon ang West Philippine Sea, Senkaku Islands sa Japan, Korean Peninsula at Taiwan.

Bukod pa ito sa pagbisita ni US House Speaker Nancy Pelosi sa taiwan na labis na ikinagalit ng China at itinuturing nilang paghahamon ng gulo.

Bahagyang bumaba ang COVID-19 reproduction rate sa Metro Manila.

Hanggang nitong Martes, Agosto 2, bumulusok sa 1.24 ang reproduction rate sa National Capital Region (NCR) kumpara sa 1.33 noong Hulyo 26.

Ito, ayon kay OCTA Research Group Fellow, Dr. Guido David, ay indikasyon na maaaring mag-peak sa mga susunod na araw o buwan ang mga bagong kaso ng COVID-19.

Gayunman, bahagya namang tumaas ang positivity rate sa N.C.R. sa 16.9% noong Martes kumpara sa 15.5% noong July 26.

Noon lamang Martes kinumpirma ng Department of Health na nakapasok na at may dalawang kaso na sa bansa ng Omicron sublineage BA.2.75 o Centaurus na sinasabing mas nakahahawa.

Handa ang Pilipinas sa posibleng pagkalat ng Monkeypox cases.

Tiniyak ito ni DOH Officer-In-Charge Maria Rosario Vergeire matapos ma-detect ang kauna-unahang kaso ng naturang sakit sa bansa noong isang linggo.

Ayon kay Vergeire, lahat ng close contacts ng unang Monkeypox case ay nananatiling asymptomatic.

Nilinaw naman ng opisyal na bukod sa virus, isa sa mga hamon sa nabanggit na sakit ang misinformation at diskriminasyon sa mga infected, dahil hindi naman sexually transmitted disease ang Monkeypox.

Samantala, plano ng Department of Transportation na makipagtulungan sa DOH sa pagbuo ng guidelines upang maiwasan ang hawaan, partikular sa public transportation.