Drew Nacino

Welcome sa Pilipinas ang posibilidad na magsagawa ng magkasanib na pagpa-patrol kasama ang US sa West Philippine Sea alinsunod sa Mutual Defense Treaty (MDT) ng dalawang bansa.

Ito ang inihayag ni Foreign Affairs secretary Enrique Manalo matapos ang kanilang joint press briefing ni US Secretary of State Antony Blinken.

Ayon kay Manalo, maaaring isagawa ang Joint Patrol, dahil saklaw naman ito ng MDT at Mutual Defense Board and Security Engagements Board.

Biyernes ng gabi nang dumating si Blinken sa bansa para sa isang bilateral meeting sa pagitan ng Pilipinas at Amerika.

Nag-courtesy call din ang US official kay Pangulong Bongbong Marcos noong Sabado at tiniyak ang pagpapaigting ng economic ties ng dalawang bansa.

Magsasagawa ng panibagong live-fire military exercises ang China.

Kinumpirma ito ng Chinese Maritime Safety Administration sa gitna ng tensyon sa pagitan ng Tsina at Taiwan matapos ang pagbisita sa Taipei ni US House Speaker Nancy Pelosi.

Sa pagkakataong ito ay ilulunsad ng China People’s Liberation Army ang mga aktibidad sa bahagi ng Bohai Sea, simula ngayong araw hanggang September 8 at Yellow Sea, simula kahapon hanggang August 15.

Hindi naman idinetalye ng China o Taiwan kung tuluyan nang nagwakas ang kanilang magkahiwalay na military exercises, kahapon.

Una nang iginiit ng Taiwanese Defense Ministry na ang apat na araw na military activity ng China ay isang pagsasanay sa pagsakop o pagbawi sa Taiwan.

Hindi agad mararamdaman ang pagbaba ng presyo ng asukal.

Ipinaliwanag ni Administrator Hermenegildo Serafica ng Sugar Regulatory Administrator na kahit mag-import ng 300,000 metric tons ng asukal ay hindi naman makararating agad ang mga ito sa bansa.

Hindi lamang anya ang importasyon ang solusyon upang mapababa ang presyo ng asukal dahil pinaka-mahalaga pa ring tutukan ang lokal na produksyon.

Halimbawa na lamang nito ang mga Sugar Mill sa Negros na nagsisimula na ring magbukas para sa produksyon na hudyat nang unti-unti.

Walang kahit isang sentimong ilalabas na pondo ang gobyerno sa pag-a-angkat ng 300,000 metric tons ng asukal.

Ito ang nilinaw ng Sugar Regulatory Administration (SRA) sa gitna ng ikinakasang importasyon bilang solusyon sa pagnipis ng stockpile ng nasabing produkto sa bansa.

Ayon kay SRA administrator Hermenegildo Serafica, mga pribadong trader naman ang gagastos sa pag-a-angkat.

Sa sandali anyang aprubahan ang plano ay agad na ilalarga ang pag-a-angkat ng tone-toneladang asukal.

Plano ng Department of Agriculture na magpataw ng Suggested Retail Price na P90 per kilogram sa asukal.

Ito’y makaraang umabot na sa mahigit P100 ang kada kilo ng asukal sa ilang pamilihan sa Metro Manila.

Ayon kay DA undersecretary Kristine Evangelista, nakatakdang pulungin ng kagawaran ang stakeholders ngayong linggo upang talakayin ang pagpapataw ng SRP.

Inihayag naman ni Hermenegildo Serafica, Administrator ng Sugar Regulatory Administration na ang ikinakasang SRP ang isa sa mga “Stopgap” sa pagmahal ng asukal, lalo’t umaaray na ang mga consumer.

Nananatiling ligtas ang nasa 200,000 Pilipino sa Taiwan sa kabila ng isinasagawang military exercises ng China.

Tiniyak ni Manila Economic Cultural Office (MECO) Chairman Silvestre “Bebot” Bello, III na mahigpit na nakatutok ang gobyerno ng Pilipinas sa sitwasyon, partikular sa kapakanan ng mga OFW.

Ayon kay Bello, noon pa nakahanda ang MECO, Department of Labor and Employment (DOLE) at iba pang sangay ng gobyerno ng Pilipinas sakaling tumindi ang panggigipit ng China sa Taiwan.

Sa katunayan anya ay may contigency plan na ang Philippine Government, lalo ang Taiwanese government maging ang lahat ng pangangailangan ng mga Pinoy ay nakalatag, gaya ng mga pagkain, tubig at iba pa.

