Drew Nacino

Nilinaw ng Metropolitan Manila Development Authority (MMDA) na walang kaugnayan ang Dolomite beach sa mabilis na pagbaha sa ilang bahagi ng lungsod ng Maynila.

Iginiit ni MMDA Acting General Manager Baltazar Melgar na ang hindi pa natatapos na tatlong pumping stations ng Department of Public Works and Highways ang rason sa mabagal na paghupa ng baha.

Ayon kay Melgar, sa halip na i-discharge sa Manila Bay ang tubig ay idina-divert ito sa Pasig River sa pamamagitan ng balete pumping station.

Nakikipag-ugnayan na anya ang MMDA sa DPWH sa pag-o-operate ng isang mobile pump upang direktang i-discharge ang tubig sa dagat.

Tumaas sa 38.2% ang bilang ng mga manggagawang edad 65 pataas noong Hunyo.

Katumbas ito ng 2,538,000 workers na edad 65 noong Hunyo kumpara sa 34.9% o 2,304,000 noong Mayo.

Batay ito sa pinaka-bagong labor force survey ng Philippine Statistics Authority (PSA).

Ayon kay PSA Undersecretary Dennis Mapa, inaasahang maghahanap ng trabaho o karagdagang pagkakakitaan, gaya ng mga senior citizen upang mapunan ang pang-araw-araw nilang pangangailangan.

Sa ilalim ng labor code ng bansa, ang compulsory retirement age ay 65, pero dahil sa patuloy na pagtaas ng presyo ng mga bilihin, gaya ng pagkain, napipilitan kahit mga lolo’t lola na magpatuloy sa pagtatrabaho.

Magugunitang inihain sa kamara ni Senior Citizen Party-List Rep. Rodolfo “Ompong” Ordanes ang House Bill 3220 na layuning tanggalin ang retirement age.

Alinsunod sa panukalang batas, maaaring magpasya ang isang empleyadong edad animnapu’t lima kung magreretiro na o magpapatuloy sa pagta-trabaho basta’t malakas pa ang katawan at gusto ng kanyang employer.

Hindi rin pabor ang commuter group na Passenger Forum sa panawagan ng Land Transportation Office (LTO) sa mga local government unit na suspendihin ang No-Contact Apprehension Policy (NCAP).

Ayon kay Passenger Forum Convenor Primo Morillo, malaki ang naitulong ng NCAP halimbawa sa Quezon City kung saan nabawasan ng 30% ang traffic violations habang 80% sa Bataan.

Hindi anya napapanahon kung sususpendihin ang NCAP lalo’t malapit na ang pagbabalik-eskwela ng milyun-milyong estudyante.

Ipinunto ni Morillo na dahil sa NCAP ay matitiyak kahit paano ang kaligtasan ng mga pasahero, partikular ang mga bata sa kalsada.

Una nang inihayag ni LTO chief at Transportation Assistant Secretary Teofilo Guadiz III na umaaray na ang mga public utility vehicle operator sa pagbabayad ng multa para sa traffic violations ng kanilang drivers dahil sa NCAP.

Tutol ang Metro Manila Mayors sa panukala ng Land Transportation Office (LTO) na suspendihin ang No-Contact Apprehension Policy (NCAP).

Ipinaliwanag ni Quezon City Mayor Joy Belmonte na noong Hulyo lamang nila inilarga ang NCAP at nagkaroon ng test run noong 2021 para matukoy ang mga problemang kahaharapin ng nasabing polisiya.

Ayon kay Belmonte, hindi sapat na batayan ang sinasabi ng LTO Na mayroon pang mga dapat plantsahin sa implementasyon ng NCAP kaya’t dapat itong suspendihin gayong nagkaroon naman na ng test run.

Bukas naman anya silang baguhin ang penalties at makatutulong kung pare-parehas sila ng iba pang metro mayors na magpatupad ng magkakatulad na multa.

Sa panig ni Valenzuela Mayor Wes Gatchalian, aminado itong bagaman tutol siya sa hirit ng LTO, malaking hamon naman para sa kanila ang pagpapatupad ng NCAP sa lungsod, lalo sa mga bike lane.

Makitid anya ang mga kalsada sa Valenzuela at halos kalahati ng kotse o minsan nakapatong na sa linya ang mga sasakyan na nakukunan ng larawan.

Iginiit ni Gatchalian na noon pang 2019 nila ipinatutupad ang NCAP at aabot na sa 200,000 violators ang nahuhuli at umaabot sa 2,000 hanggang 3,000 pesos ang multa depende sa violation.

Itinanggi ni Vice President at Education Secretary Sara Duterte-Carpio ang akusasyon ng grupong laban ng masa na siya ang nasa likod ng kinakaharap na kaso ni dating vice prsidential candidate Walden Bello.

Nanindigan si VP Inday na hindi siya kailanman naghain ng kasong libel.

Ayon kay Duterte-Carpio, sa halip na kaladkarin siya sa issue at manisi o maghinala si Bello na biktima ito ng isang political persecution, dapat paalalahanan ang dating kongresista na hindi iginagalang ng sibilisado at demokritong lipunan ang kayabangan.

Hindi anya pina-protektahan ng karapatan sa malayang pagsasalita at pagpapahayag ang sinumang naninira ng puri at reputasyon ng iba.

Lunes nang arestuhin ng Quezon City Police District si Bello sa kasong cyber libel na inihain ni Jefrey Tupas, dating information chief ng Davao City.

