Drew Nacino

Patuloy ang pagbaha ng imported na karneng baboy sa Pilipinas.

Sa datos ng Bureau of Animal Industry, tumaas ng 7% o umabot sa 851.84 million kilos ang imported meat products sa bansa mula Enero hanggang Agosto ngayong 2022.

Kumpara ito sa 795.59 million kilos na in-import sa kaparehong panahon noong isang taon.

Mahigit kalahati nito ay pawang pork import o 54% o 464.84 million kilos at pangunahing source ng karneng ay sa Spain, Canada at Brazil.

Ikalawang pangunahing meat import ay manok na 23.73% ng kabuuang inangkat na katumbas ng 244.8 million kilos o bumaba ng 5% kumpara sa 260.31 million kilos sa kaparehong panahon noong 2021.

Pangunahing pinagkukunan nito ay sa Brazil, US at Canada.

Ilan pang opisyal ng Department of Transportation at Land Transportation Office ang itinalaga ni Pangulong Ferdinand “Bongbong” Marcos Jr.

Inanunsyo ng DOTR ang pagkakatalaga kina Horatio Enrico Bona bilang LTO Executive director; Leonel Cray De Velez bilang d.o.t.r. Assistant secretary for planning and project development;

Maria paula bautista domingo bilang Assistant Secretary for Administration and Procurement at Mark Steven Pastor bilang Undersecretary for Road Transport and Infrastructure;

Jesus Nathaniel Martin Bermejo Gonzales bilang DOTr Assistant Secretary for Finance and Comptrollership; Maria Marisa Malabag bilang Director 3 for Comptrollership Service;

Zenaida Biteng bilang Director 3 for Procurement Management Service at Joel Laguerta bilang Director 3 for Planning Service.

Ang mga nabanggit na opisyal ay nanumpa na sa kanilang tungkulin sa harap ni secretary Jaime Bautista nitong Biyernes.

Patay ang isang estudyante ng University of Mindanao (UM). Habang sugatan ang isa pa sa isinagawa umanong hazing ng fraternity na Akrho– Alpha Delta chapter sa buhangin, Davao City.

Kinumpirma ng Office of the President ng UM na 4^th year student ng College of Criminal Justice ang nasawing biktima.

Kinondena rin ng pamunuan ng unibersidad ang nasabing krimen at iginiit na bawal ang lahat ng fraternity sa paaralan sa ilalim ng Republic Act 8049 o Anti-Hazing Law.

Hindi rin kinikilala ng paaralan ang nasabing fraternity group, maging ang kanilang mga aktibidad at miyembro.

Handa namang magbigay ng tulong ang pamantasan sa pamilya ng mga biktima at makipagtulungan sa imbestigasyon ng pulisya.

Tinapyasan ng 1.3 billion pesos ng kongreso ang panukalang budget ng MMDA sa taong 2023.

Sa ilalim ng 2023 proposed budget, aabot sa 4.38 billion pesos ang pondo ng MMDA kumpara sa kasalukuyang 5.67 billion pesos.

Sa kanyang pagharap sa House Appropriations Panel, inihayag ni MMDA director Michael Gison, na nagpresenta ng budget ng ahensya, na walang alokasyong ibinigay sa kanila para sa health, sanitation, urban migrating at renewal projects.

Sa panig naman ni MMDA traffic discipline office director Neomie Recio, aminado itong maaapektuhan ang traffic management, partikular ang mga streetlights at footbridge projects dahil sa binawas na pondo.

Batay sa orihinal na budget proposal, aabot sa 8.4 billion pesos ang inilaang pondo para sa MMDA.

Nasa below critical level pa rin ang tubig sa Angat dam sa Bulacan kahit nakaranas ng mga pag-ulan sa ilang bahagi ng nabanggit na lalawigan.

Sa pagtaya ng PAGASA Hydro-Meteorological Division hanggang kahapon, sumadsad pa sa 176.16 meters ang lebel ng tubig sa Angat kumpara sa 176.52 meters noong linggo.

Malayo ito sa minimum operating level na 180 meters at normal high water level na 210 meters.

