Drew Nacino

Handa ang Senado sa panawagan ng Department of Health na amyendahan ang Vaccination Program Act o RA 11525.

Ito, ayon kay Senate President Juan Miguel Zubiri, ay upang maipagpatuloy ng DOH ang vaccination program nito.

Iginiit ni Zubiri na kung may takdang panahon ang ilang probisyon sa Vaccination Program Act ay handa nila itong amyendahan kung kailangan.

Kokonsultahin muna anya nila si DOH OIC Undersecretary Maria Rosario Vergerie upang mabatid kung ano ang mga probisyon sa batas na dapat amyendahan.

Una nang umapela si Vergeire kay Zubiri na amyendahan ang Vaccination Program Act of 2021 dahil kapag na-lift na ang state of calamity sa September 12 ay mawawalang bisa na ang ilang mga probisyon ng nasabing batas.

Pinag-aaralan na ni Energy Secretary Raphael Lotilla ang paglipat sa hybrid systems upang makapagbigay ng long-term solutions sa problema sa enerhiya sa Pilipinas.

Sa isinagawang briefing sa Senate Energy Committee, inihayag ni Lotilla na dapat nang matuldukan ang labis na pagtangkilik ng bansa sa mga petroleum-based fuel.

Ito’y dahil lagi anyang makararanas ng pabago-bagong presyo ng oil products kaya’t dapat mag-invest sa solar, wind at iba pang renewable energy sources.

Gayunman, aminado ang kalihim na hindi ito mangyayari sa loob lamang ng maikling panahon at ang mahalaga ay dapat simulan ngayon pa lamang, lalo’t ang halaga ng renewables ay bumababa.

Pumanaw na ang dating Asia’s sprint queen na si Lydia de Vega sa edad na singkwenta’y syete matapos ang mahabang pakikipaglaban sa breast cancer.

Kinumpirma ni Stephanie Mercado De na binawian ng buhay ang kanyang ina sa Makati Medical Center, kagabi.

Taong 2018 nang ma-diagnose ang Asia’s fastest woman ng stage four breast cancer.

Sumailalim din ang pinay sports icon sa brain surgery noong isang buwan pero hindi rin ito nakatulong at simula noon ay lagi ng nasa intensive care unit.

Nakilala si De Vega bilang sprint queen ng Asya matapos magkampyon ng dalawang beses sa Asian Games noong 1982 at 1986.

Nag-uwi rin siya ng siyam na gintong medalya sa South-East Asian Games at naging kinatawan ng Pilipinas sa 1984 at 1988 olympics.

Pinag-aaralan na ng Department of Education ang posibilidad na palitan ang “outdated” at mamahaling laptops para sa mga guro na binili sa pamamagitan ng Procurement Service ng Department of Budget and Management (PS-DBM) noong 2021.

Inihayag ni DepEd Spokesperson Atty. Michael Poa na may dalawa silang hakbang sa isyu ng P2.4 billion halaga ng mga laptop na binili sa gitna ng covid-19 pandemic.

Una anya ay internal na suriin ang laptop upang agad na magamit o magkasa ng legal remedies para rito.

Kabilang naman sa mga rekomendasyon ng Commission on Audit nang sitahin ang DepEd sa isyu ay i-evaluate ang concerns ng mga recipient sa kondisyon, performance at technical specifications ng mga laptop at makipag-ugnayan sa PS-DBM para sa tamang aksyon.

Sakaling hilingin ng DepEd ang warranty provisions ng laptop supplier, idinagdag ni Poa na susuriin nila kung mayroong magagawa hinggil sa mga laptop o kailangang agad palitan ang mga ito.

Bukas ang Metropolitan Manila Development Authority sa anumang congressional inquiry sa mga issue hinggil sa implementasyon ng no-contact apprehension policy NCAP.

Ayon sa MMDA, nirerespeto nila ang kapangyarihan ng lahat ng local government units sa paglikha at pagpapatupad ng sariling traffic regulations.

Handa rin anila ang ahensya na makipag-ugnayan sa iba pang sangay ng pamahalaan upang matiyak ang mas episyente at maayos na implementasyon ng NCAP.

Ipinunto ng MMDA na ang panawagan ng Land Transportation Office na suspendihin ng mga LGU ang kani-kanilang NCAP ay tugon sa hirit ng ilang transport group at operator na ipatigil muna ang polisiya.

