Drew Nacino

Muling binaha ang ilang bahagi ng Metro Manila matapos ang malakas na ulan, kagabi.

Pasado ala-7 nang magsimulang bumuhos ang malakas na ulan at bumaha sa ilang bahagi ng Maynila, Quezon City, CAMANAVA, partikular sa Malabon at Caloocan Cities.

Sa pag-i-ikot ng DWIZ, abot-tuhod ang tubig sa dagatan-dagatan habang nahirapang lumusong sa taas ng tubig ang ilang maliit na sasakyan sa pagtawid ng riles sa 5^th Avenue, Caloocan.

Gutter-deep naman ang tubig sa ilang kalsada sa Santa Cruz, Ermita at Malate, Maynila kaya’t pahirapang makauwi ang mga pasahero.

Una nang inihayag ng MMDA na hindi makapag-discharge ng tubig ang mga main drainage systems patungong Manila Bay dahil hindi pa natatapos ng DPWH ang pagtatayo ng Pumping stations kaya’t agad bumabaha kahit kaunting ulan lang.

Isang lalaki ang patay dahil umano sa tetano makaraang tuliin sa Health Center sa Bayan ng Lupon, Davao Oriental.

Kinilala ang biktimang si Lear John Ilisan, 11- anyos na nagpatuli noong Hulyo a – 8.

Ayon kay Armando Ilisan, dalawang araw pa lang makaraang matuli ang kanyang anak ay may naramdaman na ito na inakalang normal lang sa bagong tuli.

Gayunman, nakaranas na ang bata ng lockjaw matapos ang ilang araw hanggang sa bawian ng buhay si Lear John noong Hulyo a – 27.

Itinanggi naman ng midwife ng health center na si Angelina Uyanguren na tetanus ang ikinamatay ng biktima.

Batay sa Death Certificate, respiratory failure ang sanhi ng pagkamatay ng bata bunsod ng generalized tetanus.

Iniimbestigahan na ng Department of Health ang nasabing insidente.

Aminado ang Metropolitan Manila Development Authority (MMDA) na maaaring nakapagpalala sa pagbaha sa Metro Manila ang hindi pa rin natatapos na Flood control projects.

Ayon sa MMDA Flood Control and Sewerage Management Office (FCSMO) hindi pa natatapos ng DPWH ang pagtatayo ng pumping stations na magtataboy sana sa sobrang tubig sa Ermita at Malate, Maynila.

Simula pa noong Biyernes ay nakararanas ng pagbaha ang mga nasabing lugar matapos ang malakas na buhos ng ulan.

Ipinaliwanag ni MMDA- FCSMO head Baltazar Melgar na tatlong drainage outfalls sa Ermita at Malate ang isinara upang maiwasan sana ang pag-agos ng tubig-baha sa mga Pumping Station na mag-da-divert naman sa Manila Bay.

Dapat anyang isailalim muna sa treatment ang tubig mula sa mga lugar na nalubog bago itulak palabas sa Manila Bay upang mapanatiling malinis ang tubig dito.

Binaha rin ang ilan pang bahagi ng Metro Manila matapos ang malakas na buhos ng ulan, kahapon.

Kabilang sa nalubog pasado alas-4 ng hapon ang bahagi ng U.N. Avenue sa Lungsod ng Maynila kaya’t hindi nakadaan ang mga sasakyan dahilan naman upang ma-stranded ang mga pasahero.

Gutter-deep naman ang tubig sa kanto ng Pureza Street at Ramon Magsaysay Boulevard sa Santa Mesa maging sa ilang bahagi ng Taft Avenue.

Una nang inihayag ng PAGASA na ang malakas na pag-ulan ay dulot ng Hanging Habagat o Southwest Monsoon.

Kung si Comelec chairman George Garcia ang tatanungin, mas gusto na niyang pag-retiruhin ang mga Vote Counting Machine (VCM) na ginagamit sa eleksyon.

Ipinunto ni Garcia na bagaman may ilang pumalpak na makina, sapat na marahil ang tatlong nagdaang halalan upang bumili o magrenta ng panibagong mga VCM.

Maaari pa rin naman anyang gamitin sa ibang aktibidad ang mga i-re-retire na makina.

Samantala, bukas naman ang Poll Body Chief sakaling may mga Pilipinong imbentor na lilikha ng sariling bersyon ng maaasahan at mas murang VCM.

Handa ang Procurement Service ng Department of Budget and Management (PS-DBM) na makipag-ugnayan sa Commission on Audit (COA).

