Drew Nacino

Kinuwestyon ni Chief Presidential Legal Counsel Juan Ponce Enrile ang natalong Quezon City mayoralty candidate na si Mike Defensor sa pagdalo nito sa mga official function ng Metropolitan Manila Development Authority.

Ito, ayon kay Enrile, ay kahit hindi naman konektado ang dating kongresista sa MMDA.

Nais mabatid ng dating senador kung na-hire ba si Defensor na consultant, adviser o utusan ng ahensya na hindi dapat mangyari dahil sa panuntunan ng one-year ban sa mga tumakbo o natalo sa nakalipas na halalan bago sila pumasok sa anumang posisyon sa gobyerno.

Pinayuhan naman ni JPE ang dating mambabatas na kailangang maging maingat at hindi dapat magpakita ng pagka-arogante sa kapangyarihan sa pag-uugali bilang public person lalo’t kung kaalyado ng kasalukuyang administrasyon.

Naniniwala si Manong Johnny na bilang legal counsel, mayroon siyang legal at moral duty para protektahan ang pangulo na mapagsamantalahan ang kabaitan nito.

Pabor ang Bureau of Jail Management and Penology (BJMP) sa rekomendasyon na magpatupad ng signal jamming sa mga piitan sa gitna ng umano’y drug operations sa loob ng kanilang mga pasilidad.

Ayon kay BJMP Spokesman Jail Superintendent Xavier Solda, mapipigilan ng signal jamming ang komunikasyon ng mga bilanggo sa kanilang mga contact sa labas ng piitan.

Umaasa anya sila na i-pa-prayoridad ng pamahalaan ang panukala dahil kailangan nito ng pondo.

Magugunitang inirekomenda ni Interior Secretary Benhur Abalos ang paggamit ng signal jammers upang putulin ang komunikasyon ng drug lords na umano’y nagsasagawa ng operasyon sa mga bilangguan.

Suportado ng isang dating government adviser ang plano ng Department of Health na muling ipanukala ang pagbigay ng bagong depinisyon sa terminong “fully vaccinated” upang isama ang mga indibidwal na nakatanggap na ng unang covid-19 booster.

Inihayag ni National Task Force Against Covid-19 Medical Adviser Dr. Ted Herbosa na maraming mga bakuna ang nagre-require ng tatlong doses gaya sa polio at hepatitis b.

Sang-ayon si Herbosa sa mungkahi na gawing tatlo talaga ang depenisyon ng tinatawag na fully vaccinated para mas maraming tao ang mapo-protektahan lalo na’t magbabalik-eskwela na ang maraming bata ngayong buwan.

Mahalaga anya ang pagpapabakuna ng booster dahil ang immunity kontra covid-19 ay humihina pagsapit ng ikatlo o ika-anim na buwan matapos makatanggap ng primary vaccine series.

Una nang sinuportahan ni Herbosa ang hirit ni dating presidential adviser for entrepreneurship Joey Concepcion na lagyan ng expiry date ang validity ng vaccination cards at palitan ng booster cards upang hikayatin ang publiko na magpaturok ng covid-19 boosters sa gitna ng pandemya.

Iniimbestigahan na ng palasyo ang mga opisyal ng Sugar Regulatory Administration (SRA) matapos maglabas ng hindi otorisadong resolusyon para sa importasyon ng 300,000 metric tons ng asukal.

Ayon kay Press Secretary Trixie Cruz-Angeles, walang pahintulot ni Pangulong Bongbong Marcos, na tumatayong agriculture secretary at chairman ng Sugar Regulatory Board ang nilagdaang resolusyon ni Agriculture Undersecretary Leocadio Sebastian. 

Sensitibo anyang bagay ang importasyon lalo na ang mga agri-product kaya kailangan itong balansehin.

Nagpapatuloy naman ang imbestigasyon upang matukoy kung may gumawa ng sariling aksyon habang nakabatay sa pagsisiyasat kung ilang opisyal ang masisibak sa pwesto.

Naghain ng isang resolusyon si Senador Koko Pimentel upang paimbestigahan ang biniling laptops ng Department of Budget and Management-Procurement Service (PS-DBM) sa halagang P2.4 billion na tinagurian ng Commission on Audit na pawang mahal pero mabagal.

Isinapubliko ni Pimentel ang resolusyon kahapon na humihiling sa Senate Blue Ribbon Committee na imbestigahan “in aid of legislation” ang umano’y sinasabing overpriced at outdated na laptops na binili ng PS-DBM para sa Department of Education.

Ayon sa senador, layunin ng resolusyon na kilalanin ang mananagot at magkaroon ng pagbabago sa procurement law at proseso kung kailangan.

Nakatakda ring maghain ng hiwalay na resolusyon si Senador Risa Hontiveros sa naturang anomalya upang matalupan ang sinumang nasa likod nito.

Samantala, wala pang tugon si Senador Francis Tolentino, Chairman ng Kumite sa inihaing resolusyon ng dalawang kapwa mambabatas.

Sa 2021 audit report ng COA para sa DepEd, itinuring nilang “pricey” ang P58,300 na kada unit ng laptop, sa kabila nang naunang pagtaya ng ahensya na aabot lamang ito sa P35,000.

