Drew Nacino

Patuloy sa pagpapakawala ng tubig ang Magat Dam sa Isabela at Bustos Dam sa Bulacan sa gitna ng malakas na pag-ulan upang mailabas ang sobrang tubig at mapanatili sa safe limit ang water level ng mga ito.

Dahil dito, naka-alerto na ang Isabela Disaster Risk Reduction and Management Office sa Isabela lalo’t maaaring magdulot ng pagbaha ang pagpapakawala ng tubig ng Magat Dam na sinimulan noong linggo.

Hanggang kahapon, isang flood gate na lamang ng nabanggit na reservoir ang nakabukas habang nasa 188.19 meters ang lebel ng tubig o malapit na sa 190-meter spilling level.

Magugunitang sumampa sa isang tulay sa Alicaocao sa Cauayan City ang tubig sa matapos bahagyang umapaw ang Magat River pero sa ngayon ay nadaraanan na ito ng mga motorist.

Samantala, bukas din ang floodgates ng Bustos sa loob ng limang araw dahil aabot na ang tubig sa spilling level na 17.35 meters.

Inabisuhan na ng mga otoridad ang mga residente malapit sa Angat River na maghanda sa posibleng pag-apaw ng ilog.

Nakikipag-ugnayan na ang Department of Labor and Employment sa Technical Education and Skills Development Authority upang saklolohan ang mga lugar na tinamaan ng magnitude 7 na lindol sa Northern Luzon.

Ayon kay Labor secretary Bienvenido Laguesma, maglalabas ng Joint Memorandum Circular ng Training-Cum-Production at Emergency Employment Program ang DOLE at TESDA.

Ipatutupad ang nasabing proyekto sa pakikipag-ugnayan sa iba pang ahensya ng National at mga Local Government Units.

Layunin ng proyekto na bumuo ng grupo ng mga construction worker na tutulong sa mga LGU sa pagsasaayos at rehabilitasyon ng mga nasirang pasilidad sa Cordillera Administrative at Ilocos Regions.

Nasa 40 batch ng 25 trainees mula sa pinakamahirap na naapektuhang mga lugar sa Abra, Ilocos Sur, at Benguet ang sasabak sa pilot implementation ng programa.

Pinag-aaralan na ni Pangulong Bongbong Marcos ang posibilidad nang pagtatayo ng Modular Nuclear Power Plants sa bansa, na tinitingnan bilang future energy source.

Ibinunyag ito ni Philippine Ambassador to the US Jose Manuel Romualdez makaraang mag-alok ang Estados Unidos ng mga planta ng kuryente sa bansa.

Ayon kay Romualdez, seryoso nang ikinu-kunsidera ang nasabing hakbang at “excited” na si Pangulong Marcos sa plano.

Sa katunayan anya ay pina-plantsa na ang partnership ng isang local energy company sa Pilipinas sa Nuscale, ang American Firm na nag-de-develop ng modular nuclear power technology.

Umaasa si Romualdez na makakaharap ni PBBM ang mga opisyal ng Nuscale sa sandaling bumisita sa Estados Unidos.

Mas mura, ligtas, madali ang maintenance at hindi hamak anyang mas maliit ang mga modular nuclear power plant kumpara sa mga conventional na planta gaya sa Bataan.

Samantala, nilinaw ng embahador na ang planong paglalagay ng mga mas maliit na planta ay hindi bahagi ng pagbuhay sa Bataan Nuclear Power Plant.

Patuloy sa pagtaas ang dengue cases sa lalawigan ng Occidental Mindoro.

Inihayag ni Dr. Maria Teresa Tan, Provincial Health Officer ng Occidental Mindoro, aabot na sa 1, 810 ang kaso ng dengue sa lalawigan, kabilang ang 9 na namatay.

Dahil anya sa patuloy na pagtaas ng dengue cases, isinailalim na rin sa State of Calamity ang mga Bayan Sablayan at San Jose.

Una nang idineklara ang State of Calamity sa lalawigan noong Hulyo.

Batay naman sa datos ng Department of Health, sumampa na sa 92, 343 ang kaso ng dengue sa bansa simula Enero a – 1 hanggang Hulyo a – 23 kumpara sa 42, 294 sa kaparehong panahon noong isang taon.

Nanindigan ang Department of Education sa pasyang ipagpatuloy ang muling pagbubukas ng klase sa Agosto – 22 sa kabila ng mga panawagan na suspendihin ito.

Ayon kay DepEd spokesman Michael Poa, wala nang atrasan ang pagbubukas ng klase sa nasabing petsa dahil alinsunod sa Republic Act 7797 ay ipinagbabawal na umpisahan ang School Year nang lampas sa Agosto.

Una nang umapela ang Teachers’ Dignity Coalition sa DepEd na i-atras ang school opening sa kalagitnaan ng Setyembre, dahil hindi umano sapat ang school break upang makapagpahinga ang mga guro mula sa nakaraang Academic Year at paghandaan ang susunod.

