Drew Nacino

Hindi pa kailangang isara ang border ng Pilipinas kahit mayroon ng unang kaso ng Monkeypox virus sa bansa.

Ito ang nilinaw ni DOH Officer-In-Charge Maria Rosario Vergeire sa gitna ng pangamba ng ilan sa posibleng idulot ng nasabing sakit, lalo’t hindi pa rin natatapos ang COVID-19 pandemic.

Ayon kay Vergeire, nasa low to moderate naman ang risk classification level ng Monkeypox.

Gayunman, kailangan anyang magpatupad ng preventive measures laban sa naturang virus.

Una nang inihayag ni Vergeire na halos 95% ng Monkeypox cases sa buong mundo ay kumalat dahil sa sexual activities pero hindi ito itinuturing na sexually transmitted disease.

Nagpasalamat naman si COMELEC Chairman George Garcia sa pagtitiwalang ibinigay sa kanya ni Pangulong Bongbong Marcos matapos ang kanyang muling pagkakatalaga sa poll body.

Inihayag ni Garcia na isang pribilehiyo na pamunuan ang komisyong nagbibigay-daan sa karapatang bumoto.

Sa ilalim anya ng kanyang pamumuno, layunin ng COMELEC na magpatupad ng makabuluhang mga reporma na reresolba sa mga isyung kinakaharap ng mga stakeholder at botante.

Kabilang dito ang mga structural reform na magpapalakas sa transparency at integridad ng poll body.

Samantala, tiniyak din ni Garcia na mananatili siyang walang kinikilingan at independyente bilang isang COMELEC Chairman.

Itinalaga ni Pangulong Bongbong Marcos si dating COMELEC Commissioner George Erwin Garcia bilang Chairman ng Commission on Elections.

Ayon kay Press Secretary, Atty. Trixie Cruz-Angeles, isinumite na ni Pangulong Marcos ang pangalan ni Garcia sa Commission on Appointments alinsunod sa batas.

Si Garcia, na naging COMELEC Commissioner bago magpalit ng administrasyon ay dating election lawyer ni PBBM.

Siya rin ang kumatawan kay Senador Grace Poe sa citizenship case nito sa Korte Suprema noong 2016 at naging abogado ni dating Manila Mayor Francisco “Isko Moreno” Domagoso.

Balik-operasyon na ang LRT-line 2 mula Antipolo hanggang Recto stations, ngayong araw.

Ito’y makaraang pumalya ang catenary wires ng Line 2 sa pagitan ng Pureza at Legarda stations, kahapon kaya’t naging limitado ang biyahe mula antipolo hanggang V. Mapa stations vice versa.

Ayon sa LRT-Administration, simula ala-5 kaninang madaling araw nang magbalik na sa normal ang operasyon.

Ang catenary wires ang nagsisilbing supply ng kuryente ng LRT-2 at nagpapatakbo sa mga tren.

Humingi naman ng paumanhin ang LRTA sa mga suki ng Line 2, lalo sa mga naabalang pasahero.

Umakyat na sa 69 ang patay sa flash floods at landslides bunsod ng malakas na ulan sa Iran.

Ayon sa Iranian Crisis Management Organization, 45 iba pa ang nawawala sa kabisera na Tehran at nasa 20, 000 kabahayan ang lubog sa tatlong lalawigan.

Ilang paliparan din at pangunahing highways ang sarado at libu-libo na ang nagsilikas.

Mahigit dalawang linggo nang umuulan sa Iran sa kabila ng Summer season.

Bahagya pang tumaas sa 33,622 ang aktibong kaso ng COVID-19 sa bansa kahapon kumpara sa 33,509 noong Sabado.

Ito’y makaraang makapagtala ang Department of Health ng karagdagang 4,159 cases na pinakamataas na single-day tally simula noong February 10.

Dahil dito, umakyat na sa 3. 77 milyon ang total caseload kabilang ang 3,682,278 recoveries habang nadagdagan ng walo ang death toll at sumampa sa 60,727.

