Drew Nacino

Nakatakdang makipagkita si Pangulong Bongbong Marcos kay U.S. President Joe Biden sa 77th United Nations General Assembly (UNGA) sa New York.

Ito, ayon kay Press Secretary Trixie Cruz-Angeles, ang pagkakataon upang talakayin ng dalawang leader ang 76 na taong mabungang alyansa ng Pilipinas at U.S. sa aspeto ng mutual cooperation, two-way trade, direct investments at iba pang issue.

Kamakailan ay inamin ni Pangulong Marcos sa pagdalo sa New York Stock Exchange Economic forum na hindi niya makita ang hiniharap ng Pilipinas nang wala ang matagal na nitong kaalyadong U.S., bilang partner.

Kasalukuyang nasa Estados Unidos si PBBM para sa kanyang working visit at inaasahang magbabalik-bansa sa Sabado, Setyembre a – 24.

Karagdagang 1,886 COVID-19 cases ang naitala ng Department of Health kaya’t sumirit pa sa 3,927,120 ang kabuuang kaso sa bansa.

Ito na ang ikalawang sunod na araw na mas mababa pa sa 2,000 ang naitalang COVID infections.

Dahil sa panibagong mga kaso, bahagyang umakyat sa 27,284 ang active cases kahapon kumpara sa 27,257 noong Martes.

Nangunguna pa rin ang National Capital Region sa may pinaka-maraming kaso na 11,989; sinundan ng CALABARZON, 4,264; Central Luzon, 2,436; Davao Region, 1,293 at Western Visayas, 935.

Dagdag 1,730 naman ang recoveries kaya’t sumampa sa 3,837,179 ang mga gumaling habang additional 37 fatalities ang naitala dahilan upang tumungtong na sa 62,657 ang death toll.

Namemeligro pang mag-mahal ang lokal at imported na baboy bago mag-Disyembre.

Aabot sa P20 ang posibleng itaas ng presyo ng kada kilo ng baboy dahil sa pagmahal ng raw materials ng feeds at patuloy na paghina ng piso kontra dolyar.

Ayon kay Agricultural Sector Alliance of the Philippines president Nick Briones, naka-apekto rin ang African Swine Fever (ASF) na hanggang ngayo’y dama ng mga hog raiser sa bansa.

Marami pa anyang rehiyon ang may mga kaso ng ASF at nasa 22 bayan sa 12 lalawigan ang may mga aktibong kaso.

Iginiit ni Briones na hindi pa nakababawi ang mga magbababoy dahil hindi pa tuluyang nasosolusyonan ang kanilang problema.

Inaasahang tataas pa ang demand sa baboy at manok habang papalapit ang holiday season.

Nanawagan din si Pangulong Bongbong Marcos ng patas na “international system” para sa lahat ng bansa upang matuldukan na ang krimen laban sa “Asian Hate” at Racism.

Sa kanyang talumpati sa 77^th session ng United Nations General Assembly sa New York City, USA, umaasa si Pangulong Marcos na gagana ang nasabing sistema sa mga pinaka-lantad na sektor ng lipunan.

Nasaksihan na rin anya ng mundo ang ambag ng mga migrante sa kampanya laban sa Covid-19 pandemic kaya’t dapat mabigyan ng patas na karapatan ang mga ito laban sa diskriminasyon.

Sa kauna-unahang pagkakataon, humarap na sa 77^th United Nations General Assembly si Pangulong Ferdinand “Bongbong” Marcos Jr., sa New York, USA.

Ipinagmalaki ni Pangulong Marcos ang naging tagumpay ng Pilipinas sa “peace building” lalo sa Mindanao.

Ito, anya, ang dahilan kaya’t nanawagan siya ng suporta para sa kandidatura ng bansa upang mapabilang sa U.N. Security council.

Ang pangunahing responsibilidad ng U.N. Security Council, na binubuo ng 15 miyembro ay panatilihin ang International Peace at Security.

Mayroon itong limang permanent members na binubuo ng China, France, Russia, United Kingdom at United States.

“Dapat mag move on na tayo!”

Ito ang reaksyon nina Senators Jinggoy Estrada at Robin Padilla sa tanong kung dapat bang mag-apologize ang Pamilya Marcos sa nangyari noong Martial Law na ginugunita ang ika-50 anibersaryo ngayong araw.

Ayon kay Senator Estrada, ano ang dapat na ihingi ng tawad ng mga Marcos at makabubuting mag-move on na lang ang lahat, lalo’t nakakuha ng pinakamataas na boto sa nakalipas na eleksyon si Pangulong Bongbong Marcos.

Iginiit naman ni Padilla na kung may kasalanan man umano si dating Pangulong Ferdinand Marcos Sr., ay hindi naman ito kasalanan ng anak.

Kahit anya sa Relihiyong Islam at Katoliko ay hindi kasalanan ng lahat ang kasalanan ni Adan.

Para naman kay Senate Minority Leader Koko Pimentel, karapatan ng mga pamilya ng mga biktima ng batas militar ang paliwanag kung ano ang nangyari sa mga mahal nila sa buhay na napatay o nasaktan. —ulat mula kay Cely Ortega Bueno (Patrol 19)

Pinagpapaliwanag ni Senador Risa Hontiveros ang National Grid Corporation of the Philippines (NGCP) sa palpak umanong serbisyo sa kabila ng bilyun-bilyong pisong kinikita nito.