Inihain na sa senado ni Senator Pia Cayetano ang panukalang patawan ng Value Added Tax (VAT) ang lahat na digital transaction.

Alinsunod sa Senate Bill 250 ni Cayetano, papatawan ng VAT ang lahat ng produkto at serbisyo na ginawa digitally o electronically o ginamitan ng internet.

Halimbawa nito ang mga binili sa online shop, mga online video game, online courses at webinars, online news papers at mga digital content, gaya ng pelikula at musika.

Nilinaw naman ni Cayetano na hindi ito paglikha ng bagong buwis bagkus nais niyang palakasin ang kapangyarihan ng Bureau of Internal Revenue (BIR) na kolektahin ang VAT ng lahat ng digital service provider sa loob at labas ng bansa.

Layunin din ng panukala na gawing pantay ang trato at pagpapataw ng buwis sa traditional at digital businesses.

Nangangahulugan anya ito na kung may VAT ang produktong aktuwal na binili sa department store, dapat may buwis din kapag bumili sa online platform at kailangang makolekta ito ng BIR mula sa digital service provider.

Batay sa international report, ang Pilipinas ang may pinakamabilis na internet economy sa Southeast Asia na nagkaroon 12 million na bagong digital consumers simula nang  magkaroon ng COVID-19 pandemic.

Isinusulong ni Senior Citizens Partylist Rep. Rodolfo “Ompong” Ordanes ang pagtanggal sa mandatory age sa pagreretiro ng mga manggagawang senior citizens sa private sector.

Sa kanyang House Bill 3220, nais i-repeal ni Ordanes ang compulsory age na 75 na itinatakda sa Labor Code of the Philippines.

Nakasaad sa kanyang panukala na dapat magkaroon ng “Choice” ang mga edad 75 kung magpapatrabaho pa basta’t kwalipikado na dapat namang patunayan ng employer.

Layunin anya ng panukala na magpatuloy sa pagtatrabaho ang mga senior citizen basta’t may kakayahan at malakas pa ang mga ito.

Kailangan lamang magpakita ng clearance galing sa mga doktor na nagsasaad na ‘fit to work’ pa rin ang mga lolo’t lola.

Isa ang nasawi sa pagbaha bunsod ng malakas na pag-ulan sa lalawigan ng Cebu.

Ayon kay Cebu City Disaster Risk Reduction and Management Council Chairperson Gerry Carillo, narekober ang labi ng isang lalaki sa ilalim ng Vestil Bridge.

Inanod anya ng rumaragasang ilog ang hindi pa nakikilalang biktima, kagabi.

Nagsilikas naman ang mga residente sa Sitio Lub-Ang, Barangay Casuntingan sa Mandaue City dahil naman sa pag-apaw ng Butuanon River.

Ganito rin ang naging sitwasyon sa Sitio Laray, Barangay Tayud sa Consolacion makaraang umapaw hanggang highway ang ilog.

Apektado rin ng pagbaha ang ilang bahagi ng Toledo City, Talisay City, Naga City at Minglanilia habang stranded ang mga pasahero sa Lapu-Lapu City dahil sa taas ng tubig.

Sa pagtaya ng PAGASA, umabot sa 58.4 milimeters ng tubig-ulan ang bumuhos o katumbas ng 292,000 barrels ng tubig sa loob lamang ng ilang oras.

Nanindigan si National Security Adviser, Secretary Clarita Carlos sa ipinatupad na polisisya ng Duterte administration sa pagharap sa maritime dispute sa pagitan ng Pilipinas at China.

Ito’y matapos ang pagbisita ni US House Speaker Nancy Pelosi sa Taiwan na ikinagalit ng Tsina.

Gayunman, iginiit ni Carlos na ginawa lamang ni Dating Pangulong Rodrigo Duterte ang sa tingin nitong tama sa gitna ng tensyon sa pagitan ng Pilipinas at China sa West Philippine Sea.

Samantala, inihayag naman ng NSC Adviser na sakaling magkausap sila ni US State Secretary Antony Blinken na bibisita sa bansa ngayong linggo, ay kanya itong hihimuking maghinay-hinay ang Amerika sa Indo-Pacific dahil sa naka-aalarmang sigalot sa rehiyon.

Hindi anya dapat maging playground ng mga superpower nation ang Indo-Pacific Region dahil marami namang “levels of cooperation” na dapat talakayin gaya ng climate change sa halip na sigalot ang manaig.

Nakatakdang dumating bukas ng Pilipinas si Blinken at haharap kay Pangulong Bongbong Marcos para sa isang Bilateral Meeting.