Nag-ugat ang kaso sa paratang ni Bello na gumagamit at tulak ng droga si Tupas na magugunitang sinibak sa pwesto ni Duterte na noo’y alkalde ng naturang lungsod matapos dumalo sa isang party kung saan P1.5 million na halaga ng droga ang nasabat.

Isinusulong ng Department of Health ang pagasasagawa ng waste water test ng maruruming tubig laban sa covid-19.

Inihayag ni DOH officer-in-charge Maria Rosario Vergeire na malaki ang maitutulong nito lalo na’t na-detect ang polio virus noon sa ilang imburnal sa Maynila at waterways sa Davao nang nagkaroon ng outbreak sa Pilipinas noong 2019.

Ayon kay Vergeire, mababatid kung saan ang sources ng infection at matutukoy ang mga lugar na high risk sa dahil sa testing ng waste water.

Nitong Marso lamang nang kumpirmahin ng Manila Water na plano nilang magtayo ng laboratoryo para sa covid-19 waste water surveillance.

Gayunman, wala pa anyang inisyatibo ang DOH para sa waste water testing ng monkeypox, na nakapasok na sa bansa.

Hindi inirerekomenda ng Department of Environment and Natural Resources-Biodiversity Management Bureau (DENR-BMB) ang pagpapakawala ng mga palaka at isda upang labanan ang dengue.

Ibinabala ng DENR-BMB Na maaaring masira ang ecological balance ng kapaligiran sa paglalagay ng mga palaka at isda sa “stagnant water”.

Nilinaw ni DENR-BMB Director Natividad Bernardino na hindi naman kasali ang mga lamok sa mga karaniwang kinakain ng mga palaka.

Ayon kay Bernardino, ang mga cane toad o palakang-tubó ang numero unong “invasive alien species” sa mundo na maaaring magdulot ng “environmental harm” at maka-apekto sa kalusugan ng tao.

Dahil ang mga palaka at isdang pinapakawalan anya ay nilalagay sa mga ecosystem kung saan hindi sila likas na nakatira, maaaring kainin ng mga ito ang mga native species sa lugar at posible ring magdala ng mga panibagong sakit.

Muling iginiit ng DENR na ang paglilinis at pagsasaayos pa rin ng kapaligiran ang pinakamabisa pa ring solusyon upang masugpo ang mga lamok na aedes aegypti (ey-dis e-jip-ti) na karaniwang nagdadala ng dengue virus.

Nakikipag-ugnayan na ang Department of Health sa ibang member-states ng association of Southeast Asian Nations (ASEAN) para sa pagbili ng mga bakuna kontra monkeypox virus.

Ayon kay DOH officer-in-charge Maria Rosario Vergeire, lalahok ang Pilipinas sa iba pang ASEAN states sakaling maisakatuparan ang planong vaccine procurement.

Mayroon na anyang mga natukoy ang DOH at Food and Drug Administration na tatlong manufacturers ng nasabing bakuna.

Samantala, inihayag ni DOH Spokesperson at Undersecretary Beverly Ho na patuloy ang pakikipag-usap nila sa U.S. Government upang makakuha ng mga bakuna laban sa monkeypox.

Nakatakda nang ihatid sa kanyang huling hantungan sa Libingan ng mga Bayani, Taguig City sa dating Pangulong Fidel Valdez Ramos, ngayong araw.

Ihihimlay ang mga abo ni Ramos sa Section A ng sementeryo o sa hanay ng mga dating presidente at makakatabi ang puntod ni dating Pangulong Elpidio Quirino.

Magsisimula ang seremonya mamayang alas-10 ng umaga at magbibigay ng full military honors sa sandaling dumating ang abo ni FVR sa Libingan ng mga Bayani sa Fort Bonifacio, na susundan ng funeral procession patungo sa puntod.

Ayon kay Army spokesman, Col. Xerxes Trinidad, inaasahang matatapos ang nasabing seremonya mamayang alas-12 ng tanghali.

Pangungunahan ng Philippine Army, sa pamamagitan ng security and escort battalion at honor guards mula sa iba’t ibang sangay ng Armed Forces of the Philippines ang full military honors para sa yumaong Pangulo.

Isang batalyong honor guards ang magsasagawa ng departure honors para kay Ramos sa Heritage Park, kung saan naka-burol ang abo nito bago ihatid ng mga sundalo ang convoy ng dating First Family at VIP guests sa Libingan ng mga Bayani.

Bibigyan din anya ng 21-gun salute ang ika-12 Pangulo ng bansa.

Dapat manatiling tapat at huwag maging abusado sa tungkulin.

Ito ang ipinaalala ni Pangulong Bongbong Marcos sa Philippine National Police sa kanyang pagdalo sa 121st Police Service Anniversary sa Multi-Purpose Center sa Camp Crame kahapon.

Ayon kay Pangulong Marcos, dapat ibigay ng bawat pulis ang kanilang dedikasyon sa pagseserbisyo at kailangan ng PNP ang suporta ng publiko upang mapanatili ang peace and order sa bansa kaakibat ng pag-unlad.

Wala anyang imposible kung sama-sama at tulung-tulong upang labanan ang mga nagtatangkang gumawa ng gulo.

Binigyan diin din ni PBBM na dapat tiyakin ng Pambansang Pulisya na makatuwiran ang paggamit ng puwersa sa kanilang tungkulin para maiwasan ang mga kontrobersiya.

Samantala, kumpiyansa naman ang Punong Ehekutibo sa pamumuno ni Gen. Rodolfo azurin bilang PNP chief at suportado niya ang mga programa nito para sa mga pulis at publiko.