Tinawag pa ni Hontiveros na unang hakbang para sa accountability ang show cause order ng Energy Regulatory Commission na nag-oobliga sa NGCP na ipaliwanag ang kabiguang sumunod sa mga polisiya upang matiyak ang stability ng power grid.

Ayon sa Senadora, bagaman nakapapagod humingi ng paliwanag sa paulit-ulit na problema, kailangang managot ang NGCP.

Kung hindi anya ito gagawin ay palagi na lamang i-ho-hostage ang gobyerno.

Hinimok din ng mambabatas ang ERC na mag-isyu ng show cause orders sa generation companies na magkakasunod na nag-offline dahilan ng power outages sa Luzon.

Inisyu ang show cause order dahil sa kabiguan ng NGCP na sumunod sa mga patakaran ng Department of Energy noong October 2021.

Kabilang dito ang pagkontrata ng ancillary services na ayon sa ERC ay kailangang suporta para sa transmission ng kuryente mula sa resources patungo sa loads habang pinananatili ang reliable operation ng grid. —ulat mula kay Cely Ortega Bueno (Patrol 19)

Namemeligro umanong mauwi sa humanitarian crisis ang deportasyon ng mahigit 40K overstaying POGO workers sa bansa.

Inamin ito ni Justice secretary Jesus Crispin Remulla sa budget hearing sa Senado.

Ibinatay anya ang datos sa 216 Philippine Offshore Gaming Operators (POGO) na hindi na nag-renew ng lisensya kung saan aabot sa average na 200 chinese workers mayroon ang mga ito.

Ayon kay Remulla, hindi basta tatanggapin ng China ang mga POGO worker dahil mayroong protocol at kondisyon na dapat dumaan sa testing procedures ang mga pababalikin sa kanilang bansa kaya’t posibleng magkaroon ng humanitarian crisis.

Halimbawa na lamang nito ang nangyari sa Quezon City Police Station kung saan isang taong itinira sa isang bahay ang nasa 300 nahuling Chinese na natagalan ang deportasyon dahil may COVID-19 pandemic.

Mag-uusap anya sila ng Ambassador ng China upang maresolba ang naturang issue.

Tinanong naman ni Senate Minority Leader Koko Pimentel kung maaaring magkusang umuwi sa China ang mga illegal staying na sa halip na gobyerno ng Pilipinas ang mag-asikaso sa kanila.

Gayunman, aminado ang kalihim na takot ang mga Chinese dahil kapag umuwi sila at nakumpirma na naging POGO worker ay hindi na sila makabibiyahe muli palabas ng tsina bukod pa sa mga multa nilang babayaran. —ulat mula kay Cely Ortega Bueno (Patrol 19)

Ligtas at walang nasaktang Pilipino sa magnitude 7.6 na lindol sa Mexico kahapon.

Ito ang tiniyak ng Department of Foreign Affairs sa kabila ng mga ulat ng casualty dulot ng malakas na pagyanig.

Ayon kay DFA spokesperson Maria Teresita Daza, nagpapatuloy ang monitoring ng Philippine Embassy sa Mexico upang matiyak ang kaligtasan ng mahigit 1,200 Pinoy sa naturang bansa.

Malayo anya ang Bayan ng Aquila, sa Michoacan State, na sentro ng lindol, o 37 kilometro mula sa Mexico City kung saan karamihan o nasa 800 Pinoy ang naninirahan o nagtatrabaho.

Dalawa ang nasawi sa nasabing pagyanig habang ilang gusali ang gumuho o bahagyang napinsala.

Naganap ang lindol sa parehong araw na dalawang pagyanig ang tumama sa bansa, isa noong September 19, 1985 at noong 2017.

Nasa 500 traffic enforcer ang idedeploy ng MMDA para sa inaasahang pagbigat ng daloy ng trapiko sa isasagawang 55th Asian Development Bank annual meeting sa susunod na linggo.

Ipakakalat ang mga enforcer sa mga ADB-Dedicated Routes upang matiyak ang tuloy-tuloy na biyahe ng mga delegado mula airport hanggang hotel, venue at iba pang engagement area.

Ayon kay MMDA acting Chairman Carlo Dimayuga, katuwang ng MMDA road emergency group ang Office of the Civil Defense, Department of Health at Bureau of Fire Protection, na naka-standby upang magbigay ng emergency assistance.

Bukod dito, kokontrolin din anya ng traffic personnels mula sa PNP, Mandaluyong at Pasig Local Government Units, at security forces ng Ortigas Center ang daloy ng trapiko sa kahabaan ng ADB Routes.

Magsisimula ang ADB Annual Meeting sa September 26 hanggang 30 na inaasahang dadaluhan ng nasa 300 delegado sa Ortigas Center, Mandaluyong City.

Nilinaw naman ni Dimayuga na walang isasarang mga kalsada pero asahan na ang mabigat na daloy ng trapiko sa bahagi ng Ortigas at iba pang apektadong ruta, gaya sa EDSA mula Magallanes hanggang Ortigas, Julia Vargas, ADB Avenue, San Miguel Avenue, Guadix Drive, Bank Drive at Saint Francis Street.