Gayunman, iginiit ni Poa na marami naman ang lumahok sa Brigada Eskuwela Program, kung saan tumutulong ang stakeholders at mga volunteer sa preparasyon ng mga paaralan para sa darating na School Year.

Nakikipag-ugnayan na rin anya ang kagawaran sa iba pang government agencies sa muling pagbubukas ng mga paaralan, tulad ng Department of Trade and Industry upang ma-regulate ang presyo ng school supplies.

Bukod pa ito sa Department of Health para mabakunahan ang mga mag-aaral at school personnel laban sa Covid-19.

Walang dapat ipangamba ang puliko sa Omicron “centaurus” sub-variant.

Ito ang tiniyak ni Infectious diseases expert, Dr. Edsel Salvana sa gitna ng mga naglalabasang ulat hinggil sa nasabing sub-variant ng COVID-19.

Iginiit ni Salvana na pinalalala at “sinensationalize” lamang ng media ang issue sa centaurus sub-variant o BA 2.75.

Gayunman, hindi naman dapat mag-panic sa bawat bagong lumalabas na Omicron sub-variant dahil ang mahalaga ay patuloy na mag-monitor at sumunod sa health protocols.

Binigyang-diin ni Salvana na nag-iba na ang pangalan ng sub-variant ng Omicron mula sa designated variants of concern ng WHO dahil sa media at sa halip na ihango sa greek alphabet, ginawa itong pangalan ng galaxy.

Nilinaw din ng Infectious disease expert na ang BA.2.75 ay hindi isang variant of concern at hindi mula sa Omicron lineage, kahit na posible itong makapasok sa bansa.

Aabot na sa 37, 942 ang aktibong kaso ng COVID-19 sa Pilipinas.

Nakapagtala ang Department of Health ng karagadagang 4, 203 COVID-19 cases kahapon.

Ito na ang ika-limang sunod na araw na mahigit 4, 000 ang mga bagong kasong naitatala sa bansa.

Sumampa naman sa 3, 808, 156 ang total case load, kabilang ang 3, 709, 377 recoveries at 60, 837 death toll.

Nangunguna pa rin ang Metro Manila sa may pinaka-mataas na bagong kaso sa nakalipas na dalawang linggo na 16, 003;

Sinundan ito ng CALABARZON, 10,229; Central Luzon, 5,226; Western Visayas, 2,819 at Central Visayas, 2,234.

Sa nakalipas na halos dalawang linggo, muling nalubog sa baha bunsod ng malakas na pag-ulan ang ilang bahagi ng lalawigan ng Cebu.

Kabilang sa mga binaha ang ilang barangay sa Naga City kung saan dalawang sasakyan ang inanod ng rumaragasang tubig.

Ayon sa LGU ng Naga City, nasa 100 residente ang apektado ng flashfloods.

Umapaw naman ang Mantayupan Falls sa Bayan ng Barili  ilang minuto pa lamang matapos ang malakas na ulan.

Inihayag ni Barili Mayor John-John Garcia na agad silang namahagi ng tulong sa mga apektadong residente habang ina-assess na nila ang pinsala sa pagbaha.

Tatlo sa mga main drainage systems sa Lungsod ng Maynila ang sarado dahil sa proyektong layuning salain ang tubig-baha bago i-discharge sa Manila Bay, malapit sa Dolomite Beach.

Tinukoy ng MMDA ang drainage systems sa Padre Faura, Remedios at Estero De San Antonio.

Ayon kay MMDA acting General Manager Baltazar Melgar, hindi pa natatapos ng Department of Public Works and Highways ang Pumping station at paglalagay ng tubo.

Ito, anya, ang dahilan nang mabilis pag-apaw ng tubig sa ilang kalsada sa Maynila kahit ilang minuto lang umulan.

Ipinaliwanag ni Melgar na nagpakawala ang MMDA ng tubig-baha sa Pasig River sa halip na direktang i-discharge sa dagat.

Samantala, posible namang i-require ng MMDA sa DPWH na maglagay ng Pumps o Mobile Pumps o i-operate muna ang existing pumps.

Itinuro naman ng MMDA ang Dolomite Beach na dahilan nang mabilis na pagbaha sa ilang kalsada sa Maynila kahit saglit lamang na umulan noong Biyernes.

Ayon sa MMDA, hindi makapag-discharge ng tubig ang tatlong main drainage systems sa Manila Bay dahil hindi pa natatapos ng DPWH ang ginagawa nitong pumping station.

Ang pumping stations ay konektado sa isang sewerage system na magsasala ng tubig bago i-discharge sa Manila Bay.

Dahil dito, kailangang pakawalan ang tubig-baha sa Balete Pumping Station patungong Pasig River sa halip na sa dagat.