Una nang inihayag ni LTO Chief at Transportation Assistant Secretary Teofilo Guadiz III na inirereklamo ng maraming public utility vehicles operator ang pagmumulta para sa traffic violations ng kanilang mga drayber.

Ilan pang opisyal ng Department of Transportation at attached agency nitong Metro Rail Transit Line 3 ang itinalaga ni Pangulong Bongbong Marcos.

Ayon sa DOTr, opisyal nang umupo sa pwesto si Jorjette Aquino bilang Assistant Secretary for Railways ng kagawaran.

Nanumpa naman bilang MRT-3 General Manager si Federico Canar, Jr. at Engr. Oscar Bongon bilang bagong Director of Operations ng MRT-3.

Magugunitang itinalaga si Bongon bilang officer-in-charge ng MRT-3 noong Hulyo.

Pinangasiwaan naman ni DOTr Secretary Jaime Bautista ang oath-taking ceremony ng mga bagong talagang opisyal.

Walang Filipinong nasaktan o nasawi sa record-breaking na pag-ulan na nagdulot ng matinding pagbaha sa South Korea.

Tiniyak ng Department of Foreign Affairs na naka-monitor na ang Philippine Embassy sa SoKor sa sitwasyon, partikular sa kabisera na Seoul.

Ayon sa DFA, nakikipag-ugnayan na rin ang embahada sa Filipino communities.

Sa datos ng South Korean Interior at Safety Ministries, walo na ang patay habang pito ang nawawala makaraang malubog sa baha bunsod ng malakas na pag-ulan simula noong Lunes.

Ito na ang pinaka-malakas na pag-ulan sa South Korea sa nakalipas na walong dekada.

Asahang tataas pa ang covid-19 cases sa sandaling bumalik na sa klase ang milyun-milyong estudyante, simula Agosto a – 22.

Sa panayam ng DWIZ kay OCTA Research Group Fellow Dr. Guido David, inihayag nitong hindi na dapat ikabigla ang muling paglobo ng covid infections.

Ayon kay David, dapat nang masanay ang publiko na mamuhay kasama ang covid-19 at hindi naman habang-buhay dapat matakot, lalo ang mga batang magbabalik-eskwela.

Gayunman, dapat anyang maging maingat ang lahat, partikular ang mga may commorbidity.

Dapat na ring magpabakuna o booster na ang mga hindi pa natuturukan ng covid-19 vaccine.

Posibleng umabot hanggang 10,612 ang daily covid-19 cases sa Metro Manila pagsapit ng unang Linggo ng Oktubre batay sa projection ng Department of Health.

Inihayag ni DOH officer-in-charge Maria Rosario Vergeire na maaaring magpatuloy ang pagtaas ng covid infections hanggang Nobyembre o Disyembre.

Gayunman, nilinaw ni Vergeire pawang projection pa lamang ang mga ito na ibinase sa mababang bilang ng nagpapa-booster at mga sumusunod sa minimum public health standards, pagdami ng mga tao sa labas at omicron subvariants.

Nanawagan naman ang opisyal sa publiko na magpa-booster na at ugaliing tumalima sa minimum public health standards.

Aminado ang Department of Public Works and Highways na kakulangan sa pondo ang dahilan nang delay sa renovation ng tatlong drainage systems na mag-di-discharge ng tubig patungong Manila Bay.

Kinumpirma ni DPWH Secretary Manny Bonoan na sarado ang Padre Faure drainage, Remedios drainage at Estero de San Antonio upang mabigay-daan sa renovation para na rin sa kapakinabangan ng Manila Baywalk Dolomite Beach.

Isinisisi sa pagsasara ng tatlong nabanggit na drainage systems ang mga pagbaha sa ilang bahagi ng Maynila bunsod ng ilang araw na malakas na pag-ulan.

Gayunman, sa ilalim ng requirements ng Dolomite project, kailangan anya ng tatlong drainage systems na mag-bomba  ng wastewater patungong sewage treatment plant bago i-discharge sa Manila Bay o malapit sa artificial beach.

Ipinaliwanag ni Bonoan na kailangang maglagay ng mas malakas na mga pambomba dahil nag-require ang Department of Environment and Natural Resources na pahabain ang mga tubo patungong dagat upang hindi madumihan ang dolomite beach.

Una nang naglaan ang Duterte administration ng P389 million para sa Dolomite beach rehabilitation project pero nagkaroon anya ng problema dahil sa additional at technical requirements ng pumping stations.