Kaugnay ito sa findings at rekomendasyon sa procurement ng mga outdated at mahal na laptop para sa Department of Education na nagkakahalaga ng P2.4 billion.

Ipag-u-utos na ng bagong Director ng PS-DBM na si Dennis Santiago ang pagbusisi sa halaga ng mga biniling kagamitan, maging ang technical specifications nito.

Ito, anya, ay sakaling mapatunayan sa mga record na bigong tumalima sa batas at procurement rules ang PS-DBM.

Tiniyak din ni Santiago na magiging “transparent at competitive” ang mga proseso sa PS-DBM habang gagawin din ang nararapat na hakbang upang maiwasan ang iregularidad sa procurement at maayos at matuwid ang pagbili para sa gobyerno.

Magugunitang itinuro ng DepEd ang PS-DBM sa procurement ng mga laptop, sa dahilang natanggap lamang nila ito mula sa nasabing procurement body.

Patay ang isang lalaking rubber plantation worker matapos pagbabarilin sa Lamitan City, Basilan.

Kinilala ng pulisya ang biktima na si Bhis Isniyan Asdali, 52- anyos.

Mag-a-ala-7 noong Sabado ng gabi nang paulanan ng bala ng hindi nakilalang salarin si Asdali habang nakaupo sa terrace ng kanyang bahay sa Sitio Muhibal, Barangay Campo Uno.

Narekober sa Crime Scene ang anim na basyo ng bala at clip ng garand rifle.

Itinanggi naman ni PNP spokesperson, Col. Jean Fajardo ang naunang ulat na kaanak ni Dr. Chao Tiao Yumol ang biktima.

Si Yumol ang suspek sa pagpatay kay dating Lamitan City Mayor Rose Furigay at dalawa pa sa loob ng Campus ng Ateneo De Manila University noong July 24.

Nagsasagawa na ng imbestigasyon ang Lamitan City Police kabilang ang pagtukoy sa motibo sa pamamaslang kay Asdali.

Hindi na dapat ipagpaliban muli ang Barangay at Sangguniang Kabataan (SK) Elections sa Disyembre a – 5.

Sa gitna ito ng mga panawagang postponement ng nasabing Halalan upang makatipid umano sa gastos ang gobyerno.

Inihayag sa DWIZ ni Comelec chairman George Garcia na hindi naman computerized ang botohan sa Disyembre.

Pero sakali anyang magpasya ang Kongreso na ipagpaliban ang halalan ay wala namang masasayang na pondo dahil magagamit pa ang mga bibilin o binilihing kagamitan sa susunod na halalan.

Ilalarga na ng Cebu City Government ang malawakang clearing operations simula Miyerkules, Agosto a – 10.

Layunin nitong marekober ang tatlong metrong easement sa mga ilog at waterways upang maiwasan ang casualty at mabawasan ang pagbaha tuwing malakas ang ulan.

Ipinag-utos na ni Cebu City Mayor Michael Rama ang paggiba sa tinatayang 2K istruktura sa gilid ng mga ilog matapos ang matinding pagbaha noong Huwebes dahil sa pag-apaw ng ilang waterways.

Kabilang sa mga umapaw ang Kinalumsan River sa Barangay Mambaling, na rumagasa at tumangay sa dalawa katao na kalauna’y nailigtas.

Ayon kay Rama, tinatayang 14K katao ang maaapektuhan sa sandaling simulan ang operasyon.

Nagpulong na rin ang Cebu City Disaster Risk Reduction and Management Office, Department of Public Works and Highways, Division for the Welfare of the Urban Poor at Cebu City Environmental and Natural Resources para sa implementasyon ng proyekto.

Ilan sa mga tututukan ang demolisyon ng illegal structures na lumalampas sa 3 meter easement ng Kinalumsan River.

Muling nalubog sa baha ang ilang bahagi ng Quezon City matapos ang malakas na ulan kahapon.

Pasado alas-3 ng hapon nang magsimulang bumuhos ang malakas na ulan batay sa Rainfall advisory ng PAGASA sa Metro Manila, Bulacan, Pampanga, Nueva Eciia, Zambales, Cavite at Laguna.

Ayon sa MMDA, gutter deep ang baha sa bahagi ng Timog Avenue maging sa EDSA-Balintawak Edsa hanggang sa A. Bonifacio Avenue at Quezon Avenue sa Quezon City, dakong ala-4.

Umabot naman ng tuhod ang tubig sa kanto ng N.S. Amoranto at Banawe habang halos baywang na ang baha sa kanto ng Amoranto Street at G. Araneta.

Pasado ala-5 na ng hapon nang humupa ang baha sa mga nabanggit na lugar.