Drew Nacino

Magbibigay ang Canada ng 12 million canadian dollars o 519 million pesos sa Pilipinas upang pondohan ang climate change activities at isulong ang economic growth sa mga conflict area sa Mindanao.

Inanunsyo ito ni Canadian Trade Minister Mary Ng sa kanyang official visit sa Maynila.

Ayon kay Ng, gagamitin ang pondo sa tatlong proyekto na magpapalakas sa climate finance ng bansa, suportahan ang women’s empowerment at buhayin ang mga komunidad na apektado ng armed conflict sa Mindanao.

Sa idinaos na aktibidad ng Minister of International Trade, Export Promotion, Small Business and Economic Development, binigyang-diin ni ng ang interes ng Canada na pagtibayin ang economic ties sa Pilipinas.

Umaasa rin anya ang Canada na tulungan ang Pilipinas na makapagtayo ng mga kalsada, tulay at ospital habang lumilikha ng lokal na hanapbuhay.

Target ng Department of Information and Communications Technology (DICT) na maglagay ng mahigit 9K free Wi-Fi sites sa bansa sa taong 2023 o mahigit doble kumpara ngayong taon.

Ito ang tiniyak ni Undersecretary for ICT Industry Development Jocelle Batapa-Sigue sa kanyang pagharap sa Senate Hearing hinggil sa panukalang budget ng Kagawaran sa susunod na taon.

Ayon kay Batapa-Sigue, karagdagang 3,273 free Wi-Fi sites ang target nilang ilagay sa unang bahagi ng 2023 kumpara sa 3,055 active sites sa mga pampublikong lugar hanggang nitong August 20, 2022.

Kabilang anya sa additional sites ang mahigit tig-isanlibong libreng Wi-Fi sa Luzon at Visayas, habang nasa 500 ang ilalagay sa Mindanao.

Sa ilalim ng National Expenditure Program para sa susunod na taon, aabot sa P7.232 billion ang inilaan para sa DICT.

Pinayagan na ng Social Security System (SSS) ang isang taon o isang bagsakang bayad ng kontribusyon ng mga magsasaka, mangingisda at iba pang informal sector workers.

Ayon sa SSS, “seasonal” lamang o hindi regular ang malakihang kita ng mga nasabing manggagawa kaya’t niluwagan ang polisiya.

Batay sa datos ng ahensya, mahigit siyam na milyon ang manggagawa sa Agriculture sector bukod pa ito sa libu-libong nasa informal sector na karamiha’y hindi regular ang kita, ani, huli at benta.

Ipinaliwanag ni SSS president at CEO Michael Regino na sa ilalim ng patakaran, maaaring bayaran ng mga mangingisda, magsasaka o mga tindero ang buong isang taon na hindi nababayarang kontribusyon kapag kumita nang malaki.

Nanawagan naman si Regino sa mga Local Government Unit na tulungan ang kanilang job order workers sa pamamagitan ng pagbibigay subsidiya sa kanilang statutory benefits, tulad ng SSS.

Kahit anya mga land-based OFW at Job Order Worker sa pamahalaan ay target din anyang gawing self-employed member sa hiwalay pang programa ng nasabing government owned and controlled corporation.

Aabot sa 40 milyon ang miyembro ng SSS pero lagpas 14 na milyon lang ang aktibong nagbabayad ng kontribusyon.

Handa si National Security adviser Clarita Carlos na baguhin at palitan ang kanyang posisyon kontra institusyonalisasyon ng National Task Force to End Local Communist Armed Conflict (NTF-ELCAC).

Ayon kay Carlos, ikinukonsidera niya ang tugon ni Senador Ronald “Bato” Dela Rosa sa kanyang pangamba hinggil sa na-dobleng tungkulin ng mga ahensiya, maging ng “duration ng existence” nito.

Sa kanyang pagharap sa Senate Hearing ng Committee on National Defense and Security, Peace, Unification and Reconciliation sa ELCAC Act, Sinabi ng NSC adviser na ang panukala ay magiging “contest of jurisdiction’’ at pagsasayang ng pondo.

Una na ring inihayag ni Carlos na hangarin ni Pangulong Bongbong Marcos na i-streamline ang burukrasya at muling ayusin ang gobyerno.

Bilang tugon, ipinunto ni Dela Rosa na layunin ng batas na tiyaking mananatili ang “Anti-Insurgency Efforts” sa gobyerno anuman ang bagong polisiya ng Pangulo.

Magugunitang naging kontrobersiyal ang NTF-ELCAC dahil sa  red-tagging sa mga paaralan, estudyante, organisasyon at kritiko ng pamahalaan.

Muling nagmahal ang puting asukal o primera sa mga palengke sa Metro Manila.

Batay sa monitoring ng Department of Agriculture, balik sa P98 hanggang P106 ang kada kilo ng primera sa Marikina Public Market habang P98 hanggang P105 sa mega Q-Mart sa Quezon City.

Inihayag naman ng kinatawan ng Sugar Board na nasa P38 hanggang P46 ang kada kilo ng millgate price ng raw sugar noong nakaraang panahon ng gilingan o milling season sa Crop Year 2021 hanggang 2022.

Gayunman, sumirit sa P60 ang kada kilo ng millgate price ng raw sugar sa Crop Year 2022 hanggang 2023.