“Huwag ninyong niloloko ang ading ko!”

Ito ang banta ni Senador Imee Marcos makaraang manawagan na lansagin ang namamayagpag na sindikato ng mga kawatan sa Department of Agriculture.

Hindi nagustuhan ni Senator Marcos ang ulat na ginamit ang Office of the President upang palusutin ang binabalak na importasyon ng asukal.

Sa kabila nito, pinuri ng senador ang kapatid na si Pangulong Bongbong Marcos sa pagbasura sa planong importasyon ng 300,000 metric tons ng asukal.

Kasabay nito ay inihirit ng mambabatas sa pangulo na magsagawa ng balasahan sa matataas na opisyal ng DA Upang buwagin na ang mga sindikato sa gobyerno.

Una nang isinumbong ng local sugar producers sa tanggapan ni Marcos na lumampas na sa P100 ang kada kilo.

Ito’y dahil binabakuran o hinaharangan ng mga abusadong manufacturer ng sugared products ang mga imported na asukal kaya hindi na ito umaabot sa mga konsyumer.

Samantala, pinaiimbestigahan ng presidential sister Marcos si DA Undersecretary Leocadio Sebastian at iba pang mga opisyal ng ahensya kung bakit binawi ang pagharang sa importasyon ng mga processed animal protein o PAP mula Italy at iba pang bansa na kontaminado ng african swine fever.

Ibinunyag ng senador na si Sebastian ang pumirma sa memo noong August 5 na magpapalusot sa pag-angkat ng PAP sa Pilipinas kahit may a.s.f. sa Italy.

Magbubukas ang Land Transportation Franchising and Regulatory Board (LTFRB) Ng isandaang ruta ng bus, jeep at u.v. Express sa Metro Manila sa susunod na linggo.

Layunin nitong madagdagan ang public transportation supply bilang preparasyon sa muling pagbubukas ng face-to-face classes simula Agosto a – 22.

Inihayag ni LTFRB Chairperson Cheloy Garafil na ang naturang hakbang matapos ang ikalawang hearing ng ahensya sa petisyon para sa fare hike sa public utility buses.

Alinsunod anya sa utos ni Transportation Secretary Jaime Bautista ay magbubukas ng modified routes sa mga lugar na may maraming paaralan, gaya ng university belt sa Maynila.

Ito’y dahil nangangailangan ng mas maraming public transportation para sa mga estudyante na magbabalik-eskwela.

Samantala, para naman sa mga jeep at uv express, idinagdag ni Garafil na muling bubuksan ang lahat ng “non-EDSA routes”.

Nag-donate ang Taiwan ng $200,000 o mahigit P11 million sa Pilipinas bilang tulong sa disaster relief operations matapos ang malakas na lindol sa Northern Luzon.

Personal na ini-abot ni Taipei Economic and Cultural Office in the Philippines o TECO Representative Peiyung Hsu ang donasyon kay Manila Economic and Cultural Office Chairperson Silvestre Bello III.

Sinaksihan naman ang hand-over ceremony ni Abra Governor Dominic Valera.

Ayon kay Hsu, nakiki-simpatya ang taiwan sa mga biktima ng lindol at nakikiramay sa pamilya ng mga namatayan.

Tiniyak naman ng kinatawan ng TECO na patuloy na makikipag-ugnayan ang Taiwan sa Pilipinas para sa disaster prevention and climate resilience.

Walang plano ang Land Transportation Office (LTO) na palitan ang kasalukuyan nitong IT systems provider na Dermalog.

Ito ang nilinaw ni LTO Chief Teofilo Guadiz III sa kabila ng kanyang naunang pahayag na maghahanap sila ng ibang IT providers na maglalatag ng solusyon upang mapaganda ang serbisyo ng ahensya.

Ayon kay Guadiz, magkakaroon lamang ng mas maraming problema sa halip na solusyon kung papalitan nila ang dermalog.

Pinaka-mainam anyang solusyon sa ngayon ay kausapin nila ang dermalog at mga opisyal, IT personnel nito at iba pang concerned stakeholders upang plantsahin ang mga issue at hamon sa LTO.

Ang Dermalog, na Germany-based technology provider,  ang nakakuha ng Land Transportation Management Systems project noong 2018 alinsunod sa pangako ng Duterte administration na gawing online ang mga karamihan sa mga transaksyon ng LTO upang maiwasan ang “fixers”.

Pina-plantsa na ng Department of Trade and Industry ang implementing rules and regulations (IRR) ng Vape Law, na mag-re-regulate sa produksyon at pagbebenta ng vape at tobacco products.

Ayon kay Trade Undersecretary Ruth Castelo, sisimulan na ng DTI ang konsultasyon sa Food and Drug Administration sa mga susunod na araw.

Sa sandali anyang maayos sa dalawang ahensya, ilalabas na ito para sa public consultation, lalo’t mina-madali na ang IRR upang tiyak na maipatupad nang maayos ang Vape Law.

Magugunitang kinumpirma ng Malakanyang noong Hulyo ang pag-lapse bilang isang batas ng kontrobersyal na panukala, na naglilipat ng regulatory powers ng mga vape at tobaco products sa DTI mula sa FDA.