Inihayag ng PAGASA na hindi naging sapat ang mga pag-ulang dala ng habagat at thunderstorms upang punan ang kakulangan ng tubig sa nabanggit na water reservoir.

Walang Pilipinong nasaktan sa pananalasa ng bagyong  Nanmadol sa Japan.

Ayon sa Department of Foreign Affairs, bago pa mag-landfall ang bagyo ay lumikas na ang maraming residente sa mga lugar na apektado ng kalamidad.

Inihayag naman ng Philippine Consulate General sa Osaka na ligtas na sa mga evacuation center ang ilang Pinoy na naninirahan sa Kagoshima prefecture.

Patuloy na mino-monitor ng konsulada ang sitwasyon ng Pinoy community sa Southwestern Japan.

Umakyat sa 15.6% ang weekly COVID-19 positivity rate sa National Capital Region.

Kumpara ito sa 13.3% noong September 10 at 14.5% noong September 14.

Ayon kay OCTA research fellow, Dr. Guido David, nag-peak na ang cases noong August 7 pero bumaba sa karamihan ng mga lalawigan, gaya ng Cebu at Davao.

Gayunman, nilinaw ni David na sa ilang lugar lamang sa Metro Manila tumaas ang positivity rate kasabay nang pagsisimula ng face-to-face classes.

Bukod sa NCR, tumaas din ang positivity rate sa mga karatig lalawigan ng Bulacan, Cavite, Rizal at Laguna.

Isa anya marahil sa dahilan nang pagtaas nito ang pagdami ng mga taong lumalabas at pagiging kampante ng publiko.

Ang positivity rate ay bilang ng mga taong nag-positibo sa COVID-19 mula sa kabuuang bilang ng mga indibidwal na sumailalim sa test.

Naniniwala ang Private Hospitals Association of the Philippines Incorporated o PHAPI na hindi pa napapanahon na alisin ang mandatory use ng facemasks sa outdoor settings.

Ito’y sa kabila ng executive order number 3 na nilagdaan ni Pangulong Bongbong Marcos na nagpapahintulot na gawin na lamang “optional” ang pagsusuot ng facemask sa outdoor maliban sa mga indoor areas.

Sa katunayan, ayon kay PHAPI president, Dr. Jose Rene De Grano, dapat ipagpatuloy ng publiko ang pagsusuot ng face masks, lalo’t bahagya muling tumaas ang kaso ng COVID-19 simula nang luwagan ang restriksyon.

Pinayuhan din ni De Grano ang publiko, partikular ang mga immuno-compromised at senior citizen, na magpaturok ng booster bilang dagdag proteksyon ngayong hindi na obligado ang pagsusuot ng facemask sa labas ng bahay.

Inaasahang tatalakayin ni Pangulong Bongbong Marcos sa 77^th United Natons General Assembly o UNGA ang economic recovery, food security, climate change, rule of law at agricultural productivity.

Sa kanyang talumpati bago tumulak pa-Amerika, inihayag ng Pangulo na kanya ring bubuksan ang issue  sa magiging tungkulin ng Pilipinas at ambag nito upang palakasin ang international relations.

Makikipag-pulong din ang Punong Ehekutibo sa Filipino community sa New Jersey performing arts center kung saan nasa 1,200 Pinoy ang inaasahang dadalo.

Bago mag-alas-12 ng hatinggabi, oras sa Pilipinas, nang dumating sa Estados Unidos, si Pangulong Marcos para sa kanyang anim na araw na working visit.

56 pang ruta ng mga Public Utility Vehicles (PUV) ang nakatakda muling buksan ng LTFRB ngayong linggo.

Alinsunod na rin ito sa hiling ng mga commuter at PUV operator.

Kinumpirma ni LTFRB Chairperson, Atty. Cheloy Garafil na inihahanda na ang pagbubukas ng mga nasabing pre-pandemic route.

Noon lamang Agosto, 133 ruta ng mga PUV ang binuksan ng ahensya kasabay ng pagbabalik sa face-to-face classes ng mga estudyante.

Sa kabuuan, nasa 90% na ng PUV routes, na isinara sa kasagsagan ng COVID-19 pandemic noong 2020, ang muling binuksan ng LTFRB.