Ipinaliwanag ni Mitzi Mangwag, board member ng Sugar Board Millers Representative, na ang pagtaas ng presyo ay bunsod ng mataas na production cost, partikular ang mahal na krudo.

Una nang tiniyak ng Sugar Regulatory Administration na sa Nobyembre pa magsisimulang bumaba ang presyo ng asukal dahil sa ganitong panahon ay fully operational na ang mas malalaking mills sa Negros.

Mahigit 1,400 kilo ng double dead na karne o botcha at iba pang frozen meat products ang nasabat sa palengke sa Tarlac City.

Sa loob ng apat na araw, isinagawa ang operasyon ng mga personnel ng City Veterinary Office at Public Order and Safety office bilang bahagi ng pinaigting na hakbang kontra African Swine Fever.

Ayon kay Tarlac City veterinarian, Dr. Noel Soliman, nagmula ang mga karne sa iba pang lalawigan.

Mahaharap anya ang ilang meat traders sa mga kasong paglabag sa meat inspection code.

Gayunman, nagpulasan ang mga nagtitinda ng karne nang mag-inspeksyon ang mga otoridad.

Samantala, agad namang idinispose ang mga nakumpiskang karne.

Hindi na dapat magpatumpik-tumpik pa ang Malakanyang at kongreso sa pagpapahinto sa operasyon ng Philippine Offshore Gaming Operators (POGO) sa bansa.

Ito ang iginiit ni senate minority leader Koko Pimentel sa gitna nang mga pahayag ni senador Imee Marcos na pinag-iisipan na ni Pangulong Bongbong Marcos ang ban sa POGO.

Ayon kay Pimentel, dapat ay agad ding ipag-utos ang total ban sa mga POGO, lalo’t mapanganib para sa bansa ang patuloy na operasyon nito.

Katumbas anya ito sa pagkakanlong ng mga posibleng kriminal at gangster na maaaring maka-apekto sa peace and order, lalo pa ngayong sunud-sunod ang insidente ng kidnapping sa bansa na may kaugnayan sa POGO.

Idinagdag ni Pimentel na dapat agad pakinggan ng Palasyo ang panawagan dahil nagiging playground ang bansa ng mga hindi kanais-nais na mga dayuhan.—mula sa ulat ni Cely Ortega-Bueno (Patrol 19)

Pinamamadali na ni senate majority leader Joel Villanueva ang pagpapatibay sa panukala na layong ipagbawal ang anumang uri ng online gambling activities sa bansa.

Isinusulong sa Senate Bill 1281 o “Anti-Online Gambling Act” ng senador na gawing labag sa batas ang lahat ng uri ng sugal sa online o internet kasama ang mga online gambling na may taya at pusta.

Ayon kay Villanueva, lubha nang malala ang kinahinatnan ng online gambling sa bansa na nauwi na sa pagkasira ng buhay at pamilya kaya hindi ito dapat baliwalain.

Bukod dito, naging dahilan din anya ang mga online gambling ng pagka-bangkarote at mga criminal activities.

Sa oras na maging ganap na batas, ang mga lalabag ay maaaring mabilanggo nang hanggang limang taon at pagmumultahin nang hanggang 500,000 pesos.

Mahaharap naman sa maximum penalty kung ang lalabag ay isang public officer bukod pa sa tuluyang pag-disqualify sa paghawak ng anumang posisyon sa gobyerno.—mula sa ulat ni Cely Ortega-Bueno (Patrol 19)

Suportado rin ni dating Tesda head, senate majority leader Joel Villanueva ang pasya ni Pangulong Bongbong Marcos na ilipat ang TESDA sa pangangasiwa ng Department of Labor and Employment mula sa Department of Trade and Industry.

Ayon kay Villanueva, tama ang naging hakbang ng Pangulo dahil nakasaad sa charter ng TESDA na ang labor secretary ang chair ng TESDA board.

Sa pamamagitan anya nito ay matitiyak ang mahusay na estratehiya para sa job generation ng pamahalaan at matutugunan ang isyu sa job skills mismatch.

Bukod kay Villanueva, sinuportahan din ni senate minority leader Koko Pimentel ang pagbabalik ng TESDA sa DOLE.

Ipinunto ni Pimentel na mahalagang magkatrabaho at magkatuwang ang mga nasabing ahensya sa pagtugon sa problema ng kawalan ng trabaho.—mula sa  ulat ni Cely Ortega-Bueno (Patrol 19)

Suportado ng Department of Trade and Industry ang pagbabalik ng Technical Education and Skills Development Authority (TESDA) sa Department of Labor and Employment.

Alinsunod sa Executive Order 5 ni Pangulong Bongbong Marcos, inilipat ang TESDA sa DOLE mula sa DTI.

Ayon kay trade secretary alfredo pascual, naging attached agency ng DTI ang TESDA para sa policy at program coordination.

Inilabas anya ang EO 5 bilang pormal na pagbabalik ng TESDA sa mother agency nitong DOLE.

Taong 1994 nang itatag ang TESDA sa ilalim ng Republic Act 796 bilang attached agency ng nasabing kagawaran.

Gayunman, ipinag-utos ni dating Pangulong Rodrigo Duterte na isailalim ang ahensya sa pangangasiwa ng cabinet secretary noong 2016 hanggang sa ilipat sa DTI noong 2018.