Sa datos ng DOH sa bawat rehiyon, pinakamarami pa ring kaso sa nakalipas na dalawang linggo ay nasa National Capital Region, 14,107; sinundan ng CALABARZON, 9,282 at Central Luzon na mayroong 4,401.

Nangunguna naman ang lalawigan ng Cavite sa mga lugar na may pinakamaraming kaso na 3,186; Quezon City, 2,972 at Laguna na may 2,511.

Nagdadalamhati si Pangulong Ferdinand “Bongbong” Marcos Jr., sa pagpanaw ng kanyang tiyuhing si dating Pangulong Fidel Ramos.

Sa kanyang official facebook page, nagpaabot ng pakikiramay si Pangulong Marcos sa pamilya Ramos.

Nakikiisa rin ang punong ehekutibo sa pagluluksa ng sambayanang Pilipino sa pagyao ng dating Pangulo.

Inihayag din ni PBBM na hindi lamang nawalan ng isang mabuting leader ang bansa kundi ng isa ring miyembro ng kanilang pamilya.

Habang-buhay anyang kikilalanin ng sambayanan ang pamana at ambag ni FVR.

Si Ramos ay second cousin ng ama ni PBBM na si dating Pangulong Ferdinand Marcos Sr.

Magkapatid ang lolo ng nakatatandang Marcos na si Fabian at lola ni Ramos na si Crispina Marcos-Valdez.

Nakikiramay si Chinese President Xi Jinping kay Pangulong Bongbong Marcos matapos ang magnitude 7 na lindol na tumama sa Northern Luzon noong Miyerkules.

Sa kanyang mensaheng ipinarating sa pamamagitan ng Chinese embassy, inihayag ni Xi ang pagkabigla nang malaman na marami ang naging biktima at malaki ang naging pinsala ng pagyanig, lalo sa lalawigan ng Abra.

Sa kabila nito, kumpiyansa naman ang Chinese president na malalampasan ng kasalukuyang Marcos administration ang mga hamong dala ng kalamidad maging ang pagsasaayos sa mga nasirang kabahayan.

Batay sa datos ng National Disaster Risk Reduction and Management Council, mahigit 82,000 families o nasa 300,000 individuals na ang apektado sa Cordillera Administrative Region; Ilocos at Cagayan Valley Regions.

Nagpaabot ng pakikiramay ang mag-amang sina dating Pangulong Rodrigo Duterte at Vice President Sara Duterte – Carpio sa pamilya ni yumaong dating Pangulong Fidel Ramos.

Ayon kay dating Pangulong Digong, labis niyang ikinalungkot ang pagpanaw ng kapwa niya dating punong ehekutibo.

Kasabay ng pagdadalamhati, ipinanawagan ng nakatatandang Duterte ang pagkilala sa mga pamana at mahalagang ambag sa bayan ni Ramos.

Tinawag naman ni VP Inday si FVR bilang isang tunay na “Makabayan” na humikayat sa mga unipormadong manggagawa na pahalagahan ang kanilang integridad bilang public servants.

Dapat anyang magsilbing inspirasyon ang buhay ni Ramos at ang napakalaki nitong pamana na kanyang itinatag bilang pagpapakita ng pagmamahal sa bayan at mga kapwa Filipino.

Taong 2016 nang suportahan ni FVR ang kandidatura ng nakatatandang Duterte sa presidential elections pero kalauna’y naging kritiko ng mga polisiya ng Duterte administration.

Naglabas na ng opisyal na pahayag ang pamilya ni dating Pangulong Fidel Ramos matapos ang pagpanaw nito sa edad na 94.

Ayon kay Freddie Jalasco, manugang ni FVR, labis na ikinalulungkot ng kanilang pamilya ang pagyao ng kanilang ama.

Nagpaabot din ng pasasalamat ang pamilya ni Ramos sa lahat ng nakikiramay kasabay ng panawagang privacy sa gitna ng kanilang pagdadalamhati.

Nakatakda anya nilang i-anunsyo ang detalye ng funeral arrangements ng dating pangulo.